Neemae maeq paellael laol myeyil hhei ngeelvae
13
Tyuqfu qiqlaq'ae, tyuqvae baelzhol e cholyaeq laoq Biqlado lye Ja'lillil cholyaeq e siq mael yoqhhaeteel e zaelheel mael'ae zonglkeq hhei e silqinq mael Yesu'ae geegaeq hhei biq'ae. 2 Yesu geehoq biq: "Noteel laoq Ja'lillil cholyaeq xi qiq miq laoq baeqjyelboq e Ja'lillil cholyaeqhael taq'ae golsiq hhal za, kaol yoqhhaeteel yaol zonglsil biq hhae lye kei gil laeq hhaemaeq? 3 Maeqngeel'ae, ngael noteel'ae geegaeq laeqngeel, noteel aeqdilmyel neemae maeq paellael kaollaoq, noteel eiq yoqhhaeteel laoqmyel myeyil hhei ngeelvae. 4 Xi'loqyal vae haeqgao gaomae myel e laoqhaol mael leeqba gayi fu, cholyaeq qyelheiq hhaeq diqvuq sil biq vae. Noteel lye kei laol, yoqhhaeteel Ye'lulsa'lenq vae zhol e cholyaeqhael taq'ae golsiq hhal za'ae lye kei laeq hhaemaeq? 5 Maeqngeel'ae, ngael noteel'ae geegaeq laeqngeel, noteel aeqdilmyel neemae maeq paellael kaollaoq, noteel eiq yoqhhaeteel laoqmyel myeyil hhei ngeelvae."Aelsiq maeq siq laelkiq e siqpyu'laq'oq e aelbol
6 Yesu dullaelmyel guqjin xilmael gee: "Cholyaeq qiq hhaeq lye siqpyu'laq'oq e aelbol qiq bol mael aeqyoq e siqbaq aeqhael vae bael kae do hhei. Yoqhhaeq aelbol taq'ae aelsiq saelpo lael, ngeelfeiq, maeq saelpopuq hhei ongl biq'ae. 7 Yoqhhaeq aeqhael fu'qyezaq e qiq hhaeq'ae gee biq: 'Nol fu, xi sul hoq'ae ngael siqpyu'laq'oq e aelbol taq'ae aelsiq saelpo lael, ngeelfeiq, maeq saelpopuq hhei ongl laeq'ae. Tyulkaol, aelbol xi qiq bol depu maoqhhae. Aeqcheekaol aeqhael vae bi deiqchiq laeq?' 8 Fu'qyezaq e qiq hhaeq gee: "Hhaoqsongl o, cheqnahoq aelbol xi qiq bol bi dyeqdeel siq. Ngael aelbol dongqpyeq vae milcaeqhael duqpu hheikaol jyeqkeeq heilcheeq hhei biq hhaeq. 9 Naqhoq aelsiq siq du'lal kaollaoq, meeq wae; maeq siq lael laol depu hhei hhae.'"
Anxiqriq'ae cholnael zonglmeeq biq
10 Anxiqriq'ae Yesu huiltangq vae cholyaeqhael'ae geemyeq gil biq. 11 Tyuqvae, niqhaeq guqzaeq li biq e haeqmiyaeq qiq hhaeq zhol'ae. Yoqhhaeq'ae dol'oq'oq yil aeqmyel teel eiq maeq zhoq laelkiq myel qyelheiq hoq nael biq aeqwae. 12 Yesu yoqhhaeq yaol mol hhei biq kaol du'lal lye gul biq, kaol yoqhhaeq'ae gee biq: "Maemoq, noq e naelgol mael meeqyil vae!" 13 Yesu aqlaq niqboq myel yoqhhaeq e aeqhhaol mael'ae baqcheeq da hhei biq, yoqhhaeq e dolcheq mael qiqlaqmyel zhoq lael vae, kaol maqqyemyel Momil'ae rongqyaol biq biq. 14 Yesu anxiqriq e qiq nao'ae cholnael zonglmeeq biq, tyulkaol, huiltangq'ae guanq e cholyaeq, zhee hol gae'lael aeqmyel cholyaeqhael'ae gee biq: "Noteel koq nao vae aeqhaelmul aeqmeel, xi koq nao laoq naelgol zonglmeeqzaeq lael hhaeq'ae, ngeelfeiq, anxiqriq qiq nao laoq maeq hhaeq'ae." 15 Hhaoqsongl gee: "Gee kaol zongl mael maeq qiqsheel e cholyaeq o! Noteel aeqsul eiq anxiqriq qiq nao'ae, maoqku nuqku ae'lye aeqnuq kaol mao'lyu mael alca maeq keelpyel hheikaol, eelcuq maeq cheel dol yil biq lilmaeq? 16 Haeqmiyaeq xitaeq laoq Yalboqlahanl e houldail'ae, Saqdanl lye qyelheiq hoq kaltoq biq aeqwae! Anxiqriq vae yoqhhaeq'ae kaltoq biq mael keelpyel biq maoq maeqngeel maeq?" 17 Yoqhhaeq saeziq xihael gee byel fu, yoqhhaeq boq'ae maeq pol e cholyaeqhael saqdol ga li gil biq'ae, ngeelfeiq, gilzuqmyel cholyaeqhael laoq yoqhhaeq lye maeqdaeqhhaeq myel zongl e silqinqhael gae'lye zhee hhaol gil biq'ae.
Oqpa oqne kaol paofenq e dullaelmyel guqjin
18 Yesu gee: "Momil e Goqja mael aeqchee mael nyegael dullael'ae lye gee laeq? Ngael aeqchee dullaelmyel guqjin maellye geedu hhei laeq? 19 Momil e Goqja laoq oqpa oqne laoqmyel hhae. Cholyaeq qiq hhaeq lye heil hheikaol aeqyoq e kilsaq vae kae deelhhei yil. Oqbye mael heeqda lal laol, aelbol qiq bol peqlal'ae, kaol mqmae taq e haeqzil yoqhhaeq e byellaq taq'ae zongl lael'ae." 20 Yoqhhaeq yol gee: "Momil e Goqja mael aeqchee mael nyegael dullael'ae lye gee laeq? 21 Momil e Goqja laoq paofenq laoqmyel hhae, cholhae aeqmae qiq hhaeq lye heil hheikaol meqziq e hhaeqxul san douq mael'ae heil keq hhei, gilzuqmyel zheeq da'lal fu keellye hhae."
Tyeqno'lye oheiq vae do'li maoqhhae
22 Yesu Ye'lulsa'lenq vae yil, hael deelpol duyil e maeq qiqsheel myel e milmae heeqmyel kaol maeq qiqsheel myel e pusiq vae cholyaeqhael'ae geemyeq gil biq. 23 Cholyaeq qiq hhaeq yoqhhaeq'ae naelhaeq biq: "Hhaoqsongl o! Cholyaeq aelheel maoqlaol maeq hhae deqjiul maeq?" Yoqhhaeq cholyaeqhael'ae gee biq: 24 "Noteel tyeqno'lye oheiq mael'ae haelmillye hha do'li congl'ae maeq lye zongl maoqhhae! Ngael noteel'ae geegaeq laeqngeel, aeqgael haeldyul cholyaeq do'li goq feiq, maq do'li ongl biq'ae. 25 Laoqhaol e hhaoqsongl tullael kaol oheiq mael piqtyeq fu, noteel oheiq nilduboq'ae haoqtul deelhhei kaol oheiq mael'ae cheq, gee: "Hhaoqsongl o! Ngaeteel'ae oheiq pong hhei laeq!' Yoqhhaeq noteel'ae geehoq laeq: 'Ngael noteel'ae maeq loq yae, noteel haeqvae lye lael hhae lye maeq loq yae.' 26 Tyuqfu, noteel xilnye gee maoqlye hhae: 'Ngaeteel noq e yiqsiboq'ae zaeq yo dol yo, nol eiq ngaeteel e gaiziq'ae lye cholyaeqhael'ae geemyeq gol biq vae.' 27 Yoqhhaeq aeqdilmyel noteel'ae geegaeq laeq: 'Ngael noteel haeqvae lye lael hhae lye maeq loq yae. Noteel maeq gongyil e cholyaeqhael, ngaeq saeqvae lye deelsae aeqkaovae!' 28 Noteel Yalboqlahanl, Yiqsaq, Yaqgel kaol xianzhihael Momil e Goqja'ae zhol mol maoqlye hhae, ngeelfeiq, noteel yaol laoq nilduboq'ae bi beiq du hhei, noteel tyuqvae nyul sil maoqmyel hhae nyul, kaol neessu hha ssu gahoq ngeelvae. 29 Aeqgael cholyaeqhael neeldu aelheiq, neelgae aelheiq, beqfang kaol nanqfang ae'lye lael, kaol Momil e Goqja'ae baqwanq zaeq maoqlye hhae. 30 Ngeelfeiq, aeqdilmyel aeqnaol naolli e cholyaeq laoq laefuq fuqli e cholyaeq peqyil ngeelvae, laefuq fuqli e cholyaeq laoq aeqnaol naolli e cholyaeq peqyil ngeelvae."
Yesu Ye'lulsa'lenq gae'lye nyul'ae
31 Tyuqfu qiqlaq'ae, Faqlilsail cholyaeq mee'nae hhaeq lael kaol Yesu'ae gee biq: "Xi'lyul noq yaol xyeq maoqlye hhae, kaol nol saeqvae lye deelsae oq!" 32 Yesu yoqhhaeteel'ae gee biq: "Noteel yil kaol honglsaelnyulpyu tyu qiq yaeq'ae geegaeq biq: 'Fu! Yaeqnao naeshoq ngael niqhaeq lyeqdu kaol cholnael zonglmeeq, dilsan tian ngael zongl maoqlye e silqinq mael zonglbyel wae.' 33 Ngeelfeiq, xianzhi laoq Ye'lulsa'lenq e nildu vae maeq hhae sil deel'ae, tyulkaol, yaeqnao naeshoq saelpyuqnao, ngael aeqdilmyel laefuqboq'ae deel maoq siq. 34 Ye'lulsa'lenq, Ye'lulsa'lenq o! Noq lye xianzhi yaol xyeqsil hhei, haqlo maellye noq e tyuqvae moqheilheil du hhei e cholyaeq yaol yol beiqsil biq'ae. Haemae mael haeyaeqhael yaol aeqyoq e aeldongl holhhaqboq'ae gul'eeq laoqmyel, ngael eiq noq e yaeqguqhael qiqgael gul'eeq yi maoqlye nyuq lil, ngeelfeiq, noteel maeq lael nae! 35 Fu! Noteel zhol myel e milcaeq laoq cholgulcillye peqyil hhei ngeelvae. Ngael noteel'ae geegaeq laeqngeel, noteel 'Hhaoqsongl e cholmil gae'lye lael e qiq hhaeq laoq, aeqdilmyel maeqdaeqhhaeq'ae lye gee biq e zae'ae' lye gee laefuq'ae, aeqdilmyel ngaeq yaol maeq hhae mol wae."