Na Mapiya A Baga Meantu Sike
Juan
Meafu Sitaw A Libru
Ipaammu-ammu na Bawu a Baga meantu sike Juan a i Jesus ino awan a pakiyaranna a sapit i Dios a nattabali si tolay anna nagyan sito talubaggan. Neturak iyaw a libru takesi yo mabbibbid ira e mangurug a i Jesus ino netamba a Mannabbut, na Anak i Dios anna megafu sikwana e matolayerana a bulun i Dios amu-amu. (Juan 20:31).
Na palungu a parte na iyaw a libru e mangipaita si naddadaruma a milagru a pakaitan a i Jesus ino netamba a Mannabbut, na Anak i Dios. Tumufad sitaw e yo pangipaimammat meafu so milagruwera. Sitaw a parte e mepaita nu kasanna a ana nangurug sike Jesus anna nattabali a dumaladandannera. Ana pay yo korwan ira a ammena mangurug e tinulyatda baggina. Nakaturak so kapitulu tafulu tallu makiyad si tafulu pituweno mauddi a gafi i Jesus bulunneno disipulunera anneno neduma a pakibulunna sikwara. Sin gafina inay, pinatuyagngeno nakamda takesi makaparan ira so dumatang a mededemmu. So kauddiyan pay a kapituluwera maipakaammuweno paggafut, pannunut anna pappatak sikwana so kurut, ino panantotolena anneno oddu a pappaddana so disipuluwera kapiyena a nantotolay.
Maindan si kaawan ino Mapiya a Baga meantu sike Juan ino angat a awan pakiyaranna meafu sike Kristo. Tata iyaw a dutung e sitoyen e mamefu-mefuwen anna maara-arasowin ino mangurug ira sike Jesus a baggineno Dalan, Kagakkuruwan anna Angat. Neduma sitaw a libruweno pangiyusa si pangarig ira patamu si danum, tinapay, sirwat, gumappastu anneno karnerunera, kayu na ubas anneno bungana iyaw takesi ipaita anna itunturuweno kagakkuruwan ira meafu sike Jesus.
Kalawumanna
Na Sapit Nattabali si Tolay 1:1-18
Netundu i Juan a Gumabbawtismu a i Jesus ino Mesiya 1:19-51
Na Passerbi i Jesus 2:1—12:50
Na Mauddi a Awera i Jesus 13:1—19:42
Na Panantotolay anneno Pappaita na Afu Jesus 20:1-31
Na Pappaita i Jesus so Pitu a Disipulu 21:1-25