Saqdanl Yesu'ae cheeqmu biq hhae
Tail 4: 1-11; Keq 1:12-13
4
Yesu'ae senllinq bong'lye za, Yoqdanl Lolbaeq ae'lye hoqlal laol, senllinq lye byelcongq'ae sheeqyil biq. 2 Niqhaeq haeqmae lye yoqhhaeq'ae yuqqyel nao cheeqmu biq vae. Tyuqfu naohaeq'ae, yoqhhaeq qiqgiq eiq maeq zaeq gol'ae, naohaeq keellael laol yoqhhaeq myeq li biq vae. 3 Niqhaeq haeqmae yoqhhaeq'ae gee biq: "Nol aeqdilmyel Momil e Yaqyo kaollaoq, haqlo xilmael zaeqzael bi peqlal!" 4 Yesu yoqhhaeq'ae geehoq biq: "Momil e Suqhhaq taq'ae xilnye cu deelhhei:'Cholyaeqhael e aeqyil bi dyeq gayil mael laoq zaeqzael oqlye maeqngeel'ae.'"
5 Niqhaeq haeqmae lye yoqhhaeq yaol hhael gao myel'ae sheeq da'li biq, qiqlaqmyel milcaeq taq'ae halza e goqja mael yoqhhaeq'ae bi fu'ae, 6 Kaol yoqhhaeq'ae gee biq: "Xihael gilzuqmyel ngaeq'ae heilmoq laeq wae, ngael aeqsul'ae heil goq laol, aeqsul'ae heil biq maoq; tyulkaol, ngael gilzuqmyel laqtaq xihael kaol rongqyaol xihael noq'ae biq laqngeel. 7 Nol ngaeq e yiqsiboq'ae ngaeq'ae tongqheel laeq laol, xihael gilzuqmyel noq e ngeelvae." 8 Yesu geehoq biq: "Momil e Suqhhaq taq'ae xilnye cu deelhhei:
'Nol noq e Hhaoqsongl Momil'ae tongqheel biq maoqhhae,
yoqhhaeq'ae maoqlaol maeq hhae fuqsil'ae.'"
9 Niqhaeq haeqmae lye yoqhhaeq yaol Ye'lulsa'lenq vae yol sheeqli biq, yoqhhaeq yaol sholhaol hhael gao myel vae bi haoqtul deelhhei, kaol yoqhhaeq'ae gee biq: "Nol aeqdilmyel Momil e Yaqyo kaollaoq, saeqvae lye dilgae yil! 10 Momil e Suqhhaq taq'ae cuda deelhhei:
'Yoqhhaeq noq gae'lye yoqhhaeq e mqmae yosonglhael'ae
noq'ae ocongq yil biq lye minllinl biq maoqlye hhae;
11 Aeqgael noq e aeqkeel mael haqlo mael'ae tongqcheeq dayil maeqhe lyekaol,
yoqhhaeteel aqlaq maellye noq'ae deiqtyeq deelhhei laeq maoqlye hhae.'"
12 Yesu yoqhhaeq'ae geehoq biq: "Momil e Suqhhaq taq'ae cu deelhhei:
'Nol noq e Hhaoqsongl Momil'ae maeq hhae cheeqmu biq'ae.'"
13 Niqhaeq haeqmae maeq qiqsheel myel e loqho maellye hael cheeqmu maoqmyel cheeqmu byel hhei'laol, Yesu zaellye deelsae hhei vae, kaol haeqfu shiqshen'ae zae'li kiq maeq lye doq deelhhei.
Yesu Ja'lillil vae Momil e saeziq geegaeq
14 Yesu laoq senllinq e onglzaeq mael za ga'lal aeqmyel Ja'lillil vae hoq keellael, yoqhhaeq e cholmil mael tyuqvae dongqpyeq dongqjyel milcaeq vae gaeqbyel yil vae. 15 Yoqhhaeq yoqhhaeteel e halza e huiltangq vae cholyaeqhael'ae geemyeq gil biq hhae, aeqsul eiq yoqhhaeq'ae zhee geel'ae lye laqma deiqqei biq hhae.
Yesu e pusiq e cholyaeqhael yoqhhaeq'ae xinq biq
16 Yesu aeqyoq heeqda lal e Naqsa'lel vae hoq keellael. Anxiqriq fu, yoqhhaeq haelzael zongl laoqmyel huiltangq vae do'li, tullael kaol Momil e saeziq mael duq gaeq gil biq maoqlye hhae. 17 Cholyaeq qiq hhaeq lye Yiqsailyal xianzhi lye cu deelhhei e suqhhaq qiq lu mael, yoqhhaeq'ae heilmoq hhei biq. Yoqhhaeq Suqhhaq mael diqpong hheikaol xilnye cu deelhhei e saeziq qiq gael saelpopuq hhei:
18 "Hhaoqsongl e yohael mael ngaeq'ae yo'lael vae,
yoqhhaeq gaoyouq mael ngaeq'ae xyecheeq hhei laeq mael laoq,
ngaeq yaol saeqyaeqhael'ae fuqyin geegaeq yil biq lye hhae.
Yoqhhaeq ngaeq'ae yotyel ha'lye geedu hhei lye moqheilheil laeq hhae:
Eezaeq li biq e cholyaeqhael yaol bi pyeqduhoq hhei;
mabyeqbyeq e cholyaeqhael yaol bi mol hoqlael;
yaqpeq biq e cholyaeqhael'ae bi zilyoq vae.
19 Hhaoqsongl hhaelgaeq e hoqlaq laoq
yaeqmeel'ae lye yotyel ha'lye geedu hhei."
20 Yoqhhaeq Suqhhaq mael lutyeq hoq hhei'laol, huiltangq vae guanqliq e qiq hhaeq'ae heilmoq hoq hhei biq, kaol zholgae hhei. Huiltangq vae zhol e cholyaeqhael gilzuqmyel yoqhhaeq'ae deelhae'lye chifu biq. 21 Yesu yoqhhaeteel'ae gee biq: "Noteel gaeq e Momil e Suqhhaq taq e saeziq xihael yaeqnao peqlal aeqwae." 22 Cholyaeqhael yoqhhaeq gee e saeziq mael ngeel yae lye gee gil'ae, yoqhhaeq e myeqbongq ae'lye geedu hhei e meeq e saeziq mael'ae gaqmaqzuq li gil biq'ae, kaol xilnye gee: "Xitaeq Yoqsel e yaqyo maeqngeel maeq?" 23 Yesu yoqhhaeteel'ae gee biq: "Noteel aeqdilmyel laefuq'aeqnao cholyaeq e saeziq maellye ngaeq'ae gee laeq: 'Cholnael zonglmeeq e cholyaeq o, noq yaol zonglmeeqzaeq hoq hhei!' Tyulkaol, noteel eiq ngaeq'ae xilnye gee laeq: 'Ngaeteel gaeq yo e nol Jabaiqnongq vae haelzongl e silqinqhael, noq e pusiq vae eiq zongl maoqhhae!'" 24 Yesu yol gee: "Ngael aeqdilmyel geegaeq gil laeqngeel, cholyaeqhael aeqyoteel pusiq e xianzhi'ae neemae onglci ae'lye maq jyeqshel goq'ae. 25 Ngael noteel'ae zaqgiq maqgiq e saeziq lye geegaeq gil laeqngeel, Yiqlilyal e naohaeq'ae, Yiqsellyel milcaeq vae vuq'yel maeq yel myel sul hoq kaol baehae koq siq zoq vae, milcaeq taq'ae haeqvae eiq hoqlaq maeqmeeq qiqgiq zaeq eiq maqza. Tyuqfu, tyuqvae miqchiq zhee zhol'ae. 26 Yiqlilyal vae yoqhhaeteel onglci e qiq hhaeq zael'ae yil lye eiq moqheil maeq heil biq'ae, Xidunl milcaeq e Saqlelfaq vae zhol e miqchiq qiq hhaeq zael'ae yil lye moqheilheil biq dyul wae. 27 Yiqlilsa xianzhi e naohaeq'ae, Yiqsellyel milcaeq vae maqfeng nael biq e cholyaeq zhee zhol'ae. Ngeelfeiq, Xullilyal milcaeq e Naiqmanl maoqlaol qiq hhaeq eiq maeq meeqsholyil biq'ae." 28 Huiltangq'ae zhol e cholyaeqhael saeziq xihael gaeq hhei biq laol, neemae dilbyeq duyi maoqmyel hol gil biq'ae, 29 Kaol yoqhhaeteel tullael kaol yoqhhaeq yaol milmae heeqmyel nilduboq'ae lyeqdu biq. Milmae heeqmyel tyulmael laoq geeqzhoq vae cu deelhhei hhae, tyulkaol, yoqhhaeteel Yesu yaol hhaqbyeq'ae ee'li biq, kaol tyuqvae lye deiq leeqgae maoqlye zongl biq hhae. 30 Ngeelfeiq, Yesu laoq yoqhhaeteel onglci ae'lye deelpol duyil kaol deelsae vae.
Yesu lye maeqshol e yohael mael lyeqdu hhei vae
31 Yesu laoq Ja'lillil milcaeq e Jabaiqnongq milmae heeqmyel vae gae keelyil, anxiqriq'ae cholyaeqhael'ae geemyeq gil biq hhae. 32 Yoqhhaeq e saeziq mael laqtaq za, kaol yoqhhaeteel yoqhhaeq geemyeq mael'ae gaqmaqzuq li gil biq'ae. 33 Huiltangq vae maeqshol e yohael guqzaeq li biq e cholyaeq qiq hhaeq, yotyel haeqheemyel gul tullaeq: 34 "Ei! Naqsa'lel cholyaeq Yesu, ngaeteel zongl mael noq'ae aeqchee bael heiq laeq hhaemaeq? Nol ngaeteel yaol zonglmye maoqlye lilmaeq? Ngael nol aeqsul'ae lye loq lil, nol laoq Momil e senljyeq qiqhhaeq'ae." 35 Yesu yoqhhaeq'ae gaezaeq biq: "Yotyel haq du! Xitaeq e aeqhhaol ae'lye duyi!" Niqhaeq lye tyutaeq yaol cholyaeqhael onglci'ae beiqleeq biq, kaol yoqhhaeq e aeqhhaol ae'lye duyi vae, yoqhhaeq'ae maeq zonglnael biq'ae. 36 Gilzuqmyel cholyaeqhael dilgu'li gil biq'ae, tyulkaol, hhaellaelmyel geegaeq gil'ae: "Aeqcheekaol xilnye hhaemaeq? Yoqhhaeq onglzaeq laqtaq maellye maeqshol e yohael mael'ae minllinl biq laol, maeqshol e yohael mael duyi hhei vae." 37 Tyulkaol, Yesu haelzonglhael tyuqvae dongqpyeq dongqjyel e milcaeq vae gaeqbyel yil vae.
Yesu lye nael biq e cholyaeq yaol zonglmeeq biq
38 Yesu tullael kaol huiltangq ae'lye deelsae hhei, kaol Ximenq toq'ae do'li. Ximenq e ssuqmae vuqduqpaeq biq'ae. Yoqhhaeteel Yesu yaol yoqhhaeq'ae bael zonglmeeq biq lye geezaeq biq. 39 Yesu yoqhhaeq e dongqpyeq'ae deel niqli, kaol vuqduqpaeq mael'ae vuq biq, kaol vuqduq maeq paeq biq vae. Kaol yoqhhaeq nae'naemyel tullael kaol yoqhhaeteel'ae zhaofu biq hhae.
40 Neelmae leeqdo goqbiq fu, cholyaeqhael lye aeqyoteel e paeqyaeqhael onglci'ae haelmillye naelgol nael biq e cholyaeqhael yaol Yesu tyuqvae sheeqlaeq biq. Yesu yoqhhaeteel'ae haetaeq vae eiq aqlaq baqcheeq da hhei biq, kaol yoqhhaeteel yaol zonglmeeq biq vae. 41 Niqhaeq eiq haelnaeqmyel cholyaeqhael e aeqhhaol ae'lye duyi vae, kaol gul gae'lael aeqmyel gee: "Nol laoq Momil e Yaqyo'ae." Yoqhhaeteel Yesu laoq Jidu'ae lye loq biq, tyulkaol, Yesu yoqhhaeteel'ae gaezaeq biq, yoqhhaeteel'ae saeziq maeq bi gee'ae.
Yesu baeqjyelboq e milcaeq vae Momil e saeziq geegaeq yil
42 Mqbaebae lael fu, Yesu duyil, kaol cholhaoq maeq zhol myel vae deel yil. Kaol cholyaeqhael duqlye yoqhhaeq'ae saelpo gil'ae. Yoqhhaeteel yoqhhaeq zhol myel'ae saelpo keelyil laol, yoqhhaeq yaol bi zholdeelsaeq goq biq, kaol yoqhhaeteel zaellye maeq bi deelsae nae'ae. 43 Ngeelfeiq, Yesu gee: "Ngael baeqjyelboq e milmae heeqmyel vae eiq Momil e Goqja e fuqyin mael geegaeq yil maoq, ngaeq yaol moqheilheil duyi laq mael laoq xilmael gae'lye hhae." 44 Tyulkaol, yoqhhaeq Yoqtail e halza huiltangq vae geemyeq gil biq hhae.