Biqdeq Ye'lulsa'lenq e jiaolhuil'ae geegaeq biq e saeziq
11
Shiqtuq kaol Yoqtail vae zhol e aqsseq aeqnilhael, baeqjyelboq minqcuq e cholyaeq qiq miq eiq Momil e saeziq mael naelhaeq do hhei vae lye gaeq hhei biq. 2 Biqdeq Ye'lulsa'lenq vae da keelli fu, Yesu'ae xinlzaeq e yeqgae gui'liq zongl gol e cholyaeqhael, yoqhhaeq nyegael geegae, 3 Gee: "Nol laoq yeqgae gui'liq maeq zongl yo e cholyaeqhael zael'ae yil, kaol yoqhhaeteel nyegael aelhoq qiqgael bael zaeq yil'ae she!" 4 Kaol Biqdeq laoq hal peqlal e silqinq mael qiq mal qiq mal lye yoqhhaeteel'ae gee'loq biq, gee: 5 "Ngael Yopal e milmae heeqmyel vae heeldoq gee fu, matutu laoqmyel zongl lael laeq'ae, kaol yilxiangl mol aeqwae: Haeqpael paelmae laoqmyel moqgoq qiq mal, yuqboq myel kaltoq hhei aeqmyel, mqmae ae'lye loq gayi, kaol ngaeq e yiqsi'ae keellael. 6 Ngael deelhae'lye chifu, onglci'ae milcaeq taq'ae aeqkeel yuq mael cuq e jyeqyaeq, byeldongl jyeqyaeq, aeqzuq kaol mqmae e haeqzil mol aeqwae. 7 Ngael eiq ngaeq'ae gee laeq e yotyel gaeq wae, gee: 'Biqdeq, tullael, xyeqzaq hhei!' 8 Ngael gee: 'Hhaoqsongl o! Xilnye maeq zongl hhaeq'ae! Ngael laoq maeqshol kaol zonglsu e zaeqzael qiqzael eiq myeqbongq mael'ae maeq bi do'lal gol yil.' 9 Yotyel mael dil'el cil mqmae ae'lye yol geehoq laeq: 'Momil lye zonglshol mael, nol laoq maeqshol myel peqyil hhae lye maeq hhae kei'ae.' 10 Xilnye suq pu laol, moqgoqhael gilzuqmyel mqmae'ae heille hoq li vae.11 Tyuqfu qiqlaq'ae, Kaiqsa'lilyal vae lye moqheilheil du hhei e cholyaeq suq nulhhaeq ngaeq saeqvae keellael, kaol ngael zhol e laoqhaol oheiq'ae haoqtul deelhhei. 12 Senllinq mael ngaeq'ae qiqgiq haeq nyuq myel, yoqhhaeteel nyegael qiqgael bal yil lye moqheilheil laeq'ae. Aqsseq aeqnil xi koq hhaeq eiq ngaeq nyegael qiqgael bal yil hhae, kaol ngaeteel tyutoq'ae do'li. 13 Yoqhhaeq ngaeteel'ae mqmae yosongl yaol mol wae lye xilnye geegaeq laeq: Mqmae yosongl yoqhhaetoq'ae haoqtul deelhhei kaol gee: 'Cholyaeq yaol Yopal'ae moqheilheil du hhei, kaol Biqdeq lye gul biq e Ximenq yaol gul laeq, 14 Yoqhhaeq noq'ae saeziq geegaeq laeq'ae, nol kaol notoq qiqhaoq qiqjyel myel bi deqjiul maoqlye hhae.' 15 Ngael saeziq zhoq gee laol, senllinq mael yoqhhaeteel'ae yo'li biq mael, laefuq ngaeteel'ae yo'lael fu laoqmyel hhae. 16 Ngael Hhaoqsongl gee gol e saeziq mael nyuq tullaeq laeq: 'Yoqhanl laoq eelcuq maellye shelxiqzongl hhae, ngeelfeiq, noteel yaol laoq senllinq maellye bi shelxiq maoqhhae.' 17 Momil lye yoqhhaeteel'ae biq hhei biq e encil mael laoq, ngaeteel Hhaoqsongl Yesu Jidu'ae xiangxinl e cholyaeqhael'ae biq laq mael laoqmyel qiqsheel'ae, ngael aeqsul maeq, ngael haelmillyekaol Momil'ae diqqye ongl laeq?" 18 Cholyaeqhael saeziq xihael gaeq hhei biq laol, qiqgiq lye maeq gee vae, rongqyaol mael Momil'ae biq biq, gee: "Xilnye fu hhei'laol, Momil eiq neemae paellael mael baeqjyelboq minqcuq'ae biq biq, kaol yoqhhaeteel'ae aeqyil bi za."
Antiq'a milmae heeqmyel e jiaolhuil
19 Sitiqfanq gae'lye bael zonglkyuq gil biq kaol haeqvae lael'ee myel kici byel e laqcaq tyuhael, Fei'niqji, Sailpuqlulsi kaol Antiq'a vae deel keellaeq; Yoqhhaeteel laoq Yoqtail cholyaeq maoqlaol, baeqjyelboq e cholyaeqhael'ae fuqyin mael maeq geegaeq gil biq'ae. 20 Ngeelfeiq, yoqhhaeteel onglci e Sailpuqlulsi cholyaeq kaol Guqlilnail cholyaeq qiq miq, Antiq'a vae keellael, kaol Xi'lal cholyaeq'ae Hhaoqsongl Yesu yaol geegaeq gil biq. 21 Hhaoqsongl e onglzaeq mael yoqhhaeteel nyegael qiqgael baelzhol'ae, kaol Hhaoqsongl'ae xiangxinl kaol pollael e cholyaeq nyeq'ei ta nyeq'ei hhael naeqlael vae. 22 Xilmael Ye'lulsa'lenq jiaolhuil'ae gaeq keelyil, kaol yoqhhaeteel lye Ba'naqba yaol Antiq'a vae moqheilheil du hhei. 23 Yoqhhaeq tyuqvae keelyil laol, Momil yoqhhaeteel'ae zhee meeq biq mael mol hhei biq, kaol zhee hhaol biq hhae, kaol cholyaeqhael'ae neemae maeqpaelmyel Hhaoqsongl'ae cho'lyeq maoqhhae lye geemyeq gil biq. 24 Ba'naqba laoq meeq e cholyaeq'ae, senllinq kaol xinlxin bong'lye za, tyulkaol, haelnaeqmyel cholyaeq laoq Hhaoqsongl boq'ae pollael vae. 25 Aeqnaol, yoqhhaeq eiq Dalsul vae Saoqloq'ae saelpo yil, 26 Saelpo hhei'laol, yoqhhaeq yaol Antiq'a vae sheeqlaeq biq. Yoqhhaeteel hhaellaelmyel jiaolhuil vae julhuilkei, kaol haelnaeqmyel cholyaeqhael'ae geemyeq biq mael bong'lye qiq hoq zoq wae. Zhoqmyel fu laqcaqhael'ae jidutuq lye gul biq mael laoq Antiq'a ae'lye hhae. 27 Tyuqfu, xianzhi mee'nae hhaeq Ye'lulsa'lenq ae'lye Antiq'a vae gaeyil. 28 Xihael onglci'ae Yaljabul lye gul biq e qiq hhaeq haoqtul lael, senllinq ae'lye yoqhhaeq'ae tyuqmyeq biq, kaol mqmae holhhaq'ae hoqlaq teel eiq maeqmeeq qiqgiq zaeq teel eiq maqza myel peqlal maoqlye hhae lye geedu hhei, xilmael aeqdilmyel Kellaoqdil zongmae geiq fu peqlal vae. 29 Tyulkaol, laqcaqhael aeqyoyoq dyuqbaq haeldyul heildu ongl laol haeldyul heildu hhei maoqlye nyuqmeeq wae, kaol Yoqtail milcaeq vae zhol e aqsseq aeqnilhael'ae heil yil biq maoqlye hhae. 30 Kaol yoqhhaeteel xilnye zongl vae, Ba'naqba kaol Saoqloq yaol dyuqbaq mael zhangqlaoqhael e tyuqvae bi heil keelyil.