Biqdeq kaol Yoqhanl'ae Yoqtail Yilhuil vae lye heqnaelhaeq biq
4
Biqdeq kaol Yoqhanl cholyaeqhael'ae saeziq geegaeq gil biq fu, jilsihael, heelhaol vae fu'qyezaqhael e yoheeq kaol Saqdugai cholyaeqhael qiqlaqmyel yoqhhaeteel tyuqvae keellael. 2 Shiqtuqhael cholyaeqhael'ae geemyeq gil biq dyul maeqcilmyel, Yesu sil myel ae'lye dyeqhoqlal mael eiq gulgaeq gil biq, tyulkaol, yoqhhaeteel zhee hol gil biq'ae, 3 Kaol shiqtuqhael yaol ee'longl gil biq. Tyuqfu laoq mqkiq wae, kaol yoqhhaeteel yaol aeqnaol qiq nao'ae koqlongl keel biq. 4 Ngeelfeiq, bael gaeq e cholyaeqhael onglci'ae haeldyul dyulmae cholyaeq xiangxinl vae, haqyoyaeq e sulmuq ngaeqca (5000) hhaeq zoqlal maoqmyel hhae.5 Dil'el tian, Yoqtail cholyaeqhael e yoheeqhael, zhangqlaoqhael kaol Momil e saeziq mael loq e laqkiqhael gilzuqmyel Ye'lulsa'lenq vae zhol'eeq deelhhei, 6 Kaol daljilsi Yalnaq kaol Gaiyalfaq, Yoqhanl, Yallilshandal kaol daljilsi toq e cholyaeqhael gilzuqmyel tyuqvae baelzhol hhae. 7 Yoqhhaeteel shiqtuqhael'ae onglci vae haoqtul deelhhei gil lye gee biq, kaol naelhaeq gil biq: "Noteel aeqchee onglzaeq maellye, kaol aeqsul e cholmil maellye xilmael zongl gil lilmaeq?" 8 Tyuqfu, Biqdeq vae laoq senllinq mael bong'lye za, kaol yoqhhaeteel'ae gee biq: "Cholyaeqhael e zhiqmoqhael kaol zhangqlaoqhael o! 9 Yaeqnao ngaeteel'ae heqnaelhaeq gil laeq mael laoq, ngaeteel lye aeqkeel maq dyeq e tyutaeq yaol zonglmeeq biq e, meeq e zongl xilmael gae'lye kaollaoq, 10 Aelmaol, noteel kaol Yiqsellyel cholyaeqhael gilzuqmyel loq maoqhhae, noteel yiqsi'ae haoqtul deelhhei e xitaeq laoq Naqsa'lel cholyaeq Yesu Jidu e cholmil gae'lye meeqshol yil aeqwae. Yesu Jidu laoq noteel lye shiqziljal'ae diqcheeq biq, Momil lye cholsil onglci ae'lye bi dyeqhoqlal tyutaeq ngeelvae. 11 Xitaeq laoq:
'Noteel laoqhaol cuzaq e cholyaeqhael lye beiqgae e haqlo'ae,
congqciq paeqhhael e hhal mulyo e haqlo peqlal vae.'
12 Yoqhhaeq maoqlaol, jiul ongl e qiq hhaeq eiq maeq zhol'ae, mqmae holhhaq vae cholyaeqhael'ae baeqjyelboq e cholmil maq biqga hhei biq'ae, tyulkaol, aedeeteel laoq Yesu e cholmil maellye maoqlaol maq hha deqjiul'ae. 13 Yoqhhaeteel Biqdeq kaol Yoqhanl neemae bozaeq'ae lye mol hhei gil biq, cholyaeq xi niq nulhhaeq laoq suqhhaq maeq loq e cholyaeq'ae lye eiq loq'ae, kaol gaqmaq zhee zuq li gil biq hhae; kaol yoqhhaeteel laoq Yesu nyegael qiqgael baelzhol gol hhae lye fuduzaq hhei'ae; 14 Kaol meeqhoqlael biq e tyutaeq eiq yoqhhaeteel nyegael qiqgael haoqtul deelhhei mol hhei gil biq laol, qiqgiq maeq geecaqda hoqli ongl biq vae, 15 Tyulkaol, yoqhhaeteel'ae Yoqtail Yilhuil nilduboq'ae duyil lye moqheilheil biq, kaol hhaellaelmyel geedazaq gil'ae, 16 Gee: "Yoqhhaeteel lye aeqsul eiq loq e shenqjiq qiq mal zongl du hhei. Ye'lulsa'lenq vae haelzhol cholyaeqhael gilzuqmyel bael loq, aedeeteel eiq maeqngeel'ae lye maeq hhae gee'ae, aelmaol, aedeeteel cholyaeq xihael'ae haelmillye zongl biq laeq? 17 Ngeelfeiq, xilmael cholyaeqhael onglci'ae maeq hhael bi geegaeq duyil lyekaol, aedeeteel yoqhhaeteel'ae xitaeq e cholmil gae'lye yo'liq maeq hhae geemyeq'ae lye hagu gil biq maoq."
18 Tyulkaol, yoqhhaeteel yaol gul laeq, kaol yoqhhaeteel'ae Yesu e cholmil gae'lye cholyaeqhael'ae maeq hhae geemyeq vae lye gee gil biq. 19 Biqdeq kaol Yoqhanl geehoq gil biq: "Noteel gee mael'ae naelhaeq, Momil gee mael'ae maeq naelhaeq, Momil e yiqsi ae'lye hoq maeq maq hoq maeq lye noteel aeqyoyoq panlduanl gil. 20 Ngaeteel haelgaeq haelmol mael maeq gee maeq hhaeq'ae!" 21 Cholyaeqhael hal peqlal mael gae'lye gilzuqmyel Momil'ae laqma deiqqei gil biq'ae, tyulkaol, zhiqmoqhael laoq cholyaeqhael gae'lye, kaol yoqhhaeteel'ae chenqfaq biq mael eiq maeq saelpopuq hhei ongl gil biq gae'lye, hagu biq laol yoqhhaeteel yaol pyeqduhoq biq vae. 22 Shenqjiq gae'lye meeqhoqlael biq e tyutaeq laoq yuqqyel hoq ongqjyeq zoq wae.
Laqcaqhael Hhaoqsongl'ae aqha biq laq lye geezaeq biq
23 Biqdeq kaol Yoqhanl yaol zhiqmoqhael lye pyeqduhoq hhei biq aeqnaol'ae, aeqyoteel e cholyaeqhael e tyuqvae hoqyil gil, kaol jilsizhangqhael kaol zhangqlaoqhael gee e saeziq mael gilzuqmyel yoqhhaeteel'ae geegaeq hhei gil biq vae. 24 Yoqhhaeteel gaeq hhei'laol, yotyel ha'lye neemae qiq siq laoqmyel Momil'ae gee biq: "Hhaoqsongl o, nol laoq mqmae milcaeq, eeldeel deelmae kaol xihael onglci e halza haelzholhael zongldu hhei e tyutaeq'ae. 25 Nol senllinq maellye, noq e yaqhacheqzaq e ngaeteel e aeqpyuq aeqdae Dalweil e myeqbongq ae'lye bi gee gol:
"Goqjahael aeqcheekaol hol biq kaol gul bonggaebyel hhaemaeq?
Haelzhol e cholyaeqhael aeqcheekaol qiqgiq yilsi maqza myel mael'ae nyuqzaeq gil hhaemaeq?
26 Milcaeq taq e zongmaehael gilzuqmyel tullael,
kaol yoheeqhael qiqgael zhol'eeq deelhhei gil hhae,
Hhaoqsongl'ae kaol gaoyouq xyecheeq hhei biq e qiq hhaeq'ae diqqye gil biq maoqlye hhae.'
27 Xi'lyul, Benqdiu Biqlado, baeqjyelboq minqcuq e cholyaeqhael kaol Yiqsellyel cholyaeqhael aeqdilmyel gilzuqmyel saeqvae milmae heeqmyel'ae zhol'eeq deelhhei gil'ae, kaol noq lye gaoyouq xyecheeq hhei biq e senljyeq yaqhacheqzaq e Yesu'ae diqqye biq, 28 Kaol noq e laqtaqa kaol noq e zhiqyil lye laefuqmyel gee deelhhei mael zongl vae. 29 Hhaoqsongl o, nol fu, yoqhhaeteel ngaeteel'ae hagu laq hhae, yaeqmeel noq e yaqhacheqzaq e cholyaeqhael'ae neemae bozaeq mael biq hhei laq, kaol noq e saeziq mael geegaeq gil biq lil. 30 Noq e aqlaq mael tyuqdu hhei, kaol zonglmeeq, kaol noq e senljyeq yaqhacheqzaq e cholyaeq Yesu e cholmil maellye, shenqjiq kaol maeqdaeqhhaeq e silqinq zongldu beq hhei lye geezaeq lil." 31 Yoqhhaeteel heeldoq gee byel hhei'laol, yoqhhaeteel zhol'eeq deelhhei e milcaeq vae ssu'ni tullaeq'ae, yoqhhaeteel'ae senllinq mael bong'lye za, kaol qiqgiq maq gu za myel Momil e saeziq mael geegaeq gil biq.
Moqgoqhael hhaellaelmyel qiqgael mul gil
32 Yesu'ae xinlzaeq e cholyaeqhael laoq neemae qiqsheel laoqmyel hhae, kaol aeqyoq e halza haelzholhael aeqyoq lil lye qiq hhaeq eiq maeq gee'ae, kaol yoqhhaeteel moqgoqhael hhaellaelmyel qiqgael mul gil hhae. 33 Shiqtuqhael onglzaeq mael za, kaol Hhaoqsongl Yesu e dyeqhoqlal mael bael mol lil lye gee gil'ae, kaol cholyaeqhael gilzuqmyel geeqlongq meeq vae. 34 Yoqhhaeteel onglci'ae maq mulloq biq e qiq hhaeq eiq maeq zhol'ae, aeqsul eiq haeldye kaol laoqhaol mael gilzuqmyel ongqzaeq byel hhei, kaol hhae'lael e dyuqbaqhael heil laeq, 35 Kaol shiqtuqhael'ae heilmoq hhei biq, kaol aeqsul'ae haeldyul mulyo biq laol haeldyul byel gil biq kaol'ae. 36 Yoqsel lye gul biq e cholyaeq qiq hhaeq zhol'ae, shiqtuqhael laoq yoqhhaeq'ae Ba'naqba lye gul gil biq hhae, Ba'naqba laoq "haeq nyuqsaeq lye gee e qiq hhaeq" lye yilsi'ae, yoqhhaeq laoq Sailpuqlulsi ae'lye dyeqlal e Lilveil cholyaeq'ae. 37 Yoqhhaeq aeqyoq e haeldyehael ongqzaeq hhei e dyuqbaqhael heil laeq, kaol shiqtuqhael'ae heilmoq hhei biq vae.