Sitiqfanq Yoqtail Yilhuil vae gee e saeziq mael
7
Daljilsi gee: "Xilmael aeqdilmyel hhaemaeq?" 2 Sitiqfanq gee: "Aedee cholyaeqhael naelhaeq gil! Aedeeteel e aeqpyuq aeqdae Yalboqlahanl Meiqsoqbuldaqmiqyal vae zhol, Ha'lanq vae maeq zhol yil siq fu, rongqyaol e Momil yoqhhaeq'ae bi molli, 3 Momil yoqhhaeq'ae gee biq:'Nol noq e milcaeq,
noq e qiqzonglyaeq ae'lye deelsae hhei,
ngael noq'ae tyuqmyeq biq e milcaeq vae yil.'
4 Tyulkaol, yoqhhaeq Ja'leldiq cholyaeq e milcaeq ae'lye deelsae hhei, kaol Ha'lanq vae zholgae hhei. Yoqhhaeq e aeqdae sil hhei aeqnaol'ae, Momil yoqhhaeq yaol tyuqvae lye noteel yaeqmeel zhol e milcaeq'ae hhaoqpol bi pol deelyil hhae. 5 Tyuqfu laoq, Momil saeqvae lye yoqhhaeq'ae zaeqdye halngeiq maq biq hhei biq'ae, yoqhhaeq'ae aeqkeel nuqdeelhhael maqza'ae, yaeqguq eiq maeq zhol biq wae siq, ngeelfeiq, Momil laoq yoqhhaeq'ae milcaeq xilmael yoqhhaeq kaol yoqhhaeq e houldailhael'ae biq laqngeel lye gee gol biq vae. 6 Momil xilnye gee: 'Noq e houldailhael ochoq e milcaeq vae hhae baelzhol hhae, cholyaeqhael yoqhhaeteel'ae hhaeq'ongq ongqzaeq e cholyaeq bi geiq, kaol yoqhhaeteel'ae yuqhael (400) hoq hhae bi zonglkyuq ngeelvae.' 7 Momil yol gee: 'Yoqhhaeteel'ae hhaeq'ongq bi ongqzaeq e goqja tyulmael, ngael chenqfaq biq maoq. Aeqnaol yoqhhaeteel duyi kaol saeqvae ngaeq'ae heel laeq'ae.'
8 Momil eiq yoqhhaeq'ae yeqgae gui'liq maellye geemeeq deelhhei hhae. Xilnye laol, Yalboqlahanl'ae Yiqsaq du'lal biq vae, heiq nao fu yoqhhaeq'ae yeqgae gui'liq zongl biq vae. Aeqnaol, Yiqsaq'ae Yaqgel du'lal biq, Yaqgel vae yaqyo qyelniq hhaeq du'lal biq, aeqnaol xiteel laoq qyelniq zonglyaeq e aeqpyuq aeqdae peqlal vae. 9 "Aeqpyuq aeqdaehael Yoqsel'ae heiqcilnael gil biq, kaol yoqhhaeq yaol Aijiq vae ongq gae zaeq yil biq hhae, ngeelfeiq, Momil laoq yoqhhaeq nyegael qiqgael baelzhol'ae, 10 Kaol yoqhhaeq yaol kuqnanl onglci ae'lye jiul du hhei biq, kaol yoqhhaeq'ae Aijiq zongmae Faqlaoq e yiqsi ae'lye endianq bi mul, kaol zhee bi geel. Faqlaoq yoqhhaeq yaol Aijiq milcaeq vae bi guanq e zaiqxiangl bi geiq hhae, kaol Aijiq milcaeq kaol Faqlaoq toq e halzahael bi guanq hhae. 11 Aeqnaol, Aijiq kaol Ja'nanq e haeqvae eiq hoqlaq maeqmeeq zaeq e maqza, zai'nanl nanlmae puqli biq, aedeeteel e aeqpyuq aeqdae zaelsiq maeq saelpopuq hhei ongl biq'ae. 12 Yaqgel laoq Aijiq'ae zaelsiq za'ae lye gaeq hhei biq, kaol aedeeteel e aeqpyuq aeqdae yaol laefuq fuqli qiq pu tyuqvae moqheilheil du hhei vae. 13 Dil'el cil fu, Yoqsel yoqhhaeq e algohael'ae aeqyoq laoq aeqsul lil lye geedu gil biq, kaol Faqlaoq laoq Yoqsel jacuq mael caiq loq hhei biq wae siq. 14 Yoqsel cholyaeq yaol moqheilheil du hhei, kaol aeqdae Yaqgel kaol qiqhaoq qiqjyel e siqqyel ngaeq hhaeq yaol bi sheeqlaeq. 15 Tyulkaol, Yaqgel laoq Aijiq vae gaeyil vae. Aeqnaol, yoqhhaeq kaol aedeeteel e aeqpyuq aeqdaehael tyuqvae lye sil vae. 16 Cholyaeqhael lye yoqhhaeteel e sil e aeqhhaol mael Shiljianl vae baq da'li, kaol Yalboqlahanl lye pulziq maellye Hamoq e houldail ae'lye vulga hhei e fuq'ongl aeqhael'ae baqduqm li biq vae.
17 Momil Yalboqlahanl'ae gee gol biq mael peqlal maoq fu, Yiqsellyel cholyaeq Aijiq vae haelnaeqmyel zheeqbeqlal; 18 Ngeelfeiq, Yoqsel yaol maeq loq e baeqjyelboq e zongmae qiq hhaeq du'lal, kaol Aijiq vae guanq fu, 19 Yoqhhaeq laoq aedeeteel e minqcuq'ae zaqgiqgiq e loqho maellye zaqgiqgiq gil biq hhae, kaol aedeeteel e aeqpyuq aeqdaehael'ae zonglkyuq biq, kaol yoqhhaeteel e albye yaol maeq bi dyeq myel beiqgae hhei lye zongl gil biq'ae. 20 Tyuqfu, Moxi dyeqlal vae, yoqhhaeq laoq zhee fusael hhae, kaol yoqhhaeq e aeqdae toq'ae baehae sul siq cu wae. 21 Yoqhhaeq yaol beiqgae biq fu, Faqlaoq e yaeqmiq lye yoqhhaeq yaol sheeqzaeq li, kaol aeqyoq e yaqyo lil lye sheeqcuzaeq hhae. 22 Moxi laoq Aijiq cholyaeq e halza e suqhhaq mael xoqxiq byel wae, kaol yoqhhaeq silqinq zongl mael kaol saeziq gee mael zhee onglzaeq hhae.
23 "Yoqhhaeq yuqqyel hoq fu, yoqhhaeq e neemae onglci'ae aeqyoq e Yiqsellyel cholyaeqhael'ae fu yil biq maoqlye nyuq biq. 24 Yoqhhaeq laoq Aijiq cholyaeq qiq hhaeq Yiqsellyel cholyaeq qiq hhaeq'ae diq biq mol hhei biq laol, yoqhhaeq'ae bael diq yil biq kaol Aijiq cholyaeq tyutaeq yaol diq sil biq vae. 25 Yoqhhaeq laoq aeqyoq e cholyaeqhael Momil yoqhhaeq e aqlaq ae'lye yoqhhaeteel'ae jiul maoqlye mael loq'ae lye kei biq hhae, ngeelfeiq, yoqhhaeteel laoq maeq loq gil biq'ae. 26 Aeqnaol qiq nao, Moxi laoq Yiqsellyel cholyaeq niq nulhhaeq diqgae mol hhei biq laol, yoqhhaeteel'ae haeq tyelgae gil lye gee biq, gee: 'Noteel laoq qiqsheel e minqcuq'ae, aeqcheekaol diqgae gil lilmaeq?' 27 Diq e tyutaeq lye yoqhhaeq yaol deiqtael biq, gee: 'Aeqsul lye noq yaol ngaeteel e yoheeq kaol shenqpanl e zhiqmoq bi geiq laq hhaemaeq? 28 Nol milnao Aijiq cholyaeq tyutaeq yaol xyeqsil biq laoqmyel, ngaeq yaol xyeq maoqlye laeq?' 29 Moxi saeziq xi qiq doq gae'lye, Miqdianl milcaeq'ae kihhaq yil kaol baelzhol hhae, kaol tyuqvae lye yaqyo niq nulhhaeq du'lal biq.
30 "Yuqqyel hoq gol hhei'laol, Xi'nail Geeqzhoq e diqsheelleeldye vae, mqmae yosongl qiq hhaeq aelgong gongbeeq aeqzaeq doq myel ae'lye Moxi'ae bi molli. 31 Moxi laoq yilxiangl tyulmael mol hhei biq laol gaqmaqzuq li biq, yoqhhaeq fu'li maoqlye fu, Hhaoqsongl e yotyel gee: 32 'Ngael laoq noq e aeqpyuq aeqdae e Momil lil, Yalboqlahanl, Yiqsaq, Yaqgel e Momil ngeelvae.' Moxi gu'ni'lye maeq fu peq biq'ae. 33 Hhaoqsongl yoqhhaeq'ae gee biq: 'Nol haoqtul deelhhei e milcaeq laoq senljyeq milcaeq'ae, tyulkaol, noq e aeqkeel e paqno mael heiga hhei. 34 Ngaeq e cholyaeqhael Aijiq vae shelkuq mael, ngael aeqdilmyel mol aeqwae; yoqhhaeteel saeq'olheeq mael ngael eiq gaeq wae, ngael gaeyi mael laoq yoqhhaeteel'ae jiul yi aeqlil. Nol lael, ngael noq yaol Aijiq vae moqheilheil duyil maoqlye lil.'
35 Moxi xitaeq laoq, Yiqsellyel cholyaeqhael yoqhhaeq'ae 'aeqsul lye noq yaol ngaeteel e yoheeq kaol shenqpanl e zhiqmoq bi geiq laq hhaemaeq' lye naelhaeq gol biq e qiq hhaeq'ae. Ngeelfeiq, Momil laoq aelgong gongbeeq vae lye yoqhhaeq'ae bi molli e mqmae yosongl e saeziqa ae'lye yoqhhaeq yaol moqheilheil du hhei, kaol yoheeq kaol jiul e qiqhhaeq bi geiq hhae. 36 Cholyaeq xitaeq lye cholyaeqhael yaol Aijiq ae'lye sheeq duyi biq, Hongqhaiqb ae'lye guq yil, kaol diqsheelleeldye vae deelpol duyil, diqsheelleeldye vae zhol e yuqqyel hoq'ae maeqdaeqhhaeq e silqinq kaol shenqjiq zongldu beq hhei'ae. 37 Moxi xitaeq laoq laefuq Yiqsellyel cholyaeqhael'ae gee biq: 'Momil noteel e minqcuq onglci ae'lye, noteel'ae ngael laoqmyel e xianzhi qiq hhaeq bi tullael maoqlye hhae.' 38 Xitaeq laoq diqsheelleeldye vae cholyaeqhael zhol'eeq deelhhei myel vae aedeeteel e aeqpyuq aeqdae nyegael qiqgael baelzhol dyul maeqcilmyel, Xi'nail Geeqzhoq vae yoqhhaeq'ae saeziq geechoq biq e mqmae yosongl nyegael eiq qiqgael baelzhol gol'ae; yoqhhaeq aeqyil e saeziq mael naelhaeq dozaq hhei'laol aedeeteel'ae geegaeq hhei laeq vae. 39 Ngeelfeiq, aedeeteel e aeqpyuq aeqdae yoqhhaeq gee mael maeq naelhaeq'ae, kaol yoqhhaeq yaol deiqtael biq, yoqhhaeteel e neemae mael Aijiq boq'ae polyil wae, 40 Kaol Yallunq'ae gee biq: 'Nol ngaeteel'ae momil zongldu beq hhei laq, kaol aedeeteel e laefuqboq'ae bi deel. Aedeeteel yaol Aijiq milcaeq ae'lye sheeq duyi e Moxi tyutaeq, ngaeteel laoq yoqhhaeq'ae aeqchee puqli biq'ae lye maeq loq yae.' 41 Tyuqfu naohaeq'ae, yoqhhaeteel lye pulsheel maellye aeqnuq nuqyaeq qiq keel zongldu hhei'ae, kaol zongldu hhei e aeqnuq mael'ae zaelheel baqheel biq, kaol aeqyoyoq e aqlaq lye zongl hhei lil lye hhaolzaeq gil'ae. 42 Tyulkaol, Momil zipol hheikaol deelsae hhei vae, kaol yoqhhaeteel'ae mqmae taq e neelmae, baehae, aeqgeel mael'ae haelmillye heel goq laol haelmillye bi heel gil'ae, kaol xianzhi Suqhhaq taq'ae cu deelhhei laoqmyel, gee:
'Yiqsellyel toq o,
noteel diqsheelleeldye vae yuqqyel hoq zhol hhei,
noteel haeqfu ngaeq'ae jyeqyaeq
kaol moqgoq baqheel gol laq lilmaeq?
43 Noteel laoq Mo'lol momil e haeqpael haelcul,
kaol Liqfan momil e aeqgeel mael baq hhei,
kaol xihael noteel lye zongldu hhei mael'ae heel biq mael ngeelvae.
Tyulkaol, ngael noteel yaol Babiqlunq
e yulboq'ae hhaoqpol bi poyil maoq.'
44 "Aedeeteel e aeqpyuq aeqdae diqsheelleeldye vae zoqzenlkei e Momil e haeqpael haelcul za'ae, Moxi nyegael saeziq gee'naeq e Momil Moxi'ae tyuqmyeq biq hhae, kaol Moxi laoq Momil yoqhhaeq'ae bi mol hhei laoqmyel zongl hhae. 45 Aedeeteel e aeqpyuq aeqdaehael lye Momil e haeqpael haelcul xilmael mul gayi vae, Momil lye baeqjyelboq minqcuq e cholyaeqhael yaol yoqhhaeteel yiqsi ae'lye lyeqdu biq aeqnaol'ae, yoqhhaeteel Yoshuyal nyegael Momil e haeqpael haelcul mael, yoqhhaeteel hhamul hhei biq e milcaeq vae baq do'li vae. Momil e haeqpael haelcul xilmael Dalweil e naohaeq'ae za keel hhae. 46 Dalweil laoq Momil e yiqsi ae'lye endianq hhamul hhei biq, tyulkaol, Dalweil Yaqgel e Momil'ae yoqhhaeq vae laoqhaol cu laqngeel lye heeldoq gee gol biq, 47 Ngeelfeiq, Momil'ae heelhaol cuq biq e qiq hhaeq laoq Soqloqmenq'ae. 48 Qiqshiq laoq, hhaelgao gao'li Momil laoq cholyaeq e aqlaq lye cu du hhei e laoqhaol vae maeq zhol'ae, xianzhi gee laoqmyel:
49 'Hhaoqsongl gee:
Mqmae laoq ngaeq e zongmae duqtyel'ae,
milcaeq laoq ngaeq e aeqkeel baqda e toqmoq'ae,
noteel ngaeq'ae haelmillye e heelhaol cu laqngeel lye laeq?
Haeqvae laoq ngaeq e hhaeqnaeq naeqhhael maeq?
50 Xihael laoq gilzuqmyel ngaeq e aqlaq lye
zongl hhei maeqngeel maeq?'
51 Noteel neehaha, neemae kaol naeqbol mael yeqgae gui'liq maeq zongl gol e cholyaeqhael o, noteel duqlye senllinq mael'ae diqqye, kaol noteel e aeqpyuq aeqdae haelmillye laol noteel eiq haelmillye hhae. 52 Xianzhi hae qiq hhaeq vae noteel e aeqpyuq aeqdae maeq zonglkyuq gol biq maeq? Noteel lye gongyil e tyutaeq lael maoqlye hhae lye peqlal maoqlye mael geedu e cholyaeqhael yaol xyeq biq vae. Yaeqmeel noteel laoq gongyil e tyutaeq yaol yotyel maqdumyel ongqzaeq biq, kaol xyeqsil biq vae. 53 Noteel mqmae yosongl gee e lilfaq mael mul vae, ngeelfeiq, maeq zongl gaeyil'ae."
Cholyaeqhael lye Sitiqfanq yaol haqlo maellye beiqsil biq
54 Cholyaeqhael saeziq xihael gaeq hhei biq laol, neemae onglci'ae zhee hol gil biq'ae, kaol Sitiqfanq'ae sheqpyeq koqzi myel zongl gil biq. 55 Ngeelfeiq, Sitiqfanq senllinq bong'lye za'ae, yoqhhaeq mqmae'ae deelhae'lye chifu, kaol Momil e rongqyaol mael mol hhei biq, kaol Yesu laoq Momil e laqsseqboq'ae haoqtul deelhhei mol hhei biq, 56 Kaol gee: "Naelhaeq gil! Ngael mqmae pong'lael kaol Cholyaeq Yaqyo laoq, Momil e laqsseqboq'ae haoqtul deelhhei mol aeqwae." 57 Cholyaeqhael yotyel ha'lye gul gil, naeqbol deiqchiq aeqmyel, neemae qiqsheel laoqmyel yoqhhaeq boq'ae byuq polyil gil'ae, 58 Yoqhhaeq yaol milmae heeqmyel nildu vae ee duyil biq, kaol haqlo maellye beiq gil biq. Bael mol e cholyaeq tyuhael laoq aeqyoteel e aelhongq mael, Saoqloq lye gul biq e yaqyoyaeq qiq hhaeq e aeqkeel dongqpyeq'ae heildeel hhei biq. 59 Yoqhhaeteel haqlo maellye Sitiqfanq'ae beiq gil biq fu, yoqhhaeq yotyel ha'lye gul: "Hhaoqsongl Yesu o, ngaeq e yohael mael heilhoqli laeq oq!" 60 Aeqnaol, vuqduqtongq gae hheikaol yotyel ha'lye gul gae'lael aeqmyel gee: "Hhaoqsongl o, golsiq xilmael yoqhhaeteel'ae haeq bi pi!" Saeziq xihael gee byel hhei'laol sil vae.