Baoqloq Ye'lulsa'lenq vae da'li
21
Ngaeteel yoqhhaeteel ae'lye deelsae hhei'laol, hoq zhol hheikaol zhoqtae'lye Geshil vae keelli, aeqnaol qiq nao Loqdiq vae keelli, kaol tyuqvae lye hoq kai hheikaol Paldalla'ae yil; 2 Ngaeteel Fei'niqji vae yil e hoq qiq mal deelpuq hhei, kaol hoq mael'ae da'li laol deel wae. 3 Ngaeteel Sailpuqlulsi milcaeq mol gil aeqwae, kaol tyuqvae e nanqbian boq'ae kai gol duyil kaol Xullilyal vae kai yil, hoq mael taq e moqgoq mael baqga maoqlyekaol Tui'loq vae kai deelhhei. 4 Ngaeteel hoq taq ae'lye gaeyi, kaol laqcaq qiq miq saelpopuq hhei, kaol tyuqvae siq nao baelzhol. Yoqhhaeteel laoq senllinq ganqdongl biq ae'lye, Baoqloq'ae Ye'lulsa'lenq vae haq da'li lye geegaeq biq. 5 Mee'nae nao gol hhei'laol, ngaeteel tyuqvae lye laefuqboq'ae yol deel maoq vae lyekaol, yoqhhaeteel laoq haeqmiqhael kaol yaeqguqhael sheeq hheikaol, ngaeteel yaol milmae heeqmyel nildu'ae bael sheeq duyi laq. Kaol ngaeteel eeldeel deelmae deeljyel vae vuqduqtongq gae deelhhei kaol heeldoq gee, 6 Yoqhhaeteel kaol ngaeteel aeqyoyoq deel maoq vae lye gee hhei'laol, ngaeteel laoq hoq mael'ae zhol da'li, yoqhhaeteel laoq laoqhaol'ae hoqyil vae.7 Ngaeteel Tui'loq ae'lye hoq kai maoq e gaelmae kai byel wae, kaol Do'lilmaiq vae keelli, tyuqvae e aqsseq aeqnilhael'ae meeqlaeqmaeq lye naelhaeq biq, kaol yoqhhaeteel nyegael qiq nao baelzhol wae. 8 Aeqnaol qiq nao, ngaeteel tyuqvae lye deelsae hhei, kaol Kaiqsa'lilyal milcaeq vae fuqyin geegaeq e Fei'lil toq'ae keelli, kaol yoqhhaeq nyegael qiqgael baelzhol. Yoqhhaeq laoq zhiqsil tyu siq hhaeq onglci e qiq hhaeq'ae. 9 Yoqhhaeq'ae yaeqmiq yuq hhaeq zhol'ae, yoqhhaeteel gilzuqmyel haqyoyaeq nyegael maq ssuqza gol e yaeqmiyaeq'ae, yoqhhaeteel peqlal maoqlye mael geedu kiq hhae. 10 Ngaeteel tyuqvae zhee mee'nae nao zhol hhei aeqnaol, Yaljabul lye gul biq e xianzhi qiq hhaeq Yoqtail ae'lye gaeyi. 11 Kaol yoqhhaeq ngaeteel'ae mol lael, yoqhhaeq Baoqloq e haeqpi mael heil pol du hheikaol, aeqyoyoq e aeqkeel aqlaq mael kaltoqzaq hoq hhei, kaol gee: "Senllinq xilnye gee, Yoqtail cholyaeq lye Ye'lulsa'lenq vae lye, haeqpi xilmael e hhaoqsongl yaol xilnye kaltoq biq maoqlye hhae, kaol baeqjyelboq minqcuq e cholyaeq e aqlaq'ae eemoq biq maoqlye hhae." 12 Ngaeteel saeziq xihael gaeq hhei'laol, ngaeteel tyuqvae milcaeq e cholyaeqhael nyegael Baoqloq'ae Ye'lulsa'lenq vae haq da'li oq lye haelmeeqlye gee biq. 13 Ngeelfeiq, Baoqloq gee: "Noteel aeqcheekaol nyul gil kaol ngaeq e neemae mael'ae bi nael gil laeq lilmaeq? Ngael Hhaoqsongl Yesu e cholmil gae'lye bi kaltoq dyul maeqcilmyel, Ye'lulsa'lenq vae hhae sil kaol'eiq hhaeq lil lye nyuqmeeq wae." 14 Yoqhhaeq ngaeteel haelmeeqlye gee biq mael maeq naelhaeq'ae, kaol ngaeteel "Hhaoqsongl e zhiqyil mael peqlal biq lye nyuqlil" lye gee dyul maoqlaol, yotyel maq du yil vae.
15 Qiqniq nao aeqnaol, ngaeteel moqgoqhael heilmeeqdo hheikaol Ye'lulsa'lenq vae da'li. 16 Kaiqsa'lilyal e laqcaq mee'nae hhaeq ngaeteel nyegael qiqgael bal yi, kaol ngaeteel yaol Sailpuqlulsi cholyaeq Naqsun toq'ae bal haq li lye sheeqli laeq; yoqhhaeq laqcaq geiq e maolgael wae.
Baoqloq Yaqgel'ae mol yil
17 Ngaeteel Ye'lulsa'lenq vae keelli laol, aqsseq aeqnilhael ngaeteel'ae hhaol gae'lael aeqmyel sheeqcaq gil laq'ae. 18 Aeqnaol qiq nao, Baoqloq kaol ngaeteel hhaellaelmyel Yaqgel'ae mol yil, haelzhol e zhangqlaoqhael eiq tyuqvae zhol'ae. 19 Baoqloq yoqhhaeteel'ae meeqlaeqmaeq lye naelhaeq gil biq aeqnaol, Momil yoqhhaeq'ae baeqjyelboq minqcuq onglci'ae bi zongl e silqinq mael gilzuqmyel yoqhhaeteel'ae qiq mal qiq mal lye geedu gil biq. 20 Yoqhhaeteel gaeq hhei biq laol Momil'ae rongqyaol biq biq, kaol Baoqloq'ae gee biq: "Algo o, naelhaeq, Yoqtail cholyaeqhael onglci'ae Yesu'ae xinlzaeq e cholyaeq mee'nae tongl zoq wae, yoqhhaeteel laoq neemae qiqsiqmyel Moxi e lilfaq mael'ae zongl yil e cholyaeq'ae. 21 Yoqhhaeteel laoq ochoq xilnye gee e gaeq gol, nol baeqjyelboq minqcuq onglci'ae zhol e gilzuqmyel Yoqtail cholyaeqhael'ae Moxi e saeziq mael haeq naelhaeq, kaol yoqhhaeteel'ae yaeqguq'ae yeqgae gui'liq haeq zongl biq, kaol beideelhhei laoqmyel eiq haeq zongl lye geemyeq gil biq'ae lye gaeq hhei biq hhae. 22 Yoqhhaeteel nol lael vae lye gaeqzaeq kiq'ae. Haelmillye zongl laeq? 23 Nol ngaeteel gee laoqmyel zongl yil, ngaeteel e saeqvae Momil'ae xuqyuanlkei gol biq e cholyaeq yuq hhaeq zhol'ae. 24 Nol yoqhhaeteel yaol bael sheeqyil, kaol yoqhhaeteel nyegael zonglshol e gui'liq zongl yil, kaol yoqhhaeteel'ae dyuqbaq bal du biq, kaol yoqhhaeteel e vuqduq qyelkeel mael bi cuga hhei, xilnye zongl laol cholyaeqhael nol laoq laefuq ochoq gee laoqmyel maeqngeel'ae lye loq wae, kaol cholyaeqhael nol laoq Moxi lilfaq laoqmyel zongl yil e cholyaeq'ae lye eiq loq wae. 25 Yesu'ae xinlzaeq e baeqjyelboq minqcuq e cholyaeqhael'ae laoq, ngaeteel yoqhhaeteel'ae xinl cu biq wae, kaol yoqhhaeteel'ae cholyaeq lye zongldu hhei e momilhael'ae baqheel gol e zaeqzael, leqsil e jyeqyaeq kaol siq maeq hhae zaeq'ae, kaol ochoq nyegael neemae maq hha ba'ae lye moqheilheil biq aeqwae." 26 Kaol Baoqloq tyu yuq hhaeq yaol sheeqyil vae, aeqnaol qiq nao, yoqhhaeteel nyegael zonglshol e gui'liq zongl vae, kaol sholhaol vae do'li, kaol zonglshol e gui'liq bong e naohaeq mael geedu li biq, naohaeq bong lael laol, yoqhhaeteel laoq jilsi yoqhhaeteel haetaeq vae eiq zaelheel bi bael heel maoqlye doqdeelzaeq hhei hhae.
Yoqtail cholyaeqhael lye Baoqloq yaol sholhaol vae lye eetyeq biq
27 Siq nao bong lael maoq fu, Yalxilyal ae'lye lael e Yoqtail cholyaeq laoq Baoqloq sholhaol vae zhol mol hhei biq, kaol cholyaeqhael'ae cheeqmu biq, kaol Baoqloq yaol eetyeq biq, 28 Kaol gul gae'lael aeqmyel gee: "Yiqsellyel cholyaeqhael o, wae baelzongl lael gil! Cholyaeq xitaeq haeqvae lael'ee myel e cholyaeqhael'ae geemyeq biq, yoqhhaeteel'ae Yiqsellyel cholyaeqhael'ae bi diqqye, Moxi lilfaq mael'ae bi diqqye, kaol sholhaol xilmael'ae bi diqqye. Yoqhhaeq lye Xi'lal cholyaeq yaol eiq sholhaol vae sheeq do'li, kaol saeqvae senljyeq milcaeq mael maeqshol myel zonglpeq vae." 29 Yoqhhaeteel laoq Yiqfuqsoq cholyaeq Telloqfeimoq laoq Baoqloq nyegael milmae heeqmyel vae zhol mol gol biq ngeelzhol'ae, kaol Baoqloq lye yoqhhaeq yaol sholhaol vae sheeq do'li hhae lye kei biq hhae. 30 Tyulkaol, gilzuqmyel milmae heeqmyel cholyaeqhael aeqvuqlaelvuqmyel zongl tul beq laq, kaol cholyaeqhael qiqgael ki beq laq laol, Baoqloq yaol eetyeq biq, kaol sholhaol nildu'ae ee duyil, kaol nae'naemyel sholhaol e oheiq mael piqtyeq hhei vae. 31 Yoqhhaeteel Baoqloq yaol xyeq maoqlye zongl fu, cholyaeq lye Loqmaq junduil vae zhol e qiqca (1000) cholyaeq e zhiqmoq'ae geedu li biq, gee: "Ye'lulsa'lenq milmae heeqmyel haelzhol cholyaeqhael aeqvuqlaelvuqmyel zongl bonggaebyel hhae!" 32 Kaol qiqca (1000) cholyaeq e zhiqmoq laoq nae'naemyel qiqhael (100) cholyaeq e zhiqmoqhael, kaol dangbinkei e cholyaeqhael yaol sheeq hheikaol yoqhhaeteel tyuqvae ki ga keelyil. Cholyaeqhael qiqca (1000) cholyaeq e zhiqmoq kaol dangbinkei e cholyaeqhael yaol zhoq mol hhei biq laol, Baoqloq'ae maeq tyel biq vae. 33 Tyulkaol, qiqca (1000) cholyaeq e zhiqmoq laefuqboq'ae ki da'li kaol Baoqloq yaol eetyeq biq, kaol cholyaeq'ae sulmca niq ca maellye yoqhhaeq yaol kaltoq hhei lye moqheilheil biq, kaol yoqhhaeq'ae aeqsul lilmaeq, kaol aeqchee silqinq zongl gol lilmaeq lye naelhaeq biq. 34 Tyuqfu, cholyaeqhael yulnye xilnye lye gul, kaol gul ho bonggaebyel'ae, kaol qiqca (1000) cholyaeq e zhiqmoq aeqdilmyel e silqinq mael laoq haelmillye hhae lye maeq hhae loq congl biq'ae, kaol cholyaeq'ae Baoqloq yaol junduil laoqhaol vae sheeqyil lye minllinl biq. 35 Baoqloq dateq vae keellael fu, cholyaeqhael byuqsil maoqmyel byuq, tyulkaol, dangbinkei e cholyaeqhael Baoqloq yaol baqqei hhei. 36 Kaol cholyaeq qiq miq laoq aeqnaolboq'ae cho'lyeq deelhhei kaol gul: "Yoqhhaeq yaol xyeq hhei."
Baoqloq aeqyoyoq gae'lye gee'loqzaeqhoq e saeziq
37 Yoqhhaeteel Baoqloq yaol sheeq hheikaol junduil laoqhaol vae keelli maoq fu, Baoqloq qiqca (1000) cholyaeq e zhiqmoq'ae gee biq: "Ngael noq'ae saeziq qiq doq gee'naeq goq yae, hhaeq maeq?" Qiqca (1000) cholyaeq e zhiqmoq gee: "Nol Xi'lal saeziq gee kiq lilmaeq? 38 Aelmaol, nol yilkae qiqtongq'ae aeqvuqlaelvuqmyel zongl e, cholyaeq xyeq gol e yuqca (4000) hhaeq yaol diqsheelleeldye'ae sheeqyil e, Aijiq cholyaeq tyutaeq maeqngeel yil maeq?" 39 Baoqloq gee: "Ngael laoq Yoqtail cholyaeq, Ji'lilja e Dalsul cholyaeq lil, ngael laoq aeqsul eiq loq e milmae heeqmyel e cholyaeq lil, kaol ngaeq yaol cholyaeqhael'ae saeziq qiqniq doq bi gee'naeq laeq lye geezaeq lil." 40 Qiqca (1000) cholyaeq e zhiqmoq yoqhhaeq'ae hhaeq'ae lye gee biq, kaol Baoqloq dateq vae haoqtul deelhhei, kaol cholyaeqhael'ae aqlaq biq biq laol, cholyaeqhael yotyel maq du vae, kaol Baoqloq Xiboqlaiq saeziq maellye gee: