Tiqmoqtail laoq Baoqloq kaol Xi'la nyegael mulhhael qiqgael bal mul lael
16
Baoqloq Telbil vae keellael, Lulsideq vae yol keellael. Tyuqvae Tiqmoqtail lye gul biq e laqcaq qiq hhaeq zhol'ae, yoqhhaeq laoq Hhaoqsongl'ae xiangxinl e Yoqtail cholyaeq cholhae aeqmae qiq hhaeq e yaqyo'ae, ngeelfeiq, aeqdae laoq Xi'lal cholyaeq'ae. 2 Lulsideq kaol Yiqge'nianl e aqsseq aeqnilhael yoqhhaeq'ae laqma deiqqei biq'ae. 3 Baoqloq laoq yoqhhaeq yaol qiqgael sheeqyil goq biq, ngeelfeiq, tyuqvae milcaeq e Yoqtail cholyaeq gae'lye, yoqhhaeq'ae yeqgae gui'liq zongl biq vae, yoqhhaeteel aeqsul eiq yoqhhaeq e aeqdae laoq Xi'lal cholyaeq'ae lye loq'ae lye kaol'ae. 4 Yoqhhaeteel hae qiqgael milmae heeqmyel vae deelpol duyil laol, Ye'lulsa'lenq e shiqtuqhael, kaol zhangqlaoqhael lye geemeeq deelhhei kaol cu deelhhei mael, laqcaqhael'ae zongl gaeyil maoqhhae lye heilmoq hhei biq. 5 Tyulkaol, hae qiqgael e jiaolhuilhael e cholyaeqhael xinlxin nyeq'ei hhal za lal biq vae, kaol Yesu'ae xinlzaeq e cholyaeq qiq nao qiq nao lye hhael naeqlael vae.Momil Baoqloq'ae Maqqiqdunl vae yil lye moqheilheil biq
6 Senllinq mael yoqhhaeteel'ae Yalxilyal vae Momil e saeziq haeq geegaeq lye diqqye biq, kaol yoqhhaeteel Fuqlyuqja milcaeq kaol Ja'latail milcaeq vae deelpol duyil vae. 7 Yoqhhaeteel Meiqxiyal milcaeq e bian'gail vae keellael, Biqtui'niq vae yil maoqlye zongl gil, Yesu e yohael mael yoqhhaeteel'ae maeq bi yil'ae. 8 Yoqhhaeteel Meiqxiyal vae deelpol duyil, kaol Telloqyal vae gaeyil. 9 Mqkiq vae Baoqloq'ae yilxiangl mol hhei biq: Maqqiqdunl cholyaeq qiq hhaeq haoqtul deelhhei kaol yoqhhaeq'ae geezaeq biq, gee: "Nol Maqqiqdunl vae lael, kaol ngaeteel'ae baelzongl lael laeq!" 10 Baoqloq yilxiangl xilmael mol hhei biq laol, ngaeteel laoq aeqdilmyel Momil ngaeteel'ae gul laeq kaol yoqhhaeteel'ae fuqyin mael geegaeq yil biq lye hhae lye loq wae, tyulkaol, nae'naemyel Maqqiqdunl vae haelmillye yil maoq hhaemaeq lye nyuq gil lil.
Lyuqdiq'yal Yesu'ae xinlzaeq vae
11 Ngaeteel Telloqyal ae'lye hoq zhol hhei, kaol Saqmoqtella vae zhoqsae'lye kai yil, aeqnaol qiq nao Niqyalboqlil vae keellael, 12 Tyuqvae lye Fei'lilbiq vae keellael, Fei'lilbiq laoq Maqqiqdunl milcaeq e hhal mulyo e milmae heeqmyel qiq gael'ae, tyuqvae laoq Loqmaq lye zholchiqzaeq biq e milcaeq'ae. Ngaeteel milmae heeqmyel saeqvae mee'nae nao zhol gil aeqwae. 13 Anxiqriq fu, ngaeteel milmae heeqmyel e oheiq vae duyil, kaol lolbaeq loljyel'ae keellael, tyuqvae laoq heeldoq gee e milcaeq'ae lye kei gil laeq hhae. Kaol ngaeteel zholgae hhei, kaol zhol'eeq deelhhei gil e cholhae aeqmaehael'ae geemyeq gil biq. 14 Momil'ae zun eiq zunjinl gu eiq gu e Lyuqdiq'yal lye gul biq e cholhae aeqmae qiq hhaeq zhol'ae. Yoqhhaeq laoq Tuiyaqtui'la milmae heeqmyel vae, ziqseq e haeqpael ongqzaeq e cholhae aeqmae'ae, yoqhhaeq naelhaeq deelhhei fu, Hhaoqsongl yoqhhaeq e neemae mael bi pong'lael, kaol Baoqloq hael geemyeq e saeziq mael haelmeeqlye bi naelhaeq do zaq hhei. 15 Yoqhhaeq kaol yoqhhaetoq e cholyaeqhael shelxiq aeqnaol'ae, ngaeteel'ae geezaeq gil laeq: "Noteel laoq ngael aeqdilmyel Hhaoqsongl'ae neemae qiqsiqmyel xiangxinl vae lye nyuq kaollaoq, ngatoq'ae baelzhol lael gil." Tyulkaol, ngaeteel'ae haelmillyekaol eiq bael zholdeelsaeq maoqhhae lye zongl gil laeq hhae.
Baoqloq kaol Xi'la yaol Fei'lilbiq vae koqlongl biq hhae
16 Qiqzael laoq, ngaeteel heeldoq gee myel vae keelli fu, duqlaq e yohael guqzaeq li biq e yaqhacheqzaq e haeqmiyaeq qiq hhaeq ngaeteel boq'ae deel laeq; yoqhhaeq moqpilpil maellye hhaoqsonglhael'ae dyuqbaq haelnaeqmyel bi za lal vae. 17 Yoqhhaeq Baoqloq kaol ngaeteel'ae cho'lyeq laeq, gul gae'lael aeqmyel gee: "Cholyaeq xihael laoq hhaelgao gao'li Momil e yaqhacheqzaq e cholyaeq'ae, noteel'ae hha deqjiul e gaelmae mael geegaeq hhae." 18 Yoqhhaeq xilnye maqqyemyel mee'nae nao gul vae, kaol Baoqloq neesusu biq, zipu lal kaol niqhaeq tyulmael'ae gee biq: "Ngael Yesu Jidu e cholmil maellye, noq yaol tyutaeq e aeqhhaol ae'lye duyi lye moqheilheil lil!" Niqhaeq tyulmael nae'naemyel duyi hhei vae. 19 Yoqhhaeq e hhaoqsonglhael dyuqbaq zonglzaeq e gaelmae mael maqza yaevae lye mol hhei biq, tyulkaol, Baoqloq kaol Xi'la yaol eetyeq biq, kaol milmae heeqmyel e dyeongl longlbeiq vae ee yil, kaol yoheeqhael'ae sheeq fu li biq, 20 Shenqpanl e zhiqmoq e yiqsi'ae yol sheeqli biq, gee: "Cholyaeq xihael laoq Yoqtail cholyaeq'ae, aedeeteel e milmae heeqmyel mael zonglbeeq maoqlye zongl hhae, 21 Aedee Loqmaq cholyaeq maq hhae jyeqshel, maeq hhae zongl e gui'liq mael geemyeq hhae." 22 Kaol cholyaeqhael yoqhhaeteel boq'ae hhaellaelmyel qiqgael byuq da laq, shenqpanl e zhiqmoq yoqhhaeteel e aelhongq mael heiga biq, kaol yoqhhaeteel'ae haeqdul maellye tyel biq lye moqheilheil biq. 23 Haelnaeq tyel biq laol, yoqhhaeteel yaol laoqgaiqkei laoqhaol vae koqlongl biq, fu'qyezaq e cholyaeqhael'ae haelmeeqlye fu'qye maoqhhae lye moqheilheil biq. 24 Laoqgaiqkei laoqhaol vae guanq e qiq hhaeq minllinl mael naelhaeq vae, kaol yoqhhaeteel yaol onglci ci'li e laoqgaiqkei laoqhaol vae koqlongl deelli biq, aeqkeel niqboq myel keeltoqdiq hhei biq.
25 Sul'ongl laellye fu, Baoqloq kaol Xi'la Momil'ae heeldoq gee kaol shigo changl gil'ae, ee'longl biq e cholyaeqhael gilzuqmyel naeqbol haellye naelhaeq gil'ae. 26 Qiqlaqmyel milho homae ho tullaeq, kaol laoqgaiqkei laoqhaol e congqciq paeqhhael mael ssu'ni tul beq laq, laoqgaiqkei laoqhaol oheiqhael qiqlaqmyel pong beq lal, ee'longl li biq e cholyaeqhael'ae kaltoq deelhhei e sulmca mael gaepyel byel hhei vae. 27 Laoqgaiqkei laoqhaol vae guanq e qiq hhaeq nyuq lael laol, oheiqhael gilzuqmyel pong'lael e mol hhei biq, kaol ee'longl biq e cholyaeqhael gilzuqmyel kisae byel wae lye kei biq, tyulkaol, maejyel eedu hheikaol zonglsilzaeqhoq maoqlye zongl hhae. 28 Baoqloq yotyel haeqheemyel gul tullaeq: "Aeqyoyoq'ae haeq zonglnaelzaeqhoq, ngaeteel gilzuqmyel saeqvae zhol lil." 29 Cholyaeq koqlongl e laoqhaol vae fu'qyezaq e qiq hhaeq aeqdael doqhoq heil laeq lye cholyaeq'ae gee biq, kaol nae'naemyel ki do'li, gu'ni'lye Baoqloq kaol Xi'la e aeqkeel dongqpyeq'ae vuqduqtongq gae deelhhei lael, 30 Aeqnaol yoqhhaeteel yaol sheeq duyi biq, gee: "Hhaoqsonglhael o, ngael haelmillye zongl kaol hha deqjiul hhaemaeq?" 31 Yoqhhaeteel gee: "Hhaoqsongl Yesu'ae xinlzaeq maoqhhae, nol kaol notoq qiqhaoq qiqjyelmyel hha deqjiul wae." 32 Kaol yoqhhaeteel Hhaoqsongl e saeziq mael, yoqhhaeq kaol yoqhhaetoq'ae haelzhol cholyaeqhael'ae geegaeq gil biq. 33 Tyuqfu qiq mil, tyuqfu qiqlaq'ae, cholyaeq koqlongl e laoqhaol vae fu'qyezaq e qiq hhaeq yoqhhaeteel yaol sheeqyil kaol naelheiq bael ciq biq. Yoqhhaeq kaol yoqhhaetoq e cholyaeqhael gilzuqmyel shelxiq gil vae, 34 Kaol yoqhhaeteel yaol laoqhaol vae sheeqli, kaol aelhoq baqdeel hhei biq. Yoqhhaeq kaol yoqhhaetoq e cholyaeqhael Momil'ae xiangxinl gae'lye zhee hhaol gil biq'ae.
35 Mqbaebae lael fu, shenqpanl e zhiqmoq lye cholyaeq ee'longlzaeq e cholyaeq yaol moqheilheil du hhei, gee: "Cholyaeq xihael yaol pyeqduhoq biq!" 36 Laoqgaiqkei laoqhaol vae guanq e qiq hhaeq saeziq xilmael Baoqloq'ae gee biq: "Shenqpanl e zhiqmoq lye noteel yaol pyeqduhoq hhei biq lye cholyaeq yaol moqheilheil du hhei hhae, yaeqmeel duyi gil hhaeq vae, neesaelhhae'lye yil gil oq!" 37 Baoqloq yoqhhaeteel'ae gee biq: "Ngaeteel laoq Loqmaq cholyaeq lil, golsiq za'ae lye maeq gee siq fu ae'lye, yoqhhaeteel aeqsul eiq bael mol gae'lael aeqmyel ngaeteel'ae tyel laeq, kaol ngaeteel yaol laoqgaiqkei laoqhaol vae koqlongl laeq hhae. Yaeqmeel laoq qiq hhaeq maeq loq myel ngaeteel yaol lyeqduhoq maoqlye hhaemaeq? Maeq hhaeq'ae! Yoqhhaeteel aeqyoyoq saeqvae keellael, kaol ngaeteel yaol sheeq duhoq yil laeq maoqhhae!" 38 Cholyaeq ee'longlzaeq hael lye shenqpanl e zhiqmoq vae saeziq xihael geegaeq hoqli biq, shenqpanl e zhiqmoqhael yoqhhaeteel laoq Loqmaq cholyaeq'ae lye gaeq hhei biq laol gu'li biq, 39 Tyulkaol, yoqhhaeteel'ae geezaeq lael biq, yoqhhaeteel yaol cholyaeq koqlongl e laoqhaol vae lye sheeq duhoq yi biq laol, yoqhhaeteel yaol tyuqvae milmae heeqmyel ae'lye deelsae hhei lye geezaeq biq. 40 Yoqhhae niq nulhhaeq laoqgaiqkei laoqhaol ae'lye duyil laol, Lyuqdiq'yal toq'ae li gil, kaol aqsseq aeqnilhael'ae fu yil biq, geemyeq gil biq laol deelsae hhei vae.