Shelxiqzongl e Yoqhanl
3
Kaiqsaa Tiqbiqliuq Loqmaq dilgoq'ae guanqliq e qyelngaeq hoq fu, Benqdiu Biqlado laoq Yoqtail vae zongqdu geiq hhae, Xi'lyul laoq Ja'lillil milcaeq vae zongmae geiq hhae, yoqhhaeq e aeqnil Fei'lil laoq Yiqtuqlilyal kaol Tellakeqniq tyu niqgael e milcaeq vae zongmae geiq hhae, Lyuqsa'nyel laoq Yalbiqlilniq milcaeq vae zongmae geiq hhae. 2 Tyuqfu, Yalnaq kaol Gaiyalfaq daljilsi geiq hhae. Momil e saeziq mael diqsheelleeldye'ae zhol e Saqja'lilyal e yaqyo Yoqhanl'ae yo'li biq. 3 Kaol Yoqhanl Yoqdanl Lolbaeq e dongqpyeq dongqjyel e milcaeq vae deeldyu byel hhei, kaol neemae paellael e ciq e gui'liq geegaeq gil biq, kaol cholyaeqhael neemae paellael kaollaoq hhae bi shelmianq vae. 4 Yiqsailyal xianzhi e Suqhhaq taq'ae cu deelhhei e saeziq laoqmyel:"Cholyaeq qiq hhaeq diqsheelleeldye ae'lye yotyel haeqheemyel gul'ae:
'Hhaoqsongl e gaelmae mael paeqgaelsael meeq deelhhei maoqhhae,
yoqhhaeq e galchi mael eiq zongl zhoq deelhhei maoqhhae!
5 Gilzuqmyel longlkaeq longllaqhael baqbong do hhei,
heeqnil e geeqzhoqhael gilzuqmyel duqsael hhei!
Byul'oqmyel e gaelmae mael zhoqsae'lye zongl zhoq hhei,
maeqsaelmyel e gaelmae mael saelza'lye zongl sael hhei!
6 Ruqtiq za e cholyaeqhael aeqsul eiq
Momil e jiul'en mael hhae mol'ae.'"
7 Yoqhanl laoq yoqhhaeq e ciq e gui'liq mael zongl maoqlye duyi e cholyaeq tyuhael'ae gee biq: "Duq zoq e oqhol lye bo hhei hael o! Aeqsul lye aeqgael yi maoqlye faqhoqkei mael'ae hoqhhaq gil lye tyuqmyeq gil laeq hhaemaeq? 8 Noteel neemae paellael mael'ae zae'li ongl aeqmyel aelsiq siq du hhei maoqhhae. Noteel neemae onglci'ae haeq nyuq: 'Aedeeteel e aeqpyuq aeqdae laoq Yalboqlahanl'ae.' Ngael noteel'ae geegaeq laeqngeel, Momil haqlo xihael ae'lye Yalboqlahanl'ae houldail bi du'lal ongl'ae. 9 Yaeqmeel, sulmzongl mael aelbol dongqcil vae baqdeel hhei aeqwae, aelsiq yomeeq maeq siq lael mael laoq depu hhei, kaol aeqzaeq doq myel'ae beiqdo hhei."
10 Cholyaeqhael yoqhhaeq'ae naelhaeq biq: "Aelmaol, ngaeteel haelmillye zongl maoqhhae maeq?" 11 Yoqhhaeq geehoq biq: "Onglci'ae dum do e aelhongq poljye niq ko za kaollaoq, maqza hael'ae byel hhei biq; zaeqzael za hael eiq xilnye zongl maoqhhae." 12 Shuil shezaeq e cholyaeq eiq lael kaol shelxiq lael, yoqhhaeq'ae naelhaeq biq: "Laoqsi, ngaeteel haelmillye zongl maoqhhae maeq?" 13 Yoqhanl yoqhhaeteel'ae gee biq: "Haeldyul lye gee deelhhei dyul maoqlaol, ongljyeqmyel haeq heilzaeq." 14 Dangbinkei e cholyaeq eiq yoqhhaeq'ae naelhaeq biq: "Ngaeteel laoq? Ngaeteel haelmillye zongl maoqhhae maeq?" Yoqhhaeq gee: "Ochoq'ae haq haguzaq kaol zaqgiq haq giqzaq yil, aeqyoyoq hhae heilzaeq e dyuqbaq za laol hhaeq vae."
15 Tyuqfu cholyaeqhael neemaegil lye doq deelhhei, aeqsul eiq Yoqhanl laoq Jidu ngeelvae laoq lye neemae mael'ae nyuqzaeq gil'ae. 16 Yoqhanl cholyaeqhael'ae gee biq: "Ngael noteel'ae eelcuq maellye shelxiqzongl biq, ngeelfeiq, ngaeq taq'ae hhael onglzaeq myel tyutaeq lael maoqlye hhae, ngael yoqhhaeq'ae paqno alca bael keelpyel biq eiq maeq zae'ae. Yoqhhaeq laoq senllinq kaol aeqzaeq doq maellye noteel'ae shelxiqzongl laeq maoqlye hhae. 17 Yoqhhaeq e aqlaq mael'ae xilbo baq hhei, yoqhhaeq e zaelsiqhael sholgaqlye bo shol byel hhei, meqziq mael yoqhhaeq e zaelsiq baqdeelzaeq e laoqhaol vae heil do byel li, gongqbeeqhael maq myeyil kiq e aeqzaeq doq maellye pe byel maoqlye hhae."
18 Yoqhanl haelnaeqmyel e saeziq maellye cholyaeqhael'ae geemyeq gil biq, kaol yoqhhaeteel'ae fuqyin geegaeq biq. 19 Xi'lyul zongmae aeqyoq e aeqnil e haeqmiq Xi'loqdiq yaol sheeqzaeq biq dyul maeqcil, duqlaq myel haelzongl e silqinqhael gae'lye, Yoqhanl lye gaezaeq biq'ae. 20 Ngeelfeiq, Xi'lyul duqlaq myel haelzongl e silqinqhael taq'ae duqlaq e ongljyeq qiq mal zongl wae siq, xilmael laoq Yoqhanl yaol laoqgaiqkei laoqhaol vae koqlongl li biq mael ngeelvae.
Yesu shelxiq vae
21 Cholyaeqhael shelxiq fu, Yesu eiq shelxiq lael'ae. Yoqhhaeq heeldoq gee fu, mqmae pong'lael'ae. 22 Senllinq mael haoqhaoq laoqmyel yoqhhaeq e aeqhhaol taq'ae loq dayi; mqmae taq ae'lye yotyel gee: "Nol laoq ngael gaeq e Yaqyo'ae, ngael noq'ae zhee hhaol yae."
Yesu Jiduq toq e pyuqcheq
23 Yesu Momil e saeziq zhoq geegaeq gil biq fu, suqqyel hoq laellye zoq wae. Cholyaeqhael yoqhhaeq laoq Yoqsel e yaqyo'ae lye kei gil biq hhae, Yoqsel laoq Xi'liq e yaqyo'ae, 24 Zail gee da'li laol, Maqtaq, Lilveil, Mailji, Yaqnaq, Yoqsel, 25 Maqtatiqyal, Yalmoqsi, Naqhongq, Yiqsi'lil, Naqgai, 26 Maqya, Maqtatiqyal, Ximeiq, Yoqsel, Yoqdal, 27 Yoqha'nanq, Lilsaq, Soqloqbaboq, Saqlatyeq, Niqlil, 28 Mailji, Yaldiq, Gesang, Yiqmoqdang, Eq, 29 Yeshuq, Yiqlilyiqxyel, Yoqlinl, Maqtaq, Lilveil, 30 Ximianq, Yoqdal, Yoqsel, Yoqnanq, Yiqlilyaljinl, 31 Miqlilyal, Maiqnanq, Maqdaqta, Naqdan, Dalweil, 32 Yexi, Oqbeildeq, Boasi, Sa'lab, Naqshunl, 33 Yalmiqnaqdaq, Yaqdangminq, Yallanq, Xisi'lunq, Faqlelsi, Yoqdal, 34 Yaqgel, Yiqsaq, Yalboqlahanl, Ta'la, Naqhel, 35 Xi'lul, Lavuq, Faqlel, Xiboq, Sa'la, 36 Gai'nanq, Yalfaqsa, Sanq, Noqyal, Lamail, 37 Maqtuqsa'la, Yiqnol, Yaqlyel, Maqlellyel, Gai'nanq, 38 Yiqnoqshil, Sailtel, Yaldang, Yaldang laoq Momil e yaqyo'ae.