Baoqloq Yaljipal zongmae yiqsi ae'lye aeqyoyoq gae'lye gee'loqzaeqhoq
26
Yaljipal Baoqloq'ae gee biq: "Noq'ae aeqyoyoq gae'lye bi gee'loq laeqngeel." Tyulkaol, Baoqloq aqlaq baqqei hhei, kaol aeqyoyoq gae'lye saeziq gee'loqzaeqhoq, gee: 2 "Yaljipal zongmae o, Yoqtail cholyaeqhael ngaeq'ae zhiqmoqkae gil laeq mael, yaeqnao ngael noq e yiqsi ae'lye aeqyoyoq gae'lye hhae gee'loqzaeqhoq kaol zhee meeqyaevae; 3 Hhael meeq mael laoq, nol Yoqtail cholyaeq e beideelhhei mael kaol geegae mael hhael loq'ae, kaol nol ngael gee mael nailxin za lye naelhaeq laeq lye geezaeq lil.4 Ngael mildi'lye fu ae'lye mael yaeqmeel keellye haelmillye cholyaeq ae'lye mael, ngaeq e goqja vae kaol Ye'lulsa'lenq vae, Yoqtail cholyaeqhael gilzuqmyel loq'ae. 5 Yoqhhaeteel zoqzenl bael kei nae kaollaoq, yoqhhaeteel laoq ngael meelhee'lye fu ae'lye ngaeteel e aeqpyuq aeqdae e hhael yanqgeq e tyu yiq pail e geemyeq laoqmyel, Faqlilsail cholyaeq geiq hhae lye loq'ae. 6 Yaeqmeel ngael haoqtul deelhhei kaol bi shenqpanl mael laoq, Momil ngaeteel e aeqpyuq aeqdae'ae biq laqngeel lye gee gol mael'ae panlwangl deelzaeq hhei gae'lye hhae. 7 Ngaeteel qyelniq zhipail laoq mqkiq mqnao myel neemae qiqsiqmyel Momil'ae fuqsil biq mael laoq, biq laqngeel lye gee gol e xilmael'ae mulgoq gil laq hhae. Zongmae o, Yoqtail cholyaeqhael ngaeq'ae zhiqmoqkae gil laeq mael laoq, biq laqngeel lye gee gol e xilmael'ae chifuzaeq gae'lye ngeelvae. 8 Momil lye cholsil yaol bi dyeqhoqlal e silqinq mael, noteel aeqcheekaol maeq xiangxinl lael'ae lye kei gil laeq hhaemaeq?
9 Yilkaefu, ngael eiq yulnye xilnye zongl maellye Naqsa'lel cholyaeq Yesu e cholmil mael'ae diqqye maoqhhae lye kei lil. 10 Aeqnaol, ngael Ye'lulsa'lenq vae xilnye zongl aeqwae. Ngael jilsizhangqhael lye laqtaq biq hhei laq mael heil yo wae, kaol haelnaeqmyel senltuqhael yaol laoqgaiqkei laoqhaol vae koqlongl biq, kaol yoqhhaeteel yaol xyeq biq fu, ngael eiq hhaeq'ae lye gee gol wae. 11 Ngael haeqvae lael'ee myel e huiltangq ae'lye hae'nae pu maeqcilmyel, yoqhhaeteel'ae maeqnaelhaeq maeqzaeqmyel xyelduq e saeziq gee maoqhhae lye diq biq; ngael yoqhhaeteel'ae zhee hol laeq hhae, kaol baeqjyelboq e goqja milmae heeqmyel vae lyeq keelyil kaol yoqhhaeteel'ae guaeq'ei diqqye biq.
12 "Tyuqfu, ngael jilsizhangqhael lye ngaeq'ae biq laq e laqtaq, kaol minllinl mael heil hhei aeqmyel Dalmaqshilgeq vae yil. 13 Zongmae o, naoongl fu, ngael gaelmae ae'lye neelmae taq'ae hhael zheelniq myel e aeqcael qiq cael mol aeqwae, mqmae taq ae'lye ngael kaol bal zoq e cholyaeqhael'ae cuq'ongq gil laeq. 14 Kaol ngaeteel milcaeq vae jye'leeq deelhhei, ngael laoq ngaeq'ae Xiboqlaiq saeziq maellye gee laeq e yotyel gaeq wae: 'Saoqloq! Saoqloq! Nol aeqcheekaol ngaeq'ae guaeq'ei diqqye laq lilmaeq? Aeqnuq mael aeqkeel maellye hhaoqsongl e haeqdul daelqei mael'ae pye mael alngeiqmyel pye laoqmyel, nol ngaeq e yilsi mael'ae diqqye mael eiq alngeiqmyel diqqye hhae.' 15 Ngael gee: 'Hhaoqsongl o, nol aeqsul lilmaeq?' Hhaoqsongl gee: 'Ngael laoq nol guaeq'ei diqqye laq e Yesu lil. 16 Nol tullael, haoqtul deelhhei, noq'ae ngaeq yaol bi mol hhei mael laoq, noq yaol ngaeq e yaqhacheqzaq e cholyaeq kaol bael mol e cholyaeq bi geiq maoqlye lil, kaol ngaeq yaol mol gol e silqinq mael kaol aeqgael noq'ae tyuqmyeq biq maoqlye e silqinq mael cholyaeqhael'ae geegaeq hhei yil biq. 17 Ngael noq yaol Yiqsellyel cholyaeq kaol baeqjyelboq minqcuq onglci ae'lye jiul duyi maoq, kaol noq yaol yoqhhaeteel tyuqvae moqheilheil du hhei maoq, 18 Kaol yoqhhaeteel e neemae mael hhael bi loq laela, kaol yoqhhaeteel yaol nahongqlye hhae lye aeqcael cuq boq'ae bi pollael, Saqdanl e laqtaq holhhaq ae'lye Momil boq'ae bi pollael; kaol yoqhhaeteel ngaeq'ae xiangxinl gae'lye golsiq mael hhae bi shelmianq, kaol senljyeq wae lye peqlal e cholyaeqhael nyegael qiqgael hhae zhol'ae.'"
19 "Tyulkaol, Yaljipal zongmae o, ngael Momil mqmae ae'lye ngaeq'ae yilxiangl onglci'ae lye gee laeq e saeziq mael naelhaeq wae, 20 Kaol Dalmaqshilgeq, Ye'lulsa'lenq kaol Yoqtail halza milcaeq e gilzuqmyel cholyaeqhael'ae laefuq geegaeq biq, aeqnaol laoq baeqjyelboq minqcuq e cholyaeqhael'ae geegaeq biq, kaol yoqhhaeteel'ae neemae paellael kaol Momil boq'ae pollael, kaol haelzongl mael neemae paellael mael'ae zae'li ongl maoqhhae lye geemyeq biq. 21 Yoqtail cholyaeqhael xilmael gae'lye ngaeq yaol sholhaol ae'lye eetyeq laeq, kaol ngaeq yaol xyeq goq biq hhae. 22 Ngeelfeiq, Momil ngaeq'ae bael zongl laeq, tyulkaol, ngael yaeqnao keellye haoqtul deelhhei ongl, kaol maduq zhee za hael'ae, kaol ochoq maeq fu'qiq'ongl hael'ae zoqzenlkei biq, ngael haelgee mael laoq, xianzhihael kaol Moxi gee e aeqgael peqlal maoqlye silqinq mael ngeelvae; 23 Silqinq tyulmael laoq, Jidu aeqdilmyel hhae bi zonglsil, yoqhhaeq cholsil onglci ae'lye laefuq fuqli dyeqhoqlal laol, jiul'en e aeqcael xilmael laoq Yoqtail cholyaeqhael'ae, kaol baeqjyelboq minqcuq e cholyaeqhael'ae geegaeq hhei biq mael ngeelvae."
Baoqloq Yaljipal'ae fuqyin geegaeq biq
24 Baoqloq xilnye aeqyoyoq gae'lye gee'loqzaeqhoq fu, Feisidu yotyel ha'lye gee: "Baoqloq! Nol muyil biq oqshevae; nol suqhhaq zhee loq, kaol noq yaol bi muyil oqshevae!" 25 Baoqloq gee: "Feisidu yoheeq o, ngael maeq muyil, ngael haelgee mael laoq zaqgiq maqgiq kaol yuqnyuqgeellye geedu hhei e saeziq'ae. 26 Yaljipal zongmae xilmael loq'ae, tyulkaol, ngael maqguzaq myel qiqgiq maeq geehhaq myel gee lil. Ngael xihael qiq mal eiq yoqhhaeq'ae maeq geehhaq ongl'ae lye xiangxinl lil, xilmael laoq ochoq maeq loq myel zongl maeqngeel kaol'ae. 27 Yaljipal zongmae o, nol xianzhi'ae xiangxinl lilmaeq? Ngael laoq nol xiangxinl'ae lye loq lil." 28 Yaljipal Baoqloq'ae gee biq: "Nol xilnye qiqniq doq maellye ngaeq yaol jidutuq bi geiq maoqlye geepolzaeq lilmaeq?" 29 Baoqloq gee: "Qiqniq doq gee haoq, haelnaeqmyel gee haoq, ngael Momil'ae geezaeq biq mael, nol qiq hhaeq dyul maeqcil'ae, yaeqnao saeqvae bael naelhaeq e cholyaeqhael, gilzuqmyel ngael nyedullye jidutuq bi peqlal, ngeelfeiq, sulmca xilnye haeq bi kaltoq lye geezaeq biq lil."
30 Yaljipal zongmae, zongqdu, Baiqniqji, kaol zhol deelhhei e cholyaeqhael gilzuqmyel haoqtul lael, 31 Kaol qiqjyelboq'ae deeltael yil, kaol hhaellaelmyel geedazaq gil, gee: "Cholyaeq xitaeq hhae sil, hhae kaltoq myel qiqgiq maeq zongl yo'ae." 32 Yaljipal Feisidu'ae gee biq: "Cholyaeq xitaeq Kaiqsa zael'ae zhiqmoqkae li maoqlye maeq gee kaollaoq, haeqfu'ae'lye pyeqduhoq biq vae."