Cholyaeqhael Ye'lulsa'lenq vae kaihuilkai gil
15
Cholyaeq mee'nae hhaeq Yoqtail milcaeq ae'lye gaeyi, kaol aqsseq aeqnilhael'ae geemyeq gil biq, gee: "Noteel Moxi e gee deelhhei e saeziq laoqmyel yeqgae gui'liq maeq zongl kaollaoq, maeq hhae deqjiul'ae." 2 Baoqloq kaol Ba'naqba, yoqhhaeteel nyegael deiqgae kaol geegae tullaeq. Tyulkaol, cholyaeqhael laoq Baoqloq, Ba'naqba kaol yoqhhaeteel onglci e mee'nae hhaeq yaol, geegae gil e xilmael gae'lye Ye'lulsa'lenq vae da'li kaol shiqtuqhael kaol zhangqlaoqhael'ae mol li lye moqheilheil du hhei. 3 Tyulkaol, jiaolhuil e cholyaeqhael yoqhhaeteel'ae qiq qye bael sheeq duhoq yil biq. Yoqhhaeteel Fei'niqji, Saqmaqlilyal vae deelpol duyil, kaol baeqjyelboq minqcuq e cholyaeqhael haelmillye Hhaoqsongl'ae pollael hhae lye mael geegaeq gil biq, kaol aqsseq aeqnilhael zhee hhaol gil biq'ae. 4 Yoqhhaeteel Ye'lulsa'lenq vae keellael laol, jiaolhuil e cholyaeqhael, shiqtuqhael kaol zhangqlaoqhael yoqhhaeteel'ae sheeqcaq biq, kaol yoqhhaeteel laoq Momil yoqhhaeteel'ae bi zongl e silqinq mael geedu gil biq. 5 Ngeelfeiq, Faqlilsail pail e Yesu'ae xinlzaeq e cholyaeq mee'nae hhaeq haoqtul lael kaol gee: "Aedeeteel aeqdilmyel baeqjyelboq minqcuq e cholyaeqhael'ae yeqgae gui'liq zongl biq maoqhhae, yoqhhaeteel'ae Moxi e lilfaq mael zongl gaeyil lye moqheilheil biq maoqhhae."6 Shiqtuqhael kaol zhangqlaoqhael qiqgael zhol'eeq deelhhei, kaol xilmael gae'lye geedazaq gil'ae. 7 Haeldyul dyulmae geegae gil laol, Biqdeq haoqtul lael kaol yoqhhaeteel'ae gee biq: "Aqsseq aeqnilhael, noteel loq'ae, laefuq qiqtongq'ae, Momil noteel onglci'ae ngaeq yaol saelpodu hhei laeq, kaol baeqjyelboq minqcuq e cholyaeqhael ngaeq e myeqbongq ae'lye fuqyin e saeziq mael hhae gaeq hhei biq, kaol xiangxinl vae. 8 Cholyaeq e neemae mael loq e Momil yoqhhaeteel'ae zoqzenl bael kei biq, kaol yoqhhaeteel'ae senllinq mael biq hhei biq mael kaol aedeeteel'ae biq laq mael qiqsheel'ae; 9 Kaol xiangxinl ae'lye yoqhhaeq lye yoqhhaeteel e neemae mael zonglshol biq vae. Momil yoqhhaeteel'ae kaol aedeeteel'ae meeq laeq mael qiqsheel'ae. 10 Yaeqmeel noteel aeqcheekaol Momil'ae shilfu lilmaeq, aedeeteel e aeqpyuq aeqdae kaol aedeeteel maeq pi ongl e nuqkeeq mael, laqcaqhael e kongqlongl mael'ae baqda hhei biq laeq? 11 Ngaeteel xiangxinl lil, kaol ngaeteel hha deqjiul mael laoq Hhaoqsongl Yesu e endianq gae'lye hhae, yoqhhaeteel eiq qiqsheel'ae."
12 Cholyaeqhael yotyel qiqtyel maqdumyel, Ba'naqba kaol Baoqloq Momil haelmillye yoqhhaeteel ae'lye baeqjyelboq minqcuq e cholyaeqhael'ae, haelzongl e shenqjiq kaol maeqdaeqhhaeq e silqinq zongl hael geegaeq gil biq mael naelhaeq hhae. 13 Yoqhhaeteel gee byel hhei'laol, Yaqgel gee: "Aqsseq aeqnilhael, ngael gee mael naelhaeq gil! 14 Geiqsu'nu Ximenq laoq Momil laefuq baeqjyelboq minqcuq'ae haelmillye fupol biq, kaol yoqhhaeteel onglci ae'lye cholyaeqhael saelpodu hhei, kaol aeqyoq e cholmil holhhaqboq'ae bi zhol lye geedu beq hhei. 15 Xianzhihael e saeziq mael, xilmael yilsi laoqmyel qiqsheel'ae, Momil e Suqhhaq taq'ae gee laoqmyel:
16 'Aeqgael ngael hoqlal,
kaol Dalweil e leeqba e haeqpael haelcul
mael cutulhoq yi maoq,
gaba myel vae cutulhoq hhei,
kaol deiqtul hoq hhei maoq,
17 Xilnye laol, baeqjyelboq e cholyaeqhael laoq,
gilzuqmyel Hhaoqsongl'ae saelpo gil;
yoqhhaeteel laoq ngaeq e cholmil mael'ae gul e,
baeqjyelboq minqcuq e cholyaeqhael ngeelvae.
18 Xilmael laoq yilkaeaeqnao ae'lye
xilmael bi loq laeq e Hhaoqsongl gee hhae.'
19 "Tyulkaol, ngael nyuq laoq, Momil'ae polhoqlael e baeqjyelboq minqcuq e cholyaeqhael'ae haeq bi mulsaeq, 20 Ngeelfeiq, yoqhhaeteel'ae cholyaeq lye zongldu hhei e momilhael'ae baqheel gol e zaeqzael, leqsil e jyeqyaeq kaol siq maeq hhae zaeq'ae, kaol ochoq nyegael neemae maq hha ba'ae lye xinl cu biq laol hhaeq vae. 21 Yilkaeaeqnao ae'lye yaeqmeel keellye, haeqvae milmae heeqmyel vae eiq, cholyaeq laoq Moxi lye cu hhei e suqhhaq mael geegaeq gil biq, kaol haeqfu qiqzael anxiqriq fu, hae qiqgael e huiltangq vae eiq duq gil kaol'ae."
Baeqjyelboq minqcuq vae cu biq e xinl
22 Tyuqfu, shiqtuqhael, zhangqlaoqhael kaol jiaolhuil e cholyaeqhael gilzuqmyel zhee meeq yae lye kei biq, kaol yoqhhaeteel onglci ae'lye cholyaeq mee'nae hhaeq saelpodu hhei, kaol yoqhhaeteel yaol Baoqloq kaol Ba'naqba nyegael Antiq'a vae qiqgael bi bal yil, saelpodu hhei hael laoq, Xi'la kaol Basaba lye gul biq e Yoqdal, yoqhhaeteel laoq aqsseq aeqnilhael e yoheeq'ae. 23 Tyulkaol, xinl cu hheikaol yoqhhaeteel'ae bi heil yil, xinl mael taq'ae gee: "Shiqtuqhael kaol zhangqlaoq geiq e aqsseq aeqnilhael, Antiq'a, Xullilyal kaol Ji'lilja e baeqjyelboq minqcuq e aqsseq aeqnilhael'ae meeqlaeqmaeq lye naelhaeq hhae. 24 Ngaeteel laoq ngaeteel e saeqvae lye duyil e cholyaeq, noteel'ae bi mulsaeq e saeziq geegaeq hhei biq'ae lye gaeq wae, kaol noteel e neemae mael maeq bi zholsael, qiqshiq laoq, ngaeteel yoqhhaeteel'ae moqheil maeq heil gol biq yil. 25 Tyulkaol, ngaeteel qiqsheel laoqmyel nyuq lil, cholyaeq mee'nae hhaeq saelpodu hhei, kaol ngaeteel gaeq e Ba'naqba kaol Baoqloq nyegael noteel'ae bi mol yil, 26 Cholyaeq xi niq nulhhaeq laoq, aedeeteel e Hhaoqsongl Yesu Jidu e cholmil gae'lye aeqyil mael maq mul kaol'eiq hhaeq'ae. 27 Ngaeteel lye Yoqdal kaol Xi'la yaol bi bal yil, yoqhhaeteel eiq yoqhhaeteel e myeqbongq maellye noteel'ae xihael geegaeq laeq'ae. 28 Senllinq kaol ngaeteel laoq, noteel aeqdilmyel zongl maoq e qiqniq mal maoqlaol, baeqjyelboq e aeq'yel noteel'ae maq baqcheeq da hhei yil lye nyuqmeeq wae. 29 Aeq'yel tyulmael laoq, cholyaeq lye zongldu hhei e momilhael'ae baqheel gol e zaeqzael, leqsil e jyeqyaeq kaol siq maeq hhae zaeq'ae, kaol ochoq nyegael neemae maq hha ba'ae lye mael ngeelvae. Noteel xihael maeq zongl laol meeq wae. Noteel'ae neesaelhhae mael yo'li biq!"
30 Cholyaeq tyuhael lye yoqhhaeteel yaol moqheilheil duyil biq vae. Yoqhhaeteel Antiq'a vae gaeyil vae, cholyaeqhael gul'eeq hhei, kaol xinl mael heilmoq hhei gil biq. 31 Cholyaeqhael duq gil vae, xinl taq'ae neehongq gee hulm gil biq e saeziq gae'lye neemae mael zhee hhaol gil biq'ae. 32 Yoqdal kaol Xi'la eiq xianzhi'ae, kaol haelnaeqmyel e saeziq lye aqsseq aeqnilhael'ae geemyeq gil biq, kaol yoqhhaeteel'ae xinlxin hhael bi za lal vae. 33 Yoqhhaeteel tyuqvae qiqtongq baelzhol hhei'laol, cholyaeqhael yoqhhaeteel'ae maeqpaeq maeqnaelmyel, yoqhhaeteel yaol moqheilheil duyi biq e aqsseq aeqnilhael zael'ae hoqli gil lye sheeqsaehoq biq.a 35 Ngeelfeiq, Baoqloq kaol Ba'naqba laoq Antiq'a vae zhol hhae, kaol baeqjyelboq e haelnaeqmyel cholyaeqhael nyegael qiqgael geemyeq, kaol Hhaoqsongl e saeziq mael geegaeq gil biq hhae.
Baoqloq kaol Ba'naqba qiq hhaeq qiqboq'ae deel vae
36 Qiqtongq lye laol, Baoqloq Ba'naqba'ae gee biq: "Aedeeteel laoq aedeeteel Hhaoqsongl e saeziq geegaeq gil gol biq myel e milmae heeqmyel e hae qiqgael vae eiq hoqyil, kaol aqsseq aeqnilhael'ae fu yil gil biq maoq, tyulnye laol, yoqhhaeteel e qinqkuangl mael haelmillye hhae lye hhae loq'ae." 37 Ba'naqba laoq Maqkeq lye gul biq e Yoqhanl yaol qiqgael bael sheeqyil maoqlye hhae, 38 Ngeelfeiq, Baoqloq yoqhhaeq yaol maeq bi bal yil nae'ae, yilkaefu yoqhhaeq Panqfei'lilyal vae lye yoqhhaeteel nyegael qiqgael mulhhael maq bal mul myel, deelsae gil biq kaol'ae. 39 Kaol yoqhhae niq nulhhaeq deiqgae gil, aeqnaol laoq qiq hhaeq qiqboq'ae deel vae. Ba'naqba laoq Maqkeq yaol sheeq hhei, hoq zhol hheikaol Sailpuqlulsi vae yil vae. 40 Ngeelfeiq, Baoqloq laoq Xi'la yaol sheeq hhei myel duyil vae; aqsseq aeqnilhael lye yoqhhaeq yaol Hhaoqsongl e endianq onglci'ae toqshiq hhei biq vae. 41 Yoqhhaeq Xullilyal kaol Ji'lilja milcaeq vae deeldyu byel vae, kaol jiaolhuilhael e aqsseq aeqnilhael'ae xinlxin hhael bi za lal vae.