22
"Aedee cholyaeqhael o, yaeqmeel ngael aeqyoyoq gae'lye gee'loqzaeqhoq mael naelhaeq gil." 2 Yoqhhaeteel Baoqloq Xiboqlaiq saeziq maellye gee mael gaeq hhei biq, kaol yotyel nyeq'ei maq du vae, Baoqloq gee: 3 "Ngael laoq Yoqtail cholyaeq, Ji'lilja e Dalsul vae lye dyeqlal lil, ngeelfeiq, saeqvae milmae heeqmyel ae'lye heeqda lal lil. Ngael Jamaqlyel zael'ae haelmeeqlye xoqxiq gol, kaol aedeeteel e aeqpyuq aeqdae e lilfaq laoqmyel haelmeeqlye zongl lil, ngael eiq yaeqmeel noteel neemae qiqsiqmyel Momil'ae fuqsil biq laoqmyel zongl lil. 4 Ngael yilkaefu Yesu'ae xinlzaeq e gaelmae xi qiq keel'ae deel da e cholyaeqhael'ae guaeq'ei diqqye biq dyul maeqcilmyel zonglsil biq, haeqmiyaeq kaol haqyoyaeq yaol kaltoq hheikaol, laoqgaiqkei laoqhaol vae koqlongl li biq, 5 Xilmael laoq daljilsi kaol gilzuqmyel Yoqtail Yilhuil e zhangqlaoqhael bal zoqzenl ongl'ae. Ngael eiq yoqhhaeteel tyuqvae lye aqsseq aeqnilhael'ae cu biq e xinl mael heil laeq, kaol Dalmaqshilgeq vae yil, kaol tyuqvae e Yesu'ae xinlzaeq e cholyaeqhael yaol kaltoq hhei, kaol Ye'lulsa'lenq vae bi chenqfaq li maoqlye sheeqli.Baoqloq Yesu'ae haelmillye xinlzaeq lael lil lye gee
6 "Naoongl longlmae laellye fu, ngael Dalmaqshilgeq vae deel niqli, qiqlaqmyel, zheelniqlye e aeqcael mael mqmae ae'lye ngaeq'ae cuq'ongq laeq. 7 Ngael milcaeq vae jye'leeq deelhhei, ngaeq'ae geechoq laeq e yotyel gaeq hhei laeq: "Saoqloq, Saoqloq! Nol aeqcheekaol ngaeq'ae guaeq'ei diqqye laq lilmaeq?' 8 Ngael geehoq biq: 'Hhaoqsongl o, nol aeqsul lilmaeq?' Yoqhhaeq gee: 'Ngael laoq nol guaeq'ei diqqye laq e Naqsa'lel cholyaeq Yesu lil.' 9 Ngaeq nyegael bal zoq e cholyaeqhael aeqcael mael mol maoqlaol, ngaeq'ae saeziq gee laeq e tyutaeq e yotyel mael maeq gaeq'ae. 10 Ngael gee: 'Hhaoqsongl o, ngael aeqchee zongl maoqhhae maeq? 'Hhaoqsongl gee: 'Tullael, Dalmaqshilgeq vae do'li, tyuqvae cholyaeq qiq hhaeq zhol'ae, yoqhhaeq nol haelzongl maoqlye mael noq'ae geedu laq'ae.' 11 Aeqcael zheelniqlye kaol ngaeq e ma'ne mael qiqgiq maeq mol congl laq vae, kaol ngaeq nyegael bal zoq e cholyaeq lye ngaeq yaol Dalmaqshilgeq vae cheel do'li laq hhae. 12 "Tyuqvae Yalnaqniqyal lye gul biq e cholyaeq qiq hhaeq zhol'ae, yoqhhaeq laoq neemae qiqsiqmyel Momil'ae cho'lyeq, kaol lilfaq laoqmyel zongl e cholyaeq'ae, tyuqvae milcaeq vae haelzhol e Yoqtail cholyaeqhael gilzuqmyel yoqhhaeq'ae laqma deiqqei biq'ae. 13 Yoqhhaeq ngaeq'ae mol lael, kaol ngaeq e dongqpyeq'ae haoqtul deelhhei, gee: "Aeqnil Saoqloq, yaeqmeel nol mol laelkiq vae." Kaol ngael nae'naemyel chifu da hhei'laol yoqhhaeq yaol mol aeqwae.' 14 Yoqhhaeq yol gee: 'Aedeeteel e aeqpyuq aeqdae e Momil lye noq yaol saelpodu hhei, kaol noq'ae yoqhhaeq e zhiqyil mael bi loq laeq, noq'ae gongyil e tyutaeq yaol bi mol hhei, kaol yoqhhaeq e myeqbongq ae'lye gee e saeziq mael bi gaeq laeq'ae. 15 Nol haelgaeq haelmol hael, yoqhhaeq'ae haelzhol cholyaeqhael e yiqsi ae'lye zoqzenl bael kei biq. 16 Nol yaeqmeel aeqcheekaol dan'goq oqyilsiq maeq? Tullael, yoqhhaeq e cholmil mael'ae geezaeq biq, kaol shelxiq laol noq e golsiq mael ciqgae laeq vae.
17 "Aeqnaol, ngael Ye'lulsa'lenq vae hoq keelli, kaol sholhaol vae neemae qiqsiqmyel heeldoq gee fu, matutu laoqmyel zongl lael laeq'ae, 18 Kaol Hhaoqsongl ngaeq'ae gee laeq mael mol aeqwae, Hhaoqsongl gee: 'Nol ngaeq'ae zoqzenl bael kei laeq mael, yoqhhaeteel maq jyeqshel nae'ae, tyulkaol, nol nae'naemyel Ye'lulsa'lenq vae lye deelsae hhei.' 19 Ngael gee: 'Hhaoqsongl o, yoqhhaeteel laoq ngael yilkaefu noq'ae xiangxinl e cholyaeq yaol koqlongl biq, kaol hae qiqgael e huiltangq vae eiq yoqhhaeteel'ae tyel biq'ae lye loq'ae, 20 Kaol noq'ae zoqzenl bael kei biq e cholyaeq Sitiqfanq yaol xyeq biq kaol siq bi yul fu, ngael eiq tyuqvae baelzhol, kaol xilnye zongl gil mael hhaeq'ae lye gee gol wae, kaol yoqhhaeq'ae xyeq biq e cholyaeqhael e aelhongq mael bael fu'qye biq.' 21 Yoqhhaeq ngaeq'ae gee laeq: 'Nol yil o, ngael noq yaol moqheilheil du hheikaol, gaelmaolsae'lye e baeqjyelboq minqcuq e cholyaeq tyuqvae bi yil maoq.'"
Baoqloq aeqyoq laoq Loqmaq cholyaeq lil lye gee
22 Cholyaeqhael yoqhhaeq gee e xi qiq doq gaeq hhei biq laol yotyel haeqheemyel gee: "Xilnye cholyaeq laoq milcaeq taq ae'lye xyeqsil hhei, kaol haeq bi dyeqdeel maoqhhae!" 23 Cholyaeqhael yotyel ha'lye gul gil, aelhongq mael zheqhei hhei, kaol haeqlyel mael mqmae vae beiqxeiq da hhei. 24 Qiqca (1000) cholyaeq e zhiqmoq cholyaeq vae Baoqloq yaol junduil laoqhaol vae sheeqyil, kaol alca maellye yul'ae tyel biq laol yul'ae naelhaeq biq lye minllinl biq, xilnye zongl mael laoq, cholyaeqhael aeqcheekaol yoqhhaeq'ae xilnye gul bonggaebyel biq hhae lye loq maoqlye kaol'ae. 25 Dangbinkei hael lye saeqgeel alca maellye yoqhhaeq'ae kaltoq biq fu, Baoqloq yoqhhaeq e dongqpyeq'ae haoqtul deelhhei e qiqhael (100) cholyaeq e zhiqmoq'ae gee biq: "Gee deelhhei e saeziq maellye gee lil laol, noteel Loqmaq cholyaeq qiq hhaeq'ae golsiq za'ae lye maeq gee biq siq fu ae'lye tyel biq, Loqmaq zenlfuq'ae xilnye gee deelhhei e saeziq za maeq?" 26 Qiqhael (100) cholyaeq e zhiqmoq gaeq hhei biq laol, qiqca (1000) cholyaeq e zhiqmoq'ae mol yil, kaol gee biq: "Cholyaeq xitaeq Loqmaq cholyaeq'ae, nol haelmillye zongl maoq maeq?" 27 Qiqca (1000) cholyaeq e zhiqmoq Baoqloq'ae naelhaeq lael biq: "Ngaeq'ae geedu laq, nol Loqmaq e cholyaeq lilmaeq?" Yoqhhaeq gee: "Ngeel lil." 28 Qiqca (1000) cholyaeq e zhiqmoq gee: "Ngael dyuqbaq haelnaeqmyel du hheikaol caiq Loqmaq e fulkeq hhamul laq wae siq. Baoqloq gee: "Ngael bogae hhei fu ae'lye ngeel lil." 29 Tyulkaol, yoqhhaeq'ae tyel biq kaol naelhaeq biq maoqlye e cholyaeqhael nae'naemyel deelsae byel vae. Qiqca (1000) cholyaeq e zhiqmoq yoqhhaeq laoq Loqmaq cholyaeq ngeel'ae lye loq hhei biq, kaol yoqhhaeq yaol kaltoq gol biq gae'lye gu li biq.
Baoqloq Yoqtail e yoheeqhael e yiqsi'ae saeziq gee
30 Aeqnaol qiq nao, qiqca (1000) cholyaeq e zhiqmoq laoq Yoqtail cholyaeqhael aeqcheekaol Baoqloq'ae zhiqmoqkae biq hhaemaeq lye loq maoqlyekaol yoqhhaeq yaol keelpyel biq, kaol cholyaeq'ae jilsizhangqhael kaol Yoqtail Yilhuil e cholyaeqhael yaol gul'eeq laeq lye minllinl biq, kaol Baoqloq yaol eiq bi sheeq gaeyi, kaol yoqhhaeq yaol yoqhhaeteel e yiqsi'ae bi haoqtul deelhhei.