Na Mapiya a Baga a Meantu Sike
Lukas
Meafu Sitaw A Libru
Na natturak sitaw a libru e i Lukas, tata gumàuru a nangurug sike Jesus siin nabayagin a tiyempu. Mas oddu yo netunduna meafu so inangwa anna netunturu i Afu Jesus ammat so korwan ira a natturak meafu sikwana, mamefu so pangibalaggaweno akkeyanak i Juan a Gumabbawtismu anni Jesus makiyad si akkeyunek i Jesus si langit. Nebalinna pay a neturak i Lukas iyaw a libru, yo Angwera na Apostol ira, meafu so poddu na minangikkurug ira so punek i Jesus si langit. Neturak yo adwa a libruwera para sike Teofilus a maayan na korwan ira a tata so kaatannangan si Roma.
Iyaw a Mapiya a Baga a neturak i Lukas e mangipakaammu a i Jesus yo Mesiya a netamba i Dios a bagginaneno manabbut so Hudyuwera anna amminan a tolayera a mangurug sikwana. Neturaknga a piniliyeno Espiritu i Dios i Jesus a mangibalaggaw si Mapiya a Baga so madidiyat ira (4:18) Nabu, oddu yo mabibbid sitaw a libru patamu so pinaggikallaknga i Jesus so amminan a tolayera a naddadaruma yo kaawanda annanot so matakit ira, so naaffunan ino demonyuwera anna inoyera a arariyan ino korwan a tolayera.
Sitaw lamang a libru yo odduwengke a istoryera, gangngaryan, na kansyon na anghel ira anneno pagganon inoyera a magguwardiya-guwardiya so karneruwera a mamulun sike Jesus so akkeyanaknga, na tiyempu a nappabattang i Jesus so Templu sin akkabbingnga, ino dammak anni Lazaro anneno pangarig ira a megafu so mapiya a Samaritano anna so natawataw a anak a lalaki.
Na korwan ira a neturak i Lukas sitaw a libru e patamu si paddasal, Espiritu i Dios, panggam, pannuffun ino bafabbay so tarabafu i Jesus, pammakoli i Dios so liwa-liwat ira anna si pangiparan ino minangikkurug ira so pannuli i Afu Jesus si langit.