Baoqloq Kaiqsa zael'ae zhiqmoqkae keelli maoqlye hhae
25
Feisidu zhiqmoq zaeqhhael mael'ae zaeqpael da'li suq nao laol, Kaiqsa'lilyal vae lye Ye'lulsa'lenq vae da'li. 2 Jilsizhangqhael kaol Yoqtail cholyaeq e yoheeqhael, Feisidu e yiqsi'ae lael kaol Baoqloq'ae zhiqmoqkae lael biq. 3 Yoqhhaeteel yoqhhaeq'ae Baoqloq yaol Ye'lulsa'lenq vae ee hoqyil lye geezaeq biq. Xilnye laol, yoqhhaeteel gaelmae vae hoqhhaq deelhhei kaol Baoqloq yaol hha xyeqsil wae. 4 Feisidu geehoq biq: "Baoqloq yaeqmeel Kaiqsa'lilyal vae koqlongl deelhhei hhae, ngael tyuqvae hoqyil maoqlye wae." 5 Yoqhhaeq yol gee: "Noteel onglci'ae laqtaq za e qiq miq ngaeq nyegael bal yi, cholyaeq tyutaeq aeqchee zonglba kaollaoq, yoqhhaeteel yoqhhaeq'ae zhiqmoqkae biq kael'ae."6 Feisidu yoqhhaeteel e tyuqvae heiq nao qyel nao laellye eiq maeq zhol yo'ae, kaol Kaiqsa'lilyal vae hoq keelli vae. Aeqnaol qiq nao duqtyel mael'ae zhol deelhhei kaol shenqpanl, kaol Baoqloq yaol sheeqlaeq lye minllinl biq hhae. 7 Baoqloq zhoq keellael laol, Ye'lulsa'lenq ae'lye lael e Yoqtail cholyaeqhael, yoqhhaeq e dongqpyeq dongqjyel vae haoqtul deelhhei, kaol haelnaeqmyel zhee heeq e golsiq maellye yoqhhaeq'ae zhiqmoqkae biq, ngeelfeiq, yoqhhaeteel qiqgiq zenljul eiq maeq heildu hhei ongl biq'ae. 8 Baoqloq aeqyoyoq gae'lye gee'loqzaeqhoq, gee: "Ngael Yoqtail cholyaeq e lilfaq haoq, sholhaol haoq, Kaiqsa'ae haoq, xihael taq'ae ngael qiqgiq golsiq maq zonglpizaeq gol yil." 9 Ngeelfeiq, Feisidu laoq Yoqtail cholyaeq'ae neezae bi lael maoqlyekaol Baoqloq'ae naelhaeq biq: "Nol Ye'lulsa'lenq vae da'li hhaeq lilmaeq? Ngael tyuqvae lye noq'ae silqinq xihael shenqpanl maoq. 10 Baoqloq gee: "Ngael yaeqmeel Kaiqsa e shenqpanltaiq e yiqsi vae haoqtul deelhhei, saeqvae laoq ngaeq'ae shenqpanl laeq maoq e milcaeq ngeelvae. Ngael Yoqtail cholyaeq'ae maq hoq myel maeq zongl gol biq yil, nol xilmael loqdaeqlye loq hhae. 11 Ngael maq hoq myel zongl gol, kaol hhae sil e golsiq zonglpizaeq yo kaollaoq, hhae sil hhae lye kaol'eiq ngael qiqgiq lye maeq gee yil, ngeelfeiq, cholyaeq xihael ngaeq'ae zhiqmoqkae laeq mael aeqdilmyel maeqngeel kaollaoq, qiq hhaeq eiq ngaeq yaol yoqhhaeteel'ae maeq hhae eemoq biq'ae. Ngael Kaiqsa zael'ae zhiqmoqkae li maoq." 12 Feisidu laoq aeqyoq'ae zuqyil bal du biq e cholyaeqhael nyegael geedazaq du hhei'laol, geehoq biq: "Nol Kaiqsa zael'ae zhiqmoqkae li maoqlye laol, Kaiqsa zael'ae kae li aeqmeel."
Baoqloq yaol Yaljipal kaol Baiqniqji yiqsi'ae sheeqlaeq biq
13 Qiqtongq gol hhei'laol, Yaljipal zongmae kaol Baiqniqji laoq Kaiqsa'lilyal vae keellael, kaol Feisidu'ae meeqlaeqmaeq lye naelhaeq biq. 14 Yoqhhaeteel tyuqvae mee'nae nao zhol vae, kaol Feisidu lye cholyaeqhael Baoqloq'ae zhiqmoqkae gil biq mael zongmae'ae geegaeq hhei biq, gee: "Saeqvae ee'longl biq e cholyaeq qiq hhaeq zhol'ae, Fei'lilsi lye koqlongl deelsaeq hhae. 15 Ngael Ye'lulsa'lenq vae zhol fu, jilsizhangqhael kaol Yoqtail cholyaeq e zhangqlaoqhael yoqhhaeq'ae zhiqmoqkae gil biq hhae, yoqhhaeq'ae golsiq za hhae lye gee biq lye geezaeq lael laeq hhae. 16 Ngael yoqhhaeteel'ae geehoq biq, zhiqmoqkae gil biq e tyutaeq kaol zhiqmoqkae hael hhaellaelmyel maeq gee'loq yo siq, zhiqmoqkae gil biq e tyutaeq aeqyoyoq gae'lye maeq hhae gee'loqzaeqhoq siq fu ae'lye yoqhhaeq'ae golsiq za'ae lye gee biq, xilmael Loqmaq cholyaeq e beideelhhei mael maeqngeel'ae. 17 Aeqnaol yoqhhaeteel gilzuqmyel saeqvae keellael vae, kaol ngael maeq dan'goq myel aeqnaol qiq nao ae'lye duqtyel mael'ae zhol deelhhei kaol shenqpanl wae, kaol cholyaeq vae tyutaeq yaol sheeqlaeq lye minllinl biq hhae. 18 Yoqhhaeq'ae zhiqmoqkae biq hael gilzuqmyel tyuqvae haoqtul deelhhei, kaol yoqhhaeteel yoqhhaeq'ae zhiqmoqkae gil biq mael, ngael nyuq laoqmyel tyuldyulmyel ba maeqngeel'ae. 19 Yoqhhaeteel yoqhhaeq nyegael geegae mael laoq, yoqhhaeteel heelzaeq gil mael gae'lye dyul wae, kaol Yesu lye gul biq e qiq hhaeq zhol'ae lye gee, yoqhhaeq sil vae, ngeelfeiq, Baoqloq laoq yoqhhaeq dyeqdeel wae siq lye gee. 20 Geegae gil e xihael laoq, ngael haelmillye zongl maoqlye maeq loq yae, kaol yoqhhaeq vae Ye'lulsa'lenq'ae da'li, kaol xihael gae'lye tyuqvae bi shenqpanl hhaeq maeq lye naelhaeq biq lil. 21 Ngeelfeiq, Baoqloq aeqyoq laoq zholdeelsaeq, kaol huangqdil yaol bi zonglloq lael maoqlye geezaeq hhae, tyulkaol, ngael cholyaeq'ae yoqhhaeq yaol Kaiqsa zael'ae ee'li fu keellye, koqlongl hhei lye minllinl biq lil." 22 Yaljipal Feisidu'ae gee biq: "Ngael eiq cholyaeq xitaeq aeqchee lye gee hhaemaeq lye naelhaeq goq yae." Feisidu gee: "Nol naeshoq ae'lye naelhaeq lael aeqmeel."
23 Aeqnaol qiq nao, Yaljipal kaol Baiqniqji maduq zhee za aeqmyel lael vae, kaol qiqca (1000) cholyaeq e zhiqmoqhael kaol milmae heeqmyel e maduq zhee za hael nyegael shenqpanl laoqhaol'ae do'li vae. Feisidu lye qiq doq minllinl du hhei'laol, cholyaeq lye Baoqloq yaol sheeq du'laq vae. 24 Feisidu gee: "Yaljipal zongmae kaol haelzhol cholyaeqhael o, noteel cholyaeq xitaeq'ae fu hhei gil, Ye'lulsa'lenq kaol saeqvae milcaeq e Yoqtail cholyaeqhael gilzuqmyel ngaeq'ae geezaeq laeq, cholyaeq xitaeq yaol haeq bi dyeqdeel oq lye gul bonggaebyel'ae. 25 Ngael yoqhhaeq hhae sil gae'lael aeqmyel golsiq maeq saelpodu hhei yil, ngeelfeiq, yoqhhaeq aeqyoyoq huangqdil'ae zhiqmoqkae da'li maoqlye gee laol, ngael yoqhhaeq yaol tyuqvae ee'li maoqlye nyuqmeeq wae. 26 Ngeelfeiq, cholyaeq xitaeq'ae gee keelli laol, ngael huangqdil'ae cu biq maoq e qiqgiq maqza'ae. Tyulkaol, ngaeq lye yoqhhaeq yaol noteel yiqsi'ae sheeqlaeq biq, Yaljipal zongmae noq e yiqsi'ae nyeq'ei hhael sheeqlaeq maoq, xilnye laol, naelhaeq loq hhei'laol, huangqdil'ae cu da'li biq e saeziq za wae. 27 Ngael nyuq laoq, koqlongl biq e cholyaeq'ae golsiq za'ae lye maeq geedu hhei biq siq fu ae'lye, yoqhhaeq yaol eesae li biq e maq hoq'ae lye kei laeq kaol'ae."