Na Pangarig ino Nawawan a Karneru
15
Namitta aw, inumaranni sike Jesus ino oddu a gumattuki si biyenes anna sinaliwat ira takesi maningngag sikwana. 2 Marekla-reklamuweno Fariseowera anneno mapoporay si katunungan. Kunda, “Iyaw a tolay e makikekkolak anna makitetallang a mangngan so sinaliwat ira.”3 Antu nangarig i Jesus sikwara, 4 “Gangngaryan, nu yo tata sikwayu e ana tatut a karneruna anna mawawan ino tata sikwara, nenay a akwanna? Ammena kad anawan ino asiyamafulu asiyam so pappastuwan anna intufukan ino nawawan makiyad si maintarakanna? 5 Nu naintufukannan ino karneru, mammalamuwang baggina a buttungan iyaw so afana. 6 Paddatangnga so balena, ayanneno kolakngera anneno karebbingngera e itunduna sikwara, ‘Makilamuwang kayu sikwak se naintufukangkun ino nawawan a karneruk!’ 7 Itunduk sikwayu, maanggam irengke si langit gumafu so tata sinaliwat a nabboboli ammat so asiyamafulu asiyam a matunung a tolay a ammena maawag a mabboboli.”
Na Pangarig Megafu So Natawataw A Pirak A Diplata
8 Kunna kepay i Jesus so Fariseowera anna so mapoporay si katunungan, “Gangngaryan, nu yo tata bafay e ana tafulu a piraknga a diplata e matawatawneno tata, nenay yo akwanna? Ammena kad a massigi si allamparan, sammeranneno balena anna intufukanna si mapiya yo natawataw a pirak makiyad si maitana? 9 Se nu naintufukannan iyaw, ayanneno kolakngera anneno karebbingngera e itunduna sikwara, ‘Makilamuwang kayu sikwak se naintufukangkun ino natawataw a pirakku.’
10 “Itunduk sikwayu, kunna keppay yo anggam na anghel ira i Dios gumafu so tata sinaliwat a nabboboli.”
Na Pangarig meafu so Anak a Nanamfut si Pirak
11 Kunna kepay i Jesus, “Ana tata tolay a ana adwa anaknga a lalaki. 12 Kunneno uddi a anak so amana, ‘Ama, iyaddamun sikwak ino erensiyangku.’ Antu ginadweno ama yo pakkukwanera so adwa a anaknga. 13 Nappasa si pigya aw, nelakuweno uddi a anak ino ballena e naddoyug so aroyu a talubbunan. Tinamfutna amminan sinayeno pirakngera si maral a aggangwa. 14 Sin natamfutna amminan ino pirakngera, dinumatang ino nafulotan a bisin sinay a talubbunan, antu namefuwen baggina a madidiyat. 15 Antu tinumallung baggina a gumappakkan si bafuyera sinay a lubbun. 16 Gumafu se nafulotan ino bisinna, kanggamma nad a mangngan so akkanan na bafuyera. Awan a nangiyadda sikwana si maakkan. 17 Sin nanonotneno inangwanera e kunna si nakamma, ‘Odduwengke yo maakkan na gumasserbiyera i amak, udde anaak sitaw a matay si bisin! 18 Muliyak sike amak anna sapitangku sikwana, “Ama, nakaliwatak sike Dios a ana si langit anna sikwam. 19 Bakkanakun a mepangngat a maayan si anakngu, taratunnak a kakunna yo tata so natandanan a gumasserbim ira.” ’ 20 Nanaw baggina sinay e nuli so amana.
“Aroyu kepay baggina so balera sin naita i amaneno paddatangnga e naallakan sikwana. Siddarat a dinumafung ino amana, ginakkapna anna inummananneno anaknga. 21 Kunneno anaknga sikwana, ‘Ama, nakaliwatak sike Dios anna sikwam. Bakkanakun a mepangngat a maayan si anakngu.’ 22 Udde inayan ino amaneno imbutnera e kunna sikwara, ‘Malan! Appan diyaweno kakastan ingke a tafál anna barasiyan diyaw baggina. Sakkalangan anna sandalyatan diyaw baggina. 23 Appan diyaweno katafan a ubbun a baka se partin diyaw takesi akkanantam anna maffunsyon etam! 24 Gumafu se iyaw a anakku e arig a natayin udde sitoye nantotolayin, arig a nawawan udde sitoye naintarakanin.’ Antu pinefunandan a maffunsyon.
25 “Ana sinoy so uma yo palungu a anaknga. Sin nuli baggina anna aranniyen so balera, nadingngagnga a ana funsyon a mededemmu. 26 Inayanneno tata so imbutdera e finuutna nu nenay yo mededemmu. 27 Tinumabbag ino imbut, ‘Dinumatang ino wayim. Nepaparti i amam ino katafan a ubbun a baka, gumafu se natolay a nakauliyeno wayim anna awan nedemmu sikwana.’
28 “Nakaallang baggina anna ammena kanggam a tumallung so balera. Antu nallawan ino amana e nakigumallak sikwana. 29 Udde tinumabbag baggina, ‘Ama, dingngaggannak! Pinasserbiyan taka si oddu a rawun a manilla tata so imbutnuwera anna kinurugku amminan ino nedundunnu sikwak. Udde ammenak inindan si maski nad lamang tata ubbun a ganding takesi ana a pattatarallangammi a makkokolak. 30 Udde sin dinumatang iyaw a anakngu, nepapartim ino katafan a ubbun a baka para sikwana maski nu tinamfutneno pakkukwam ira si mapagan a bafabbayera.’