Baoqloq kaol Ba'naqba Yiqge'nianl vae zhol
14
Baoqloq kaol Ba'naqba Yiqge'nianl vae, haelzael'ae laoqmyel Yoqtail e huiltangq vae do'li kaol Momil e saeziq geegaeq gil biq, tyulkaol, haelnaeqmyel Yoqtail cholyaeq kaol Xi'lal cholyaeq gilzuqmyel xiangxinl vae. 2 Ngeelfeiq, maeq xiangxinl nae e Yoqtail cholyaeqhael laoq, baeqjyelboq minqcuq e cholyaeqhael'ae cheeqmu biq hhae, xilnye zongl mael laoq, yoqhhaeteel e neemae onglci'ae lye aqsseq aeqnilhael'ae neema bi su zaq maoqlye hhae. 3 Ngeelfeiq, yoqhhae niq nulhhaeq laoq tyuqvae haelnaeq zhol vae, Hhaoqsongl gae'lye maqguzaq myel Momil e saeziq mael geegaeq gil biq, Hhaoqsongl yoqhhaeteel e aqlaq ae'lye shenqjiq kaol maeqdaeqhhaeq e silqinq zongl du hhei, kaol yoqhhaeq e endianq e xiaoxiq mael zenlminq du hhei vae. 4 Milmae heeqmyel e cholyaeqhael niqboq peqyil vae, qiq miq laoq Yoqtail cholyaeq boq'ae pol, qiq miq laoq shiqtuq boq'ae pol. 5 Tyuqfu, baeqjyelboq minqcuq e cholyaeqhael, Yoqtail cholyaeqhael, kaol yoqhhaeteel e yoheeqhael, shiqtuqhael'ae geekyuq goq biq, kaol haqlo maellye beiqsil maoqlye zhee zongl goq biq wae. 6 Yoqhhae niq nulhhaeq loq hhei biq laol, Lyuqgaoniq e Lulsideq kaol Telbil milmae heeqmyel xi niq gael'ae, kaol dongqpyeq dongqjyel e milcaeq vae kihhaq yil vae, 7 Kaol tyuqvae fuqyin geegaeq gil biq.Baoqloq kaol Ba'naqba Lulsideq vae zhol
8 Lulsideq milmae heeqmyel vae, aeqkeel niqboq aqha maq zoq myel qiq hhaeq zhol deelhhei'ae. Yoqhhaeq laoq bogae hhei fu ae'lye aeqkeel maq dyeq biq hhae, qiqzael eiq gaelmae maeq deel gol'ae. 9 Yoqhhaeq Baoqloq gee e Momil e saeziq mael naelhaeq; Baoqloq yoqhhaeq'ae deelhae'lye chifu biq, yoqhhaeq xinlxin za kaol zonglmeeq ongl she lye mol hhei biq, 10 Kaol yotyel haeqheemyel gee: "Nol tullael, aeqkeel niqboq myel haoqzhoq deelhhei!" Kaol yoqhhaeq dilqei tullaeq, kaol gaelmae deel tullaeq.
11 Cholyaeqhael Baoqloq zongl mael mol hhei biq laol, Lyuqgaoniq saeziq maellye yotyel haeqheemyel gee: "Momilhael cholyaeq e yanglziq ae'lye ngaeteel saeqvae gaeyi vae!" 12 Tyulkaol, yoqhhaeteel Ba'naqba'ae Zhoulsia lye gul biq hhae, Baoqloq laoq haeqfu qiqzael eiq saeziq laefuq gee e qiq hhaeq'ae lyekaol, yoqhhaeq'ae Xi'eqmiq lye gul biq hhae. 13 Milmae heeqmyel e oheiq e yiqsi'ae Zhoulsi miaol vae zhol e jilsi, aeqnuq lalbu qiqniq keel cheel hhei, kaol alyi yi'ongq heil hhei myel oheiq vae keellael, kaol cholyaeqhael nyegael zaelheel qiqgael heel maoqlye zongl gil hhae.
14 Shiqtuq Baoqloq kaol Ba'naqba gaeq hhei biq laol, hol biq kaol aelhongq mael eezi hhei, kaol cholyaeqhael onglci'ae ki do'li, gul gae'lael aeqmyel gee: 15 "Cholyaeqhael, aeqcheekaol xilnye zongl gil lilmaeq? Ngaeteel eiq cholyaeq lil, noteel laoqmyel cholyaeq lil. Ngaeteel noteel'ae fuqyin geegaeq mael laoq, noteel yaol qiqgiq yilsi maqza myel xihael ae'lye deelsae hhei, kaol mqmae milcaeq, eeldeel deelmae kaol halza haelzholhael zongldu hhei e, haeqfu eiq dyeqdeel e Momil boq'ae polhoqlael maoqhhae lye kaollil. 16 Yilkaefu e naohaeq'ae, yoqhhaeq laoq halza e goqja e cholyaeqhael haelmillye zongl goq laol haelmillye bi zongl hhae, 17 Yoqhhaeq duqlye meeq e silqinq zongl, mqmae ae'lye aeq'yel bi yelgae hhei, hoqlaq haelmeeqlye bi meeq, kaol noteel'ae hhae bi zaeqdye doldye, kaol neemae bi hhaol, xihael gae'lye yoqhhaeq laoq aeqdilmyel zhol lil lye zenlminq hhae." 18 Yoqhhae niq nulhhaeq saeziq xihael gee byel hheikaol cholyaeqhael yaol yoqhhaeteel'ae maeq bi baqheel myel caiq diqqye hhei wae siq. 19 Ngeelfeiq, Yoqtail cholyaeq qiq miq laoq, Antiq'a, Yiqge'nianl ae'lye lael, kaol cholyaeqhael'ae maeqmeeqmyel tyuqcuq biq, haqlo maellye Baoqloq'ae beiq biq, yoqhhaeteel yoqhhaeq sil vae lye kei gil biq, kaol yoqhhaeq yaol milmae heeqmyel nilduboq'ae ee duyil biq. 20 Laqcaqhael yoqhhaeq'ae ongtyeq deelhhei gil fu, yoqhhaeq ki tullael kaol milmae heeqmyel'ae do'li vae. Aeqnaol qiq nao, yoqhhaeq Ba'naqba nyegael Telbil'ae qiqgael yil vae.
Baoqloq kaol Ba'naqba Xullilyal e Antiq'a vae hoq keellael
21 Yoqhhaeteel tyuqvae milmae heeqmyel'ae fuqyin geegaeq gil biq, kaol haelnaeqmyel cholyaeq laqcaq peqlal vae, aeqnaol yoqhhaeteel Lulsideq, Yiqge'nianl kaol Antiq'a vae hoq keellael, 22 Kaol laqcaqhael'ae xinlxin hhael bi za lal, kaol haeqfu eiq xinl gaeyil maoqhhae lye haelmeeqlye gee biq, yol gee: "Aedeeteel Momil e Goqja'ae do'li maoqlye laol, haeldyul dyulmae hhae saeq hhae." 23 Yoqhhae niq nulhhaeq lye hae qiqgael jiaolhuil vae eiq zhangqlaoq geiq e cholyaeq saelpodu hhei gil biq; maeq zaeq myel heeldoq gee gil hhei'laol, yoqhhaeteel yaol yoqhhaeteel xiangxinl e Hhaoqsongl'ae toqshiq hhei biq. 24 Yoqhhae niq nulhhaeq Biqxidiq ae'lye deelpol duyil, kaol Panqfei'lilyal vae keellael, 25 Byeqja vae Momil e saeziq geegaeq gil biq, aeqnaol laoq Yaldallil vae gaeyil vae, 26 Kaol tyuqvae lye hoq zhol hheikaol Antiq'a vae hoqyil vae. Laefuq cholyaeqhael saeqvae lye, yoqhhaeteel yaol Momil e endianq onglci'ae toqshiq hhei biq, kaol yoqhhaeteel yaol mulhhael mul yil lye moqheilheil du hhei, yaeqmeel yoqhhaeteel zonglbyel wae. 27 Kaol yoqhhaeteel tyuqvae keellael laol, cholyaeqhael gul'eeq beq hhei, kaol Momil yoqhhaeteel ae'lye haelzongl e silqinq, kaol Momil baeqjyelboq minqcuq e cholyaeqhael vae xinlyangq e oheiq mael pong hhei biq vae lye geegaeq gil biq. 28 Yoqhhae niq nulhhaeq laqcaqhael nyegael qiqtongq baelzhol vae.