Mqmae yosongl Ge'niqliuq'ae saeziq geegaeq biq
10
Kaiqsa'lilyal vae Ge'niqliuq lye gul biq e cholyaeq qiq hhaeq zhol'ae, yoqhhaeq laoq Yildallil bulduila e qiqhael (100) cholyaeq e zhiqmoq'ae. 2 Yoqhhaeq laoq neemae qiqsiqmyel Momil'ae cho'lyeq hhae. Yoqhhaeq kaol aeqyotoq e cholyaeqhael gilzuqmyel Momil'ae zun eiq zunjinl gu eiq gu'ae, yoqhhaeq saeqyaeqhael'ae zhee meeq biq hhae. Momil vae duqlye heeldoq gee biq. 3 Qiq nao laoq, xalvuq sandianq laellye fu, yoqhhaeq yilxiangl onglci'ae lye loqdaeqlye Momil e mqmae yosongl qiq hhaeq yoqhhaeq'ae tyuqvae lael mol hhei biq, kaol yoqhhaeq'ae gee biq: "Ge'niqliuq!" 4 Yoqhhaeq deelhae'lye chifu hhei'laol gu li biq, gee: "Hhaoqsongl o, aeqchee maeq?" Mqmae yosongl gee: "Nol gee e heeldoq kaol meeq e zongl mael, Momil e yiqsiboq'ae keellael vae, kaol Momil nyuqdeel vae. 5 Yaeqmeel nol cholyaeq yaol Yopal'ae yil lye moqheilheil du hhei, kaol Biqdeq lye gul biq e Ximenq tyutaeq yaol bi gul laeq. 6 Yoqhhaeq laoq saeqgeel diq laqkiq Ximenq toq'ae zhol hhae, laoqhaol mael eeldeel deeljyel vae za hhae." 7 Yoqhhaeq nyegael saeziq gee'naeq e mqmae yosongl deelsae hhei'laol, yoqhhaeq lye laoqhaol e yaqhacheqzaq e cholyaeq niq nulhhaeq, kaol yoqhhaeq'ae fuqsil biq e neemae qiqsiqmyel yoqhhaeq'ae cho'lyeq e dangbinkei e qiq hhaeq yaol gul laeq, 8 Kaol xihael gilzuqmyel yoqhhaeteel'ae geegaeq hhei biq, kaol yoqhhaeteel yaol Yopal'ae yil lye moqheilheil du hhei.Biqdeq yilxiangl mol hhei biq
9 Dil'el tian, naoongl longlmae laellye fu, yoqhhaeteel milmae heeqmyel tyulmael'ae deel niqli fu, Biqdeq laoq tongqgee'ae heeldoq gee li. 10 Tyuqfu, Biqdeq oqma myeq li biq, kaol aelhoq zhee zaeq goq biq, tyutoq aelhoq caqzaq fu, yoqhhaeq'ae matutu laoqmyel zongl li biq, 11 Kaol xilnye mol hhei biq: Mqmae pong'lael, kaol moqgoq qiq mal loq gayi, haeqpael paelmae laoqmyel hhae, yuqboq myel kaltoq hhei aeqmyel milcaeq vae loq gayi. 12 Haeqpael onglci'ae milcaeq taq'ae hael dyeq e aeqkeel yuq mael cuq e jyeqyaeqhael, aeqzuqhael kaol mqmae e haeqzilhael mol hhei biq.
13 Momil yoqhhaeq'ae gee biq: "Biqdeq, tullael, xyeqzaq hhei!" 14 Biqdeq gee: "Hhaoqsongl o, xilnye maeq zongl hhaeq'ae! Ngael laoq maeqshol kaol zonglsu e zaeqzael qiqzael eiq maeq zaeq gol yil." 15 Momil dil'el cil yoqhhaeq'ae yol gee biq: "Momil lye zonglshol mael, nol maeqshol myel peqyil hhae lye maeq hhae kei'ae." 16 Xilnye suq pu laol, moqgoq tyulmael qiqlaqmyel mqmae'ae heille hoq li vae. 17 Biqdeq laoq yilxiangl xilmael aeqchee yilsi oqlolyaeq lye nyuq, haelmillye zongl maoqlye maeq loq biq fu, Ge'niqliuq lye moqheilheil du hhei e cholyaeqhael, Ximenq toq'ae saelpo keellaeq, kaol oheiq e nildu vae haoqtul deelhhei, 18 Kaol yotyel haeqheemyel naelhaeq: "Ximenq lye gul biq e Biqdeq saeqvae zhol hhaemaeq?"
19 Biqdeq laoq yilxiangl mael aeqchee yilsi maeqhe lye nyuq siq fu, senllinq mael yoqhhaeq'ae gee biq: "Naelhaeq, cholyaeq suq nulhhaeq noq'ae saelpo lael vae! 20 Yoqhhaeteel laoq ngaeq lye moqheilheil du hhei lil, tyulkaol, qiqgiq maeq nyuq kael, tullael, gaeyil kaol yoqhhaeteel nyegael qiqgael bal yil." 21 Tyulkaol, Biqdeq gaeyil kaol yoqhhaeteel e tyuqvae keelyil, gee: "Naelhaeq, ngael laoq noteel saelpo e qiq hhaeq lil. Noteel aeqchee gae'lye saeqvae lael gil lilmaeq?" 22 Yoqhhaeteel geehoq biq: "Qiqhael (100) cholyaeq e zhiqmoq Ge'niqliuq laoq gongyil e cholyaeq'ae, Momil'ae zun eiq zunjinl gu eiq gu hhae, Yoqtail milcaeq e cholyaeqhael gilzuqmyel yoqhhaeq'ae laqma deiqqei biq hhae. Senljyeq mqmae yosongl yoqhhaeq'ae noq yaol yoqhhaetoq'ae sheeqlaeq, kaol nol gee e saeziq mael naelhaeq maoqhhae lye tyuqmyeq biq." 23 Biqdeq yoqhhaeteel yaol sheeq do'li biq, kaol bi haq deelsaeq. Aeqnaol qiq nao, Biqdeq yoqhhaeteel nyegael qiqgael bal yil vae, Yopal milcaeq e aqsseq aeqnil mee'nae hhaeq eiq yoqhhaeq nyegael bal yil vae. 24 Aeqnaol qiq nao, yoqhhaeteel Kaiqsa'lilyal'ae keellael. Ge'niqliuq laoq aeqyoyoq e paeqyaeqhael kaol yelchoqhael gul'eeq deelhhei kaol yoqhhaeteel'ae doq deelhhei wae. 25 Biqdeq zhoq do'li laol, Ge'niqliuq yoqhhaeq'ae sheeqcaq yi biq, kaol yoqhhaeq e aeqkeel dongqpyeq'ae vuqduqtongq gae deelhhei yi biq. 26 Biqdeq yoqhhaeq'ae cheel yil biq, kaol gee: "Tullael, ngael eiq cholyaeq lil." 27 Biqdeq yoqhhaeq nyegael saeziq yul'ae gee laol yul'ae do'li, cholyaeq haelnaeqmyel tyuqvae zhol'eeq deelhhei mol hhei biq, 28 Kaol yoqhhaeteel'ae gee biq: "Yoqtail cholyaeq laoq baeqjyelboq minqcuq e cholyaeqhael nyegael qiqgael maeq hhae deellongq'ae lye noteel loq'ae, ngeelfeiq, Momil ngaeq'ae tyuqmyeq laeq vae, haetaeq eiq maeqshol kaol zonglsu e cholyaeq'ae lye maeq hhae fu biq'ae. 29 Tyulkaol, noteel ngaeq'ae sheeqyi laeq laol, ngael qiqgiq lye eiq maeq gee myel bael lael wae. Yaeqmeel ngael naelhaeq gil laeqngeel: Noteel ngaeq yaol sheeqyi laeq mael laoq aeqcheekaol maeq? 30 Ge'niqliuq gee: "Yuq nao laefuq'ae, xalvuq sandianq laellye fu, ngael laoqhaol vae heeldoq gee, qiqlaqmyel aelhongq zheelniqlye dum hhei e qiq hhaeq, ngaeq e yiqsiboq'ae haoqtul deelhhei, 31 Kaol gee laeq: "Ge'niqliuq, noq e heeldoq mael Momil gaeq vae, kaol nol meeq e zongl mael Momil nyuqdeel vae. 32 Nol cholyaeq yaol Yopal'ae yil lye moqheilheil du hhei, kaol Biqdeq lye gul biq e Ximenq yaol bi gul laeq. Yoqhhaeq laoq eeldeel deeljyel vae zhol e saeqgeel diq laqkiq Ximenq toq'ae zhol hhae.' 33 Tyulkaol, ngael nae'naemyel cholyaeq yaol moqheilheil du hheikaol noq yaol bi gul yil aeqlil, yaeqmeel nol lael laol meeqyaevae! Ngaeteel gilzuqmyel Momil e yiqsiboq'ae zhol, Hhaoqsongl noq'ae moqheilheil biq e gilzuqmyel saeziq mael naelhaeq maoqlye lil."
Biqdeq Ge'niqliuq toq vae Momil e saeziq geegaeq gil biq
34 Biqdeq myeqbongq gu'ngae hheikaol gee: "Ngael aeqdilmyel fudu hhei aeqwae, Momil laoq cholyaeqhael'ae qiqboq eiq maeq polzaeq'ae. 35 Hae qiqsheel e minqcuq onglci'ae aeqsul yoqhhaeq'ae zun eiq zunjinl gu eiq gu, kaol gongyil gae'lael aeqmyel zongl hael laoq, yoqhhaeq laoq yoqhhaeteel'ae zhee hhaol biq ngeelzhol'ae. 36 Momil laoq Yesu Jidu geegaeq e hoqpinq e fuqyin ae'lye Yiqsellyel cholyaeq'ae saeziq xilmael geegaeq hhei biq vae, Yesu laoq halza haelzholhael e Hhaoqsongl'ae. 37-38 Saeziq xihael Yoqhanl ciq e gui'liq mael geegaeq e aeqnaol'ae, Ja'lillil ae'lye mael Yoqtail halza milcaeq vae geegaeq keel byel yil vae. Momil lye senllinq kaol onglzaeq maellye Naqsa'lel cholyaeq Yesu yaol haelmillye saelpodu hhei hhae lye mael, xihael noteel gilzuqmyel loq'ae. Yoqhhaeq haeqvae lael'ee myel milcaeq vae yil, meeq e silqinq zongl, kaol niqhaeq lye zongltyeq biq e cholyaeqhael yaol zonglmeeq biq'ae, xilmael laoq, Momil yoqhhaeq nyegael qiqgael baelzhol kaol'ae. 39 Ngaeteel laoq yoqhhaeq Yoqtail milcaeq kaol Ye'lulsa'lenq vae haelzonglhael bael mol e cholyaeq lil. Yoqhhaeteel lye yoqhhaeq yaol shiqziljal mael'ae diqcheeq da biq, kaol yoqhhaeq yaol xyeq biq vae. 40 Dilsan tian'ae, Momil yoqhhaeq yaol bi dyeqhoqlal vae, kaol cholyaeqhael'ae bi molli, 41 Haelzhol e cholyaeq'ae myel bi mol maeqngeel'ae, Momil lye laefuqmyel saelpodu hhei e bael mol e cholyaeqhael'ae maoq maeq bi mol'ae, ngaeteel laoq yoqhhaeq cholsil onglci ae'lye dyeqhoqlal aeqnaol'ae, yoqhhaeq nyegael zaeq dol e cholyaeqhael ngeelvae. 42 Yoqhhaeq ngaeteel'ae cholyaeqhael'ae geegaeq yil biq lye moqheilheil laeq, aeqyoq laoq Momil lye geemeeq deelhhei e choldyeq kaol cholsil'ae shenqpanl e Hhaoqsongl'ae lye bi zenlminq lael. 43 Haelzhol e xianzhi yoqhhaeq'ae zoqzenl bael kei biq: Aeqyoq'ae hael xiangxinl e cholyaeqhael laoq, yoqhhaeq e cholmil ae'lye golsiq mael hhae bi shelmianq wae."
Baeqjyelboq minqcuq e cholyaeqhael'ae senllinq yo'li biq mael
44 Biqdeq saeziq gee siq fu, senllinq mael tyuqvae saeziq xilmael'ae naelhaeq e cholyaeqhael'ae yo'li biq, 45 Kaol Biqdeq nyegael qiqgael bael lael e Yesu'ae xinlzaeq e yeqgae gui'liq zongl gol e Yoqtail cholyaeqhael, senllinq e encil mael baeqjyelboq minqcuq e cholyaeqhael'ae xeiq gae hhei biq gae'lye, gaqmaq zhee zuq li gil biq'ae; 46 Yoqhhaeteel baeqjyelboq minqcuq e saeziq maellye, Momil laoq hhael heeq e qiq hhaeq'ae lye gee kaol'ae. Tyulkaol, Biqdeq gee: 47 "Cholyaeq xihael'ae ngaeteel'ae laoqmyel senllinq yo'li biq vae, kaol aeqsul yoqhhaeteel'ae eelcuq maellye shelxiq maeq bi zongl lye diqqye ongl siq maeq?" 48 Tyulkaol, Biqdeq yoqhhaeteel'ae Yesu Jidu e cholmil maellye shelxiq maoqhhae lye moqheilheil biq. Aeqnaol, yoqhhaeteel Biqdeq'ae qiqniq nao bael zholdeelsaeq lye geezaeq biq.