Shelxiqzongl e Yoqhanl
3
Tyuqfu naohaeq'ae, shelxiqzongl e Yoqhanl duyi, Yoqtail e diqsheelleeldye vae cholyaeqhael'ae geegaeq gil biq, gee: 2 "Mqmae Goqja niqlael vae, tyulkaol, noteel neemae paellael maoqhhae." 3 Cholyaeq xitaeq laoq Yiqsailyal xianzhi gee gol e tyutaeq ngeelvae, yoqhhaeq xilnye gee:"Cholyaeq qiq hhaeq diqsheelleeldye ae'lye yotyel haeqheemyel gul'ae:
Hhaoqsongl e gaelmae mael paeqgaelsael meeq deelhhei maoqhhae,
yoqhhaeq e galchi mael eiq duqzhoq deelhhei maoqhhae!"
4 Yoqhanl xitaeq laoq loltoq caeqhum aelhongq dum hhei hhae, saeqgeel e haeqpi mael haeqpipaqhhael vae paq hhei, aeldyel zaeq, baeqsho baq'eel dol hhae. 5 Tyuqfu, Ye'lulsa'lenq, Yoqtail halza milcaeq vae kaol Yoqdanl Lolbaeq e dongqpyeq dongqjyel vae haelzhol e cholyaeqhael, gilzuqmyel Yoqhanl tyuqvae yil gil hhae, 6 Kaol aeqyoteel golsiq za yae lye gee gil'ae, kaol Yoqdanl Lolbaeq ae'lye yoqhhaeq lye shelxiq gil biq vae.
7 Yoqhanl laoq haelnaeqmyel Faqlilsail cholyaeqhael kaol Saqdugai cholyaeqhael eiq shelxiq lael mol hhei biq, kaol yoqhhaeteel'ae gee biq: "Duq zoq e oqhol lye bo hhei hael o, aeqsul lye aeqgael yi maoqlye faqhoqkei mael'ae hoqhhaq gil lye tyuqmyeq gil laeq hhaemaeq? 8 Noteel aelsiq siq du hhei mael, neemae paellael mael'ae zae'li ongl maoqhhae. 9 Aeqyoyoq e neemae onglci'ae 'ngaeteel e aeqpyuq aeqdae laoq Yalboqlahanl'ae' lye haeq nyuq. Ngael noteel'ae geegaeq laeqngeel, Momil haqlo xihael onglci ae'lye Yalboqlahanl'ae houldail bi du'lal ongl'ae. 10 Yaeqmeel, sulmzongl mael aelbol dongqcil vae baqdeel hhei wae, aelsiq yomeeq maeq siq lael e aelbol mael laoq depu hhei, kaol aeqzaeq doq myel vae beiqdo maoqlye hhae. 11 Ngael noteel'ae eelcuq maellye shelxiqzongl biq, kaol noteel'ae neemae bi paellael; ngeelfeiq, aeqgael ngaeq e aeqnaol'ae lael maoqlye e tyutaeq laoq, ngaeq taq'ae hhael onglzaeq'ae, ngael yoqhhaeq'ae paqno bael pyeq biq eiq maeq zae yae. Yoqhhaeq laoq senllinq kaol aeqzaeq doq maellye noteel'ae shelxiqzongl laeq maoqlye hhae. 12 Yoqhhaeq e aqlaq mael'ae xilbo baq hhei, yoqhhaeq e zaelsiqhael sholgaqlye bo shol byel hhei, meqziq mael yoqhhaeq e zaelsiq baqdeelzaeq e laoqhaol vae heil do byel li, gongqbeeqhael maq myeyil kiq e aeqzaeq doq maellye pe byel maoqlye hhae."
Yesu shelxiq vae
13 Tyuqfu, Yesu Ja'lillil ae'lye Yoqdanl Lolbaeq vae keellael, kaol Yoqhanl e tyuqvae keelli, Yoqhanl yaol yoqhhaeq'ae shelxiq bi zongl maoqlye hhae. 14 Yoqhanl yoqhhaeq'ae diqqye biq maoqlye zongl hhae, gee: "Ngaeq yaol laoq noq lye shelxiq bi zongl maoqhhae, nol haelmillyekaol ngaeq e saeqvae lael lilmaeq?" 15 Yesu yoqhhaeq'ae geehoq biq: "Xilnye laefuq zongl aeqmeel, aedeeteel laoq zongl maoqhhae lye e gilzuqmyel gongyil mael, xilnye zongl maoq kaol'ae." Tyulkaol, Yoqhanl laoq yoqhhaeq gee laoqmyel zongl vae. 16 Yesu shelxiq hhei'laol, nae'naemyel eelcuq ae'lye da'lal; mqmae mael qiqlaqmyel yoqhhaeq'ae pong hhei biq, yoqhhaeq laoq Momil e yohael mael haoqhaoq laoqmyel loq gayi, kaol yoqhhaeq e aeqhhaol taq'ae loq da deelhhei mol hhei biq. 17 Tyuqfu qiqlaq'ae, mqmae ae'lye yotyel gaeqlael, gee: "Xitaeq laoq ngael gaeq e Yaqyo'ae, yoqhhaeq ngaeq'ae neezae zhee lael yae."