Yesu aeqyoq yaol laqcaq siq hhaeq'ae bi molli
21
Silqinq xihael aeqnaol'ae, Yesu laoq Tiqbiqliyal eeldeel deeljyel vae lye aeqyoyoq yaol laqcaqhael'ae yol qiq pu bi molli. Yoqhhaeq yoqhhaeteel'ae bi molli mael laoq xilnye hhae: 2 Tyuqfu, Ximenq Biqdeq, "Haeqmoq" lye gul biq e Domaq, Ja'lillil milcaeq e Ja'naq cholyaeq Naqdanl'yel, Xibiqtail e yaqyo niq nulhhaeq kaol baeqjyelboq e laqcaq niq nulhhaeq gilzuqmyel qiqgael zhol'eeq deelhhei hhae. 3 Ximenq Biqdeq yoqhhaeteel'ae gee biq: "Ngael ngaeqdyel xeiq yil maoq." Yoqhhaeteel gee: "Ngaeteel eiq noq nyegael qiqgael bal yi hhaeq." Tyulnye laol, yoqhhaeteel duyil vae, kaol hoq mael'ae da'li, ngeelfeiq, tyu qiq mil yoqhhaeteel qiqgiq maeq xeiq da hhei'ae. 4 Mqshoq fu, Yesu eeldeel deeljyel vae haoqtul deelhhei; ngeelfeiq, laqcaqhael yoqhhaeq laoq Yesu'ae lye maeq loq gil biq'ae. 5 Yesu yoqhhaeteel'ae gee biq: "Yaeqguqhael, noteel'ae ngaeqdyel za maeq?" Yoqhhaeteel geehoq biq: "Maqza'ae." 6 Yesu gee: "Hhaezongl mael hoq e laqsseqboq'ae xeiq deelhhei laol ngaeqdyel hhae'lael kiq'ae." Kaol yoqhhaeteel lye hhaezongl mael xeiq do hhei vae, ngeelfeiq, ngaeqdyel naeq li aeqkaol maeq ee da ongl gil biq'ae. 7 Yesu gaeq e laqcaq tyutaeq Biqdeq'ae gee biq: "Hhaoqsongl'ae!" Ximenq Biqdeq Hhaoqsongl'ae lye zhoq gaeq hhei'laol, nae'naemyel nildu e poljye mael dumda hhei (Tyuqfu yoqhhaeq aelhongq maeq dum hhei kaol'ae), kaol eeldeel deelmae vae dilpuq vae. 8 Baeqjyelboq e laqcaqhael deeljyel'ae niqli aeqmyel zhol hhae (Yilbeq miq laellye hhae), kaol hoq mael taq'ae zhol gil hhae, kaol hhaezongl onglci e ngaeqdyelhael eepol laeq hhae. 9 Yoqhhaeteel deeljyel vae da'li, kaol tyuqvae aeqzaeq e heqzi qiqgael doq, holtaqboq'ae laoq ngaeqdyel kaol aqba za mol hhei gil biq hhae. 10 Yesu yoqhhaeteel'ae gee gil biq: "Noteel lye geiqsu'nu xeiq da hhei e ngaeqdyel mael qiqniq yaeq heil laeq." 11 Kaol Ximenq Biqdeq hoq mael'ae da'li, kaol hhaezongl mael deeljyel'ae ee da hhei vae; hhaezongl tyulmael'ae haeqheemyel ngaeqdyel bong'lye zoq hhae, gilzuqmyel qiqhael ngaeqqyel suq (153) yaeq'ae. Ngaeqdyel naeq feiq, hhaezongl mael maq gazi hhei'ae. 12 Yesu yoqhhaeteel'ae gee biq: "Noteel lael, kaol mqshoq e aelhoq zaeq lael gil." Laqcaqhael onglci'ae "nol aeqsul lilmaeq" lye qiq hhaeq eiq yoqhhaeq'ae maeq naelhaeq peq biq'ae, yoqhhaeteel laoq yoqhhaeq Hhaoqsongl'ae lye loq biq kaol'ae. 13 Yesu deel du'laq, kaol aqba mael yoqhhaeteel'ae heilmoq hhei biq, ngaeqdyel mael eiq yoqhhaeteel'ae tyulnye heilmoq hhei biq. 14 Xilmael laoq Yesu cholsil onglci ae'lye dyeqhoqlal aeqnaol'ae, dilsan cil laqcaqhael'ae bi molli hhae.Yesu Biqdeq'ae suq pu naelhaeq biq
15 Yoqhhaeteel mqshoq e aelhoq zaeq hhei'laol, Yesu Ximenq Biqdeq'ae naelhaeq biq: "Yoqhanl e yaqyo Ximenq, nol ngaeq'ae gaeq laeq mael xihael taq'ae hhael naeq maeq?" Yoqhhaeq geehoq biq: "Hhaoqsongl o, ngeel'ae, nol laoq ngael noq'ae xiqhuan'ae lye loq'ae." Yesu gee biq: "Nol laoq ngaeq e aqciq ciqyaeqhael'ae cu biq." 16 Yesu yoqhhaeq'ae yol qiq pu naelhaeq biq: "Yoqhanl e yaqyo Ximenq, nol ngaeq'ae gaeq laeq lilmaeq?" Yoqhhaeq geehoq biq: "Hhaoqsongl o, ngeel'ae, nol ngael noq'ae xiqhuan'ae lye loq'ae." Yesu gee: "Nol laoq ngaeq e aqciq ciqyaeqhael'ae hoqzaq biq." 17 Yesu yoqhhaeq'ae dilsan cil naelhaeq biq: "Yoqhanl e yaqyo Ximenq, nol ngaeq'ae gaeq laeq lilmaeq?" Biqdeq laoq Yesu dilsan cil yoqhhaeq'ae "nol ngaeq'ae gaeq laeq lilmaeq" lye naelhaeq gae'lye nyuqsaeq li biq, kaol Yesu'ae naelhaeq biq: "Hhaoqsongl o, nol laoq maeq loq myel qiqgiq maqza'ae, nol laoq ngael noq'ae xiqhuan'ae lye loq'ae." Yesu gee: "Nol ngaeq e aqciqhael'ae cu biq. 18 Ngael aeqdilmyel noq'ae geegaeq laeqngeel, nol aqha bo siq fu, aeqyoyoq haeqpi paqda hhei, kaol haeqvae yil goq laol haeqvae hha yil'ae; ngeelfeiq, yaeqmoqmoq lael fu laoq, nol aqlaq tyuqdu hhei, kaol ochoq lye noq yaol kaltoq maoqlye hhae, kaol nol maq yil goq myel milcaeq'ae sheeqyil laeq maoqlye hhae." 19 Yesu saeziq xilmael gee mael laoq, Biqdeq aeqgael haelmillye hhae sil maellye Momil'ae rongqyaol maoqlye mael geedu hhae. Saeziq xilmael gee hhei'laol, Biqdeq'ae gee biq: "Nol ngaeq'ae cho'lyeq lael!"
Yesu gaeq biq e laqcaq tyutaeq
20 Biqdeq zipol hoqlael, kaol Yesu gaeq biq e laqcaq tyutaeq cho'lyeq deelhhei mol hhei biq, xitaeq laoq mqkiq aelhoq zaeq fu, Yesu e neeto oheiq'ae leeqmaoq deelhhei, kaol "Hhaoqsongl o, noq yaol yotyel maqdumyel ongqzaeq e qiq hhaeq laoq aeqsul maeq?" lye naelhaeq e tyutaeq ngeelvae. 21 Biqdeq yoqhhaeq yaol mol hhei'laol, Yesu'ae naelhaeq biq: "Hhaoqsongl o, cholyaeq xitaeq aeqgael haelmillye hhaemaeq?" 22 Yesu yoqhhaeq'ae geehoq biq: "Ngael yoqhhaeq yaol ngael keellael fu keellye bi dyeqdeel maoqlye kaollaoq, noq'ae maeq bael guanq yo'ae. Nol ngaeq'ae cho'lyeq laol hhaeq vae!" 23 Tyulkaol, saeziq xi qiq doq laoq aqsseq aeqnilhael onglci'ae geegaeq duyil vae, laqcaq tyutaeq maeq sil yilkiq'ae lye gee gil'ae. Qiqshiq laoq, Yesu yoqhhaeq'ae yoqhhaeq maeq sil yilkiq'ae lye maeq gee biq'ae, "ngael yoqhhaeq yaol ngael keellael fu keellye bi dyeqdeel maoqlye kaollaoq, noq'ae maeq bael guanq yo'ae" lye gee dyul wae.
24 Silqinq xihael bal zoqzenl kaol silqinq xihael cuga hhei e qiq hhaeq laoq laqcaq xitaeq ngeelvae; ngaeteel yoqhhaeq e zoqzenl mael laoq aeqdilmyel hhae lye loq lil.
25 Yesu haelzongl e silqinqhael laoq, baeqjyelboq'ae haelnaeqmyel za siq; gilzuqmyel qiq mal qiq mal lye cuga hhei kaollaoq, ngael nyuq laoq, cu du hhei e suqhhaq mael laoq milcaeq xilmael taq vae eiq maq zadyel'ae.