Na Panantotolay i Jesus
16
Sin nabalinin ino Aw na Aggimemmang, da Maria a taga-Magdala, Salome anni Mariaa a ina i Santiago e naggatang si pabangug a lana takesi umanggana iyaffuryat so baggi i Jesus. 2 Sin maggibbat na Linggu a pallattak ino sinag, inang ira so pattanamman i Jesus. 3 Sikwara a mallaka-lakad, sittatera a nakkun, “Yanya yo mangidarolignga so batu a nakasellad so pattanamman?”4 Sin nakadutung iran so pattanamman i Jesus, naitara a nakadaroliggin ino batu. Nalaggat ira gumafu se madiyat a ituyyud ino dokal ingke a batu. 5 Dengkera a tinumallung so pattanamman, nakaitera si tata sulteru a nakabarasi si furaw a kumilla-killat a sinnun a nakatuttud so diwananda. Nalaggat ira sin naitara baggina.
6 Kunneno sulteru sikwara, “Amme kayu mattalaw. Ammuk a intu-intufukan diyaw i Jesus a taga-Nazaret a nepatak so kurut. Udde awanin baggina sitaw se nantotolayin! Itan diyaw! Sinayeno nangiwaggatanda sikwana. 7 Udde umang diyaw itundu so disipulunera anna sike Pedro a mapalungu i Jesus sikwayu a umang so Galilea. Maitayuna baggina sinay a kakunna keppay yo sinapitna sikwayu.” 8 Antu nallawan ira anna nanawera so pattanamman se nalaggat irengke anna nayyayyak ira si talora. Awan maski tata nangitunduwanda nu nenay yo nedemmu gumafu se mattalawerengke.
Nappadda i Jesus sike Maria a Taga-Magdala
9 [Kapiyena a nantotolayin i Jesus so maggibbat na aw na Linggu, palungu abbu baggina a nappadda sike Maria a taga-Magdala. Pitu a demonyuwera a pinaanaw i Jesus sitaw a bafay. 10 Inang i Maria e netunduna nu nenay yo nedemmu so gumaladandan ira i Jesus a maradda-raddam anna mattangi-tangit. 11 Udde ammera kinurug ino sinapitna a nantotolayin i Jesus anna nappadda sikwana.
Nappadda i Jesus so Adwa a Disipulunera
12 Akkabalinna, nattametengkeno baggi i Jesus sin nappadda baggina so adwa so disipulunera a mallaka-lakad so lawan na Jerusalem. 13 Kapiyera a naimunuwan baggina, nuliyera so Jerusalem e netundura so bafulundera udde ammera kinurug.
Nappadda i Jesus so Disipulunera
14 Akkabalinna, nappadda i Jesus so tafulu tata disipulunera sikwara a mangnga-mangngan. Pinassapitannera se awan ingke angngurugga anna mataggat ino urera gumafu se ammera kinurug ino tolayera a nakaita sikwana kapiyena nantotolay.
15 Anna kunna sikwara, “Umang kayu amminan so talubaggan anna ibalaggoyuweno Mapiya a Baga meafu sikwak so amminan a tolayera. 16 Na tolay a mangurug anna mabawtismuwan e matabbutna, udde yo ammena mangurug e makastiguna. 17 Inoyera a mangurug sikwak e maindanna si pakapangwa a mangwa si milagruwera. Usandaneno pakandamak a mappaanaw si demonyuwera so tolayera anna mabid irana si bawu a sapit ira a ammera kepay a kinalakammu sinoy. 18 Imurangkunera nu miggam ira si nagita a iraw onnu makainum si kappatay a kiya-kiyan e awan maral a medemmuna sikwara. Ipotundaneno kamatda so matakit ira e mammapiyerana.”
Na Pattullu i Jesus si Langit
19 Akkabalinna a nakitetabbag i Afu Jesus so disipulunera, netullu baggina si langit e nakipanangngal sike Dios.b 20 Antu inang ino disipulunera so naddadaruma a lubbu-lubbun e nebalaggoreno Mapiya a Baga so tolayera. Dinuffunan ira i Afu Jesus e yo tuntururera e nataddan a gakkurug megafu so milagruwera a inangwara.]