Na Pakaidundunan na Tafulu Adwa a Apostol ira
9
Inammungnga i Jesus ino tafulu adwa a apostolnera anna inindannera si nammu anna pakandama a mappaanaw si demonyuwera anna mappammapiya si taki-takit. 2 Dinundunnera a ibalaggaweno pattangngalan i Dios so tolenera anna mapammapiyanera. 3 Kunna sikwara, “Amme kayu mangikangkalin si maski sanna so paddoyug diyaw, awan a bangkulu onnu pangiyekwanan si pakkukwayuwera, onnu tinapay, onnu pirak maski kepay barasiyera a pattaliyan. 4 Nu nenay tallungan diyaw a balay, magyang kayu sinay makiyad si manaw kayu sitan a lubbun. 5 Nu awan mappadulot sikwayu, manaw kayu sitan a lubbun anna pappaggan diyaweno girafuk so takkiyu tapenu ipaitayu so tolayera a kastiguwan irana i Dios se inammayandeno mensahena.”6 Antu nanaw anna inang ira so korwan a tarabbunan ira a ibalaggaweno Mapiya a Baga anna mapammapiya inoyera a matakit maski nu sintawera.
Pakakungkurwan i Herodes Antipas
7 Nadingngag amminan i Herodes Antipas a gumattangngal na Galilea megafu so amminan a nedemmu. Antu nakungkurwan ingkeno nonotna gumafu so netunduweno korwan ira a nantotolay i Juan a Gumabbawtismu. 8 Kundeno korwan ira a nappadda i profeta Elias. So korwan ira kunda a ana tata so profetera siin palungu a tiyempu a nantotolay. 9 Kunna i Herodes Antipas, “Nepafugutku i Juan udde yanya iyaw a tolay a nakadingngaggangku si oddu a kiya-kiyan meafu sikwana?” Kinumananna a maita i Jesus.
Namakkan i Jesus si Maturuk Limarifu a Tolay
10 Sin nuliyeno apostol ira so paddoyu-doyugga so naddadaruma a lubbu-lubbun, netundura sike Jesus amminan a inangwara. Ira-ira pelamang yo nebulunna a inang so tata lubbun a maayan si Betsaida. 11 Sin naammuwan ino tolayera a inang ira sinay, dinandananda i Jesus. Inarasawnera anna tinunturuwannera meafu so pattangngalan i Dios so tolenera anna pinammapiyana inoyera a maawag a mapammapiya.
12 Sin massillapin, inang ino tafulu adwa a apostolnera sikwana e kunda, “Paanawannuweno tolayera tapenu umang ira so lebut na tarabbunan anna talubbunan ira a mintarak si paffunduwan anna maakkan gumafu se ana etam sito lubbun a awan bafalay.”
13 Udde kunna i Jesus sikwara, “Pakkanan diyawera.”
Tinumabbag ino apostolnera, “Lima a tinapay anna adwa a busilad lamang yo ana sikwami onnu kanggammu kad a ingkami a maggatang si akkanan para so amminan a tolayera?” 14 (Mallimarifu a lallakiyereno ana sinay.)
E kunna so disipulunera, “Pattutturan diyawera si taggi-limafulu.”
15 Antu yo inangwara e pinatuttudda amminan ira. 16 Inappana i Jesus ino lima a tinapay anna adwa a busilad e nattangaw si langit anna nappabalat sike Dios. Ginadwaneno tinapay anneno busilad e neyaddana so disipulunera se ibunnera so tolayera. 17 E Nangngan amminan anna nabattug ira. Inammung ino disipuluwera yo nabuna e napannuweno tafulu adwa a kaba.
Pakaammu i Pedro meafu so Akkatolay i Jesus
18 Namitta aw, sin tattatana i Jesus a maddasa-dasal bulunneno disipulunera, finuutnera, “Yanyaak so tolayera?”
19 Tinumabbag ira, “Ana yo korwan a massapit si ikka i Juan a Gumabbawtismu, udde kunda pay yo korwan ira si ikka i profeta Elias, e kunna kepay yo korwan ira si ikkeno tata so profetera so palungu a tiyempu a nantotolay.”
20 Kunna sikwara, “Ikkayu pay ay, yanyaak sikwayu?”
Tinumabbag i Pedro, “Ikka i Mesiya i Dios!”
Nepakaammuna i Jesus ino Akkapatena anna Panantotolena
21 Nengangngadna a tinunan ira a ammera itundu maski yanya a tolay meafu sikwana.
22 Kunna sikwara, “Ikkanak a yo Anak na Tolay e maawag a maddalan si odduwengke a passufri anna pammayan na manannakam na Hudyuwera, afu-afu a pariyera anneno mapoporay si katunungan anna ipapateraknga udde kabalin na tallu aw mantotolayaknga.”
Na Paddandan Sike Jesus
23 Antu kunna sikwara amminan, “Nu ana manggam a mattabali si gumaladandangku, anawanneno panggammanna a akwan anna kinaaw a ibali-balinna a mangurug sikwak maski nu antuweyan yo pakegafuwan a passufrina anna akkapatena. 24 Seanya yo mangikenga pelamang si angatna e ammena matolay a bulun i Dios amu-amu anna seanya yo manggam a matay maipegafu sikwak e matolena a bulun i Dios amu-amu. 25 Nenay kad mapiya a maappa na tata tolay maski nu akwana amminan a wara-wara sito talubaggan udde ammena matolay a bulun i Dios amu-amu. 26 Inoyera a mangikaatal sikwak anneno sapitkuwera, ikkanak a yo Anak na Tolay e ikaatalkuna payera nanu muliyak a ana dayok anna pakandamak a naggabwat sike Amak a bulunneno anghel ira a dinundunna. 27 Udde gakkurug yo itunduk sikwayu, ana korwan a mattadda-taddag sitoye a maitaneno pattangngalan i Dios so tolenera liyera matay.”
Na Pangangkakwa na Baggi i Jesus
28 Mattalingguwan kapiyena sinapit i Jesus iyawera, nebulunna i Pedro, Juan anni Santiago e nunek ira so tata dangutul a maddasal. 29 Sikwana a maddasa-dasal i Jesus, nangangkakweno interu baggina metalwaring ino mutungnga e nattameta anna mangngilikilit a naffuraweno barasina. 30 Lannat a naiteno disipuluwera yo adwa a lallakiyera, i Moises anni Elias a makiteta-tetabbag sike Jesus. 31 Nappaddera si mangngilikilit a baggaw e nassapi-sapit ira meafu so patena a balinannana se iyan ino uray i Amana a medemmuna so Jerusalem. 32 Mammit ingkeno akkaturug i Pedro anneno bafulunnera udde sin nagamyera, naitara i Jesus si mangngilikilit a baggaw bulunneno adwa a lallakiyera. 33 Sin paanawin ino adwa a lallakiyera, kunna i Pedro sike Jesus. “Afu, mapiya se ana etam sitaw! Nu kanggammu, mangwa kami si tallu a amingan, tata para tata, tata para sike Moises anna tata para sike Elias.” (Ammena ammu nu nenay a sapi-sapitanna.)
34 Sikwana a mabi-abid, nappaddeno dulam a naniyong sikwara. Natalawan ino disipuluwera dengkera a napalebutan si dulam. 35 Nadingngaggeno tata ngaral a naggabwat so dulam a nakkun, “Antuweyaw yo Anakku a Pinilika. Maningngag kayu sikwana!”
36 Sin naawan ino ngaral, naiteno disipuluwera i Jesus a tattatana a nabattang. Awan a mimmitda anna awan nangitunduwanda megafu so naitara a nedemmu.
Pinammapiyana i Jesus ino Abbing a Lalaki a Naaffunan si Demonyu
37 Kadaddaramatanna, dinumafung sike Jesus ino odduwengke a tolayera dengkera dinumolam so dangutul. 38 Tata so kaodduwan na tolayera a lannat a naggirawa e kunna, “Mestru, makigumallakak sikwam se itannuweno anakku a lalaki. Mittata anakku baggina. 39 Siddarat a finuwersa a ginammat na demonyuweno abbing e pinakallitna. Pinabbanilawna demonyu baggina makiyad si nalluluweno sangina. Ammenengke pinamemmak a palowan baggina. 40 Nakigumallakak so disipulum ira se paanawandeno demonyu udde ammera makwa.”
41 Tinumabbag i Jesus, “Ikkayu a diyafuwan sitoye, awan angngurug diyaw anna ammeyu ammuweno fustu onnu bakkan a fustu. Kasanna kad ingke kabayag yo pagyangku onnu pàattamku sikwayu? Iyang diyaweno abbing sikwak.”
42 Dengkera neyang ino abbing sike Jesus, binaletwak ino demonyu baggina so lubag antu pinabbanilawna. Udde pinassapitanna i Jesus ino demonyu. Pinammapiyaneno abbing a lalaki anna netolina baggina so amana. 43 Anna nalaggat amminan ino tolayera so pakapangwengke i Dios.
Nepakaammuna Imman i Jesus ino Akkapatena
Sikwara a naitareno kakkapallat a inangwana, kunna so disipulunera, 44 “Maningngag kayu si mapiya anna dandamman diyaw iyaw a itunduk sikwayu. Ikkanak a yo Anak na Tolay e traydorandakngeno tolayera.” 45 Udde ammera naintindiyan nu nenay kanggamma sapitan ino sinapitna se neyimadna sikwara e mattalawera a maffuut sikwana.
Gakkurug a Kaatannangan
46 Siggatatan a nattitinnulyat ino disipuluwera nu ansa sikwareno kaatannangan. 47 Udde ammuna i Jesus ino nono-nonotanda nabu nangappa baggina si abbing e pinataddagnga so karebbingnga. 48 Kunna sikwara, “Seanya yo mangarasaw sito abbing maipegafu sikwak e arasawannak, anna seanya yo mangarasaw sikwak e arasawanna pay yo nanundun sikwak. Se yo ammena kurwa kaawan sikwayu e antuwen ino kaatannangan.”
Buluntam ino Ammena Mattulyat Sikwatam
49 Tinumabbag i Juan, “Mestru, nakaita kami si tata tolay a mappaana-anaw si demonyu a usa-usandeno ngannu. Ginaggaddammi baggina se bakkantam a bulun.”
50 Udde kunna i Jesus sikwana, “Ammeyu fuwaddan baggina! Seanya yo ammena mattulyat sikwayu e antu yo bulun diyaw.”
Ammena Inarasaweno Taga-Samaria i Jesus
51 Sin aranniyen a muli i Jesus si langit, naddesisyon baggina a umang so Jerusalem. 52 Nangidundun baggina si korwan a gumabbanduwera a mapalungu sikwana. Inang ira so tarabbunan na Samaritanuwera tapenu meparan yo paddatang i Jesus, 53 udde ammena kanggamma Samaritanuwera a umang baggina so tarabbunanda gumafu se ammura a umang baggina so Jerusalem a maddayaw sike Dios. 54 Sin nadingngag i Santiago anni Juan a disipulunera megafu sinay, kunda, “Afu, kanggammu se marang kami si afuy so Dios takesi madaralnera?”
Na Gumaladandan ira i Jesus
57 Sin mallaka-lakad ira so dalan, inumaranniyeno tata lalaki sike Jesus e kunna, “Dumandanak sikwam maski sintaw angannu.”
58 Antu sinapitna i Jesus sikwana, “Ana pabbalayan ino simaron a aggayam ira so abbu-abbut anna pumukan na pappitut ira, udde ikkanak a yo Anak na Tolay e awan pimemmangan onnu balay a paturuwangku.”
59 Kunna i Jesus so korwan, “Dandanannak.”
Udde kunneno lalaki, “Afu, pulinnak abbu se umangku ipetanam i amak.”
60 Kunna i Jesus sikwana, “Inoyera a ammena mangurug sikwak e neyarig so tolayera a natay. Itanamda inoyera a kakunnara. Udde ikka a mangwa, ingkan anna ibalaggom ino pattangngalan i Dios so tolenera.”
61 Ana imman tata nassapit sike Jesus, “Dumandanak sikwam, Afu, udde umangak abbu so balek se ipakaammuk sikwara a dumandanaknga sikwam.”
62 Kunna i Jesus sikwana, “Na tata tolay a mara-aradu so payawna e ammena nad makalangngi-langngi anna itanna nu nenay naangwana. Kakunna keppay, yo tolay a mangibalin a mangitakit meafu so familyana anneno korwan ira a nabattangnga e ammena mepangngat a tangngallan i Dios.”