Xi'lyul lye Yaqgel yaol xyeq biq, Biqdeq yaol koqlongl biq
12
Tyuqfu, Xi'lyul Yaljipal zongmae e aqlaq mael jiaolhuil e cholyaeq qiq miq'ae guaeq'ei diqqye biq, 2 Kaol Yoqhanl e algo Yaqgel yaol maejyel maellye xyeq biq. 3 Yoqhhaeq laoq xilnye zongl mael Yoqtail cholyaeqhael zhee hhaol biq she lye mol hhei biq, kaol Paofenq Maqzoq Zaeqnao tyu qiqtongq'ae, Biqdeq yaol eetyeq biq. 4 Eetyeq hhei'laol, yoqhhaeq yaol laoqgaiqkei laoqhaol vae koqlongl biq, kaol dangbinkei e yuq miq'ae qiq miq aeqnaol'ae qiq miq bi fu'qye hhae, qiq miq laoq yuq hhaeq'ae, Yuq'yeqjyeq gol hhei'laol, yoqhhaeq yaol ee duyil kaol cholyaeqhael'ae sheeqmoq biq maoqlye nyuqzaeq hhae. 5 Tyulkaol, Xi'lyul lye Biqdeq yaol laoqgaiqkei laoqhaol vae koqlongl biq hhae. Ngeelfeiq, jiaolhuil cholyaeqhael laoq maqqyemyel yoqhhaeq gae'lye Momil'ae heeldoq gee biq.Mqmae yosongl lye Biqdeq yaol jiul duhoq yi biq
6 Xi'lyul yoqhhaeq yaol ee duyi maoqlye e laefuq qiq mil, Biqdeq yaol sulmca niq ca maellye kaltoq deelhhei myel, dangbinkei e cholyaeq niq nulhhaeq e kaeqlaeq'ae bi ssuqza deelhhei, kaol dangbinkei e cholyaeq oheiq nildu vae songlqye deelhhei wae siq. 7 Qiqlaqmyel, Hhaoqsongl e mqmae yosongl qiq hhaeq mol du'lal, cholyaeq koqlongl e laoqhaol vae zheelniqlye wae. Mqmae yosongl Biqdeq e nulhhael dongqpyeq'ae pa hhei biq, kaol gulnyuq biq, gee: "Wae tullael!" Sulmca mael yoqhhaeq e aqlaq ae'lye gaepyel hhei vae. 8 Mqmae yosongl yoqhhaeq'ae gee biq: "Haeqpi paqda hhei, kaol paqno nuq da hhei." Kaol yoqhhaeq xilnye zongl vae. Mqmae yosongl yol gee: "Aelhongq poljye mael dumda hhei, kaol ngaeq nyegael bael deel." 9 Yoqhhaeq duyi kaol mqmae yosongl nyegael qiqgael bael deel vae, ngeelfeiq, yoqhhaeq laoq mqmae yosongl zongl mael aeqdilmyel hhae lye maeq loq biq wae siq, yilxiangl mol lael hhae lye kei biq hhae. 10 Yoqhhaeteel laoq dilyiq gol, dil'el gol cholyaeq songlqye myel ae'lye deelpol duyil, milmae heeqmyel'ae do'li e sulm oheiq vae keellael, oheiq tyulmael aeqyoyoq myel yoqhhaeteel'ae pong hhei biq. Kaol yoqhhaeteel duyi vae, gaiziq qiqgael'ae deelpol duyil, mqmae yosongl qiqlaqmyel yoqhhaeq zaellye deelsae hhei vae. 11 Biqdeq nyuqgeel li biq vae, gee: "Yaeqmeel ngael aeqdilmyel loq wae, Hhaoqsongl aeqyoq e mqmae yosongl yaol moqheilheil du hhei, kaol ngaeq yaol Xi'lyul e aqlaq ae'lye kaol Yoqtail cholyaeqhael bi peqlal goq biq e silqinq onglci ae'lye jiul duhoq yi laq vae." 12 Yoqhhaeq loq li biq laol, Yoqhanl e aeqmae Maqlilyal toq'ae li. Yoqhanl vae Maqkeq lye eiq gul biq hhae. Tyutoq'ae haelnaeqmyel cholyaeq zhol'eeq deelhhei kaol heeldoq gee gil'ae.
13 Biqdeq nildu oheiq mael'ae cheq li, Loqdal lye gul biq e yaqhacheqzaq e haeqmiyaeq qiq hhaeq oheiq pong yi biq. 14 Yoqhhaeq Biqdeq e yotyel yae lye naelhaeq du hhei'laol, hhaol biq kaol oheiq pong maq lo biq myel ki do'li kaol Biqdeq oheiq nildu'ae haoqtul deelhhei hhae lye geegaeq li gil biq. 15 Cholyaeqhael gee: "Nol mu biq vae laoq." Ngeelfeiq, yoqhhaeq laoq aeqdilmyel ngeel hhae lye gee gil biq. Yoqhhaeteel gee: "Tyutaeq laoq yoqhhaeq e mqmae yosongl'ae." 16 Biqdeq maqqyemyel oheiq mael'ae cheq; yoqhhaeteel oheiq pong hhei'laol, yoqhhaeq yaol mol hhei biq, kaol gaqmaqzuq li gil biq'ae. 17 Biqdeq yoqhhaeteel'ae yotyel haq du lye aqlaq biq biq, kaol yoqhhaeteel'ae Hhaoqsongl haelmillye yoqhhaeq yaol laoqgaiqkei laoqhaol ae'lye sheeq duhoq yi laq hhae lye mael geegaeq gil biq, yol gee: "Noteel xihael Yaqgel kaol aqsseq aeqnilhael'ae geegaeq hhei gil biq." Kaol tyuqvae lye deelsae hhei vae, kaol baeqjyelboq e milcaeq vae yil vae. 18 Mqbaebae lael fu, dangbinkei e cholyaeqhael Biqdeq'ae aeqchee zongl li biq hhae lye maeq loq gil biq, kaol aeqvuqlaelvuqmyel zongl bonggaebyel'ae. 19 Xi'lyul Biqdeq yaol saelpo hhae, ngeelfeiq, yoqhhaeq yaol maeq saelpopuq hhei ongl biq'ae, kaol oheiq'ae fu'qyezaq e cholyaeqhael'ae heqnaelhaeq biq, kaol yoqhhaeteel yaol ee duyil kaol xyeq yil lye minllinl gil biq. Aeqnaol, Xi'lyul Yoqtail milcaeq vae lye deelsae hheikaol, Kaiqsa'lilyal vae gaeyil vae, kaol tyuqvae zholgae hhei vae.
Momil lye Xi'lyul yaol bi sil vae
20 Tyuqfu, Xi'lyul laoq Tui'loq cholyaeq kaol Xidunl cholyaeq'ae faqhoqkei biq. Xi niqgael cholyaeqhael e zaelsiq mael laoq zongmae tyuqvae lye hhae'lael biq hhae, tyulkaol, yoqhhaeteel zongmae e nulyaeq vae zhaofuzaeq e Boqlasidu yaol geepolzaeq li, kaol yoqhhaeteel neemae qiq siq laoqmyel Xi'lyul'ae mol yil, kaol yoqhhaeq nyegael maoqhoqli maoqlye zongl hhae. 21 Geemeeq deelhhei e naohaeq keellael laol, Xi'lyul laoq zongmae e aelhongq mael dumda hhei, kaol zongmae duqtyel mael'ae zhol da'li, kaol yoqhhaeteel'ae saeziq geegaeq gil biq. 22 Cholyaeqhael yotyel haeqheemyel gul: "Xilmael laoq momil e yotyel'ae, cholyaeq e yotyel maeqngeel'ae." 23 Xi'lyul rongqyaol mael Momil'ae maq biq biq'ae, tyulkaol, Hhaoqsongl e mqmae yosongl yoqhhaeq'ae qiqlaqmyel diq biq, kaol yoqhhaeq'ae aeqzuq maellye bi koq kaol bi sil vae. 24 Momil e saeziq mael'ae xiangxinl e cholyaeq nyeq'ei ta nyeq'ei hhael naeqlael, kaol yoqhhaeteel lye Momil e saeziq mael haeqvae lael'ee myel geegaeq du beq yil, 25 Ba'naqba kaol Saoqloq dyuqbaq mael heil keelyil biq laol, Maqkeq lye gul biq e Yoqhanl yaol sheeq hheikaol Ye'lulsa'lenq ae'lye hoqlal vae.