Baoqloq Ge'linqdo vae zhol
18
Silqinq xilmael aeqnaol, Baoqloq Yaqdianq vae lye deelsae hheikaol Ge'linqdo vae keellael, 2 Benqdu vae lye dyeqlal e Yoqtail cholyaeq qiq hhaeq deelpuq hhei biq, cholmil mael Yalju'la lye gul biq hhae. Kellaoqdil laoq haelzhol e Yoqtail cholyaeqhael Loqmaq ae'lye deelsae maoqhhae lye minllinl gae hhei, tyulkaol, Yalju'la kaol yoqhhaeq e haeqmiq Baiqji'la yaeqmeel qiqtongq Yildallil ae'lye lael, kaol Baoqloq yoqhhaeteel'ae saelpo yil. 3 Yoqhhaeteel laoq haeqpael haelcul zongldu cholyaeq'ae, Baoqloq kaol yoqhhaeteel mul e mulhhael mael qiqsheel'ae, kaol yoqhhaeteel nyegael qiqgael baelzhol, kaol mulhhael qiqgael mul hhae. 4 Haeqfu qiqzael anxiqriq'ae, Baoqloq huiltangq vae cholyaeqhael nyegael geegae, Yoqtail cholyaeq kaol Xi'lal cholyaeq'ae Hhaoqsongl boq'ae polhoqlael maoqhhae lye geemyeq gil biq hhae.5 Xi'la kaol Tiqmoqtail Maqqiqdunl ae'lye gaeyi fu, Baoqloq laoq neemae qiqsiqmyel Hhaoqsongl e saeziq mael geegaeq gil biq, Yoqtail cholyaeqhael'ae Yesu laoq Jidu'ae lye maqqyemyel zenlminq gil biq. 6 Ngeelfeiq, yoqhhaeteel Baoqloq'ae deiqtael, kaol yoqhhaeq'ae geekyuq biq fu, Baoqloq aelhongq e haeqlyel mael tehael hhei, kaol yoqhhaeteel'ae gee biq: "Noteel e golsiq mael noteel pizaeq gil oq, ngaeq nyegael guanxil maqza vae. Saeq ae'lye aeqnaol laoq, ngael baeqjyelboq minqcuq tyuqvae yil maoq vae." 7 Yoqhhaeq tyuqvae lye deelsae hhei, kaol Tiqdo Yoqshildu toq'ae keelyil vae. Xitaeq laoq Momil'ae heel e cholyaeq'ae, yoqhhaetoq laoq huiltangq dongqpyeq vae zhol hhae. 8 Huiltangq'ae guanq e Ji'lilsibul kaol yoqhhaetoq e cholyaeqhael gilzuqmyel Hhaoqsongl'ae xiangxinl lael vae, haelnaeqmyel Ge'linqdo e cholyaeqhael Momil e saeziq mael naelhaeq, kaol Hhaoqsongl'ae xiangxinl vae, kaol shelxiq vae. 9 Mqkiq Hhaoqsongl yilxiangl onglci'ae lye Baoqloq'ae gee biq: "Maq gu kael, geegaeq gil biq aeqmeel, myeqbongq haeq mqcuq hhei, 10 Ngael eiq noq nyegael qiqgael baelzhol lil, kaol cholyaeq qiq hhaeq eiq noq'ae maq hail lalkiq'ae, milmae heeqmyel saeqvae ngaeq e cholyaeq zhee zhol'ae." 11 Baoqloq tyuqvae qiq hoq pa zhol aeqwae, kaol yoqhhaeteel'ae Momil e saeziq mael geemyeq gil biq.
12 Ja'liuq Yalgaiyal milcaeq e yoheeq geiq fu, Yoqtail cholyaeqhael hhaellaelmyel Baoqloq'ae zonglkyuq lael biq, yoqhhaeq yaol shenqpanl myel vae ee'li biq, 13 Gee: "Cholyaeq xitaeq laoq cholyaeqhael'ae lilfaq laoqmyel Momil'ae heel mael haeq zongl gil lye tyuqcuq gil biq hhae." 14 Baoqloq myeqbongq zhoq gu'ngae maoqlye fu, Ja'liuq Yoqtail cholyaeqhael'ae gee gil biq: "Yoqtail cholyaeqhael o, aeqsul fanlfaqkei, paelsilmyel duqlaq e silqinq zongl kaollaoq, ngael noteel gee mael haelmeeqlye naelhaeq hhaeq. 15 Ngeelfeiq, geegae mael laoq, saeziq, cholmil kaol noteel e lilfaq gae'lye kaollaoq, noteel aeqyoyoq haelmillye zongl maoqlaol zongl gil. Ngael xilmael maeq shenqpanl goq yae." 16 Tyulkaol, yoqhhaeteel yaol shenqpanl myel vae lye lyeqdu biq. 17 Cholyaeqhael huiltangq'ae guanq e Soqtiqniq yaol eetyeq hheikaol, shenqpanl myel vae yiqsi ae'lye tyel biq. Silqinq xihael Ja'liuq eiq maeq guanq'ae.
Baoqloq Antiq'a vae hoqlal
18 Baoqloq zhee qiqtongq zhol vae, aeqnaol, aqsseq aeqnilhael zaellye deelsae hhei vae, hoq zhol hheikaol Xullilyal vae yil vae, Baiqji'la kaol Yalju'la eiq qiqgael bal yil vae. Yoqhhaeq xuqyuanlkei gol wae, kaol Jian'geqliq vae lye qyelkeel cuga vae. 19 Yoqhhaeteel Yiqfuqsoq vae keellael laol, Baoqloq yoqhhaeteel yaol tyuqvae bi zholdeelsaeq vae, aeqyoyoq laoq huiltangq vae li, kaol Yoqtail cholyaeqhael nyegael geegae hhae. 20 Cholyaeqhael yoqhhaeq'ae qiqtongq baelzhol hhei siq lye gee biq, ngeelfeiq, yoqhhaeq hhaeq'ae lye maeq geehoq gil biq'ae, 21 Ngeelfeiq, yoqhhaeteel'ae deelsae maoq vae lye gee biq: "Momil hhaeq lil lye kaollaoq, ngael noteel saeqvae hoqlal maoq siq." Tyulkaol, Yiqfuqsoq vae lye hoq zhol hheikaol deelsae vae. 22 Baoqloq Kaiqsa'lilyal vae lye hoq taq ae'lye gaeyi, kaol Ye'lulsa'lenq'ae da'li kaol jiaolhuil e cholyaeqhael'ae meeqlaeqmaeq lye naelhaeq li gil biq, aeqnaol Antiq'a vae gaeyil vae. 23 Tyuqvae qiqtongq zhol hhei'laol, yoqhhaeq yol deel vae, yoqhhaeq Ja'latail milcaeq kaol Fuqlyuqja milcaeq'ae qiqgael qiqgael lye deel dyul byel hhei, kaol laqcaqhael'ae xinlxin hhael bi za lal vae.
Yalbo'loq Yiqfuqsoq milcaeq vae Momil e saeziq mael geegaeq gil biq
24 Yallilshandal vae lye dyeqlal e Yoqtail cholyaeq Yalbo'loq lye gul biq e qiq hhaeq zhol'ae, yoqhhaeq Yiqfuqsoq vae keellael. Yoqhhaeq myeqbongq zhee dyeq hhae, Momil e Suqhhaq taq e saeziq mael aeqchee yilsi'ae lye zhee geedu hhei kiq hhae. 25 Cholyaeq xitaeq laoq Hhaoqsongl e saeziq mael xoqxiq gol wae, kaol neemae onglci'ae laqheiq zhee qyel aeqmyel gee, kaol cholyaeqhael'ae zhee hoq ga'lal aeqmyel Yesu e silqinq mael geemyeq gil biq hhae, ngeelfeiq, yoqhhaeq laoq Yoqhanl e ciq e gui'liq mael maoqlaol maeq loq'ae. 26 Cholyaeq xitaeq teel eiq maqguzaq myel huiltangq vae gee tul beq laq; Baiqji'la kaol Yalju'la gaeq hhei biq laol, yoqhhaeq yaol sheeqlaeq, kaol Momil e gaelmae mael hoq ga'lal aeqmyel yoqhhaeq'ae geedu biq. 27 Yalbo'loq laoq Yalgaiyal vae yil goq biq hhae, aqsseq aeqnilhael yoqhhaeq'ae yil aeqmeel lye gee biq, kaol tyuboq e laqcaqhael'ae yoqhhaeq yaol sheeqcaq biq lye xinl cu biq. Yoqhhaeq tyuqvae keelli laol, endianq hhamul hhei biq e senltuqhael'ae haelnaeqmyel baelzongl gil biq, 28 Yoqhhaeq laoq cholyaeqhael e yiqsi ae'lye, Yoqtail cholyaeqhael'ae zhee onglzaeqmyel gee yinqzaeq biq, kaol Momil e Suqhhaq maellye Yesu laoq Jidu'ae lye zenlminq gil biq kaol'ae.