Saoqloq neemae paellael kaol Hhaoqsongl'ae cho'lyeq vae
9
Saoqloq laoq Hhaoqsongl e laqcaqhael'ae xyeq maoqlye hagu gil biq wae siq. Yoqhhaeq daljilsi tyuqvae keelli, 2 Kaol yoqhhaeq'ae Dalmaqshilgeq e hae qiqgael e huiltangq vae xinl cu biq lye geezaeq biq, xilnye laol, yoqhhaeq laoq geemyeq e xilmael'ae xiangxinl e cholyaeq saelpopuq hhei kaollaoq, haeqmiyaeq haoq haqyoyaeq haoq gilzuqmyel kaltoq hheikaol Ye'lulsa'lenq vae hhae ee'li wae. 3 Saoqloq Dalmaqshilgeq vae keelli maoq fu, qiqlaqmyel mqmae ae'lye aeqcael mael yoqhhaeq'ae cuq'ongq biq laol, 4 Yoqhhaeq milcaeq'ae jye'leeq deelhhei, yoqhhaeq'ae geechoq biq e yotyel gaeq hhei biq: "Saoqloq, Saoqloq! Nol aeqcheekaol ngaeq'ae guaeq'ei diqqye laq lilmaeq?" 5 Yoqhhaeq gee: "Hhaoqsongl o, nol laoq aeqsul lilmaeq?" Hhaoqsongl gee: "Ngael laoq nol guaeq'ei diqqye laq e Yesu lil. 6 Tullael, milmae heeqmyel'ae do'li! Nol zongl maoqlye mael laoq ochoq noq'ae geegaeq laeq'ae." 7 Bal zoq e cholyaeqhael laoq, yotyel gaeq hhei feiq cholyaeq laoq maeq mol biq, kaol deelhae'lye tyuqvae haoqtul deelhhei gil hhae. 8 Saoqloq milcaeq ae'lye tullael, ma'ne gupye hhei feiq qiqgiq maeq mol congl biq'ae. Yoqhhaeteel yoqhhaeq e aqlaq mael'ae cheel hheikaol Dalmaqshilgeq vae sheeqli biq hhae. 9 Yoqhhaeq suq nao laoq qiqgiq maeq mol congl biq'ae, kaol zaeq eiq maeq zaeq, dol eiq maeq dol.10 Dalmaqshilgeq vae cholmil mael Yalnaqniqyal lye gul biq e laqcaq qiq hhaeq zhol'ae, Hhaoqsongl yilxiangl onglci'ae lye yoqhhaeq'ae gee biq: "Yalnaqniqyal!" Yoqhhaeq gee: "Hhaoqsongl o, ngael naelhaeq deelhhei lil." 11 Hhaoqsongl yoqhhaeq'ae gee biq: "Tullael, Zhiqgai lye gul e gaelmae vae yil, kaol Yoqdal toq ae'lye Dalsul cholyaeq Saoqloq lye gul biq e qiq hhaeq yaol saelpo yil. Nol fu, yoqhhaeq yaeqmeel heeldoq gee hhae. 12 Saoqloq yilxiangl onglci ae'lye Yalnaqniqyal lye gul biq e qiq hhaeq do'lal laol, yoqhhaeq'ae aqlaq baqcheeq hhei biq, kaol yoqhhaeq e ma'ne mael bi mol hoqlael vae lye mol hhei biq." 13 Ngeelfeiq, Yalnaqniqyal geehoq biq: "Hhaoqsongl o, ngael haelnaeqmyel cholyaeq xitaeq'ae gee gil biq mael, kaol yoqhhaeq Ye'lulsa'lenq vae noq e senltuqhael'ae guaeq'ei diqqye biq'ae lye gaeq wae; 14 Kaol yoqhhaeq saeqvae lael mael laoq jilsi lye laqtaq heil hhei biq kaol lael hhae, kaol noq e cholmil mael'ae geezaeq e cholyaeqhael yaol kaltoq maoqlye hhae." 15 Hhaoqsongl yoqhhaeq'ae gee biq: "Nol yil aeqmeel! Xitaeq laoq ngaeq lye saelpodu hhei e cholyaeq'ae, kaol ngaeq e cholmil mael baeqjyelboq minqcuqhael, zongmaehael kaol Yiqsellyel cholyaeqhael'ae bi geegaeq yil maoqlye lil. 16 Ngael yoqhhaeq'ae tyuqmyeq biq maoq, ngaeq e cholmil gae'lye yoqhhaeq haeldyul dyulmae e kuqnanl hhae pi hhae." 17 Kaol Yalnaqniqyal yil vae, kaol yultoq'ae do'li, kaol Baoqloq'ae aqlaq baqcheeq da hhei biq, gee: "Aeqnil Saoqloq, nol lael e gaelmae'ae noq'ae bi mol e Yesu laoq Hhaoqsongl ngeelvae, ngaeq yaol moqheilheil duyi laq mael laoq, noq yaol bi mol congl, kaol senllinq eiq bong'lye bi za maoqlye hhae." 18 Qiqlaqmyel Saoqloq e ma'ne onglci ae'lye ngaqho laoqmyel leeqgae yi, kaol yoqhhaeq mol congl vae. Tyulkaol, tullael laol shelxiqzaeq vae, 19 Aelhoq zaeq hhei'laol Saoqloq'ae aqhabo hoqlael biq vae.
Saoqloq Dalmaqshilgeq vae Momil e saeziq mael geegaeq gil biq
Saoqloq kaol Dalmaqshilgeq vae zhol e shiqtuqhael hhaellaelmyel qiqtongq zhol vae, 20 Kaol haeqvae lael'ee myel huiltangq vae Yesu laoq Momil e Yaqyo'ae lye geegaeq gil biq. 21 Gaeq e cholyaeqhael gilzuqmyel gaqmaqzuq li gil biq'ae, gee: "Ye'lulsa'lenq vae cholmil xilmael'ae geezaeq hael'ae guaeq'ei diqqye gil biq e qiq hhaeq laoq xitaeq maeqngeel maeq? Yoqhhaeq saeqvae lael mael laoq yoqhhaeteel yaol jilsihael'ae eemoq biq maoqlye maeqngeel maeq?" 22 Ngeelfeiq, Saoqloq nyeq'ei ta nyeq'ei onglzaeq lael biq, kaol Dalmaqshilgeq vae zhol e Yoqtail cholyaeqhael yaol gee yinqzaeq biq vae, kaol Yesu laoq Jidu'ae lye zoqzenl hhae.
Saoqloq Yoqtail cholyaeq e aqlaq ae'lye kisae hhei
23 Qiqtongq lye laol, Yoqtail cholyaeqhael laoq Saoqloq yaol zonglsil maoqlye geedazaq gil'ae; 24 Ngeelfeiq, yoqhhaeteel geedazaq gil mael Saoqloq lye loqzaeq biq. Yoqhhaeteel yoqhhaeq yaol xyeqsil maoqlyekaol milmae heeqmyel e oheiqhael vae mqkiq mqnao myel songlqye deelhhei gil'ae. 25 Tyulkaol, mqkiq vae yoqhhaeq e laqcaqhael lye yoqhhaeq yaol haeqheemyel guqlanq maellye milmae heeqmyel e congqciq ae'lye pyeqgae hhei biq.
26 Saoqloq Ye'lulsa'lenq vae keellael laol, laqcaqhael'ae deelniq goq biq hhae, ngeelfeiq, cholyaeqhael yoqhhaeq'ae gu gil biq, yoqhhaeq laqcaq'ae lye maeq xiangxinl gil biq'ae. 27 Ba'naqba maoqlaol yoqhhaeq'ae maeq sheeqcaq biq'ae, kaol yoqhhaeq yaol shiqtuqhael'ae sheeq mol li biq. Baoqloq yoqhhaeq gaelmae ae'lye Hhaoqsongl yaol haelmillye mol aeqlil lye mael, kaol Hhaoqsongl yoqhhaeq'ae saeziq gee biq mael, kaol yoqhhaeq Dalmaqshilgeq vae qiqgiq maqguzaq myel Yesu haelzongl e silqinq mael geegaeq gilbiq lil lye mael gilzuqmyel geedu hhei vae. 28 Tyulkaol, Saoqloq Ye'lulsa'lenq vae laqcaqhael nyegael qiqgael yil qiqgael lael, kaol Hhaoqsongl e cholmil maellye qiqgiq maq guzaqmyel Momil e saeziq mael geegaeq gil biq, 29 Kaol Xi'lal saeziq gee e Yoqtail cholyaeqhael nyegael saeziq geechoq kaol geegae gil, ngeelfeiq, cholyaeq tyuhael laoq yoqhhaeq yaol xyeq goq biq. 30 Aqsseq aeqnilhael loq hhei'laol, yoqhhaeq yaol Kaiqsa'lilyal vae sheeqyil biq kaol Dalsul vae yil lye moqheilheil biq. 31 Tyuqfu, Yoqtail, Ja'lillil kaol Saqmaqlilyal e hae qiqgael e jiaolhuil vae neesaelhhae mael za, kaol xinlxin hhal za'lal gil vae. Yoqhhaeteel aeqchee silqinq mael taq vae eiq Hhaoqsongl'ae zun eiq zunjinl gu eiq gu. Senllinq mael yoqhhaeteel'ae baelzongl biq, kaol xiangxinl e cholyaeq nyeq'ei ta nyeq'ei hhael naeq laeq vae.
Biqdeq lye Yiqniqyaq yaol zonglmeeq biq
32 Biqdeq haeqvae lael'ee myel yil fu, Lyuqdal pusiq vae zhol e senltuqhael e tyuqvae eiq keelyil vae. 33 Yoqhhaeq tyuqvae lye cholyaeq qiq hhaeq deelpuq hhei biq, tyutaeq e cholmil mael Yiqniqyaq lye gul biq hhae, maeq dongni yil kiq myel peqyil biq hhae, kaol ssuqhhal taq'ae heiq hoq ssuqza aeqwae. 34 Biqdeq yoqhhaeq'ae gee biq: "Yiqniqyaq, Yesu Jidu lye noq yaol zonglmeeq vae! Tullael, noq e zashe mael heille hhei!" Kaol yoqhhaeq qiqlaqmyel tullael vae. 35 Lyuqdal kaol Sa'lunq dyeongl longlmae vae haelzhol cholyaeqhael, yoqhhaeq yaol mol hhei biq laol Hhaoqsongl boq'ae pollal gil vae.
Biqdeq lye Doja yaol zonglmeeq biq
36 Yopal vae Taqbilsaq lye gul biq e haeqmiyaeq laqcaq qiq hhaeq zhol'ae, Xi'lal saeziq laoq Doja lye gul biq hhae; yoqhhaeq laoq neemae zhee meeq kaol ochoq'ae byel sheqhhaq'ae. 37 Tyuqfu, yoqhhaeq laoq nael biq kaol sil wae; kaol cholyaeq lye yoqhhaeq yaol ciqshol hheikaol haoqtaq'ae baqdeel li biq. 38 Lyuqdal laoq Yopal'ae niq hhae, Laqcaqhael Biqdeq laoq yulboq'ae zhol'ae lye gaeq hhei gil biq, kaol cholyaeq niq nulhhaeq yaol moqheilheil du hheikaol yoqhhaeq'ae bi geezaeq yil, gee: "Ngaeteel e tyuqvae bal yi laq, haeq dan'goq!" 39 Kaol Biqdeq tullael laol, yoqhhaeteel nyegael qiqgael yil vae. Yoqhhaeq keelli laol, yoqhhaeteel lye haoqtaq'ae sheeq da'li biq. Haelzhol e miqchiqhael Biqdeq e dongqpyeq'ae haoqtul deelhhei kaol nyul gil hhae, yoqhhaeteel lye Doja laefuq yoqhhaeteel nyegael zhol fu, zongl hhei e onglci'ae dum do e aelhongq kaol poljye mael yoqhhaeq'ae heil fu hhei biq. 40 Biqdeq cholyaeqhael'ae duyil lye gee biq aeqnaol'ae, vuqduqtongq gaeq hheikaol Momil'ae heeldoq gee biq, aeqnaol zipol hoqlael kaol sil e aeqhhaol mael'ae chifu hheikaol gee: "Taqbilsaq tullael!" Kaol yoqhhaeq ma'ne gupye hhei vae, Biqdeq yaol zhoq mol hhei'laol zhol tullael vae. 41 Biqdeq aqlaq tyuqdu hheikaol yoqhhaeq yaol cheeltul hhei, kaol senltuqhael kaol miqchiqhael yaol gul do hhei'ae, kaol Doja yaol dyeq ga'lal aeqmyel yoqhhaeteel'ae sheeqmoq hhei biq hhae. 42 Silqinq xilmael Yopal'ae haeqvae eiq gaeq keelyil vae, kaol haelnaeqmyel cholyaeq Hhaoqsongl'ae xiangxinl vae. 43 Aeqnaol, Biqdeq laoq Yopal'ae saeqgeel diq laqkiq Ximenq toq'ae zhee qiqtongq zhol vae.