Yesu Jidu dyeqlal
2
Tyuqfu naohaeq'ae, zongmae Kaiqsa Aolguqsidu lye moqheilheil e saeziq cuga hhei e suqhhaq heil gaeyi, kaol Loqmaq dilgoq e haelzhol cholyaeqhael yaol fulkeq bi dengjil maoqlye hhae. 2 Xilmael laoq Ju'liqnyuq Xullilyal milcaeq vae zongqdu geiq fu, laefuq fuqli qiq pu fulkeq dengjil hhae. 3 Tyulkaol, cholyaeqhael haeqvae milcaeq e cholyaeq laol, haeqvae dengjil hoqyil hhae. 4 Yoqsel laoq Dalweil jacuq e cholyaeq'ae. Tyulkaol, yoqhhaeq eiq Ja'lillil milcaeq e Naqsa'lel pusiq ae'lye Yoqtail milcaeq'ae da'li, kaol Dalweil e milmae heeqmyel e Boqlilhenq lye gul myel vae keellael vae. 5 Yoqhhaeq vae biq hhei biq e Maqlilyal nyegael fulkeq qiqgael dengjil li gil hhae. Tyuqfu, Maqlilyal yaeqguqpi hhei aeqwae. 6 Yoqhhaeteel tyuqvae zhol fu, Maqlilyal yaeqguq bo e naohaeq keel wae. 7 Yoqhhaeq fuqbo yaqyo bogae hhei vae, kaol albye'ae haeqpael maellye leeltyeq hhei biq, kaol maoqzael hoqloq mael'ae ciq do deelhhei, tyuqfu, lyuqsel'ae haqhhael maqza vae kaol'ae.8 Tyu qiq nao mqkiq, tyuqvae milcaeq e aqciq hoqzaq e cholyaeq qiq miq byelcongq'ae aqciqhael fu'qyezaq hhae. 9 Hhaoqsongl e mqmae yosongl qiq hhaeq yoqhhaeteel e dongqpyeq'ae deel mol du'laq. Hhaoqsongl e rongqyaol e aeqcael mael yoqhhaeteel'ae dongqpyeq dongqjyel myel cuqmol beq hhei biq'ae. Kaol aqciq hoqzaq e cholyaeqhael zhee gu gil biq'ae. 10 Mqmae yosongl yoqhhaeteel'ae gee biq: "Maq gu gil kael! Naelhaeq gil! Ngael yaeqmeel noteel'ae zhee hhaol gae'lael aeqmyel fuqyin geegaeq gil laeqngeel, xilmael laoq gilzuqmyel cholyaeqhael'ae meeqyo'lael'ae: 11 Yaeqnao Dalweil e milmae heeqmyel vae, noteel gae'lye jiulzuq qiq hhaeq dyeqlal vae. Yoqhhaeq laoq Hhaoqsongl Jidu'ae. 12 Noteel albye qiq hhaeq hhallo maellye leeltyeq hhei aeqmyel, maoqzael hoqloq onglci'ae ssuqza deelhhei mol maoqlye hhae. Xihael laoq noteel'ae geedu biq e jilhaol mael ngeelvae." 13 Qiqlaqmyel mqmae taq'ae mqmae yosongl haelnaeq naeqmaemyel deel mol du'laq, kaol mqmae yosongl tyutaeq nyegael qiqgael Momil'ae laqma deiqqei biq, gee:
14 "Mqmae taq'ae hhaelgao gao'li vae,
rongqyaol mael Momil'ae biq biq!
Milcaeq taq'ae, neesaelhhae mael
aeqyoq hhaol e cholyaeqhael'ae yo'li biq!"
15 Mqmae yosonglhael yoqhhaeteel zaellye deelsae hheikaol mqmae'ae hoqli vae, aqciq hoqzaq e cholyaeqhael hhaellaelmyel geegaeq gil'ae, gee: "Hhaoqsongl aedeeteel'ae peqlal e silqinq mael bi loq laeq vae. Aedeeteel yaeqmeel ae'lye Boqlilhenq'ae yil kaol xilmael fu'li gil maoq!" 16 Tyulkaol, yoqhhaeteel nae'naemyel yil vae. Yoqhhaeteel Maqlilyal, Yoqsel kaol maoqzael hoqloq onglci'ae ssuqza deelhhei e albye yaol saelpopuq hhei vae. 17 Yoqhhaeteel mol hhei biq laol, mqmae yosongl yaeqguq xitaeq'ae gee e saeziq mael geegaeq du byel yil vae. 18 Haelgaeq e cholyaeqhael laoq aqciq hoqzaq e cholyaeqhael yoqhhaeteel'ae geegaeq gil biq e saeziq mael'ae gaqmaqzuq li gil biq'ae. 19 Ngeelfeiq, Maqlilyal laoq, silqinq xihael gilzuqmyel neemae mael'ae nyuqtongq deelhhei, kaol duqlye nyuq'ae. 20 Aqciq hoqzaq e cholyaeqhael hoqli vae. Yoqhhaeteel gaeq hhei biq kaol mol hhei biq e silqinq mael, mqmae yosongl yoqhhaeteel'ae geegaeq biq laoqmyel peqlal gae'lye yoqhhaeteel Momil'ae rongqyaol biq, kaol laqma deiqqei biq hhae.
21 Heiq nao keellael laol, yaeqguq'ae yeqgae gui'liq zongl biq maoqlye e naohaeq keellael vae. Maqlilyal yoqhhaeq yaol maeq pi laefuq'ae, mqmae yosongl lye yaeqguq e cholmil mael Yesu lye mil deelhhei biq aeqwae, tyulkaol, yoqhhaeteel yaeqguq'ae Yesu lye gul biq hhae.
Yesu yaol Momil e yiqsi'ae sheeqli biq
22 Moxi e lilfaq laoqmyel zonglshol e naohaeq bong lael laol, yoqhhaeteel yaeqguq yaol sheeq hhei aeqmyel Ye'lulsa'lenq'ae da'li, kaol yaeqguq yaol Hhaoqsongl e yiqsi'ae sheeqli biq maoqlye hhae. 23 Xilmael laoq, Hhaoqsongl e lilfaq taq'ae cu deelhhei laoqmyel: "Fuqbo yaqyohael laoq gilzuqmyel senljyeq wae lye Hhaoqsongl'ae biq biq maoqhhae." 24 Hhaoqsongl e lilfaq taq'ae cu deelhhei laoqmyel nulzhol haoqhaoq qiq zul, paelsilmyel haoqhaoq aelyaeq niq yaeq heelda hhei maoq wae siq.
25 Tyuqfu, Ye'lulsa'lenq vae cholmil mael Ximianl lye gul biq e cholyaeq qiq hhaeq zhol'ae. Yoqhhaeq laoq neemae qiqsiqmyel Momil'ae cho'lyeq e gongyil e cholyaeq'ae. Yoqhhaeq haeqfu eiq Yiqsellyel e haeq nyuqsaeq lye gee e qiq hhaeq'ae panlwangl deelzaeq hhei'ae. Senllinq mael yoqhhaeq nyegael qiqgael baelzhol'ae. 26 Senllinq lye Ximianl'ae yoqhhaeq maeq sil e laefuq'ae aeqdilmyel Hhaoqsongl e Miqsailyal yaol hhae mol'ae lye qiqshil hhei biq vae. 27 Yoqhhaeq'ae senllinq ganqdongl biq, kaol sholhaol vae do'li. Tyuqfu, Yesu e aeqdae aeqmae yaeqguq yaol sheeq hheikaol do'lal. Yoqhhaeteel lilfaq taq'ae cu deelhhei laoqmyel zongl maoqlye hhae. 28 Kaol Ximianl yaeqguq yaol sheeq pol hhei, kaol Momil'ae maeqdaeqhhaeq'ae lye gee biq, gee:
29 "Hhaoqsongl o! Yaeqmeel nol gee gol e saeziq mael peqlal vae.
Tyulnye laol, noq e yaqhacheqzaq e cholyaeq yaol neesaelhhae'lye bi sil laeq oq!
30 Ngaeq e ma'ne mael noq e jiul'en mael mol aeqwae.
31 Jiul'en xilmael laoq, nol milcaeq vae
haelzhol cholyaeqhael'ae laefuqmyel paeqgaelsael meeq deelhhei biq mael ngeelvae.
32 Yoqhhaeq laoq baeqjyelboq minqcuq e cholyaeq'ae qiqshil biq e aeqcael'ae,
yoqhhaeq laoq noq e Yiqsellyel cholyaeqhael e rongqyaol'ae."
33 Yaeqguq e aeqdae aeqmae laoq Yesu'ae gee e saeziq xihael gae'lye gaqmaqzuq li gil biq'ae. 34 Ximianl yoqhhaeteel'ae geeqlongq biq biq, kaol yaeqguq e aeqmae Maqlilyal'ae gee biq: "Naelhaeq! Yaeqguq xitaeq Momil lye saelpodu hhei hhae. Yoqhhaeq lye Yiqsellyel cholyaeqhael onglci e haeldyul dyulmae e cholyaeq yaol bi jye'leeq maoqlye hhae, haeldyul dyulmae cholyaeq yaol bi haoqtul deel ongla, kaol haeldyul cholyaeq lye bi geekyuq e duilxiangl peqyil maoqlye hhae. 35 Yoqhhaeq haeldyul cholyaeq e neemae onglci'ae nyuqtongq deelhhei mael bi mol du'lal maoqlye hhae. Noq e neemae eiq maejyel co laoqmyel hhae bi co ngeelvae."
36 Yalnaq lye gul biq e haeqmiyaeq qiq hhaeq zhol'ae, yoqhhaeq laoq xianzhi'ae, yoqhhaeq laoq Yalshel zhipail e Faqneillil e yaeqmiq'ae, cholhoq zhee heeq wae, haqyoyaeq nyegael qiqgael maeq bael ssuqza yo fu ae'lye mulzaeq hhae, haqyo nyegael qiqgael siq hoq zhol hhei'laol, 37 Miqchiq geiq hhae, yaeqmeel heiqqyel yuq hoq zoq wae. Yoqhhaeq laoq sholhaol ae'lye maeq deelsae gol'ae, maeq zaeq myel zhol kaol heeldoq gee, kaol mqkiq mqnao myel Momil'ae heel biq hhae. 38 Tyuqfu qiqlaq'ae, yoqhhaeq do'lal kaol Momil'ae meeqyaevae lye gee biq, kaol Ye'lulsa'lenqb mael jiul duhoq hhei biq lye panlwangl deelzaeq hhei e cholyaeqhael'ae yaeqguq xitaeq e silqinq mael geegaeq gilbiq'ae.
39 Yoqsel kaol Maqlilyal Hhaoqsongl e lilfaq laoqmyel gilzuqmyel silqinq mael zonglbyel hhei'laol, yoqhhaeteel aeqyoteel e pusiq, Ja'lillil milcaeq e Naqsa'lel pusiq'ae hoqyil vae. 40 Yaeqguq qiq nao qiq nao lye heeqda lal, qiq nao qiq nao lye aqha hhael bo lael, geel eiq zhee geel hhae. Momil e endianq mael yoqhhaeq nyegael qiqgael baelzhol'ae.
Yesu sholhaol vae laoqsihael nyegael saeziq gee'naeq
41 Haeqfu qiq hoq Yuq'yeqjyeq fu, Yesu e aeqdae aeqmae laoq Ye'lulsa'lenq'ae da'li gil'ae. 42 Yesu qyelniq hoq zoq fu, yoqhhaeteel zaeqnao e beideelhhei laoqmyel Ye'lulsa'lenq'ae da'li gil'ae. 43 Yoqhhaeteel zaeqnao zaeq du hhei'laol hoqyil fu, yaeqguq Yesu laoq Ye'lulsa'lenq vae zholdeelsaeq hhae. Ngeelfeiq, yoqhhaeq e aeqdae aeqmae laoq maeq loq biq'ae. 44 Yoqhhaeteel Yesu laoq aeqyoteel nyegael qiqgael bael deel e cholyaeqhael onglci'ae bal zoq hhae lye kei biq hhae. Gaelmae qiq nao deelhhei kaol caiq yoqhhaeteel laoq paeqyaeqhael kaol loq e cholyaeqhael zael'ae yoqhhaeq yaol saelpo tullaeq wae siq. 45 Yoqhhaeteel Yesu'ae maeq saelpopuq hhei ongl biq'ae. Tyulkaol, yoqhhaeteel Ye'lulsa'lenq'ae yoqhhaeq yaol saelpo hoqli hhae. 46 Suq nao aeqnaol fu, yoqhhaeteel sholhaol vae lye Yesu yaol mol hhei biq. Yoqhhaeq laoqsihael onglci'ae zhol deelhhei, yoqhhaeteel gee e saeziq mael naelhaeq deelhhei, kaol yoqhhaeteel'ae yulnye xilnye lye naelhaeq biq. 47 Yoqhhaeq haelgee e saeziqhael gaeq hhei biq e cholyaeqhael laoq, yoqhhaeq e geel mael kaol geehoq mael'ae gaqmaqzuq li gil biq'ae. 48 Yoqhhaeq e aeqdae aeqmae yoqhhaeq yaol mol hhei biq kaol gaqmaqzuq li gil biq'ae. Yoqhhaeq e aeqmae gee biq: "Yaeqguq o, aeqcheekaol ngaeteel'ae xilnye zongl laeq lilmaeq? Nol fu, nodae kaol ngael noq'ae haeldyul saelpo aeqwae. Ngaeteel zoqgiq kyuq yaevae." 49 Yesu yoqhhaeteel'ae gee biq: "Aeqcheekaol ngaeq'ae saelpo laeq? Noteel laoq ngael haelmillyekaol eiq ngaedae toq'ae zhol maoqhhae lye maeq loq gil laeq hhaemaeq?" 50 Ngeelfeiq, yoqhhaeteel laoq Yesu yoqhhaeteel'ae gee biq e saeziq mael, aeqchee mael'ae gee hhae lye maeq loq gil biq'ae. 51 Yesu yoqhhaeteel nyegael qiqgael bael gaeyil, kaol Naqsa'lel vae hoq keelyil vae, haeqfu eiq aeqdae aeqmae e saeziq mael naelhaeq'ae. Yoqhhaeq e aeqmae laoq silqinq xihael gilzuqmyel neemae mael'ae nyuqtongq deelhhei hhae. 52 Yesu nyeq'ei ta nyeq'ei hhael heeq lael, nyeq'ei ta nyeq'ei hhael geel lael, Momil kaol cholyaeqhael eiq yoqhhaeq'ae nyeq'ei ta nyeq'ei hhaelgaeq biq.