Baoqloq kaol Xi'la Tyeqsa'loqniqja vae zhol hhae
17
Baoqloq kaol Xi'la laoq Anlfeipo'liq kaol Yalbo'loqniqyal vae deelpol duyil, kaol Tyeqsa'loqniqja vae keellael, tyuqvae Yoqtail cholyaeq e huiltangq za'ae. 2 Baoqloq haelzael'ae laoqmyel anxiqriq fu huiltangq vae do'li, xilnye maqqyemyel suq pu ngeel wae, kaol Momil e Suqhhaq taq'ae cu deelhhei maellye yoqhhaeteel nyegael geegae, 3 Jidu laoq aeqdilmyel hhae bi zonglkyuq, kaol cholsil onglci ae'lye dyeqhoqlal mael zenlminq kaol geemyeq gil biq, gee: "Ngael noteel'ae geegaeq biq e Yesu xitaeq laoq Jidu ngeelvae." 4 Yoqhhaeteel onglci'ae qiq miq laoq yoqhhaeq gee mael naelhaeq vae, Baoqloq kaol Xi'la'ae cho'lyeq li vae; neemae qiqsiqmyel Momil'ae cho'lyeq e Xi'lal cholyaeqhael, kaol maduq zhee za e cholhae aeqmaehael eiq yoqhhaeteel'ae bael cho'lyeq vae. 5 Ngeelfeiq, Yoqtail cholyaeqhael laoq heiqcilnael gil biq, kaol gaiziq vae zhol e gaipiqhael yaol gul'eeq hhei, cholyaeq qiq miq peqlal vae, kaol milmae heeqmyel vae aeqvuqlaelvuqmyel zongl gil'ae, Yesun toq'ae ki do'li, Baoqloq kaol Xi'la yaol saelpodu hheikaol cholyaeqhael'ae eemoq yil biq maoqlye zongl hhae. 6 Yoqhaeteel yaol maeq saelpodu hhei ongl biq'ae, tyulkaol, Yesun kaol aqsseq aeqnil mee'nae hhaeq yaol tyuqvae e zhiqmoqhael zael'ae ee'li biq, kaol gul gae'lael aeqmyel gee: "Mqmae holhhaq e cholyaeqhael'ae zonglbeeq biq e cholyaeqhael, saeqvae keellael vae, 7 Ngeelfeiq, Yesun yoqhhaeteel'ae sheeqcaq biq hhae. Cholyaeq xihael laoq Kaiqsa e minllinl mael laoqmyel maeq zongl'ae, baeqjyelboq e Yesu lye gul biq e zongmae qiq hhaeq zhol'ae siq lye gee hhae." 8 Cholyaeqhael kaol tyuqvae e zhiqmoq saeziq xihael gaeq hhei biq laol, zoqgiq li gil biq'ae, 9 Kaol Yesun kaol baeqjyelboq e cholyaeqhael e baoqzenl e dyuqbaq mael heilzaeq hhei, kaol yoqhhaeteel yaol caiq pyeqduhoq hhei biq wae siq.Baoqloq kaol Xi'la Biqliyal vae keellael
10 Aqsseq aeqnilhael tyuqfu qiq mil ae'lye nae'naemyel, Baoqloq kaol Xi'la yaol Biqliyal vae sheeqsae biq. Yoqhhae niq nulhhaeq keelli laol, Yoqtail cholyaeq e huiltangq vae do'li. 11 Saeqvae cholyaeqhael laoq Tyeqsa'loqniqja cholyaeqhael taq'ae saeziq hhael geezaeqlael'ae, neemae hhaol gae'lael aeqmyel Hhaoqsongl e saeziq mael xiangxinl'ae, yoqhhaeteel geemyeq e xilmael hoq maeqlye loq maoqlyekaol naochomyel Momil e Suqhhaq mael yinqjiu gil hhae. 12 Tyulkaol, yoqhhaeteel onglci'ae haeldyul dyulmae cholyaeq xiangxinl vae, cholyaeq xihael onglci'ae laoq maduq zhee za e Xi'lal e cholhae aeqmaehael, kaol haqyoyaeq eiq zhee bal zoq'ae. 13 Ngeelfeiq, Tyeqsa'loqniqja e Yoqtail cholyaeqhael laoq, Baoqloq Biqliyal vae Momil e saeziq geemyeq hhae lye loq hhei biq, kaol tyuqvae yil, kaol cholyaeqhael'ae maeqmeeqmyel tyuqcuq biq kaol cheeqmu biq. 14 Aqsseq aeqnilhael lye Baoqloq yaol nae'naemyel eeldeel deeljyel vae sheeq keelyil biq. Xi'la kaol Tiqmoqtail laoq Biqliyal vae zholdeelsaeq hhae. 15 Baoqloq yaol sheeqsae biq e cholyaeq lye yoqhhaeq yaol Yaqdianq vae sheeq keellaeq biq, Baoqloq yoqhhaeteel'ae Xi'la kaol Tiqmoqtail yaol yoqhhaeq'ae nae'naemyel mol yi lye gee biq lye moqheilheil gil biq, tyulkaol, yoqhhaeteel hoqli vae.
Baoqloq Yaqdianq vae zhol
16 Baoqloq Yaqdianq vae yoqhhaeteel'ae doq biq fu, milmae heeqmyel vae haeqvae eiq zongldu hhei e momil za mol hhei biq, kaol neemae zhee nyuqsaeq biq. 17 Tyulkaol, huiltangq vae Yoqtail cholyaeqhael, kaol neemae qiqsiqmyel Momil'ae cho'lyeq e cholyaeqhael nyegael geegae gil'ae; kaol naochomyel milmae heeqmyel e dyeongl longlbeiq'ae kaol deelpuq e cholyaeqhael nyegael geegae. 18 Kaol Yibiljiu'luq pail kaol Sidoyal pail e zheqxoqjahael eiq yoqhhaeq nyegael geegae, qiq miq laoq gee: "Xitaeq yiqzenl bulguanq myel aeqchee gee hhaemaeq?" Qiq miq laoq gee: "Yoqhhaeq laoq baeqjyelboq milcaeq e momil yaol geegaeq e cholyaeq ngeelnaol'ae." Xilnye gee mael laoq, Baoqloq laoq Yesu kaol dyeqhoqlal e yo'liq mael geegaeq gil biq kaol'ae. 19 Yoqhhaeteel Baoqloq yaol cheel hheikaol, Yallyul Baguq yilhuil vae sheeqli biq, gee: "Nol geemyeq e yo'liq yosheq xilmael, ngaeteel eiq hhae loq maeq? 20 Noq lye qiqguail lal aeqmyel e silqinq mael ngaeteel e naeqbol mael'ae bi gaeqlael yae, kaol ngaeteel xihael aeqchee yilsi mael'ae gee hhae lye loq goq yae." 21 Yaqdianq cholyaeqhael kaol tyuqvae baelzhol e baeqjyelboq e goqja e cholyaeqhael laoq, qiqgiq maeq zongl fu, kuanqbeq diq mael kaol qiqzael eiq maeq gaeq gol mael naelhaeq mael hhaol gil biq hhae.
22 Baoqloq Yallyul Baguq yilhuil e cholyaeqhael onglci'ae haoqtul deelhhei, kaol gee: "Yaqdianq cholyaeqhael o, ngael laoq noteel aeqchee mael taq vae eiq momilhael'ae zun eiq zunjinl gu eiq gu hhae lye fudu hhei aeqwae. 23 Ngael gaelmae deel fu, noteel heel mael haelmeeqlye fu aeqwae, kaol jiltanq qiq mal mol aeqwae, tyulmael taq'ae 'maeq loq e momil'ae heelda hhei biq lil' lye cuda deelhhei hhae. Ngael yaeqmeel noteel'ae noteel maeq loq myel heel e momil xitaeq yaol yotyel ha'lye geedu hhei gil laeqngeel. 24 Mqsongl milcaeq kaol halza haelzholhael zongldu e Momil, yoqhhaeq laoq mqmae milcaeq e Hhaoqsongl'ae, kaol cholyaeq e aqlaq lye cu du hhei e heelhaol vae maeq zhol'ae, 25 Kaol cholyaeq e aqlaq lye eiq maeq fuqsil biq kael'ae, yoqhhaeq laoq aeqchee eiq za kaol'ae. Yoqhhaeq laoq aeqyil, saeq'ol kaol gilzuqmyel haelzholhael cholyaeq'ae biq hhei biq. 26 Yoqhhaeq lye cholyaeq qiq hhaeq ae'lye gilzuqmyel minqcuq zongldu hhei, kaol yoqhhaeteel yaol milcaeq taq'ae haeqvae eiq bi zhol gil, tyulkaol, yoqhhaeteel haeqfu'ae hhae dyeq keel, kaol haeqvaehael'ae hhae zhol hhae lye mael gilzuqmyel geemeeq deelhhei wae, 27 Momil laoq yoqhhaeteel yaol yoqhhaeq'ae bi saelpo lael, paelsilmyel saelpo fufu laol yoqhhaeq yaol saelpopuq hhei, yoqhhaeq laoq aedeeteel hae qiq hhaeq nyegael eiq maeq maol'ae, 28 Aedeeteel ssuqhaoq caqzaq mael, dongni mael kaol dyeqdeel mael laoq yoqhhaeq gae'lye hhae, noteel e shirenq geiq hael lye cu hhei mael laoqmyel, gee: 'Aedeeteel eiq yoqhhaeq e houldail ngeelzhol'ae.' 29 Aedeeteel laoq Momil e houldail'ae, Momil laoq cholyaeq e aqlaq, kaol neemae hael nyuq laoqmyel pulziq pulsheel, kaol haqlo maellye taqdu hhei laoqmyel hhae lye maeq hhae kei'ae. 30 Yilkaefu, milcaeq taq e cholyaeqhael qiqgiq maeq loq fu, Momil yoqhhaeteel'ae maeq guanq biq'ae; ngeelfeiq, yaeqmeel, yoqhhaeq laoq haeqvae lael'ee myel cholyaeqhael eiq neemae paellael maoqhhae lye moqheilheil biq, 31 Yoqhhaeq laoq naohaeq geemeeq deelhhei wae, yoqhhaeq lye saelpodu hhei e qiq hhaeq ae'lye gongyil gae'lael aeqmyel milcaeq taq e cholyaeqhael'ae bi shenqpanl maoqlye hhae, kaol yoqhhaeq yaol cholsil onglci ae'lye bi dyeqhoqlal, kaol haelzhol cholyaeqhael'ae bi xiangxinl e zenljul bi geiq." 32 Cholyaeqhael cholsil dyeqhoqlal mael gee e gaeq hhei biq laol, yoqhhaeq'ae eel gil biq, ngeelfeiq, qiq miq laoq gee: "Ngaeteel nol gee xilmael naelhaeq maoq siq." 33 Xilnye laol, Baoqloq yoqhhaeteel zaellye deelsae hhei vae. 34 Ngeelfeiq, mee'nae hhaeq laoq yoqhhaeq'ae deelniq hhae, kaol Hhaoqsongl'ae xiangxinl lael vae, cholyaeq xihael onglci'ae Yallyul Baguq e yilhuil onglci e Diu'niqxiu, kaol Dalmaqliq lye gul biq e cholhae aeqmae qiq hhaeq, kaol yoqhhaeteel nyegael qiqgael baelzhol e baeqjyelboq e cholyaeqhael bal zoq'ae.