Saqdanl Yesu'ae cheeqmu biq hhae
4
Tyuqfu, senllinq lye Yesu yaol diqsheelleeldye vae sheeqyil biq, kaol niqhaeq haeqmae yaol yoqhhaeq'ae bi cheeqmu hhae. 2 Yoqhhaeq maeq zaeq myel zhol mael mqkiq mqnao myel yuqqyel nao zoq wae, aeqnaol myeq li biq vae, 3 Cheeqmu e tyutaeq lael kaol yoqhhaeq'ae gee biq: "Nol Momil e Yaqyo lil lye kaollaoq, haqlo xihael zaeqzael bi peqlal." 4 Ngeelfeiq, Yesu geehoq biq: "Momil e Suqhhaq taq'ae cu deelhhei:'Cholyaeq e aeqyil dyeq gayil mael laoq zaeqzael oqlye maeqngeel'ae,
Momil e myeqbongq ae'lye duyi e saeziqhael'ae lye hhae.'"
5 Niqhaeq haeqmae lye yoqhhaeq yaol senljyeq milmae heeqmyel vae sheeq do'li biq, kaol yoqhhaeq yaol sholhaol e hhael gao myel vae bi haoqtul deelhhei, 6 Kaol yoqhhaeq'ae gee biq: "Nol Momil e Yaqyo lil lye kaollaoq, dilgae yil! Momil e Suqhhaq taq'ae xilnye cu deelhhei kaol'ae:
Aeqgael noq e aeqkeel mael haqlo mael taq'ae tongqcheeq dayil maeqhe lyekaol,
Momil noq gae'lye aeqyoyoq e mqmae yosongl'ae minllinl biq,
kaol aqlaq maellye noq'ae bi deiqtyeq deelhhei maoqlye hhae.'"
7 Yesu yoqhhaeq'ae gee biq: "Momil e Suqhhaq taq'ae yol cu deelhhei:
'Nol noq e Hhaoqsongl Momil'ae maeq hhae cheeqmu'ae.'"
8 Niqhaeq haeqmae lye yoqhhaeq yaol guaeq'ei gao e geeqzhoq qiq zhoq vae yol sheeq da'li biq, kaol milcaeq taq e halza e goqja kaol goqjahael e rongqyaol mael yoqhhaeq'ae tyuq fu hhei biq. 9 Kaol yoqhhaeq'ae gee biq: "Nol ngaeq'ae vuqduqtongq heel laeq kaollaoq, ngael xihael gilzuqmyel noq'ae heil laeqngeel." 10 Yesu gee: "Saqdanl, deeltael! Momil e Suqhhaq taq'ae xilnye cu deelhhei kaol'ae:
'Nol noq e Hhaoqsongl Momil'ae baqheel biq maoqhhae,
yoqhhaeq'ae maoqlaol vuqduq maeq hhae tongqheel'ae.'"
11 Tyulkaol, niqhaeq haeqmae laoq Yesu ae'lye deelsae hhei vae, kaol mqmae yosongl yoqhhaeq'ae nae'naemyel zhaofu lael biq.
Yesu Ja'lillil vae Momil e saeziq geegaeq
12 Yesu laoq Yoqhanl yaol ee'longl li biq vae lye gaeq hhei biq, kaol Ja'lillil'ae yil vae; 13 Aeqnaol, yoqhhaeq Naqsa'lel ae'lye deelsae hhei, kaol Jabaiqnongq vae yil kaol tyuqvae zholgae hhei. Tyuqvae milcaeq laoq eeldeel deelmae vae niq hhae, Xibullunq kaol Naqfuqta'lil milcaeq vae ngeelvae. 14 Xilmael laoq Yiqsailyal xianzhi gee e saeziq mael peqlal maoqlye hhae, gee:
15 "Xibullunq, Naqfuqta'lil milcaeq,
eeldeel deelmae cho'lomyel e gaelmae,
Yoqdanl Lolbaeq e yulboq,
baeqjyelboq minqcuq e cholyaeq e Ja'lillil milcaeq,
16 Nahongqlye vae zhol deelhhei e cholyaeqhael,
aeqcael caelmae mael mol hhei vae;
sil e caelsiq vae zhol deelhhei e cholyaeqhael'ae,
aeqcael mael yoqhhaeteel'ae cuqmol hhei biq."
17 Tyuq ae'lye aeqnaol, Yesu cholyaeqhael'ae zhoqmyel geegaeq gil biq, gee: "Mqmae Goqja niqlael vae, tyulkaol, noteel neemae paellael maoqhhae."
Yesu lye laqcaq yuq hhaeq saelpodu hhei
18 Yesu Ja'lillil e eeldeel deelmae deeljyel cho'lomyel deel fu, niq goyaeq mol hhei biq, xi niq goyaeq laoq, Biqdeq lye gul biq e Ximenq kaol yoqhhaeq e aeqnil Andeqlyel ngeelvae, tyuqfu qiqlaq'ae, eeldeel deelmae vae hhaezongl jye gil hhae; yoqhhaeteel laoq ngaeqdyel niqzaq niqzaqmyel zhol e cholyaeq'ae. 19 Yesu yoqhhaeteel'ae gee biq: "Ngaeq'ae cho'lyeq lael gil. Aeqgael, ngael noteel'ae ngaeqdyel haelnaeqmyel hhae'lael laoqmyel, cholyaeq haelnaeqmyel bi hhae'lael laeqngeel." 20 Yoqhhaeteel nae'naemyel hhaezongl mael beiqdeelsaeq, kaol yoqhhaeq'ae cho'lyeq li vae. 21 Yesu tyuqvae lye laefuqboq'ae deel du'li, kaol baeqjyelboq e niq goyaeq mol hhei biq, xi niq goyaeq laoq, Xibiqtail e yaqyo Yaqgel kaol yoqhhaeq e aeqnil Yoqhanl ngeelvae, tyuqfu qiqlaq'ae, yoqhhaeteel e aeqdae Xibiqtail nyegael hoq taq'ae hhaezongl shiltulhoq hhae, kaol Yesu yoqhhaeteel'ae yoqhhaeq'ae cho'lyeq lael lye gul biq. 22 Kaol yoqhhaeteel nae'naemyel hoq mael beiqdeelsaeq, kaol aeqdae ae'lye deelsae hheikaol Yesu'ae cho'lyeq li vae.
Yesu cholyaeqhael'ae geemyeq biq
23 Yesu Ja'lillil vae deeldyu byel vae, hae qiqgael e huiltangq vae eiq cholyaeqhael'ae geemyeq gil biq, Mqmae Goqja e fuqyin mael geegaeq gil biq, kaol cholyaeqhael'ae maeq qiqsheel e naelgol mael zonglmeeq gil biq vae. 24 Yoqhhaeq haelzonglhael Xullilyal milcaeq'ae haeqvae eiq gaeq keelyil vae. Tyuqvae cholyaeqhael lye hael nael gil biq e cholyaeq yaol Yesu e tyuqvae sheeqlaeq biq, nael biq e cholyaeqhael laoq, maeq qiqsheel e naelgol nael biq hael, niqhaeq guqzaeq li biq hael, ciqpyepye biq hael kaol ssuqhhal ae'lye maeq tullael kiq hael ngeelvae, kaol Yesu lye gilzuqmyel zonglmeeq byel biq vae. 25 Tyuqfu, haelnaeqmyel cholyaeq Ja'lillil, Diqjapo'liq, Ye'lulsa'lenq, Yoqtail kaol Yoqdanl Lolbaeq e yulboq ae'lye yoqhhaeq'ae cho'lyeq lael gil vae.