Suqhhaq zhee loq e laqkiqhael Yesu'ae vuqduqtongq lael gil biq
2
Xi'lyul zongmae geiq fu, Yesu laoq Yoqtail milcaeq e Boqlilhenq vae dyeqlal vae. Suqhhaq zhee loq e laqkiqhael neeldu aelheiq boq ae'lye Ye'lulsa'lenq vae keellael, 2 Kaol gee: "Yoqtail cholyaeq e zongmae geiq maoqlye bogae hhei e tyutaeq haeqvae zhol hhaemaeq? Ngaeteel neeldu aelheiq boq ae'lye yoqhhaeq e aeqgeel mael mol aeqwae, kaol yoqhhaeq'ae vuqduqtongq lael gil biq lil." 3 Xi'lyul zongmae gaeq hhei biq laol, zhollihhael maeqsael myel zongl biq; Ye'lulsa'lenq milmae heeqmyel vae haelzhol cholyaeqhael eiq zhollihhael maeqsael gil biq'ae. 4 Kaol yoqhhaeq lye jilsizhangq kaol cholyaeqhael onglci e Momil e saeziq mael loq e laqkiqhael yaol gul'eeq laeq, kaol yoqhhaeteel'ae naelhaeq biq: "Jidu laoq haeqvae milcaeq vae dyeqlal maoqlye hhaemaeq?" 5 Yoqhhaeteel gee: "Yoqtail milcaeq e Boqlilhenq vae dyeqlal maoqlye hhae. Xianzhi xilnye cu deelhhei kaol'ae:6 'Yoqdal milcaeq e Boqlilhenq o!
Nol Yoqdal e milmae heeqmyelhael onglci'ae,
hhaelnil nilli maeqngeel'ae;
aeqgael noq e tyuqvae lye zongmae qiq hhaeq du'lal maoqlye hhae,
kaol ngaeq e Yiqsellyel cholyaeqhael'ae sheeqmyeq biq maoqlye kaol'ae.'"
7 Tyulkaol, Xi'lyul lye yotyel maqdumyel suqhhaq zhee loq e laqkiqhael yaol gul laeq, kaol yoqhhaeteel'ae aeqgeel tyulmael haeqfu du'lal hhaemaeq lye haelmeeqlye naelhaeq biq, 8 Kaol yoqhhaeteel yaol Boqlilhenq vae yil lye moqheilheil du hhei, gee: "Noteel yaeqguq guqyaeq tyutaeq yaol haelmeeqlye saelpo yil gil, saelpo hhei'laol ngaeq'ae geegaeq hoqlael laeq, tyulnye laol, ngael eiq yoqhhaeq'ae vuqduqtongq yil biq maoq." 9 Yoqhhaeteel zongmae e saeziq mael naelhaeq hhei'laol yil vae. Qiqlaqmyel, neeldu aelheiq ae'lye mol e aeqgeel tyulmael, yoqhhaeteel e laefuqboq'ae sheeqmyeq biq, kaol yaeqguq guqyaeq tyutaeq zhol myel milcaeq vae sheeq keelli biq laol, holtaqboq'ae za deelhhei vae. 10 Yoqhhaeteel aeqgeel tyulmael mol hhei biq laol, zhee hhaol gil biq'ae; 11 Laoqhaol vae do'li laol, yaeqguq guqyaeq kaol yoqhhaeq e aeqmae Maqlilyal yaol mol hhei biq, kaol yaeqguq tyutaeq'ae vuqduqtongq biq, pyuqjyeqjyeq e moqgoq heil do e zalba mael diqpong hhei, kaol pulsheel, ruqxiang kaol molyaol mael liqvuq geiq kaol yoqhhaeq'ae heilmoq hhei biq. 12 Hhaoqsongl yoqhhaeteel e matu onglci'ae lye Xi'lyul'ae haeq mol hoqli lye tyuqmyeq biq, tyulkaol, baeqjyelboq e gaelmae ae'lye aeqyoyoq e milcaeq vae hoqli vae.
Yoqsel kaol Maqlilyal Aijiq vae kihhaq yil
13 Yoqhhaeteel deel hhei aeqnaol, Hhaoqsongl e mqmae yosongl qiqlaqmyel matu onglci'ae lye Yoqsel'ae bi molli, gee: "Tullael, yaeqguq guqyaeq kaol yoqhhaeq e aeqmae yaol sheeq hheikaol Aijiq vae kihhaq yil, kaol ngael noq'ae zail tyuqmyeq bi fu keellye tyuqvae zholgae hhei; Xi'lyul yaeqguq guqyaeq xitaeq yaol saelpo hheikaol yoqhhaeq yaol xyeq lal maoqlye kaol'ae." 14 Yoqsel tullael vae, mqkiq mqqyemyel yaeqguq guqyaeq kaol yoqhhaeq e aeqmae yaol sheeq hheikaol Aijiq vae yil vae, 15 Kaol Xi'lyul sil fu keellye tyuqvae zhol hhae. Xilmael laoq, Hhaoqsongl laoq xianzhi ae'lye 'ngael Aijiq ae'lye ngaeq e yaqyo yaol gul du hhei aeqlil' lye haelgee e saeziq mael peqlal maoqlye hhae.
Xi'lyul lye haelnaeqmyel yaeqguq guqyaeq yaol xyeq biq
16 Xi'lyul laoq suqhhaq zhee loq e laqkiqhael lye zaqgiqgiq hhei yae lye loq li biq, kaol faqhoq guaeq'ei kei hhae, kaol yoqhhaeq laefuq suqhhaq zhee loq e laqkiqhael ae'lye naelhaeqzaeq hhei e naohaeq laoqmyel, cholyaeq yaol moqheilheil du hhei, kaol Boqlilhenq kaol dongqpyeq dongqjyel e milcaeq vae, niq hoq holhhaq e yaqyoyaeqhael gilzuqmyel xyeq byel vae. 17 Xilmael laoq Ye'lilmiq xianzhi gee e saeziq mael peqlal vae, gee:
18 "Lamaq milcaeq vae nyul sil maoqmyel nyul gil e yotyel gaeqlael,
Lajyeq yoqhhaeq e yaeqguq gae'lye nyul hhae,
haeq nyuqsaeq lye gee biq mael maeq naelhaeq nae,
yaeqguqhael maeq zhol biq vae kaol'ae."
Yoqsel kaol Maqlilyal Aijiq vae lye hoqlal
19 Xi'lyul sil hhei aeqnaol, Aijiq vae lye, Hhaoqsongl e mqmae yosongl qiqlaqmyel matu onglci'ae lye Yoqsel'ae bi molli, 20 Gee: "Yaeqguq xitaeq'ae xyeq maoqlye e cholyaeqhael sil hhei vae. Tullael, yaeqguq kaol yoqhhaeq e aeqmae yaol sheeq hheikaol Yiqsellyel milcaeq vae hoqyil." 21 Kaol Yoqsel tullael vae, yaeqguq guqyaeq kaol yoqhhaeq e aeqmae yaol sheeq hheikaol, Yiqsellyel milcaeq vae do'li. 22 Ngeelfeiq, yoqhhaeq laoq Yalji'laoq aeqyoq e aeqdae Xi'lyul e zaeqhhael mael'ae zaeqpael da'li, kaol Yoqtail milcaeq e zongmae geiq hhae lye gaeq hhei biq gae'lye, tyuqvae maq yil peq biq'ae; Hhaoqsongl matu onglci'ae lye yoqhhaeq'ae yol tyuqmyeq biq, kaol Ja'lillil milcaeq vae yil vae. 23 Yoqhhaeteel milmae heeqmyel e qiqgael vae keellael, tyuqvae laoq Naqsa'lel lye gul hhae, kaol tyuqvae zholgae hhei gil vae. Xilmael laoq, xianzhihael gee e saeziq 'yoqhhaeq'ae laoq Naqsa'lel cholyaeq lye gul biq hhae' lye mael peqlal maoqlye hhae.