Yalnaqniqyal kaol Safei'la e guqjin
5
Yalnaqniqyal lye gul biq e cholyaeq qiq hhaeq zhol'ae, yoqhhaeq kaol haeqmiq Safei'la haeldye mael ongqzaeq hhei. 2 Yoqhhaeq lye ochoq'ae maeq bi loq myel dyuqbaq teel heildeelzaeqsaeq, yoqhhaeq e haeqmiq eiq xilmael bael loq'ae. Yoqhhaeq lye baeqjyelboq e dyuqbaqhael heillaeq kaol shiqtuqhael'ae heilmoq hhei biq. 3 Biqdeq gee: "Yalnaqniqyal o! Aeqcheekaol Saqdanl noq e neemae onglci'ae bong'lye zhol, kaol noq yaol senllinq mael'ae zaqgiq bi giq, kaol ochoq'ae maeq bi loq myel haeldye ongqzaeq e dyuqbaq mael teel heildeelzaeqsaeq lilmaeq? 4 Haeldyehael maeq ongqzaeq fu laoq noq e maeqngeel maeq? Ongqzaeq hhei vae laol, dyuqbaq mael nol hhae guanq maeqngeel maeq? Nol neemae onglci'ae aeqcheekaol xilnye zongl maoqlye nyuq lilmaeq? Nol cholyaeq'ae zaqgiqgiq biq maeqngeel'ae, Momil'ae zaqgiqgiq biq hhae." 5 Yalnaqniqyal saeziq xilmael zhoq gaeq hhei biq laol oqbaq jyebaq hheikaol saeq'ol qye'li vae. Kaol bael gaeq e cholyaeqhael gilzuqmyel zhee gu li gil biq'ae. 6 Yaqyoyaeq qiqniq nulhhaeq lye, yoqhhaeq yaol leel meeq hhei'laol baq duyil kaol baqduqm biq vae.7 San gol xiaoqshiq laellye gol hhei'laol, Yalnaqniqyal e haeqmiq do'lal, aeqchee peqlal hhae lye maeq loq biq wae siq. 8 Biqdeq yoqhhaeq'ae naelhaeq biq: "Nol ngaeq'ae geegaeq laeq, noteel haeldye ongqzaeq hhei e dyuqbaq mael xuldyul wae maeq?" Yoqhhaeq gee: "Ngeel'ae, xuldyul ngeelvae." 9 Biqdeq gee: "Noteel aeqcheekaol qiqsheel laoqmyel Hhaoqsongl e yohael mael'ae shilfu gil lilmaeq? Nol fu, noq e haqyo yaol baqduqm e cholyaeq e aeqkeel mael oheiq'ae keellael vae, yoqhhaeteel noq yaol eiq baq duyil maoqlye hhae." 10 Yoqhhaeq qiqlaqmyel Biqdeq e aeqkeel dongqpyeq vae oqbaq jyebaq hheikaol saeq'ol qye'li vae. Yaqyoyaeq tyuhael do'lal laol, yoqhhaeq sil vae lye mol hhei gil biq, kaol yoqhhaeq yaol baq duyil kaol yoqhhaeq e haqyo dongqpyeq'ae baqduqm biq vae. 11 Jiaolhuil cholyaeqhael kaol xilmael bael gaeq e cholyaeqhael gilzuqmyel zhee gu li gil biq'ae.
Shiqtuqhael lye shenqjiq kaol maeqdaeqhhaeq e silqinq zongl du hhei
12 Hhaoqsongl laoq shiqtuqhael e aqlaq ae'lye cholyaeqhael onglci'ae shenqjiq kaol maeqdaeqhhaeq e silqinq haelnaeqmyel zongl du hhei. Yoqhhaeteel neemae qiq siq laoqmyel Soqloqmenq zouqlangq vae zhol'eeq deelhhei lael gil'ae, 13 Baeqjyelboq e cholyaeqhael qiq hhaeq eiq yoqhhaeteel'ae maeq niqli peq biq'ae, ngeelfeiq, cholyaeqhael gilzuqmyel yoqhhaeteel'ae zunjinl biq'ae. 14 Hhaoqsongl'ae xiangxinl e haeqmiyaeq kaol haqyoyaeq nyeq'ei hhael naeqlael'ae, 15 Tyulnye maeqcilmyel, cholyaeqhael lye cholnael yaol ssuqhhal kaol zashe taq'ae baqda hhei aeqmyel gaiziq'ae baqdeel laeq biq, kaol Biqdeq deelpol duyil fu, aelbillaelbael mael cholnaelhael e aeqhhaol taq'ae bi loq dayi kaol'eiq hhaeq lye nyuq gil biq hhae. 16 Ye'lulsa'lenq dongqpyeq dongqjyel e milmae heeqmyel e cholyaeqhael laoq, cholnaelhael kaol maeqshol e yohael guqzaeq li biq e cholyaeqhael sheeq hhei myel lael beq lal gil'ae, kaol cholyaeq xihael gilzuqmyel meeq byel yil biq vae.
Shiqtuqhael yaol koqlongl biq
17 Daljilsi kaol yoqhhaeq boq e Saqdugai cholyaeqhael gilzuqmyel tullael, kaol neemae onglci'ae neemasu zaq bonggaebyel'ae, 18 Tyulkaol, shiqtuqhael yaol deiqtyeq biq, kaol yoqhhaeteel yaol cholyaeq koqlongl e laoqhaol vae koqlongl biq. 19 Mqkiq'ae Hhaoqsongl e mqmae yosongl qiq hhaeq lye laoqgaiqkei laoqhaol oheiq mael diqpong hhei, kaol yoqhhaeteel yaol sheeq duyi, gee: 20 "Noteel yil gil, kaol sholhaol vae haoqtul deelhhei gil, gilzuqmyel aeqyil e saeziq xihael cholyaeqhael'ae geegaeq hhei gil biq."
21 Shiqtuqhael mqmae yosongl e saeziq mael naelhaeq hhei'laol, mqbaebae lael maoq fu sholhaol vae do'li kaol geemyeq gil biq. Daljilsi kaol yoqhhaeq boq e cholyaeqhael keellael vae, Yoqtail Yilhuil e cholyaeqhael, kaol Yiqsellyel e zhangqlaoqhael gul'eeq laeq, kaol cholyaeq yaol laoqgaiqkei laoqhaol ae'lye shiqtuqhael yaol sheeq duyi lye moqheilheil du hhei. 22 Cholyaeq ee'longl e cholyaeq laoq laoqgaiqkei laoqhaol vae keellael vae, yoqhhaeteel yaol maeq saelpopuq hhei'ae, kaol geehoqlael biq: 23 "Ngaeteel laoqgaiqkei laoqhaol oheiq mael haelmeeqlye piqtyeq deelhhei mol aeqwae, fu'qyezaqhael eiq oheiq nildu'ae fu'qye deelhhei hhae; oheiq pong hhei'laol, onglci'ae cholyaeq qiq hhaeq eiq maeq zhol'ae." 24 Heelhaol vae fu'qyezaqhael e yoheeq kaol jilsizhangqhael saeziq xihael gaeq hhei biq laol, maeq nyuq byel ongl myel nyuq gil biq, aeqgael xilmael haelmillye peqyil hhei maeqhe lye maeq loq biq'ae. 25 Tyuqfu qiqlaq'ae, qiqlaqmyel cholyaeq qiq hhaeq geehoqlael, gee: "Noteel lye laoqgaiqkei laoqhaol'ae koqlongl deelhhei e cholyaeqhael, yaeqmeel sholhaol onglci vae haoqtul deelhhei kaol cholyaeqhael'ae geemyeq gil biq hhae!" 26 Tyulkaol, heelhaol'ae fu'qyezaqhael e yoheeq kaol cholyaeq ee'longl e cholyaeqhael yil, kaol shiqtuqhael yaol sheeqlaeq, ngeelfeiq, maeq tyel biq'ae, cholyaeqhael haqlo maellye yoqhhaeteel'ae beiq lael maeqhe lye gu gil biq kaol'ae.
27 Yoqhhaeteel lye shiqtuqhael yaol sheeqlaeq laol, Yoqtail Yilhuil vae bi haoqtul deelhhei. Daljilsi yoqhhaeteel'ae naelhaeq gil biq: 28 "Ngaeteel noteel'ae aeqlyeq maeq lyeq myel cholmil xilmael lye maeq hhae geemyeq'ae lye moqheilheil gol biq wae, ngeelfeiq, noteel lye noteel e yo'liq mael Ye'lulsa'lenq vae geegaeq byel vae, xitaeq yaol xyeq biq e golsiq mael ngaeteel'ae baqcheeq hhei maoqlye zongl hhae." 29 Biqdeq kaol shiqtuqhael yoqhhaeteel'ae geehoq biq: "Ngaeteel Momil e saeziq mael'ae naelhaeq, cholyaeq e saeziq mael'ae maeq naelhaeq mael laoq, aeqdilmyel hoq hhae. 30 Noteel lye shiqziljal mael'ae diqcheeq hheikaol xyeqsil biq e Yesu laoq, aedeeteel e aeqpyuq aeqdae e Momil lye yoqhhaeq yaol bi dyeqhoqlal vae. 31 Momil lye yoqhhaeq yaol aeqyoyoq e laqsseqboq'ae ee da'li biq, zongmae kaol jiulzuq bi geiq, xilnye laol, Yiqsellyel cholyaeqhael neemae hhae bi paellael, kaol yoqhhaeteel e golsiq mael hhae bi shelmianq wae. 32 Ngaeteel xilmael gae'lye zoqzenl lil, kaol Momil lye yoqhhaeq e saeziq mael'ae naelhaeq e cholyaeqhael'ae biq hhei biq e senllinq mael eiq, xilmael gae'lye bal zoqzenl hhae."
33 Yoqtail Yilhuil e cholyaeqhael gaeq hhei biq laol zhee hol gil biq, kaol yoqhhaeteel yaol xyeq goq biq hhae. 34 Ngeelfeiq, Jamaqlyel lye gul biq e Faqlilsail cholyaeq qiq hhaeq zhol'ae, yoqhhaeq laoq cholyaeqhael zunjinl biq e lilfaq mael loq e laqkiq'ae. Yoqhhaeq Yoqtail Yilhuil vae lye haoqtul lael, kaol cholyaeq'ae shiqtuqhael yaol nildu vae qiqlaq sheeqsae yil lye moqheilheil biq, 35 Aeqnaol cholyaeqhael'ae gee biq: "Yiqsellyel cholyaeqhael o, noteel cholyaeq xihael'ae haelmillye zongl biq maoqlye mael, aeqyae'lye kei maoqhhae. 36 Yilkaeaeqnao, Duldaq lye gul biq e cholyaeq qiq hhaeq zhol'ae, aeqchee eiq onglzaeq lil lye zongl hhae, yoqhhaeq'ae cho'lyeq e cholyaeq yuqhael (400) hhaeq zoqlal maoqmyel hhae. Yoqhhaeq yaol xyeq biq laol, yoqhhaeq'ae cho'lyeq e cholyaeqhael kisae byel vae, kaol qiqgiq maeqngeel myel peqyil vae. 37 Xitaeq aeqnaol'ae, fulkeq dengjil gil fu, Yoqdal lye gul biq e Ja'lillil cholyaeq qiq hhaeq zhol'ae. Yoqhhaeq laoq cholyaeqhael'ae yoqhhaeq'ae cho'lyeq lael lye cheeqmu gil biq. Aeqnaol yoqhhaeq eiq sil vae, kaol yoqhhaeq'ae cho'lyeqhael kisae byel vae. 38 Yaeqmeel peqlal e silqinq mael laoq, ngael noteel'ae cholyaeq xihael vae haeq guanq lye haelmeeqlye gee lil, yoqhhaeteel aeqchee zongl zongl biq! Zongl maoqlye nyuqmeeq mael kaol zongl yil mael, cholyaeq e yilsi lye lael kaollaoq, maeq zongl tullaeq ongl kaol'ae. 39 Momil ae'lye lael kaollaoq, noteel yoqhhaeteel'ae maeq hhae diqqye biq'ae, tyulnye kaollaoq, noteel Momil nyegael zonglgae maeqhe." Yoqhhaeteel yoqhhaeq e saeziq mael'ae naelhaeq vae, 40 Kaol shiqtuqhael yaol gul do'laq kaol diq biq, kaol yoqhhaeteel'ae Yesu e cholmil maellye maeq hhae geemyeq lye moqheilheil biq, kaol yoqhhaeteel yaol pyeqduhoq biq vae. 41 Shiqtuqhael zhee hhaol gae'lael aeqmyel Yoqtail Yilhuil ae'lye duyi gil vae, yoqhhaeteel laoq Hhaoqsongl e cholmil gae'lye bi zonglkyuq mael'ae zae yaevae lye kaol'ae. 42 Yoqhhaeteel naochomyel sholhaol kaol aeqyoyoq toq'ae zhol gil'ae, maqqyemyel geemyeq kaol Yesu laoq Jidu'ae lye geegaeq gil biq.