Baoqloq Yiqfuqsoq vae zhol
19
Yalbo'loq Ge'linqdo vae zhol fu, Baoqloq hongldul milcaeq ae'lye deelpol duyil, kaol Yiqfuqsoq vae keellael, kaol laqcaq mee'nae hhaeq deelpuq hhei biq, 2 Kaol yoqhhaeteel'ae naelhaeq biq: "Noteel xiangxinl fu, senllinq mael yo'lael gol laeq vae maeq?" Yoqhhaeteel gee: "Maeq yo'lael gol laeq'ae, nol gee e senllinq xilmael, ngaeteel qiqzael eiq maeq gaeq gol yil." 3 Baoqloq naelhaeq biq: "Aelmaol, noteel ciq e gui'liq mael laoq hae qiqsheel maeq?" Yoqhhaeteel gee: "Yoqhanl e ciq e gui'liq lye hhae." 4 Baoqloq gee: "Yoqhanl zongl mael laoq neemae paellael e ciq e gui'liq'ae, yoqhhaeq cholyaeqhael'ae yoqhhaeq e aeqnaol'ae lael maoqlye e tyutaeq'ae xiangxinl maoqhhae lye gee gil biq, tyutaeq laoq Yesu ngeelvae." 5 Yoqhhaeteel gaeq hhei biq laol, Hhaoqsongl Yesu e cholmil maellye shelxiq gil vae. 6 Baoqloq yoqhhaeteel vae aqlaq baqcheeq da hhei biq, kaol senllinq mael yoqhhaeteel'ae yo'li biq vae, kaol yoqhhaeteel baeqjyelboq minqcuq e saeziq maellye saeziq gee gil, kaol peqlal maoqlye mael eiq geedu kiq. 7 Yoqhhaeteel gilzuqmyel qyelniq hhaeq laellye hhae. 8 Baoqloq huiltangq vae do'li, teel eiq maqguzaq myel Momil e saeziq mael geegaeq gil biq, Momil e Goqja gae'lye geegae gil, kaol cholyaeqhael'ae geemyeq gil biq, xilnye maqqyemyel baehae sul siq zoq wae. 9 Ngeelfeiq, cholyaeq qiq miq laoq neehaha hhae, maeq xiangxinl nae'ae, kaol cholyaeqhael e yiqsiboq ae'lye geemyeq e xilmael'ae geekyuq gil'ae, kaol Baoqloq yoqhhaeteel zaellye deelsae vae, laqcaqhael vae eiq yoqhhaeteel nyegael haeq baelzhol lye gee biq. Yoqhhaeq naochomyel Tui'la'nuq lye gul e xoqxiaol vae cholyaeqhael nyegael geezil geezae hhae. 10 Xilnye niq hoq gol hhei'laol, Yalxilyal e haelzhol cholyaeqhael haoq, Yoqtail cholyaeq haoq, paelsilmyel Xi'lal cholyaeq haoq, gilzuqmyel Hhaoqsongl e saeziq mael gaeq yo vae.Shiljiwaq e yaqyohael haelzongl gil mael
11 Momil Baoqloq e aqlaq ae'lye maeqdaeqhhaeq e shenqjiq zongl du hhei. 12 Cholyaeqhael laoq Baoqloq e aeqhhaol ae'lye paelsheel kaol aeldaeq mael heil yil, kaol cholnael e aeqhhaol'ae heil da hhei biq laol, cholnaelhael meeqhoqlael biq vae, duqlaq e yohael mael eiq duyi vae. 13 Tyuqfu, niqhaeq lyeqdu e Yoqtail cholyaeq mee'nae hhaeq haeqvae lael'ee myel deel, Hhaoqsongl Yesu e cholmil maellye duqlaq e yohael guqzaeq li biq e cholyaeqhael'ae gee biq: "Ngael Baoqloq geegaeq e Yesu tyutaeq e cholmil maellye, noteel yaol duyi lye minllinl lil." 14 Xilnye zongl e cholyaeqhael laoq, Yoqtail cholyaeq Shiljiwaq lye gul biq e jilsizhangq e yaqyo siq hhaeq'ae. 15 Duqlaq e yohael yoqhhaeteel'ae geehoq biq: "Yesu yaol ngael loq lil, Baoqloq yaol ngael eiq loq lil, noteel laoq aeqsul lilmaeq?" 16 Duqlaq e yohael guqzaeq li biq e cholyaeq tyutaeq yoqhhaeteel'ae deiqcongq yil biq, kaol yoqhhae niq nulhhaeq yaol zongltyeq biq, tyel yinq biq vae, kaol yoqhhaeteel'ae tyelnael byel aeqmyel nyelguqlye laoqhaol tyulmael ae'lye kisae duyi. 17 Yiqfuqsoq vae haelzhol e Yoqtail cholyaeqhael kaol Xi'lal cholyaeqhael, xilmael aeqsul eiq loq vae, kaol cholyaeqhael gu gil biq'ae, kaol Hhaoqsongl Yesu e cholmil mael aeqsul eiq maeqdaeqhhaeq'ae lye gee gil'ae. 18 Yesu'ae xinlzaeq e cholyaeqhael eiq zhee naeq'ae, kaol aeqyoyoq haelzongl gol mael cenqrenlzaeq lael kaol geedu hhei. 19 Moqpilhael eiq, yoqhhaeteel e suqhhaq mael qiqgael baq'eeq deelhhei, kaol cholyaeqhael e yiqsi ae'lye pe hhei vae. Yoqhhaeteel suqhhaq xihael e hhaeqpyuq mael haeldyul zoq maeq lye suqda fu gil laol, gilzuqmyel pulziq ngaeqtongl (50000) zoq wae lye caiq loq hhei biq wae siq. 20 Xilnye laol, senltuq nyeq'ei ta nyeq'ei hhael naeqlael vae, kaol cholyaeqhael lye Hhaoqsongl e saeziq mael haeqvae lael'ee myel geegaeq du beq yil vae.
Yiqfuqsoq e cholyaeqhael aeqvuqlaelvuqmyel zongl gil
21 Xihael aeqnaol'ae, Baoqloq laoq Maqqiqdunl kaol Yalgaiyal vae deelpol duyil, kaol Ye'lulsa'lenq vae yil maoqlye nyuqmeeq wae, yoqhhaeq gee: Ngael tyuqvae keelyil laol, Loqmaq vae eiq fu yil maoq yae. 22 Tyulkaol, Baoqloq yoqhhaeq e aeqchee'lael'ee balmul biq e cholyaeqhael onglci ae'lye, Tiqmoqtail kaol Yiqladu yaol Maqqiqdunl vae moqheilheil du hhei, aeqyoq laoq Yalxilyal vae qiqtongq zholdeelsaeq.
23 Tyuqfu, Yesu'ae xinlzaeq e gaelmae xi qiq keel gae'lye aeqvuqlaelvuqmyel zhee zongl tul gil laeq wae, 24 Pulziq diq e laqkiq Diqmiqdiu lye gul biq e qiq hhaeq zhol'ae, yoqhhaeq laoq Yaldimiq lye gul biq e haeqmiyaeq momil e pulziq e laoqhaol haolyaeq zongldu hhae. Yoqhhaeq lye xilnye qiqsheel mulhhael mul e cholyaeqhael'ae dyuqbaq zhee bi zonglzaeq hhei vae. 25 Yoqhhaeq lye cholyaeq xihael kaol qiqsheel mulhhael mul e cholyaeqhael yaol gul'eeq hhei, kaol gee gil biq: "Cholyaeqhael o, noteel laoq aedeeteel senyil xilmael lye dyuqbaq zonglzaeq hhae lye loq'ae. 26 Baoqloq xitaeq laoq Yiqfuqsoq vae gee dyul maeqcilmyel, Yalxilyal halza milcaeq vae eiq geegaeq byel aeqwae, haelnaeqmyel cholyaeqhael'ae cheeqmu biq, kaol sheeqba byel vae lye gee: 'Cholyaeq e aqlaq maellye zongldu hhei e mael laoq momil maeqngeel'ae.' Xilmael laoq noteel mol eiq bael mol gaeq eiq bael gaeq vae. 27 Xilnye laol, aedeeteel xi qiqsheel mulhhael mul e cholyaeqhael laoq ochoq maeq fu'qiq'ongl dyul maeqcilmyel, haeqmiyaeq momil milmae Yaldimiq e laoqhaol mael eiq cholyaeqhael lye beiqgae hhei wae, kaol gilzuqmyel Yalxilyal halza milcaeq kaol milcaeq taq e heel gil e haeqmiyaeq momil e maduq eiq maqza wae."
28 Yoqhhaeteel gaeq hhei biq laol, neemae dilbyeq duyi maoq myel hol gil biq'ae, gul gae'lael aeqmyel gee: "Yiqfuqsoq cholyaeq e haeqmiyaeq momil Yaldimiq maeqdaeqhhaeq'ae!" 29 Milmae heeqmyel e cholyaeqhael aeqvuqlaelvuqmyel zongl tul beq laq. Yoqhhaeteel lye Baoqloq nyegael qiqgael bael zoq e Maqqiqdunl cholyaeq Gaiyoq, kaol Yalliqdaqguq yaol eetyeq biq, kaol qiqsheel neemae laoqmyel biaoqyanq myel vae byuqdo beq li. 30 Baoqloq cholyaeqhael tyuqvae li maoqlye zongl hhae, ngeelfeiq, laqcaqhael maeq bi li'ae. 31 Kaol Baoqloq e yelchoq Yalxilyal e yoheeq mee'nae hhaeq lye, cholyaeq yaol moqheilheil du hhei, kaol Baoqloq yaol biaoqyanq myel vae haeq li lye bi gee yil. 32 Tyuqfu cholyaeqhael aeqvuqlaelvuqmyel zongl bonggaebyel'ae, xilnye gul eiq zhol, yulnye gul eiq zhol. Ngeelfeiq, haelnaeqmyel cholyaeqhael laoq saeqvae zhol'eeq gil mael aeqcheekaol lye maeq loq gil'ae. 33 Yoqtail cholyaeq lye Yallilshandal yaol cholyaeqhael e yiqsi'ae deiq du hhei biq, cholyaeqhael onglci e qiq miq lye yoqhhaeq'ae haelmillye zongl lye geedu biq. Tyulkaol, Yallilshandal laoq cholyaeqhael'ae aqlaq biq biq, kaol cholyaeqhael'ae gee'loq biq maoqlye hhae. 34 Cholyaeqhael laoq yoqhhaeq Yoqtail cholyaeq'ae she lye fuduzaq hhei, kaol hhaellaelmyel gul gil: "Yiqfuqsoq cholyaeq e haeqmiyaeq momil Yaldimiq maeqdaeqhhaeq'ae!" Xilnye liangqgol xiaoqshiq zoqlal maoqmyel gul do wae. 35 Aeqnaol, milmae heeqmyel e shujil lye cholyaeqhael'ae yotyel maeq bi du vae laol, yoqhhaeq gee: "Yiqfuqsoq cholyaeqhael o, noteel e milmae heeqmyel mael laoq, Yaldimiq e laoqhaol mael fu'qyezaq, kaol Zhoulsi tyuqvae lye leeqgae yi e haqlo tyulmael'ae fu'qyezaq hhae lye aeqsul eiq loq'ae. 36 Xilmael laoq qiq hhaeq eiq maeq geepolzaeq yil ongl'ae, kaol noteel yotyel haq du gil, aeqvuqlaelvuqmyel haeq zongl gil o. 37 Noteel lye sheeqlaeq e cholyaeq xihael, yoqhhaeteel miaolfangq onglci e moqgoq mael maeq diqkoqzaeq, aedeeteel e haeqmiyaeq momil vae eiq maeq xyelduq gol'ae. 38 Diqmiqdiu kaol yoqhhaeq nyegael qiqgael mulhhael bal mulhael, aeqsul'ae zhiqmoqkae biq maoqlye kaollaoq, zhiqmoqkae myel vae bi gee yil, paelsilmyel yoheeq'ae eemoq hhei biq, kaol yoqhhaeteel qiqhhaeq qiqhhaeq'ae zhiqmoqkae kael'ae. 39 Noteel baeqjyelboq e aeqchee gee'loqzaeq maoqlye kaollaoq, zhiqmoqhael hhaeq'ae lye laol zhol'eeq deelhhei kaol gee'loqzaeq gil. 40 Yaeqnao aeqvuqlaelvuqmyel zongl gil mael laoq, qiqgiq'ae lye maqza myel zongl gil hhae, kaol aedeeteel'ae xilnye zongl'ae lye zhiqmoqkae lael gil maeqhe. Yaeqmeel qiq pu xilnye zhol'eeq mael'ae, aedeeteel qiqgiq maeq gee'loq du ongl'ae." 41 Yoqhhaeq saeziq xihael gee byel hhei'laol, cholyaeqhael yaol lyeqci hoq byel hhei vae.