Na Panantotolay i Jesus
24
Sin maggibbat na palungu aw na linggu, inang ino bafabbayera so pattanamman i Jesus e nekangkalindeno pabangug a lana a neparanda. 2 Sin dinumatang ira sinay, naitara a nakadaroliggin ino batu a nakasellad so pattanamman. 3 Udde sin tinumallung ira so pattanamman, ammera naintufukan ino baggi i Jesus. 4 Udde sin ammera ammu nu nenay akwanda meafu sitaw, lannat a nappaddeno adwa a lallakiyera so karebbingga a kumilla-killat yo barasira. 5 Natalawan ino bafabbayera e nallabbera so lubag udde kunneno lallakiyera sikwara, “Saay se intu-intufukan diyaweno natolay so natayera? 6 Awanin baggina sitaw se nantotolayin! Dandamman diyaweno sinapitna sikwayu sikwana a ana kepay so Galilea, 7 a baggina a yo Anak na Tolay e maawag a medawawa so sinaliwat ira, mepatak so kurut e mantotolena so meka-tallu aw.”8 Nadandamdeno sinapit i Jesus 9 antu nanawera so pattanamman makiyad si netundura so tafulu tata apostol ira anna so korwan a bafulundera nu nenay yo nedemmu sinay. 10 I Maria a taga-Magdala, Juana, anni Maria a ina i Santiago anneno korwan kepay a bulunda a bafabbayereno nangitundu so apostol ira. 11 Udde arig ino apostol ira a awan kagakkuruwanna yo sinapit ino bafabbayera nabu ammera nangurug sikwara. 12 Maski nu kunna sitan, nakkarantut i Pedro so pattanamman. Naddomug e nassirib baggina so unagngeno pattanamman udde naitana lamang yo sinnun a nebabbat so baggi i Jesus. Antu nuli baggina so balena a nalaggat so nedemmu.
Nappadda i Jesus so Adwa a Disipulunera
13 Sitan keppay a aw, ana adwa disipulu i Jesus a mallaka-lakad paumang so Emmaus. Mattafulu tata kilometro yo kaaroyuna so Jerusalem. 14 Pattataretabbanda meafu so amminan a nedemmu. 15 Sikwara a nattataretabbag, inumaranni i Jesus anna nebulun baggina sikwara. 16 Udde ammera naimunuwan baggina.
17 Anna kunna i Jesus sikwara, “Nenay yo pattataretabban diyaw?”
Sinuminak ira a narraddam.
18 Kunneno tata sikwara a mingan si Cleofas, “Ikka pelamang yo tolay a maggannon so Jerusalem a ammena makaammu so nedemmu so nappasa a awera.”
19 Finuutna i Jesus sikwara, “Nenay yo nedemmu?”
Netabbagga, “Na nedemmu sike Jesus a taga-Nazaret. Tata baggina a profeta a makapangwa si aggita i Dios anna tolayera. Naita iyaw so inangwanera anna so tunturunera. 20 Nedawawareno afu-afu a pariyera anneno afu-afuwera na Hudyuwera baggina so Romanowera nabu nasentensiyan a matay so kurut. 21 Innanamammi a baggineno mangisalak so Israel so pattangngal na Romanowera. Udde ammenan dama se mattallu awin makiyad sin natay baggina. 22 Tata kepay, nalaggat kami so nebageno korwan a bulummi a bafabbayera. Maggibbat ira a inang so nattanamman i Jesus, 23 anna sin ammera naiteno baggina, nuliyera e kunda sikwami a naitareno anghel ira a nappadda e kunda sikwara a natolay i Jesus. 24 Inang ino korwan a bafulummi so nattanamman i Jesus e gakkurug amminan ino sinapit ino bafabbayera. Ammera naita i Jesus sinay.”
25 Kunna i Jesus sikwara, “Amme kayu kad makaintindi? Saay se amme kayu mangurug so amminan a sapi-sapitan na profetera? 26 Maawag a massufri i Kristo liyena mapadayawan baggina i Dios.” 27 Anna nepaintindi i Jesus sikwareno kanggamma sapitan ino amminan a neturak a sapit i Dios meafu sikwana, mamefu so neturak i Moises makiyad so amminan a neturak na profetera.
28 Aranniyeran so tarabbunan a anganda e manilla ibali-balin kepay i Jesus so pallakadna, 29 udde finuwaddandengke baggina. Kunda sikwana, “Magyangka sikwami se gafiyenin.” Antu nebulun baggina sikwara. 30 Sin mangngan iran, nangappa i Jesus si tinapay e nappabalat sike Dios. Kapiyena ginadwa-gadwaneno tinapay e neyaddana sikwara. 31 Sitoye lamang a naimunuwanda i Jesus, udde lannat a naawan baggina so aggitara. 32 Kunda, “Antu keppay kena se mapiya yo ginna-ginnanta kabbulan sikwana a katetabbagngeta so dalan e pinaintindina sikwateno neturak a sapit i Dios!”
33 Siddarat a ginumikkat ira a nuli so Jerusalem. Naintufukandeno tafulu tata apostol ira anneno korwan a bafulunda a nammu-ammung. 34 Sinapi-sapitda, “Gakkurug a nantotolay i Afu e nappadda baggina sike Simon!”
35 E sinapit pay yo adwa sikwareno nedemmu so dalan anna kasannara a naimunuwan i Jesus sin ginadwa-gadwaneno tinapay.
Nappadda i Jesus so Disipulunera
36 Sikwara a pattataretabbanda iyaw, siddarat a nappadda i Jesus sikwara e kunna, “Piya yo ana sikwayu!”
37 Udde nalaggat anna natalawan irengke gumafu se arigga a nakaitera si banig. 38 Antu kunna i Jesus sikwara, “Saay se mattalaw kayu? Saay se mabbabang kayu? 39 Gakkurug a ikkanak iyaw. Itan diyaweno kamatkuwera anneno takkik ira. Senggirandak anna itan diyaw. Se yo banig awan a ballagnga anna tulangnga, udde ikkanak maitayu a ana sikwak.”
40 [Sin sinapitna iyaw, nepaitaneno kamatnera anna takkinera.] 41 Naanggam anna nalaggat ira udde ammera kepay nangurug se gakkurug a natolay baggina. Kunna i Jesus sikwara, “Wara maakkan sitaw?” 42 Inindanda baggina si tata natunu a busilad. 43 Inappana e inakkanna so allanganda.
44 Antu kunna sikwara, “Iyaweno sapitkuwera a netunduk sin anaak kepay sikwayu a maawag a maparulot amminan ino neturak so katunungan i Moises, anneno neturak na profetera anneno neturak so libru na Salmo ira patamu sikwak.”
45 Antu pinaintindi i Jesus sikwareno neturak a sapit i Dios. 46 Kunna sikwara, “Kunna sitaweno neturak, ikkanak i Mesiya e maawag a massufrina anna matena anna mantotolena so meka-tallu aw. 47 E maawag a mebalaggaw so interu a talubbunan, mamefu so Jerusalem, megafu sikwak e pakomanna i Dios ino mabbobolina so liwa-liwatda. 48 Ikkayuweno nakaimammat so amminan a kiya-kiyan a nedemmu e maawag pay a itunduyu so korwan ira. 49 Maningngag kayu, idundungku sikwayuweno Espiritu i Dios a netamba i Amak, antu amme kayu manaw so Jerusalem makiyad si maarasoyuweno pakapangwa a naggabwat si langit.”
Na Pattullu i Jesus si Langit
50 Antu nebulunna i Jesus ino disipulunera so Betania. Sinay netulluneno kamatna a naddasal se indannera i Dios si mapiya a akkatolay. 51 Sikwana a akakwan iyaw, inanawannera dengke a netulluwen baggina si langit. 52 Dinaya-dayora i Jesus anna mammalamuwang ira a nuli so Jerusalem. 53 Maumid a anera so Templu a maddaya-dayaw sike Dios.