Gakkurug a Kaatannangan
18
Sitan a tiyempu, inang ino disipuluwera sike Jesus e finuutda baggina, “Yanya yo kaatannangan so pattangngalan i Dios?”2 Nayag i Jesus si tata abbing a nepataddagnga so allanganda, 3 e kunna, “Gakkurug yo itunduk sikwayu, nu ammeyu angkakwan ino agginonotan diyaw anna mekunna kayu si abbing ira, amme kayu dama a mebilang sike Dios so pattangngalanna. 4 Seanya yo mappataibbafa a kakunna iyaw a abbing antu yo kaatannangan so pattangngalan i Dios. 5 Seanya yo mangarasaw sito abbing gumafu sikwak e arasawannak.”
Na Pakegafuwan na Pakaliwatan
6 Nebalinna i Jesus a nakkun, “Nu yanya sikwayuweno pakegafuwan na pakaliwatan ino tata mangurug sikwak a ibbafa a tolayera a mangurug sikwak a kakunna si abbing ira, tammapiya a bassinan si dokal a aggilingan ino tangngadna anna malimat so bebay. 7 Gakkurug a dumatang ino pakegafuwan na pakaliwatan ino tolayera sito talubaggan, udde pakekkallak ino tolay a paggabwatanna iyaw!
8 “Nu yo kamatnu onnu takkim ino pakegafuwan na pakaliwatannu, gabbungannu anna itappolnu. Mas mapiya kepay a pilay onnu pukulka a matolay a bulun i Dios amu-amu ammat si ana adwa a kamat anna adwa a takkim anna metappol so infiyernu a ana afuy a ammena maadda-addap. 9 Anna nu yo matam pay yo pakegafuwan na pakaliwatannu, kulotannu anna itappolnu. Mas mapiya kepay a matolay a bulun i Dios amu-amu a ana tata lamang a mata ammat si adwa mata e metappol si infiyernu.
Na Pangarig na Nawawan a Karneru
10 “Itan diyaw se ammeyu arariyan inoyera a mangurug sikwak a kakunna iyawera a abbing se sapitangku sikwayu a ibali-balin na angheldera a manaron sikwara a bulunda i Amak. 11 (Se ikkanak a yo Anak na Tolay e inang a manabbut so nawawan ira.)
12 Nenay masapitnu? Gangngaryan, nu ana gumappastu e ana tatut a karneruna anna nawawan ino tata sikwara, ammena kad ibattang ino asiyamafulu asiyam so bakulud e intufukanneno tata karneru a nawawan? 13 E nanu matumpalanna, gakkurug yo itunduk sikwayu, mammalamuwang ingkena baggina so tata naintufukan ammat so siyamafulu asiyam a ammena nawawan. 14 Kunna keppay sike Amak si langit a ammena nakam a ana mawawan so mangurug ira sikwak a kakunna yo abbing ira.”
Wayi si Angngurug
15 “Nu nakaliwat sikwam ino wayim si angngurug ingka itundu sikwaneno liwatna. Udde akwannu iyaw nu ikkayu pelamang adwa. Nu maningngag baggina sikwam, netolimun ino abbafurulun diyaw si angngurug. 16 Udde nu ammena maningngag sikwam, mangibulungka kepay si tata onnu adwa a manestigu so pattaretabban diyaw. 17 E nu ammena kepay kanggam a maningngag, ipakaammum so grupu na minangikkurug ira a negagangera a massosoronnung. E nu ammena kepay maningngag sikwara, ibilangngu baggina a kakunna yo pattaratum si tata karallan a sinaliwata.
Na Neyallang anneno Neyannut
18 “Gakkurug yo itunduk sikwayu, nu nenay yo iyallang diyaw sito lubag e neyallangin si langit e yo iyannut diyaw sito lubag e neyannutin si langit. 19 Gakkurug pay yo itunduk sikwayu, nu sito lubag e umannung kayu adwa nu nenay yo arangngan diyaw sike Amak si langit, gakkurug a iyaddanana. 20 Se nu ana adwa onnu tallu a naammung a maddasal gumafu se mangurug ira sikwak, anaak sikwara.”
Na Pangarig meafu si Pammakoma
21 Sin inang i Pedro sike Jesus, naffuut baggina, “Afu, nu ana wayik si angngurug a namimpigyengke a nakaliwat sikwak, mamimpigya kad a mappakomaak? Mamimpitu?”
22 Kunna i Jesus sikwana, “Bakkan lamang a mamimpitu udde mamimpitufulub! 23 Kunnantu, yo pattangngalan i Dios e meyarig si tata patul a mattuki si gatut na imbutnera. 24 Sin namefu a mattuki baggina, neyangga sikwaneno tata so imbutnera a nakagatut si dokal. 25 Gumafu se awan pappagana so gatutnera, netun ino patul a melaku baggina mesapat ino atawana, anakngera anna amminan a pakkukwanera takesi makapagana baggina. 26 Nammalitud ino imbut so allangan na patul a nakkun, ‘Afu, ikallakngak! Pasensiyannak abbu, se pagangkuna amminan ino gatutku.’ 27 Gumafu se naallakkan ino patul sikwana, pinakomanna baggina so amminan a gatutna e pinaulinan.
28 “Dengke a nallawan ino imbut, nasemmuneno tata so ka-imbutannera a nakagatut sikwana si tatut a dinaryuc e pinattalna a nakkun, ‘Pagannun ino gatutnu!’ 29 Nammalitud anna nakigumallak ino tolay a nakagatut sikwana, ‘Pasensiyannak abbu e pagan takana.’ 30 Udde ammena inallakan ino imbut antu pinafukuknga makiyad si makapagana si gatutnera. 31 Narraddam ino korwan a imbut ira sin naitareno nedemmu so bulunda. Inang ira so patul a naddanug so naitara a nededemmu so bulunda. 32 Nepaayagngeno patul ino imbut e kunna sikwana, ‘Mapara-paralkangke a imbut! Pinakomangkun amminan a gatutnu gumafu se nakigumallakka. 33 Ikallakngu nad yo kakunnam a imbut kakunna yo panagikallakku sikwam!’ 34 Makaallang ino patul nabu pinadiyatanneno imbut so paffukukan makiyad si makapagana si gatutnera.”
35 Akkabalinna a nangarig i Jesus, kunna sikwara, “Kunna sitaw yo akwan i Amak a ana si langit sikwayu nu ammeyu gakkurug a mapakoman yo kasittoleyu.”