Cholyaeq siq hhaeq saelpodu hhei
6
Laqcaq maqqyemyel naeq beq lal fu, Xi'lal saeziq gee e Yoqtail cholyaeqhael, tyuqvae milcaeq e Xiboqlaiq cholyaeqhael'ae gaezaeq gil biq'ae, naochomyel mulyo gil biq mael heil gil biq mael, yoqhhaeteel e miqchiqhael'ae maeq bael heil biq kaol'ae. 2 Tyulkaol, shiqtuq qyelniq hhaeq lye laqcaqhael yaol gul'eeq laeq, gee: "Ngaeteel'ae Momil e saeziq mael maeq bi geemyeq laeq myel, zaeq dol mael bi guanqliq gil laeq mael laoq maq hoq'ae. 3 Tyulkaol, algo aeqnilhael, noteel onglci ae'lye miqyil meeq e, senllinq kaol geel mael bong'lye za e cholyaeq siq hhaeq saelpodu hhei, ngaeteel yoqhhaeteel'ae xilmael bi guanqliq gil maoqlye lil. 4 Ngaeteel laoq neemae qiqsiqmyel heeldoq gee kaol Momil e saeziq geegaeq maoq." 5 Cholyaeqhael xilmael meeq yae lye kei gil biq'ae, tyulnye laol, Sitiqfanq yaol saelpodu hhei, yoqhhaeq laoq xinlxin kaol senllinq bong'lye za e cholyaeq'ae, yoqhhaeteel lye yol saelpodu hhei hael laoq xihael'ae: Fei'lil, Boqloqge'loq, Niqja'noq, Tiqmenq, Bamiqnaq kaol Yoqtail jiaol'ae xiangxinl e Antiq'a cholyaeq Niqge'la'ae, 6 Cholyaeqhael yoqhhaeteel'ae shiqtuqhael e yiqsi'ae haoqtul deelhhei lye gee gil biq'ae. Shiqtuqhael yoqhhaeteel'ae heeldoq bael gee biq laol, aqlaq mael yoqhhaeteel'ae baqcheeq da hhei biq. 7 Momil e saeziq mael haeqvae eiq geegaeq byel yil vae; Ye'lulsa'lenq vae laqcaq haelnaeqmyel naeqlael, haelnaeqmyel e jilsi eiq fuqyin xilmael'ae xiangxinl vae.Sitiqfanq yaol deiqtyeq biq
8 Momil Sitiqfanq'ae enhuil kaol onglzaeq mael biq biq, kaol cholyaeqhael onglci'ae haeqheemyel maeqdaeqhhaeq e silqinq kaol shenqjiq zongl du hhei. 9 Tyuqfu, "Zilyoq e cholyaeq" lye gul e huiltangq e cholyaeqhael, kaol Guqlilnail milcaeq, Yallilshandal milcaeq, Ji'lilja milcaeq kaol Yalxilyal milcaeq ae'lye lael e cholyaeqhael, Sitiqfanq nyegael geegae lael gil'ae. 10 Ngeelfeiq, Sitiqfanq laoq senllinq kaol geel maellye saeziq gee, kaol yoqhhaeteel maeq gee yinqzaeq ongl gil biq'ae. 11 Tyulkaol, yoqhhaeteel laoq cholyaeqhael'ae dyuqbaq heilmoq hhei biq kaol zaqgiq xilnye bi giq yil, gee: "Ngaeteel laoq yoqhhaeq Moxi kaol Momil'ae xyelduq biq e saeziq gaeq wae." 12 Yoqhhaeteel laoq cholyaeqhael, zhangqlaoqhael kaol Momil e saeziq mael loq e laqkiqhael vae eiq cheeqmu gil biq. Cholyaeq tyuhael lye Sitiqfanq yaol eetyeq biq kaol Yoqtail Yilhuil vae ee'li biq, 13 Kaol jaq e zoqzenl maellye gee: "Cholyaeq xitaeq laoq maeqmeeq e saeziq maellye sholhaol kaol lilfaq mael'ae gee hhae. 14 Aedeeteel yoqhhaeq gee mael gaeq gol wae: 'Naqsa'lel cholyaeq Yesu xitaeq saeqvae milcaeq mael zonglba maoqlye hhae, kaol Moxi lye aedeeteel'ae beideelhhei laeq mael zonglpael maoqlye hhae.'" 15 Tyuqfu, Yoqtail Yilhuil vae zhol deelhhei e cholyaeqhael, yoqhhaeq'ae deelhae'lye chifu biq, yoqhhaeq e maduq mael mqmae yosongl e maduq laoqmyel hhae lye mol hhei gil biq.