Ba'naqba kaol Saoqloq yaol moqheilheil duyil
13
Antiq'a jiaolhuil vae, xianzhi kaol laoqsi mee'nae hhaeq zhol'ae, yoqhhaeteel laoq Ba'naqba, Niqjyeq lye gul biq e Ximianl, Guqlilnail cholyaeq Lulqiuq, tyuqvae milcaeq e Xi'lyul zongmae nyegael qiqgael heeqda lal e Maq'nianl kaol Saoqloq'ae. 2 Yoqhhaeteel Hhaoqsongl'ae heel biq, kaol maeq zaeq myel zhol fu, senllinq mael gee biq: "Ngaeq gae'lye Ba'naqba kaol Saoqloq yaol zonglqyel du hhei maoqhhae, kaol ngael yoqhhaeteel'ae bi zongl maoqlye mulhhael mael bi zongl yil." 3 Tyulkaol, yoqhhaeteel maeq zaeq myel heeldoq gee gil, kaol yoqhhae niq nulhhaeq'ae aqlaq baqcheeq da hhei biq, kaol yoqhhaeteel yaol moqheilheil duyil vae.Baoqloq dilyiq cil fuqyin geegaeq yil
4 Senllinq lye yoqhhaeteel yaol moqheilheil duyil biq hhae, tyulkaol, yoqhhaeteel Xi'liuqji'ae gae keelyil vae, kaol tyuqvae lye hoq zhol hheikaol Sailpuqlulsi daoq vae yil vae. 5 Yoqhhaeteel Saqlamiq vae keellael, kaol Yoqtail cholyaeq e hae qiqgael e huiltangq vae Momil e saeziq mael geegaeq gil biq, Yoqhanl laoq yoqhhaeteel'ae baelzongl biq hhae. 6 Yoqhhaeteel daoq vae deeldyu byel vae, Palfuq vae keellael, Ba Yesu lye gul biq e Yoqtail cholyaeq deelpuq hhei biq, yoqhhaeq laoq niqhaeq tulzaeq hhae, jaq xianzhi eiq ngeel hhae. 7 Cholyaeq xitaeq laoq Shilqiuq Baoqloq shenqzhangq nyegael duqlye qiqgael zhol hhae. Shilqiuq Baoqloq laoq zhee geel hhae, yoqhhaeq laoq Ba'naqba kaol Saoqloq yaol gul laeq, kaol Momil e saeziq mael naelhaeq maoqlye hhae. 8 Ngeelfeiq, niqhaeq tulzaeq e Yiqlyuqmaq laoq shiqtuqhael'ae diqqye biq hhae, kaol shenqzhangq yaol xinlyangq xilmael'ae lye bi deelsae maoqlye zongl hhae. Yiqlyuqmaq laoq "niqhaeq tulzaeq" e yilsi'ae. 9 Baoqloq lye gul biq e Saoqloq'ae laoq, senllinq mael bong'lye za hhae, kaol yoqhhaeq'ae deelhae'lye chifu biq, 10 Gee: "Nol laoq maeq qiqsheel e zaqgiqgiq kiq kaol duqlaq mael bong'lye za e cholyaeq'ae, niqhaeq haeqmae e yaqyo, nol laoq gilzuqmyel gongyil e diqrenq'ae, noq lye Hhaoqsongl e zhoqsae'lye gaelmae mael zongl oq hhei, nol zail zongl maoq siq maeq? 11 Naelhaeq, yaeqmeel Hhaoqsongl e aqlaq mael noq'ae yo'lael wae, nol mabyeqbyeq yil hhei, kaol xi qiqtongq'ae aeqcael maeq mol congl wae." Kaol yoqhhaeq'ae qiqlaqmyel zhiqhaoq kaol nahongqlye mael congqkaeq biq, kaol baeqjyelboq e cholyaeq'ae yoqhhaeq e aqlaq mael cheel hheikaol gaelmae bi sheeqmyeq hhae. 12 Shenqzhangq laoq peqlal e xilmael mol hhei biq laol xiangxinl vae, yoqhhaeq Hhaoqsongl e geemyeq mael'ae gaqmaqzuq li biq kaol'ae.
Baoqloq Biqxidiq e Antiq'a vae zhol
13 Baoqloq kaol yoqhhaeq nyegael qiqgael bal zoq hael Palfuq vae lye hoq zhol hheikaol, Panqfei'lilyal milcaeq e Byeqja vae keellael, ngeelfeiq, Yoqhanl laoq yoqhhaeteel zaellye deelsae hhei, kaol Ye'lulsa'lenq vae hoqli vae. 14 Yoqhhaeteel Byeqja ae'lye laefuqboq'ae deel du'li, Biqxidiq milcaeq e Antiq'a vae keellael, anxiqriq'ae huiltangq vae do'li kaol zholgae hhei gil'ae. 15 Lilfaq kaol xianzhi e Suqhhaq mael duq hhei'laol, huiltangq'ae guanq e cholyaeq lye cholyaeq yaol yoqhhaeteel tyuqvae moqheilheil du hhei, kaol bi gee: "Aqsseq aeqnilhael, cholyaeqhael'ae aeqchee geemyeq biq maoqlye kaollaoq, geemyeq hhei gil biq."
16 Kaol Baoqloq tullael, aqlaq baqqei hhei, gee: "Yiqsellyel cholyaeqhael kaol Momil'ae zun eiq zunjinl gu eiq gu e cholyaeqhael naelhaeq gil." 17 Yiqsellyel cholyaeq e Momil lye ngaeteel e aeqpyuq aeqdae yaol saelpodu hhei. Yoqhhaeteel Aijiq milcaeq vae baelzhol gil fu, Momil lye yoqhhaeteel yaol deiqqei da hhei, zhee onglzaeq e aqlaq maellye yoqhhaeteel yaol tyuqvae lye sheeq duyi biq; 18 Momil diqsheelleeldye vae yoqhhaeteel'ae yuqqyel hoq laellye baorongq biq wae. 19 Momil lye Ja'nanq milcaeq e siq gol minqcuq yaol bi zonglmye e aeqnaol'ae, tyuqvae milcaeq mael yoqhhaeteel wae lye byel hhei gil biq; 20 Aijiq'ae zhol fu ae'lye mael Ja'nanq'ae do'li fu keellye, gilzuqmyel yuqhael ngaeqqyel (450) hoq laellye zoq wae. Aeqnaol, Samuq'eq xianzhi fu keellye, Momil yoqhhaeteel'ae shenqpanl e zhiqmoq biq biq. 21 Tyuqfu, yoqhhaeteel zongmae qiq hhaeq mul maoqlye geezaeq, kaol Momil lye Bianlyaqminq zhipail onglci e Jishil e yaqyo Saoqloq yaol, yoqhhaeteel e zongmae yuqqyel hoq bi geiq vae. 22 Momil lye Saoqloq yaol zongmae maeq bi geiq aeqnaol, yoqhhaeteel'ae Dalweil yaol zongltul hhei biq kaol zongmae bi geiq, kaol yoqhhaeq'ae zoqzenl bael kei biq, gee: 'Ngael Yexi e yaqyo Dalweil yaol saelpopuq hhei wae, yoqhhaeq laoq ngaeq e neezae'lael e cholyaeq'ae, yoqhhaeq laoq ngaeq e zhiqyil laoqmyel zongl yil maoqhhae.'
23 Momil aeqyoq biq laqngeel lye gee gol laoqmyel, cholyaeq xitaeq e houldail onglci ae'lye Yiqsellyel cholyaeq'ae jiulzuq qiq hhaeq sheeqlaeq biq, xitaeq laoq Yesu ngeelvae. 24 Yoqhhaeq maq du'lal laefuq'ae, Yoqhanl Yiqsellyel cholyaeqhael'ae neemae paellael e ciq e gui'liq geegaeq gol gil biq vae. 25 Yoqhanl aeqyoq haelzongl maoqlye mael zonglbyel maoq fu, gee: 'Noteel ngael aeqsul'ae lye kei gil laeq hhaemaeq? Ngael Jidu maeqngeel yil. Aeqgael ngaeq e aeqnaol'ae lael maoqlye e qiq hhaeq, ngael yoqhhaeq'ae aeqkeel e paqno alca bael keelpyel biq dyel'eiq maeq zae.'
26 "Aqsseq aeqnilhael, Yalboqlahanl e houldailhael kaol noteel onglci'ae Momil'ae zun eiq zunjinl gu eiq gu e cholyaeqhael o! Jiul'en e saeziq xilmael laoq aedeeteel'ae geegaeq laeq hhae. 27 Ye'lulsa'lenq vae zhol e cholyaeqhael, kaol yoqhhaeteel e yoheeqhael, yoqhhaeq laoq Jidu'ae lye maeq loq biq, haeqfu qiqzael anxiqriq'ae, xianzhihael gee e saeziq mael duq feiq maeq loq gil biq, kaol yoqhhaeq'ae golsiq za'ae lye gee biq mael laoq, xianzhihael gee e saeziq mael peqlal vae kaol'ae. 28 Yoqhhaeteel laoq yoqhhaeq hhae sil e golsiq maeq saelpodu hhei feiq, Biqlado'ae yoqhhaeq yaol xyeq hhei lye geezaeq biq. 29 Yoqhhaeteel laoq yoqhhaeq'ae hal peqlal maoqlye cu deelhhei mael zonglbyel hhei'laol, yoqhhaeq yaol shiqziljal taq ae'lye pyeqgae hhei, kaol fuq'ongl onglci'ae baqdeel hhei. 30 Ngeelfeiq, Momil lye yoqhhaeq yaol cholsil onglci ae'lye bi dyeqhoqlal vae. 31 Naohaeq tyu qiqtongq'ae, yoqhhaeq laoq aeqyoq nyegael Ja'lillil ae'lye Ye'lulsa'lenq'ae bael li e cholyaeqhael'ae bi molli, yaeqmeel cholyaeq xihael cholyaeqhael e yiqsi vae yoqhhaeq'ae zoqzenl bael kei biq hhae, 32 Ngaeteel laoq noteel'ae fuqyin geegaeq laeqngeel: Momil aeqpyuq aeqdae'ae biq laqngeel lye gee gol biq e saeziq mael, 33 Yesu dyeqhoqlal gae'lye, ngaeteel yuqpaeq yuqnyul geiq hael'ae bi peqlal laq vae. Shipian dil'el pian taq'ae cu deelhhei laoqmyel:
'Nol laoq ngaeq e Yaqyo'ae,
yaeqnao ngael noq e aeqdae geiq maoq.'
34 Kaol Momil yoqhhaeq yaol cholsil onglci ae'lye bi dyeqhoqlal, kaol qiqzael eiq maq buq gayil kiq, yoqhhaeq xilnye gee gol:
'Ngael Dalweil'ae biq laqngeel lye gee gol biq e,
senljyeq kaol aeqdilmyel e geeqlongq mael,
noteel'ae biq laqngeel.'
35 Tyulkaol, yoqhhaeq baeqjyelboq e yil pian'ae gee:
'Nol laoq noq e senljyeq qiqhhaeq yaol maeq bi buq gayil'ae.'
36 "Dalweil yoqhhaeq aeqyoyoq e naohaeq'ae, Momil nyuqmeeq deelhhei laoqmyel zongl yil, aeqnaol yoqhhaeq yuqxul vae, aeqpyuq aeqdaehael zael'ae da'li vae, kaol aeqhhaol mael eiq buq ga vae. 37 Momil bi dyeqhoqlal e tyu qiq hhaeq maoqlaol, maq buq ga myel qiq hhaeq eiq maeq zhol'ae. 38 Tyulkaol, aqsseq aeqnilhael, noteel loq maoqhhae, golsiq mael shelmianq mael laoq Yesu xitaeq lye noteel'ae geegaeq hhei biq hhae. Noteel Moxi e lilfaq mael'ae kaolzaeq ae'lye gongyil e cholyaeq'ae lye maeq hhae bi gul e gilzuqmyel silqinq taq'ae, 39 Yesu'ae xinlzaeq e cholyaeqhael'ae laoq gongyil e cholyaeq'ae lye hhae bi gul wae. 40 Noteel aeqyae'lye kei maoqhhae, aeqgael xianzhihael e suqhhaq taq'ae gee mael noteel'ae yo'lael maeqhe:
41 'Ngael noteel e naohaeq'ae mulhhael qiq mal mul maoq,
ochoq noteel'ae geegaeq biq feiq,
noteel qiqzael eiq maeq xiangxinl,
tyulkaol, naelhaeq gil,
Momil'ae maeq fu'qiq'ongl e cholyaeqhael o!
Noteel gaqmaqzuq kaol myeyil maoqlye hhae.'"
42 Baoqloq kaol Ba'naqba duyi fu, cholyaeqhael yoqhhaeteel'ae aeqgael qiq pu anxiqriq vae, yoqhhaeteel'ae saeziq xihael geegaeq lael laeq siq lye geezaeq biq. 43 Julhuilkei du hhei'laol, Yoqtail cholyaeq kaol xinlyangq meeq e Yoqtail jiaol'ae xiangxinl e cholyaeqhael Baoqloq kaol Ba'naqba'ae cho'lyeq li vae. Yoqhhae niq nulhhaeq yoqhhaeteel'ae haelmeeqlye gee biq, Momil e endianq onglci'ae duqlye zhol gaeyil maoqhhae lye geemyeq biq.
44 Aeqnaol qiq pu anxiqriq'ae, milmae heeqmyel e cholyaeqhael gilzuqmyel lael laoqmyel wae, kaol Hhaoqsongl e saeziq mael'ae naelhaeq maoqlye zhol'eeq deel beq hhei vae. 45 Yoqtail cholyaeqhael laoq haelnaeqmyel cholyaeq xihael mol hhei biq, kaol heiqcil zhee nael gil biq'ae, kaol Baoqloq gee mael maq hoq'ae lye gee, kaol yoqhhaeq'ae geekyuq biq. 46 Baoqloq kaol Ba'naqba laoq teel eiq maq gu myel gee: "Momil e saeziq mael, noteel'ae laefuq geegaeq biq mael laoq, aeqdilmyel xilnye zongl maoqhhae. Ngeelfeiq, noteel saeziq xihael maeq naelhaeq nae'ae, aeqyoyoq laoq haeqfu eiq zadeel e aeqyil mael'ae maeq zae yae lye kei biq, tyulkaol, yaeqmeel ngaeteel baeqjyelboq minqcuq e cholyaeqhael boq'ae zipol yil maoq vae. 47 Hhaoqsongl ngaeteel'ae xilnye moqheilheil gol laq kaol'ae:
'Ngaeq lye noq yaol baeqjyelboq minqcuq e
cholyaeqhael e aeqcael bi geiq,
kaol noq yaol jiul'en mael milcaeq taq'ae
haeqvae eiq bi geegaeq keelyil.'"
48 Baeqjyelboq minqcuq e cholyaeqhael gaeq hhei biq laol, zhee hhaol biq, Hhaoqsongl e saeziq mael'ae laqma deiqqei biq, aeqsul laoq haeqfu eiq zadeel e aeqyil mael hhamul'ae lye geemeeq deelhhei hael laoq, gilzuqmyel xiangxinl vae. 49 Tyulkaol, Hhaoqsongl e saeziq mael tyuqvae milcaeq vae gaeqbyel yil vae. 50 Ngeelfeiq, Yoqtail cholyaeqhael laoq neemae qiqsiqmyel Momil'ae cho'lyeq e maduq zhee za e cholhae aeqmaehael, kaol milmae heeqmyel'ae aeqsul eiq loq e cholyaeqhael'ae maeqmeeqmyel tyuqcuq biq, kaol yoqhhaeteel'ae Baoqloq kaol Ba'naqba vae guaeq'ei bi diqqye hhae. Yoqhhaeteel lye Baoqloq kaol Ba'naqba yaol tyuqvae milcaeq ae'lye lyeqsae gil biq vae. 51 Yoqhhae niq nulhhaeq cholyaeqhael e yiqsi ae'lye aeqkeel mael'ae su e haeqlyel mael nuqhael gae hhei, kaol Yiqge'nianl e milmae heeqmyel vae yil vae. 52 Laqcaqhael'ae hhaol mael kaol senllinq mael bong'lye za.