Neyang i Jesus sike Pilato
15
Kadaddaramatanna, nammu-ammung ino afu-afu a pariyera, ino mapoporay si katunungan, ino manannakam na Hudyuwera anneno interu Sanhedrina tapenu pattataretabbanda nu kasanna a maakusan i Jesus. Na guwardiyera e siniggutandeno kamatnera anna neyangga baggina sike Gubernador Pilato.2 Finuutna i Pilato i Jesus a nakkun, “Ikka kad yo Patul na Hudyuwera?” Kunna i Jesus, “Nasapitnun.”
3 Antu yo afu-afu a pariyera e inakusanda baggina si oddu a kiya-kiyan. 4 Finuut i Pilato imman baggina, “Awan kad a metabbagngu? Itannuweno kaodduneno akusarera sikwam.” 5 Udde ammena tinumabbag i Jesus antu nalaggat i Pilato.
Nasentensiyan i Jesus a Matay
6 Kada Fiyesta na Attalebad, gagangay i Gubernador Pilato a mappalawan si tata fukuk a piniliyeno tolayera.
7 Sitan a tiyempu, oddu yo rebeldera a nefukuk gumafu se nakapatayera si oddu a tolayera sin maddaggun yo gulu metulyat so gubyernu na Romano. Tata sikwara a minganan si Barabbas. 8 Antu inang ino tolayera sike Pilato e inarangga sikwana a mappalawan si tata fukuk so Fiyesta na Attalebad se antu yo gagangena a akakwan sikwara. 9 Tinabbagnga i Pilato ira, “Kanggam diyaw kad a palawanangkuweno Patul na Hudyuwera?” 10 Finuut iyaw i Pilato se ammuna a mafuweno afu-afu a pariyera nabu nedawawara i Jesus sikwana. 11 Udde yo afu-afu a pariyera e sinussuwandeno tolayera tapenu palawananna i Pilato i Barabbas bakkan i Jesus. 12 Kunna i Pilato sikwara, “Nenay antu kanggam diyaw a akwangku sitaw a tolay a minganan diyaw si Patul na Hudyuwera?” 13 Naggirawera, “Ipapatakngu baggina so kurut!” 14 Kunna i Pilato sikwara, “Saay, nenay yo nakaliwatanna?”
Udde tattullot a naggirawera, “Ipapatakngu baggina so kurut!”
15 Gumafu se kanggam i Pilato a mapaanggamman ino tolayera, pinalawanna i Barabbas. Kapiyena pinalassit i Jesus, nedawawana so sundaluwera takesi ipatakdana baggina so kurut.
Na Sundaluwera e Pinadiyatanda i Jesus
16 Liyera ipatak ino sundaluwera i Jesus so kurut, neyangga baggina so lagwerta na dokal a balay na gubernador e inayandeno interu batalyon na sundaluwera. 17 Nilubbungandeno makan-lawan a barasina e binarasiyanda baggina si kulor ubi a tafál anna nangappera si sinaasit a pangera e inangwara si manilla singat anna nepotunda so uluna. 18 Iniyoyunganda baggina e kunda, “Mattolay! Patul na Hudyuwera!” 19 Pinompo-pompoldeno uluna si runu anna niluppa-luppanda baggina. Nammalitud ira sikwana a massasan a maddayaw sikwana. 20 Kapiyera a iniyoyungan i Jesus, inarireno kulor ubi a tafálna e netolireno barasina anna nelawanda baggina so lubbun tapenu mepatak so kurut.
Na Akkepatak i Jesus so Kurut
21 Sikwara a mallaka-lakad, nadafunggeno tata lalaki a minganan si Simon a taga-Siria, a amara Alejandro anni Rufo. Naggabwat i Simon so lawan na Jerusalem e netunda a akkitanneno kurut a buttu-buttungan i Jesus. 22 Neyangga i Jesus so lugar a maayan si Golgota, kanggamma sapitan “Na lugar na Balangkag.” 23 E inindanda i Jesus si binarayan a nalamuran si mira udde ammena ininum. 24 Akkabalinna inay, nepatakda i Jesus so kurut. Nabbaballayandeno barasina si pangiyattu si namarkan a batuwera tapenu maammuwanda nu nenay yo barasi a maappara.
25 Alas nuwebe si daddaramat sin nepatakda i Jesus so kurut. 26 Ana neturak so uttun na kurutna antu yo nepaliwatda metulyat sikwana, “Na Patul na Hudyuwera!” 27 Ana pay adwa a gumakkokot a nepatak so kurut karebbing i Jesus, tata so diwananna anna tata so dawirina. 28 [Naparulot iyaw a sapit i Dios a kunna, ‘Nebilang baggina a tata so kriminal ira.’]b
29 Amminan a tolayera a mattale-talebad e massipittera sike Jesus anna mawwarakkiwak ira a nakkun sikwana, “Nenay antu! Kunnu se darallannuneno Templu anna pataddaggannuna keppay si tallu aw. 30 Nu maangwam iyan, mullugka so kurut anna isalakngu yo baggim ingkepay!”
31 Iniyoyungan pay yo afu-afu a pariyera anneno mapoporay si katunungan i Jesus e kunda, “Nesalakngeno korwan ira udde ammena mesalak yo baggina ingkepay. 32 Kunna, ‘Ikkanak i Mesiya, yo Patul na Israel,’ nu gakkurug yo sinapitna, mullug nad baggina sitoye so kurut takesi mangurug etam.” Anna iniyoyungan baggineno adwa a bulunna a nepatak pay so kurut.
Na Akkapatay i Jesus
33 Sin tangnganawin, nallammuk so interu a lubag makiyad si alas tres si fuwab. 34 Sin alas tres si fuwab, naggirawa si madappa i Jesus a nakkun, “Eloi, Eloi, lama sabaktani?” kanggamma sapitan, “Diosku, Diosku, saay se pinurayannak?”c
35 Anna sin nadingngag ino korwan a tolayera a ana sinay kunda, “Dingngaggan diyaw, aya-ayanna i profeta Elias.” 36 Tata sikwara yo nakkarantut a inang nangappa si espongha e nelappadna so maantam a binarayan, neyagwana si surrut anna nepasussupna sike Jesus e kunna, “Bulang kayu, itantam nu dumatangnga i profeta Elias a mangiyullug sikwana so kurutna.” 37 Antu naggirawa si madappa i Jesus e nakattangin ino angatna. 38 Sitan keppay a orat, nagadweno kurtina na Templud mamefu so uttun makiyad so dolam. 39 Sin nakataddag ino kapitan na sundaluwera so allangan i Jesus, naitaneno akkapatena so kurut e kunna, “Gakkurug ingke a Anak i Dios iyaw a tolay!” 40 So ammena kurwa aroyu, makaita-ita pay sinayeno oddu a bafabbayera so nededemmu. Bulunda i Maria a taga-Magdala, Salome anni Maria a inara Santiago anni Jose. 41 Ira yo maumid nebumbulun sike Jesus a nanuffun so maawagngera sin nagyan baggina so Galilea. Anna ana kepay korwan a bafabbayera a nebulun sikwana so Jerusalem.
Na Akkatanam i Jesus
42 Sin gafiyenin, gumafu se antu yo Aw na Pangiparan na Hudyuwera so maawagga para so Aw na Aggimemmang, 43 i Jose a taga-Arimatea, tata a miyembru na affuyug na Hudyuwera anna inang baggina sike Pilato tapenu arangnganneno baggi i Jesus. Ilaweno tolayera baggina anna tata kepay baggina a minda-indag sike Dios a mattangngal so tolenera.
44 Antu nakkabbaw i Pilato sin nadingngagnga a natayin i Jesus. Nepaayagngeno kapitan na sundaluwera e finuutna sikwana nu gakkurug a natayin i Jesus. 45 Sin naammuwan i Pilato so kapitan na sundaluwera a gakkurug a natayin i Jesus, neyannutna sike Jose a appanneno baggi i Jesus. 46 Nedolamdeno baggi i Jesus so kurut e binabbattanda si sinnun a linu a ginatang i Jose. Akkabalinna, neyekwareno baggi i Jesus so tata pattanamman a naabbutan a batu e nedarolig da Jose anneno bulunnereno dokal a batu takesi maserran ino pattallungan na pattanamman. 47 I Maria a taga-Magdala anni Maria a inara Jose anni Santiago ino nakaimammat so nakatanamman ino baggi i Jesus.