Saoqloq jiaolhuil'ae guaeq'ei diqqye biq
8
Sitiqfanq yaol zonglsil biq mael Saoqloq eiq hhaeq'ae lye gee gol hhae. Tyuqfu qiq nao ae'lye laol, cholyaeqhael Ye'lulsa'lenq e jiaolhuil'ae guaeq'ei diqqye biq hhae; Yesu'ae xinlzaeq e cholyaeqhael laoq Yoqtail kaol Saqmaqlilyal haeqvae lael'ee myel milcaeq'ae kici byel yil vae, shiqtuqhael zholdeelsaeq dyul wae. 2 Neemae qiqsiqmyel Momil'ae cho'lyeq e cholyaeqhael lye Sitiqfanq yaol baqduqm biq vae, kaol yoqhhaeq gae'lye zhee nyul gil vae. 3 Ngeelfeiq, Saoqloq laoq jiaolhuil e cholyaeqhael'ae hail biq, kaol aeqsul toq vae eiq do'li, kaol Yesu'ae xinlzaeq e haeqmiyaeq kaol haqyoyaeq yaol ee hheikaol laoqgaiqkei laoqhaol vae koqlongl li biq vae.Fuqyin mael Saqmaqlilyal vae geegaeq keelyil vae
4 Kici yil e cholyaeq tyuhael, haeqvae lael'ee myel milcaeq vae fuqyin mael geegaeq yil gil biq. 5 Fei'lil laoq Saqmaqlilyal milmae heeqmyel'ae gae keelyil, kaol yoqhhaeteel'ae Jidu yaol geegaeq gil biq. 6 Cholyaeqhael Fei'lil gee mael gaeq hhei, kaol yoqhhaeq haelzongl e shenqjiq mael eiq mol hhei, kaol neemae qiq siq laoqmyel yoqhhaeq e saeziq mael naelhaeq gil vae. 7 Haelnaeqmyel e cholyaeqhael'ae maeqshol e yohael guqzaeq li biq hhae, maeqshol e yohael mael yotyel haeqheemyel gul laol duyi vae; kaol haelnaeqmyel ssuqhhal ae'lye maeq tullael kiq hael kaol keeldilhael gilzuqmyel zonglmeeq biq wae siq. 8 Kaol milmae heeqmyel tyuqvae e cholyaeqhael zhee hhaol gil biq'ae.
9 Ximenq lye gul biq e qiq hhaeq zhol'ae, laefuq milmae heeqmyel'ae niqhaeq tulzaeq hhae, kaol Saqmaqlilyal e cholyaeqhael'ae gaqmaq bi zuq li gil'ae, kaol aeqyoyoq onglzaeq lil lye zongl'ae, 10 Milmae heeqmyel e zhiqmoqhael haoq, aeqhael mulzaeqhael haoq, gilzuqmyel yoqhhaeq e saeziq mael'ae naelhaeq gil'ae, gee: "Xitaeq laoq 'Momil e onglzaeq e qiqhhaeq'ae' lye gul biq e tyutaeq ngeelvae." 11 Tyutaeq niqhaeq tulzaeq maellye cholyaeqhael'ae gaqmaq bi zuq li e naohaeq maolgael wae, tyulkaol, yoqhhaeteel yoqhhaeq e saeziq mael'ae naelhaeq gil hhae. 12 Ngeelfeiq, Fei'lil lye yoqhhaeteel'ae Momil e Goqja e fuqyin, kaol Yesu Jidu e cholmil mael geegaeq gil biq, kaol yoqhhaeteel Fei'lil gee mael'ae xiangxinl vae, kaol haeqmiyaeq haqyoyaeq laoqlye shelxiq gil vae. 13 Ximenq aeqyoyoq eiq xiangxinl vae, kaol yoqhhaeq shelxiq e aeqnaol'ae duqlye Fei'lil nyegael qiqgael zhol'ae. Ximenq laoq Fei'lil shenqjiq kaol maeqdaeqhhaeq e silqinq zongl du hhei mol hhei'laol, gaqmaq zhee zuq biq'ae.
14 Ye'lulsa'lenq vae zhol e shiqtuqhael laoq Saqmaqlilyal cholyaeqhael Momil e saeziq mael naelhaeq dozaq hhei gil vae lye gaeq hhei biq, kaol Biqdeq kaol Yoqhanl yaol moqheilheil du hheikaol yoqhhaeteel e tyuqvae bi yil'ae. 15 Yoqhhae niq nulhhaeq keelyil laol, cholyaeqhael'ae heeldoq bael gee gil biq'ae, yoqhhaeteel'ae senllinq mael bi yo'li maoqlye hhae. 16 Senllinq mael yoqhhaeteel'ae qiq hhaeq vae eiq maq loq dayi biq wae siq; yoqhhaeteel Hhaoqsongl Yesu e cholmil maellye shelxiq dyul wae siq kaol'ae. 17 Tyulkaol, shiqtuqhael yoqhhaeteel'ae aqlaq baqcheeq da hhei biq, kaol yoqhhaeteel senllinq mael mul vae. 18 Ximenq laoq shiqtuqhael aqlaq zhoq baqcheeq da hhei'laol, senllinq mael biqga yi mol hhei biq, kaol dyuqbaq mael yoqhhaeteel'ae heilmoq hhei biq hhae, 19 Gee: "Laqtaq xilmael ngaeq'ae biq hhei laq, xilnye laol, ngael aeqsul'ae aqlaq baqcheeq da hhei biq laol aeqsul laoq senllinq mael hhamul wae." 20 Biqdeq yoqhhaeq'ae gee biq: "Nol laoq Momil e encil mael dyuqbaq maellye vul hhei ongl'ae lye kei biq. Tyulnye kaollaoq, noq e pulziq mael laoq noq nyegael qiqgael myeyil hhei wae! 21 Nol Momil e yiqsi'ae neemae onglci'ae nyuq mael maq hoq wae, tyulkaol, nol kaol xilmael laoq qiqgiq guanxil maqza vae. 22 Tyulkaol, nol laoq neemae paellael kaol duqlaq myel ae'lye deelsae maoqhhae, Hhaoqsongl'ae geezaeq biq laol, noq e neemae onglci'ae nyuq mael shelmianq laeq maeqhe. 23 Ngael laoq nol heiqcilnael e saeq onglci'ae zhol, kaol duqlaq maellye noq yaol kaltoq biq'ae lye mol aeqwae." 24 Ximenq geehoq biq: "Noteel ngaeq gae'lye Momil'ae bael geezaeq biq, kaol noteel gee mael ngaeq e aeqhhaol taq'ae qiq mal eiq haeq biq yo'lael laeq." 25 Shiqtuqhael zoqzenlkei, kaol Hhaoqsongl e saeziq mael geegaeq gil biq laol, Ye'lulsa'lenq vae hoqyil, kaol gaelmae qiq keel myel Saqmaqlilyal e haelnaeqmyel pusiq vae fuqyin geegaeq gil biq hhae.
Fei'lil tailjian'ae Yesu laoq aeqsul'ae lye geegaeq biq
26 Hhaoqsongl e mqmae yosongl qiq hhaeq Fei'lil'ae gee biq: "Tullael, nanqfang boq'ae deel, Ye'lulsa'lenq ae'lye Jasal'ae gaeyil e gaelmae'ae yil." Gaelmae tyu qiq keel laoq diqsheelleeldye vae za hhae. 27 Kaol yoqhhaeq deel vae. Aisail'eqbiqyal vae cholyaeq qiq hhaeq zhol'ae, yoqhhaeq laoq Aisail'eqbiqyal goqja e haeqmiyaeq zongmae holhhaq'ae laqtaq za e tailjian'ae, kaol haeqmiyaeq zongmae Gandalji e dyuqbaq baqdeelzaeq e laoqhaol mael guanqliq hhae. Yoqhhaeq Ye'lulsa'lenq vae da'li kaol liqbailkei li. 28 Yoqhhaeq hoqyil fu, maqche mael'ae zhol da hhei myel Yiqsailyal xianzhi e Suqhhaq mael duq hhae. 29 Senllinq mael Fei'lil'ae gee biq: "Nol yil, maqche tyulmael'ae niqli aeqmyel deel!" 30 Fei'lil laoq tailjian e tyuqvae ki yil, kaol yoqhhaeq Yiqsailyal xianzhi e Suqhhaq mael duq e gaeq hhei biq, kaol yoqhhaeq'ae naelhaeq biq: "Nol duq mael aeqchee yilsi'ae lye nol loq lilmaeq?" 31 Yoqhhaeq gee: "Ngaeq'ae cholyaeq qiq hhaeq eiq maeq geemyeq laeq'ae, kaol haelmillyekaol loq laeq?" Tyulkaol, Fei'lil yaol maqche mael'ae bi da'lal kaol yoqhhaeq nyegael qiqgael bi baelzhol. 32 Yoqhhaeq duq e Suqhhaq tyuhael gee mael laoq:
"Yoqhhaeq laoq aqciq laoqmyel cheelli kaol bi xyeq hhei,
aeqyol yolyaeq caeqhum no biq fu cholyaeq e yiqsi'ae
yotyel maq du laoqmyel eiq dul'ae,
yoqhhaeq laoq haeqfu eiq myeqbongq maeq gu'ngae'ae.
33 Cholyaeqhael yoqhhaeq'ae maduq maqza myel zongl biq fu,
yoqhhaeq'ae gongyil gae'lael aeqmyel shenqpanl biq maeqngeel'ae.
Aeqsul laoq yoqhhaeq e houldail yaol geedu hhei ongl laeq?"
Yoqhhaeq e aeqyil mael milcaeq taq ae'lye diqkoqzaeq yil biq kaol'ae.
34 Tailjian Fei'lil'ae gee biq: "Xianzhi gee e saeziq xilmael laoq aeqsul'ae gee hhaemaeq? Yoqhhaeq aeqyoyoq'ae gee hhaemaeq? Paelsilmyel baeqjyelboq e cholyaeq'ae gee hhaemaeq?" 35 Fei'lil myeqbongq gu'ngae hheikaol saeziq gee, zhoqmyel Momil e Suqhhaq e saeziq xil qiq doq maellye yoqhhaeq'ae Yesu yaol geegaeq biq. 36 Yoqhhaeteel laefuqboq'ae deel siq fu, eelcuq za myel'ae deel keelli, tailjian gee: "Nol fu, saeqvae eelcuq za'ae, ngael shelxiq maoqlye mael'ae qiqgiq eiq maeqhael diqqye ongl vae?"a 38 Tyulkaol, tailjian maqche mael lyeq e cholyaeq'ae maqche mael lyeq deelhhei lye moqheilheil biq, Fei'lil kaol yoqhhaeq eelcuq onglci'ae doyil, kaol Fei'lil lye yoqhhaeq'ae shelxiqzongl biq vae. 39 Yoqhhaeteel eelcuq vae lye da'lal fu, Hhaoqsongl e yohael lye Fei'lil yaol sheeqsae yil biq vae, kaol tailjian yoqhhaeq yaol qiqzael eiq maeq hhae mol biq vae, kaol hhaol gae'lael aeqmyel deel vae. 40 Aeqnaol, cholyaeq Fei'lil yaol Yalsoqdu vae lye deelpuq hhei biq. Yoqhhaeq milmae heeqmyel e haeqvae eiq deeldyu byel vae, kaol fuqyin mael Kaiqsa'lilyal keellye geegaeq keelyil vae.