Biqdeq lye keeldil yaol zonglmeeq biq
3
Xalvuq sandianq heeldoq gee e shiqshen fu, Biqdeq kaol Yoqhanl sholhaol vae da'li. 2 Dyeqlal fu ae'lye aeqkeel maq dyeq e qiq hhaeq yaol cholyaeqhael lye baq laq biq. Yoqhhaeteel lye yoqhhaeq yaol naochomyel Zhigaq Oheiq lye gul e sholhaol e oheiq qiqgael vae baqdeel hhei biq, kaol yoqhhaeq yaol sholhaol vae do'lal e cholyaeqhael'ae bi saelzaeq. 3 Yoqhhaeq laoq Biqdeq kaol Yoqhanl sholhaol vae do'li maoqlye zongl mol hhei biq, kaol yoqhhaeteel'ae saelzaeq biq. 4 Biqdeq kaol Yoqhanl yoqhhaeq'ae deelhae'lye chifu biq, Biqdeq gee: "Nol ngaeteel'ae chifu!" 5 Tyutaeq yoqhhaeteel'ae deelhae'lye chifu deelhhei, kaol yoqhhaeteel ae'lye aeqchee hhamul maeq lye chifuzaeq hhae. 6 Ngeelfeiq, Biqdeq gee: "Ngaeq'ae pulziq pulsheel maqza, ngeelfeiq, ngaeq'ae za mael noq'ae heil laeqngeel: Ngael Naqsa'lel cholyaeq Yesu Jidu e cholmil maellye noq'ae gaelmae deel lye moqheilheil lil!" 7 Tyulkaol, Biqdeq yoqhhaeq e laqsseq mael'ae cheel hheikaol cheeltul hhei biq; yoqhhaeq e aeqkeel mael kaol zaqneq e saeq'yuq mael, qiqlaqmyel aqhabo lael biq vae, 8 Kaol yoqhhaeq dilqei lael, haoqtul deelhhei, kaol gaelmae deel vae. Yoqhhaeq gaelmae yul'ae deel laol yul'ae dilqei hhae, kaol Momil'ae laqma deiqqei biq, kaol yoqhhaeteel nyegael hhaellaelmyel sholhaol vae bal do'li vae. 9 Cholyaeqhael yoqhhaeq yul'ae deel laol yul'ae Momil'ae laqma deiqqei biq mol hhei biq; 10 Kaol yoqhhaeteel yoqhhaeq laoq haeqfu eiq sholhaol e Zhigaq Oheiq vae, saelzaeq e qiq hhaeq'ae lye fudu hhei vae, kaol yoqhhaeq'ae puqli biq mael'ae qiqguail biq, kaol gaqmaqzuq li gil biq'ae.Biqdeq Soqloqmenq zouqlangq vae geemyeq gil biq mael
11 Tyutaeq laoq Biqdeq kaol Yoqhanl'ae cheelcaq hhei fu, cholyaeqhael laoq gaqmaqzuq li gil biq, kaol yoqhhaeteel tyuqvae ki keelli, Soqloqmenq zouqlangq lye gul e holhhaq vae ngeelvae. 12 Biqdeq mol hhei'laol cholyaeqhael'ae gee biq: "Yiqsellyel cholyaeqhael o, aeqcheekaol xilmael gae'lye gaqmaqzuq gil laq hhaemaeq? Aeqcheekaol ngaeteel'ae deelhae'lye chifu laeq, ngaeteel laoq aeqyoyoq e onglzaeq mael, kaol neemae qiqsiqmyel Momil'ae cho'lyeq gae'lye, cholyaeq xitaeq yaol gaelmae bi deel hhae lye kei gil laeq hhaemaeq? 13 Aedeeteel e aeqpyuq aeqdae Yalboqlahanl, Yiqsaq, Yaqgel e Momil lye yoqhhaeq e yaqhacheqzaq e cholyaeq Yesu'ae rongqyaol bi za. Yesu xitaeq laoq noteel lye zhiqmoq'ae eemoq biq. Biqlado yoqhhaeq yaol pyeqduhoq goq biq hhae, ngeelfeiq, noteel laoq Biqlado yiqsi ae'lye yoqhhaeq yaol maq mul biq. 14 Noteel laoq senljyeq kaol gongyil e Yesu yaol maq mul biq, kaol Biqlado'ae cholyaeq xyeq yo e qiq hhaeq yaol pyeqduhoq hhei laq lye geezaeq biq. 15 Noteel lye 'aeqyil zonglbeibei du e qiq hhaeq' yaol xyeq vae, ngeelfeiq, Momil lye yoqhhaeq yaol cholsil onglci ae'lye bi dyeqhoqlal. Ngaeteel laoq xilmael bael mol e cholyaeq lil. 16 Yoqhhaeq e cholmil mael'ae xiangxinl gae'lye, yoqhhaeq e cholmil lye noteel mol kaol loq e xitaeq yaol aqha bi bo hoqlael vae. Yoqhhaeq lye biq hhei e xinlxin gae'lye, xitaeq yaol cholyaeqhael e yiqsi ae'lye bi meeqshol yil vae. 17 Algo aeqnilhael o, ngael laoq noteel zongl mael noteel maeq siqcongl biq kaol'ae lye loq lil, noteel e zhiqmoqhael eiq xilnye ngeelvae. 18 Ngeelfeiq, Momil laoq xianzhihael e myeqbongq ae'lye, yoqhhaeq lye saelpodu hhei e Yesu Jidu laoq aeqgael hhae sil hhae lye mael yotyel ha'lye geedu hhei, kaol xilnye peqlal vae. 19 Tyulkaol, noteel laoq neemae paellael kaol Momil boq'ae polhoqlael maoqhhae, tyulnye laol, noteel e golsiq mael hhae bi deiqgiq gae hhei wae. 20 Tyulnye laol, zholsael e naohaeq laoq Hhaoqsongl yiqsi ae'lye keellael, kaol yoqhhaeq lye noteel'ae laefuqmyel saelpodu deelhhei biq e Jidu Yesu yaol moqheilheil du hhei. 21 Yoqhhaeq aeqdilmyel mqmae'ae zholdeelsaeq, kaol halza haelzholhael laefuq laoqmyel bi peqhoqlal fu keellye, Momil yilkae aeqnao ae'lye senljyeq xianzhihael e myeqbongq maellye gee gol e saeziq mael ngeelvae. 22 Moxi gee gol: "Hhaoqsongl laoq noteel e Momil ngeelvae, yoqhhaeq noteel e aqsseq aeqnilhael onglci ae'lye ngael laoqmyel e xianzhi qiq hhaeq bi tullael maoqlye hhae; yoqhhaeq noteel'ae aeqchee gee laeq feiq, noteel aeqdilmyel naelhaeq maoqhhae. 23 Aeqsul xianzhi yultaeq e saeziq mael'ae maeq naelhaeq kaollaoq, cholyaeqhael onglci ae'lye zonglmye hhei. 24 Samuq'eq ae'lye mael, aeqnaol du'lal e peqlal maoqlye mael gee gol e xianzhihael, gilzuqmyel naohaeq xihael yotyel ha'lye geedu hhei gol vae. 25 Noteel laoq xianzhihael e yuqpaeq yuqnyulhael'ae, Momil noteel e aeqpyuq aeqdae nyegael geemeeq deelhhei mael eiq hhamul e cholyaeq'ae. Momil Yalboqlahanl'ae gee gol biq: 'Milcaeq taq e gilzuqmyel minqcuqhael noq e houldail gae'lye geeqlongq meeq vae.' 26 Momil lye aeqyoq e yaqhacheqzaq e cholyaeq yaol bi tullael, kaol yoqhhaeq yaol laefuqmyel noteel saeqvae moqheilheil du hhei, kaol noteel'ae geeqlongq bi biq, kaol noteel aeqsul eiq polhoqlael, kaol noteel e duqlaq e gaelmae ae'lye deelsae maoqhhae."