Ochoq'ae maeq hhae panlduanl'ae
7
"Noteel ochoq'ae maeq hhae panlduanl'ae, aeqgael noteel vae eiq panlduanl laeqngeel. 2 Noteel ochoq'ae haelmillye panlduanl laol, haelmillye hhae bi panlduanl hhei ngeelvae; noteel ochoq'ae aeqchee coqloq maellye kuq biq laol, noteel vae eiq aeqchee coqloq maellye kuqhoq laeq'ae. 3 Aeqcheekaol noq e yelchoq e ma'ne onglci'ae zoq e gongqbeeq mael mol congl, aeqyoyoq e ma'ne onglci'ae aelbol duqmae zoq yae lye maeq nyuq lilmaeq? 4 Noq e ma'ne onglci'ae aelbol duqmae zoq, haelmillyekaol noq e yelchoq'ae gee biq: 'Ngael noq e ma'ne onglci'ae zoq e gongqbeeq mael heildu laqngeel.' 5 Gee kaol zongl mael maeq qiqsheel e cholyaeq o! Noq e ma'ne onglci e aelbol duqmae mael laefuq heildu hhei kaolmaoqlaol maeq fu'loq ongl'ae, kaol noq e yelchoq e ma'ne onglci e gongqbeeq mael heildu biq. 6 Senljyeq zaeqzael mael aeqkeeq'ae haeq heilmoq biq, noteel e zhenzhu mael eiq aqhhaq e yiqsiboq'ae haeq beiqdeel, aeqgael yoqhhaeteel e aeqkeel maellye zhenzhu mael nuqhaeq hhei, zipol hoqlael kaol noteel'ae ee'nu lal maeqhe."Geezaeq, saelpo, oheiq mael'ae cheq
7 "Noteel geezaeq laol, noteel'ae heil laeq'ae; saelpo laol, saelpopuq hhei ongl'ae; oheiq mael'ae cheq laol, noteel'ae pong hhei laeq'ae. 8 Geezaeq e cholyaeq laoq hhamul'ae, saelpo e cholyaeq laoq saelpopuq hhei ongl'ae, oheiq mael'ae cheq e cholyaeq laoq, yoqhhaeq'ae oheiq pong hhei biq kaol'ae. 9 Noteel onglci e haetaeq laoq, yaqyo yoqhhaeq'ae aqba saelzaeq biq fu, yoqhhaeq'ae haqlo heil biq laeq? 10 Ngaeqdyel saelzaeq fu, yoqhhaeq'ae oqhol niq biq laeq? 11 Noteel maeqmeeq feiq, meeq e moqgoq mael yaeqmiq yaqyo'ae heil biq maoqlye loq'ae, noteel e mqmae vae zhol e aeqdae laoq nyeq'ei maeq gee kael vae, yoqhhaeq laoq meeq e moqgoq mael yoqhhaeq'ae geezaeq biq e cholyaeq'ae nyeq'ei hhal biq biq maeqngeel maeq? 12 Tyulkaol, aeqchee silqinq mael taq'ae haoq, noteel ochoq noteel'ae haelmillye bi za goq laol, noteel eiq ochoq'ae haelmillye za biq maoqhhae, xilmael laoq, lilfaq kaol xianzhi e yo'liq mael ngeelvae."
Tyeqno'lye oheiq vae do'li maoqhhae
13 "Noteel tyeqno'lye e oheiq vae do'li maoqhhae. Myeyil myel'ae yil e oheiq mael laoq haeqheemyel hhae, gaelmae mael heeq, doyil e cholyaeq eiq naeq kaol'ae. 14 Aeqyil za myel'ae yil e oheiq mael laoq tyeqno'lye hhae, gaelmae mael nil, saelpopuq hhei e cholyaeq eiq maeq naeq'ae."
Meeq e aelbol kaol maeqmeeq e aelbol
15 "Noteel jaq xianzhi'ae fu'qyedeelzaeq hhei maoqhhae. Yoqhhaeteel noteel e saeqvae keellael, nildu vae laoq aqciq e saeqgeel peiqcheeq hhei hhae, ngeelfeiq, onglci laoq sheqpyeq zilvuqlye e haeqheil'ae. 16 Aelgong gongbol taq ae'lye haelmillyekaol siqbaq che hhei ongl laeq? Pongqdeiq'ae lye haelmillyekaol siqpyu'laq'oq e aelsiq che hhei ongl laeq? Yoqhhaeteel e aelsiq mael'ae fu hhei'laol, yoqhhaeteel yaol fudu hhei ongl'ae. 17 Xilnye laol, meeq e aelbol laoq aelsiq yomeeq siq lael'ae, maeqmeeq e aelbol laoq maeqmeeq e aelsiq siq lael'ae. 18 Meeq e aelbol laoq maeqmeeq e aelsiq maeq siq laelkiq'ae, maeqmeeq e aelbol eiq aelsiq yomeeq maeq siq laelkiq'ae. 19 Aelsiq yomeeq maeq siq lael e aelbolhael laoq, dega hhei, kaol aeqzaeq doq e onglci'ae beiqdo hhei. 20 Tyulkaol, yoqhhaeteel e aelsiq mael'ae fu hhei'laol, yoqhhaeteel yaol fudu hhei ongl'ae."
Hhaoqsongl e zhiqyil laoqmyel zongl maoqhhae
21 "Ngaeq'ae 'Hhaoqsongl o, Hhaoqsongl o' lye gul e haetaeq myel, Mqmae Goqja vae hha do'li maeqngeel'ae, ngaeq e mqmae Aeqdae e zhiqyil laoqmyel zongl yil e cholyaeq maoq maq hha do'li'ae. 22 Tyuqfu qiq nao'ae, haelnaeqmyel cholyaeq ngaeq'ae gee laeq: 'Hhaoqsongl o, Hhaoqsongl o! Ngaeteel noq e cholmil maellye Momil e saeziq mael geegaeq gil biq, kaol noq e cholmil maellye niqhaeq lyeqdu, noq e cholmil maellye haelnaeqmyel shenqjiq zongl gol maeqngeel maeq?' 23 Ngeelfeiq, ngael yoqhhaeteel'ae maeq geehhaq myel gee biq maoq: 'Ngael noteel yaol qiqzael eiq maeq siqcongl yil; noteel duqlaq e zongl e cholyaeqhael o, ngaeq saeqvae lye deelsae hhei!'"
Maeq qiqsheel myel vae zongl deelhhei e congqciq paeqhhael
24 "Tyulkaol, aeqsul ngaeq e saeziq xihael gaeq hheikaol zongl yil laol, geel cholyaeq qiq hhaeq lye aeqyoyoq e laoqhaol mael, haqlo loongl mael taq'ae cuda deelhhei laoqmyel hhae. 25 Vuq'yel de, eellyeqlyeq, zaeqxil bo maellye laoqhaol mael'ae tongq biq feiq, laoqhaol mael maeq leeqba hhei, congqciq paeqhhael mael haqlo loongl taq'ae cuda deelhhei kaol'ae. 26 Aeqsul ngaeq e saeziq xihael gaeq hhei feiq maeq zongl yil laol, yaeqzhoqzhoq biq e cholyaeq qiq hhaeq lye, aeqyoyoq e laoqhaol mael milqyel taq'ae cuda deelhhei laoqmyel hhae. 27 Vuq'yel de, eellyeqlyeq, zaeqxil bo maellye laoqhaol mael'ae tongq biq, kaol laoqhaol mael leeqba vae, kaol ba'lye gaba vae."