Yoqtail cholyaeqhael Baoqloq'ae zhiqmoqkae gil biq
24
Ngaeq nao gol hhei'laol, Yalnaqniqyal daljilsi kaol zhangqlaoqhael lyulshi Tyeqtuqloq nyegael lael vae, kaol yoqhhaeteel zongqdu zael'ae Baoqloq'ae zhiqmoqkae gil biq. 2 Baoqloq yaol gul laeq laol, Tyeqtuqloq yoqhhaeq'ae zhiqmoqkae biq, gee: "Fei'lilsi yoheeq o, noq gae'lye ngaeteel neesaelhhae'lye haelmeeqlye hhae zhol hhei yae; nol naeshoq aeqnao'ae nyuqkeel ongl gae'lye kaol goqja xilmael nyeq'ei ta nyeq'ei hhael meeq lael; 3 Kaol ngaeteel haeqfu qiqlaq eiq noq'ae meeqyaevae lye gee eiq maeq gee byel ongl yaevae. 4 Yaeqmeel ngaeteel noq'ae haeldyulmyel maeq dan'goq yil, nol neemaekuan lye ngaeteel saeziq qiqniq doq gee mael'ae naelhaeq laeq lye noq'ae geezaeq lil. 5 Ngaeteel fu hhei'laol cholyaeq xitaeq laoq doqlal kiq e naelgol laoqmyel hhae, mqmae holhhaq e Yoqtail cholyaeqhael'ae aeqvuqlaelvuqmyel zongl lye tyuqcuq biq, yoqhhaeq laoq Naqsa'lel pail e yoheeq'ae. 6 Yoqhhaeq sholhaol mael maeqshol myel zonglpeq maoqlye nyuq biq hhae, kaol ngaeteel lye yoqhhaeq yaol eetyeq biq.a 8 Nol aeqyoyoq yoqhhaeq'ae naelhaeq biq laol, ngaeteel yoqhhaeq'ae zhiqmoqkae biq e silqinqhael loqdaeqlye hhae loq wae." 9 Yoqtail cholyaeqhael eiq yoqhhaeq nyegael Baoqloq'ae zhiqmoqkae gil biq, gee: "Xilmael aeqdilmyel hhae."Baoqloq Fei'lilsi e yiqsi ae'lye aeqyoyoq gae'lye gee'loqzaeqhoq
10 Zongqdu Baoqloq'ae saeziq gee lye tyuqmyeq biq, kaol Baoqloq gee: "Ngael nol laoq ngaeteel e goqja vae shenqpanl e zhiqmoq hae'nae hoq geiq wae lye loq lil, tyulkaol, ngael aeqyoyoq gae'lye hhae gee'loqzaeqhoq kaol hhaol yae. 11 Nol naelhaeq yil laol hhae loq'ae, ngael Ye'lulsa'lenq vae liqbailkei li qiq nao ae'lye mael yaeqmeel keellye qyelniq nao eiq maq zoq wae siq; 12 Yoqhhaeteel ngael sholhaol ae'lye cholyaeq nyegael geegae'ae lye maeq mol gol'ae, huiltangq'ae kaol milmae heeqmyel vae cholyaeqhael'ae aeqvuqlaelvuqmyel zongl lye tyuqcuq biq eiq maeq mol gol'ae. 13 Yaeqmeel yoqhhaeteel ngaeq'ae zhiqmoqkae gil laeq e silqinq mael, noq e yiqsi'ae maq zoqzenl du hhei ongl'ae. 14 Ngeelfeiq, ngael noq'ae qiq mal cenqrenl maoq, ngael laoq yoqhhaeteel maq hoq'ae lye gee e yo'liq maellye, ngaeq e aeqpyuq aeqdae e Momil'ae heel lil, kaol gilzuqmyel lilfaq kaol xianzhi lye cu deelhhei mael eiq xiangxinl lil. 15 Ngael Momil e yiqsi'ae panlwangl deelzaeq hhei mael, kaol yoqhhaeteel panlwangl deelzaeq hhei mael qiqsheel'ae, xilmael laoq, gongyil e cholyaeq kaol maeq gongyil e cholyaeq gilzuqmyel dyeqhoqlal maoqlye mael ngeelvae; 16 Tyulkaol, ngael haelzongl mael Momil kaol cholyaeq e yiqsi ae'lye haeqfu eiq ngaeq e liangqxin mael'ae nyuqfuhoq peq lil. 17 Mee'nae hoq gol hhei'laol, ngael heil'eeq laeq e dyuqbaqhael ngaeq e minqcuq e saeqyaeqhael'ae heilhoqlaeq biq wae, kaol Momil'ae zaelheel heel li biq. 18 Ngael zaelheel heel fu, yoqhhaeteel ngael sholhaol vae zhol mol vae, tyuqfu, ngael zonglshol e gui'liq zongl aeqwae, ngael haelnaeqmyel cholyaeqhael nyegael qiqgael maeq baelzhol yil, aeqvuqlaelvuqmyel eiq maeq zongl gol yil, 19 Tyuqfu, Yalxilyal ae'lye lael e Yoqtail cholyaeq mee'nae hhaeq zhol dyul wae, yoqhhaeteel ngaeq'ae aeqchee zhiqmoqkae maoqlye kaollaoq, noq e yiqsi'ae zhiqmoqkae lael maoqhhae. 20 Tyulnye maeqngeel kaollaoq, ngael Yoqtail Yilhuil vae haoqtul deelhhei kaol ngaeq'ae naelhaeq gil laeq fu, ngael zonglba gol kaollaoq, cholyaeq xihael'ae bi geedu hhei. 21 Zonglba gol kaollaoq, ngael yoqhhaeteel onglci'ae haoqtul deelhhei kaol gul e 'Ngael yaeqnao noteel e yiqsi ae'lye bi naelhaeq mael laoq, cholsil dyeqhoqlal'ae'' lye xi qiq doq gae'lye hhae." 22 Fei'lilsi laoq yo'liq xilmael haeldyul eiq loq'ae, ngeelfeiq, yoqhhaeteel'ae baelyaelmyel dan'goq biq, gee: "Qiqca (1000) cholyaeq e zhiqmoq Lyuqxiyal lael laol noteel'ae zail shenqpanl laeqngeel." 23 Tyulkaol, yoqhhaeq qiqhael (100) cholyaeq e zhiqmoq'ae Baoqloq yaol fu'qye deelhhei, yoqhhaeq'ae meeq biq, yoqhhaeq e paeqyaeq kaol yelchoq yoqhhaeq'ae mulyo e moqgoq heil laeq biq fu maeq hhae diqqye biq'ae lye minllinl biq hhae.
Fei'lilsi Momil e saeziq mael gaeq hhei biq laol gu li biq
24 Qiqniq nao gol hhei'laol, Fei'lilsi kaol yoqhhaeq e haeqmiq Yoqtail cholyaeq Tuqxi'la qiqgael keellael, kaol Baoqloq yaol gul laeq, kaol yoqhhaeq gee e Yesu Jidu'ae xiangxinl e silqinq mael'ae naelhaeq lael gil. 25 Baoqloq laoq gongyil mael, aeqyoyoq zongltyeqzaeq hoq kaol aeqgael shenqpanl maoqlye mael'ae gee keelli fu, Fei'lilsi gu li biq, kaol gee: "Nol deel o, aeqgael ngael haeqfu lo laol noq'ae gul laeqngeel." 26 Yoqhhaeq laoq Baoqloq yoqhhaeq'ae dyuqbaq baqmoq hhei laeq lye eiq chifuzaeq hhae, kaol Baoqloq yaol yoqhhaeq'ae mol lael lye hae'nae pu gul laeq wae, kaol yoqhhaeq nyegael saeziq gee'naeq. 27 Niq hoq gol hhei'laol, Bo'qiuq Feisidu laoq Fei'lilsi e zhiqmoq zaeqhhael mael'ae zaeqpael da'li vae; Fei'lilsi laoq Yoqtail cholyaeqhael'ae neezae bi lael maoqlyekaol Baoqloq yaol laoqgaiqkei laoqhaol vae bi zholdeelsaeq waesiq.