Na Mapiya a Baga Meantu Sike
Markus
Meafu Sitaw A Libru
Iyaw a libru e tata so annam a fulu annam a libruwera si Bibliya. Neturak iyaw a libru i Juan Markus a anak i Maria, tata dammak so Jerusalem. Makkolak da Markus anni Pedro e disipuluwera i Jesus. Meantu so kaodduwan na tolayera, naggabwat iyaw sike Pedro e neturak i Markus.
Neturak i Markus iyaw a libru so bakkan a Hudyuwera, metalwaring so tolayera na Roma. Antuweyaw yo kaibbafan so appat a libru a maayan si Mapiya a Baga meafu so akkatolay anna tunturuwera i Jesus. So pefu na panunturu i Jesus, nangwa baggina si oddu a milagruwera. Akkabalinna a nappili si appat a disipulunera (1:16-20), siddarat a oddu yo pinammapiyana. Anna inoyera a pinammapiyana a naaffunan si demonyuwera (1:21-28), anneno bafay a katuwangan i Simon (1:32-34), anneno tolay kurwengke matakit si gaddang (1:40-45). Itundu i Markus nu kasanna a pinammapiya i Jesus yo tolayera, udde maumid a nepaitana a i Jesus ino nangwa sitaw a milagruwera megafu so pakapangwa i Dios.
Sin tiyempuna i Jesus, inammayan ino korwan a afu-afuwera na Hudyuwera baggina. Antuweyaw yo gafuna nu saay a pinefunanda a nintufuk nu kasannarana a patayan i Jesus.
Nepaitana i Markus a i Jesus e tata Gumasserbi i Dios gumafu se baggineno nangwa si uray i Dios. Anneno milagruwera a inangwana, na ammapiyanera anneno angngaffutna so demonyuwera a mangipaita sito talubaggan a i Jesus e bakkan a manilla yo korwan a gumasserbiyera, udde baggineno gakkurug a Anak i Dios.
Napannu iyaw a libru si milagruwera a istorya a nakapallatan ino odduwengke a tolayera anneno disipuluwera i Jesus. Udde kunna i Markus a yo passufri anna akkapatay i Jesus antu yo kakkapallat ingke. Anneno palungu a tolay a nakaintindi sitaw e yo sundalu a Romano a nakaita so akkapatay i Jesus e kunna, “Gakkurug ingke a Anak i Dios iyaw a tolay!” (15:39). Na akkatolay anneno akkapatay i Jesus e mangipaita a amminan a inangwana anna amminan a sinapitna patamu sikwana e gakkurug.
Kalawumanna
Na Pefu na Mapiya a Baga 1:1-13
Na Passerbi i Jesus so Galilea 1:14—9:50
Mamefu so Galilea Makiyad si Jerusalem 10:1-52
Na Passufri anna Akkapatay i Jesus 11:1—15:47
Na Panantotolay i Jesus 16:1-8
Na Pemunuwan ira anna Punek i Jesus si langit Akkabalinna a Nangantotolay 16:9-20