Yesu Momil e saeziq mael loq laqkiq kaol Faqlilsail cholyaeq'ae gaezaeq biq
23
Tyuqfu, Yesu cholyaeqhael kaol laqcaqhael'ae geegaeq gil biq, 2 Gee: "Momil e saeziq mael loq e laqkiq, kaol Faqlilsail cholyaeq Moxi e duqtyel mael'ae zhol da deelhhei hhae, 3 Tyulkaol, yoqhhaeteel noteel'ae moqheil hael heil mael, noteel tyulnye zongl yil kaol haelmeeqlye zongl gaeyil maoqhhae. Ngeelfeiq, yoqhhaeteel zongl laoqmyel haeq bael zongl gil, yoqhhaeteel laoq gee kiq dyul maoqlaol maeq zongl kaol'ae. 4 Yoqhhaeteel lye maq baq sael e chengdyeqlye aeq'yel mael kaltoq hhei, kaol ochoq e baqtaq mael'ae baqda hhei biq, ngeelfeiq, aeqyoyoq laoq laqnyul qiq nyul eiq maeq dongni goq'ae.5 Yoqhhaeteel haelzongl e silqinq mael laoq cholyaeq'ae bi mol maoqlye hhae, tyulkaol, doqda hhei e jinwenq hoqhoa mael zongl heeq hhei, kaol aelhongq e aelbuq'aelqyel mael zongl maol hhei, 6 Kaol baqwanq zaeq myel'ae hhael meeq e zholhhael mael, kaol huiltangq onglci'ae hhael meeq e zholhhael mael'ae hhaol biq hhae, 7 Kaol gaiziq ae'lye cholyaeqhael yoqhhaeteel'ae meeqlaeqmaeq lye naelhaeq biq mael, kaol yoqhhaeteel'ae labiqb lye gul biq mael hhaol biq hhae. 8 Ngeelfeiq, noteel'ae labiq lye haeq bi gul gil, noteel e laoqsi laoq qiq hhaeq oq kaol'ae; noteel laoq gilzuqmyel aqsseq aeqnil'ae. 9 Noteel'ae aeqdae qiq hhaeq wae, tyutaeq laoq mqmae vae zhol e noteel e aeqdae ngeelvae, kaol milcaeq taq e cholyaeq vae eiq aeqdae lye haeq gul biq. 10 Noteel'ae laqkiq qiq hhaeq maoq maeq zhol'ae, yoqhhaeq laoq Jidu ngeelvae, tyulkaol, laqkiq lye haeq bi gul gil. 11 Noteel onglci'ae aeqsul hhael heeq laol, aeqsul laoq noteel e yaqhacheqzaq e cholyaeq geiq maoqhhae. 12 Aeqsul aeqyoyoq yaol deiqqei da zaq laol, aeqgael bi deiqgae hhei ngeelvae; aeqyoyoq maeq dilqeizaeq hael laoq, aeqgael hhae bi deiqqei da hhei ngeelvae.
13 "Noteel gee kaol zongl mael maeq qiqsheel e Momil e saeziq mael loq e laqkiqhael, kaol Faqlilsail cholyaeqhael zaihuol za vae! Noteel cholyaeqhael e yiqsi ae'lye Mqmae Goqja e oheiq mael piqtyeq hhei, aeqyoyoq laoq maq do'li, do'li maoqlye e cholyaeq vae, noteel yoqhhaeteel vae eiq maeq bi do'li.c
15 "Noteel gee kaol zongl mael maeq qiqsheel e Momil e saeziq mael loq e laqkiqhael, kaol Faqlilsail cholyaeqhael zaihuol za vae! Noteel eeldeel deelmae kaol milgee vae deeldyu byel, cholyaeq qiq hhaeq yaol noteel xiangxinl mael'ae bael xiangxinl lael lye geepolzaeq biq, yoqhhaeq bael xiangxinl lael vae, ngeelfeiq, yoqhhaeq yaol noteel taq'ae hhael ba myel e daq'oqlaqmae e yaqyo bi peqyil hhei.
16 "Noteel mabyeqbyeq e sheeqmyeqzaeq e cholyaeqhael zaihuol za vae! Noteel gee: 'Sholhaol mael'ae tyuq deelhhei kaol faqsilkei mael laoq, qiqgiq maeq suanl hhaeq'ae; ngeelfeiq, sholhaol onglci e pulsheel mael'ae tyuq deelhhei kaol faqsilkei laol, yoqhhaeq haelmeeqlye zongl gaeyil maoqhhae.' 17 Noteel yaeqzhoqzhoq e mabyeqhael o, haelmael hhael heeq hhaemaeq? Pulsheel maeq, paelsilmyel pulsheel mael bi senljyeq lal e sholhaol mael maeq? 18 Noteel yol gee: 'Jiltanq mael'ae tyuq deelhhei kaol faqsilkei mael laoq, qiqgiq maeq suanl hhaeq'ae; ngeelfeiq, jiltanq taq e zaelheel mael'ae tyuq deelhhei kaol faqsilkei laol, yoqhhaeq haelmeeqlye zongl gaeyil maoqhhae.' 19 Noteel mabyeqhael o, haelmael hhael heeq hhaemaeq? Zaelheel maeq, paelsilmyel zaelheel mael bi senljyeq lal e jiltanq mael maeq? 20 Tyulkaol, cholyaeq jiltanq mael'ae tyuq deelhhei kaol faqsilkei laol, jiltanq, kaol jiltanq taq e halza mael'ae tyuq deelhhei kaol faqsilkei ngeelvae; 21 Cholyaeq sholhaol mael'ae tyuq deelhhei kaol faqsilkei laol, sholhaol kaol sholhaol onglci'ae zhol e tyutaeq'ae tyuq deelhhei kaol faqsilkei ngeelvae; 22 Cholyaeq mqmae'ae tyuq deelhhei kaol faqsilkei laol, Momil e duqtyel, kaol tyuqvae zhol da deelhhei e qiq hhaeq'ae tyuq deelhhei kaol faqsilkei ngeelvae.
23 "Noteel gee kaol zongl mael maeq qiqsheel e Momil e saeziq mael loq e laqkiqhael, kaol Faqlilsail cholyaeqhael zaihuol za vae! Noteel onglzil, baqgoq kaol huiqxiang mael, qyel mael onglci e qiq mal heelda hhei, lilfaq taq'ae hhal mulyo e silqinq mael laoq, gongyil, hhaoqsaeqsaeq, haelmillye gee laol haelmillye zongl mael ngeelvae, ngeelfeiq, xihael noteel laoq maeq zongl kaol'ae; xihael laoq noteel zongl maoqhhae, ngeelfeiq, fenglxianl e tyuhael eiq maeq beiqbael hhaeq'ae. 24 Noteel mabyeqbyeq e sheeqmyeqzaeq e cholyaeqhael, noteel laoq haelsheel mael zonglqyel du hhei, loltoq mael laoq meqdo hhei.
25 "Noteel gee kaol zongl mael maeq qiqsheel e Momil e saeziq mael loq e laqkiqhael, kaol Faqlilsail cholyaeqhael zaihuol za vae! Noteel beiziq kaol panqpan e nilduboq'ae ciqshol hhei, ngeelfeiq, onglci'ae laoq neemaecuqm kaol aeqchee zongl goq laol aeqchee zongl mael bong'lye zoq kaol'ae. 26 Nol mabyeqbyeq e Faqlilsail cholyaeq o, beiziq onglci vae laefuq ciqshol hhei, xilnye laol, nildu vae eiq shol wae.
27 "Noteel gee kaol zongl mael maeq qiqsheel e Momil e saeziq mael loq e laqkiqhael, kaol Faqlilsail cholyaeqhael zaihuol za vae! Noteel laoq zonglzhi hhei e fuq'ongl laoqmyel hhae, nilduboq laoq zhigaqlye, onglci laoq cholsil e saeq'yuq kaol xinqlalmyel hael bong'lye zoq kaol'ae. 28 Noteel eiq qiqsheel ngeelvae, nilduboq'ae laoq cholyaeqhael'ae gongyil she lye bi mol, ngeelfeiq, onglci'ae laoq gee kaol zongl mael maeq qiqsheel kaol lilfaq laoqmyel maeq zongl e silqinq mael bong'lye zoq hhae.
29 "Noteel gee kaol zongl mael maeq qiqsheel e Momil e saeziq mael loq e laqkiqhael, kaol Faqlilsail cholyaeqhael zaihuol za vae! Noteel xianzhi'ae fuq'ongl cu biq, kaol gongyil e cholyaeq e fuq'ongl mael zonglzhi hhei biq, kaol xilnye gee kaol'ae: 30 'Ngaeteel aeqpyuq aeqdaehael e naohaeq vae zhol kaollaoq, yoqhhaeteel nyegael xianzhihael'ae siq bi yul mael maeq bael zongl yil.' 31 Xilnye laol, noteel laoq xianzhi yaol xyeq e cholyaeq e houldail lil lye aeqyoyoq zenlminqzaeq aeqwae. 32 Noteel laoq noteel e aeqpyuq aeqdae e duqlaq myel zongl mael laoqmyel, bael zongl gaeyil gil oq!
33 Noteel oqhol hael o, duq zoq e oqhol lye bo hhei hael o, haelmillyekaol daq'oqlaqmae e chenqfaq mael'ae kihezaq ongl laeq? 34 Tyulkaol, ngael xianzhi, geel cholyaeq kaol Momil e saeziq mael loq e laqkiq yaol noteel e saeqvae moqheilheil du hhei, qiq miq laoq noteel lye xyeq maoqlye hhae, shiqziljal mael'ae diqcheeq maoqlye hhae; qiq miq laoq noteel huiltangq vae lye caxu maellye zheq biq maoqlye hhae, milmae heeqmyel e xi qiqgael ae'lye yul qiqgael'ae lyeq yil biq, 35 Xilnye laol, gongyil e cholyaeq Yalboq ae'lye mael, noteel lye sholhaol vae, kaol jiltanq onglci'ae lye xyeq biq e Ba'laja e yaqyo Saqja'lilyal e siq keellye, milcaeq taq'ae gongyil e cholyaeq'ae siq bi yul mael gilzuqmyel noteel'ae baqcheeq da hhei maoq. 36 Ngael aeqdilmyel noteel'ae geegaeq laeqngeel, gilzuqmyel xihael yaeqmeel dyeqdeel e cholyaeqhael'ae, baqcheeq da hhei biq maoq."
Yesu Ye'lulsa'lenq gae'lye nyul'ae
37 "Ye'lulsa'lenq o, Ye'lulsa'lenq o, nol duqlye xianzhi yaol xyeqsil biq'ae, kaol haqlo maellye noq e saeqvae moqheilheil du hhei biq e cholyaeq yaol beiqsil biq'ae. Haemae mael haeyaeqhael yaol aeqyoq e aeldongl holhhaqboq'ae gul'eeq laoqmyel, ngael eiq noq e yaeqguqhael yaol qiqgael gul'eeq maoqlye hae'nae zael nyuq aeqwae, ngeelfeiq, noteel maeq lael nae'ae! 38 Naelhaeq gil! Noteel e laoqhaol mael qiq hhaeq eiq maeq zhol myel peeqchiq chiqdye bi peqyil maoqlye hhae. 39 Ngael noteel'ae geegaeq laeqngeel, saeq ae'lye aeqnaol, noteel 'Hhaoqsongl e cholmil maellye lael e qiq hhaeq laoq maeqdaeqhhaeq'ae' lye gee fu keellye, noteel ngaeq yaol qiqzael eiq maeq hhae mol wae."