Na Panantotolay i Jesus
28
Akkabalinneno Aw na Aggimemmang, sin maggibbat na palungu aw na Linggu, inang i Maria a taga-Magdala anna bulunneno tata Maria so pattanamman i Jesus. 2 Lannat a nallunig si matuyag e dinumassag ino tata anghel i Dios a naggabwat si langit. Nedaroligngeno batu a nakasellad so pattanamman i Jesus e nattuttud sinay. 3 Makasinsilaweno anghel a manilla kilat. Na barasina e mafurawengke a manilla niyebe. 4 Mayyayyak si talaweno guwardiyera sin maitareno anghel e nabaletwak ira anna ammera makaguyu a manilla natayera.5 Udde kunneno anghel so bafabbayera, “Amme kayu mattalaw. Ammuk a intu-intufukan diyaw i Jesus a nepatak so kurut. 6 Awanin baggina sitaw se nantotolayin a kakunna yo sinapitna sikwayu. Kayutaw, itan diyaweno nangiwaggatanda sikwana. 7 Mappalang kayu e siddarat diyaw a itundu so disipulunera a nantotolayin baggina! Mapalungu i Jesus sikwayu a umang so Galilea. Maitayuna baggina sinay! Dandamman diyaweno sinapitku sikwayu.”
8 E nappalan ira a nanaw so pattanamman a ana talaw anna anggam sikwara. Nakkakarelera a inang so disipuluwera takesi itundureno nedemmu.
Nappadda i Jesus sike Maria a Taga-Magdala
9 Udde dinafung ira i Jesus e kunna, “Sintaw yo angan diyaw?” Inumaranniyera sikwana, ginakkapdeno takkina, anna dinayora baggina. 10 Kunna i Jesus sikwara, “Amme kayu mattalaw! Umang diyaw itundu so wayik ira a umang ira so Galilea. Maitaraknga sinay.”
Na Nebaga na Guwardiyera
11 Sin nakaanawin ino bafabbayera, inang pay so lubbun ino korwan a sundaluwera a nagguwardiya so nattanamman i Jesus. Netundura so afu-afu a pariyera ino amminan a nedemmu. 12 Nammu-ammung ino afu-afu a pariyera anna manannakam na Hudyuwera e nattatera a pasussukan si oddu a pirak ino sundaluwera 13 Kunda so sundaluwera, “Kunna sitaweno sapitan diyaw so tolayera. ‘So gafi a matu-maturug kami, ginumumwang ino disipuluwera i Jesus e kinokotdeno baggina.’ 14 Nu maammuwan iyaw i Gubernador, ikkamin ino makammu a makitetabbag sikwana tapenu ammena kayu likkaran.” 15 Inappa na sundaluwereno pirak anna inangwareno netun sikwara a akwanda. Antu makiyad sitoye, iyaw kepay yo istorya a sapi-sapitan na Hudyuwera.
Nappadda i Jesus so Disipulunera
16 Inang ino tafulu tata disipuluwera i Jesus so Galilea, so bakulud a netundu i Jesus sikwara. 17 Sin naitara i Jesus, naddayawera sikwana udde nabbabang ino korwan ira sikwara. 18 Inumaranni i Jesus sikwara e kunna, “Neyadda amminan sikwak ino pakandama si langit anna sito lubag! 19 Nabu, umang kayun e tunturuwan diyaw a mattabali si disipuluk ino tolayera si amminan a talubaggan megafu si pabbawtismuyu sikwara si ngan da Ama, anna sikwak a Anaknga anni Espiritu i Dios 20 anna megafu so panunturuyu sikwara a makimoray so amminan a dundungkuwera. Dandamman diyaw, maumid a bulundak makiyad si tamfut na talubaggan.”