Na Gakkad Metulyat sike Jesus
14
Adwa kepay a aw liyeno fiyesta na Hudyuwera a maayan si Aw na Attalebad anna Fiyesta na Tinapay a Awan Labadurana. Mintu-intufuk si pakegafuwan ino afu-afu a pariyera anneno mapoporay si katunungan takesi meyimad a magafut i Jesus anna ipapatera baggina. 2 Udde kunda, “Ammetam nad akwan nu maddaggun ino fiyesta tantaro nu makkaguluweno tolayera.”Binubbuwan ino Bafay si Pabangug a Lana ino Ulu i Jesus
3 Sikwana a nagyan i Jesus so Betania a mangnga-angngan so balay i Simon a kuruwengkeno takitna si gaddang sinoy, dinumatang ino tata bafay a nangikangkalin si mangina a pabangug a lana a naangwa si fulut a nardo a ana so pangiyekwanan a naangwa si batu a alabastro. Binakkaneno tangngad na alabastro e nebubbuna amminan ino pabangug a lana so ulu i Jesus.
4 Udde nakaallang ino korwan a tolayera a ana sinay e kunda, “Saay a nasayang ino pabangug? 5 Nelakuna nad lamangin si maturuk a tallu tatut a dinaryu e meyaddeno pirak so madidiyat ira.” Pinallangngandeno bafay.
6 Udde kunna i Jesus, “Purayan diyaw lamang baggina. Saay se gulu-gulun diyaw baggina? Mapiyengkeno inangwana sikwak. 7 Se maumid a bulun diyaweno madidiyat ira e damayuwera a duffunan maski nenay a orat. Udde ikkanak, ammeknga maumid a ana sikwayu. 8 Inangwa iyaw a bafay yo damana akwan sikwak. Binubbuwanna si pabangug ino baggik a pangiparan para so akkatanamku. 9 Gakkurug yo itunduk sikwayu, maski sintaw sito interu a talubaggan e ibalaggawneno tolayera iyaw a Mapiya a Baga meafu sikwak, itundurana pay yo inangwana a pakadandamman sikwana.”
Nakisittata i Judas so Kapakwera i Jesus
10 Antu i Judas Iscariote, tata so tafulu adwa a disipuluwera i Jesus e inang so afu-afu a pariyera tapenu traydoranna i Jesus.
11 Sin nadingngaggeno sinapit i Judas, mangga-anggam irengke anna netambara a indanda baggina si pirak. Anna nintufuk i Judas si makasta a tiyempu tapenu medawawa i Jesus sikwara.
Na Pangiparan si Pananggafi para so Fiyesta
12 So palungu aw na Fiyesta na Tinapay a Awan Labadurana a antu yo tiyempu a papparti si ubbun a karneru a walli para so Fiyesta na Attalebad, naffuut ino disipuluwera sike Jesus e kunda, “Sintaw yo kanggammu a pangiparanammi si pananggafim so Fiyesta na Attalebad?”
13 Antu dinundunna i Jesus ino adwa so disipulunera e kunna, “Umang kayu so Jerusalem e madafung diyawneno tata lalaki a nakabuttung si buwod a napannu si danum. Dandanan diyaw baggina 14 so balay a pattallunganna e kun diyaw so makambalay, ‘Ipafuut i Mestru nu sintaw yo kwartu a nakaparan si pananggafina anneno disipulunera para so Fiyesta na Attalebad?’ 15 Ipaitanana sikwayuweno dokal a kwartu so uttun na balay a nakaparan amminanin ino maawagtam a rumenta. Mangiparang kayuna sinay si pananggafitam.”
16 Antu nanaweno adwa a disipulunera e inang ira so Jerusalem, naitara amminan meantu so netundu i Jesus sikwara. Neparanda sinayeno pananggafira para so Fiyesta na Attalebad.
Nepakaammuna i Jesus nu Yanya yo Mattraydor Sikwana
17 Kagafiyananna, dinumatang i Jesus anneno tafulu adwa a apostolnera.
18 Sikwara a mangnga-angngan, kunna i Jesus sikwara, “Gakkurug yo itunduk sikwayu, tata sikwayu a makiakka-akkan sikwak sitaw a mattraydorna sikwak.”
19 Antu narraddam ingkeno apostolnera e sittatera a nakkun sikwana, “Bakkanak!”
20 Anna kunna i Jesus sikwara, “Tata sikwayu so tafulu adwa a apostolkuwera a makisosawna sikwak si tinapay so mallukung. 21 Se ikkanak a yo Anak na Tolay e papatayandana meantu so neturak a sapit i Dios, udde pakekkallak ingkeno mattraydorna sikwak! Mas mapiya nad lamangin a ammena neyanak iyan a tolay.”
22 Sikwara a mangnga-angngan, nangappa i Jesus si tinapay e nappabalat sike Dios, ginadwa-gadwana anna neyaddana so disipulunera e kunna, “Appan diyaw, antuweyaw yo baggik.”
23 Akkabalinna, nangappa i Jesus si tasa a napannu si binarayan, nappabala-balat sike Dios, neyaddana sikwara e ninum ira amminan.
24 Kunna sikwara, “Iyaweno dāk. Na dāk a mallifi so katayangku e antu yo kaparulotan ino bawu a anu-anuwan i Dios so tolayera. 25 Gakkurug yo itunduk sikwayu, ammekunna imman a minum si binarayan na ubas makiyad so aw a minumak si bawu a binarayan na ubas so pattangngalan i Dios si langit.”
26 Akkabalinda a nakkansyon si pammadayaw sike Dios, inang ira so Dangutul na kakayuwan a Olibu.
Nepakaammuna i Jesus ino Pangiyambafag i Pedro
27 Anna kunna i Jesus sikwara, “Anawandaknga amminan se kunna so neturak a sapit i Dios,
‘Patayangkuneno tolay a manaron so tolek ira
e makkakaratwayerana.’a
28 Udde kapiyek a mantotolena, mapalunguwaknga sikwayu so Galilea.”
29 Kunna i Pedro sike Jesus, “Amme takana anawan maski nu anawan dakayuweno amminan a tolayera.”
30 E kunna i Jesus sikwana, “Gakkurug yo itunduk sikwam sito aw, liyena ipidweno lalung a massirallok sitoye gafi e mamillunaknga a iyambafag.”
31 Udde nelillin kepay i Pedro a nakkun, “Amme takana a iyambafag maski nu matayaknga a bulun diyaw.” E parefu keppay yo sinapit ino amminan a disipuluwera.
Naddasal i Jesus so Dangutul na Kakayuwan a Olibu
32 Akkabalinna, inang da Jesus anneno disipulunera so tata lugar a maayan si Getsemani. Kunna sikwara, “Mattuttud kayu sitaw sikwak a maddasal.” 33 Nebulunna pelamang da Pedro, Santiago anni Juan. Narraddam anna naburungan ingke i Jesus. 34 E kunna sikwara, “Kurwengke lowna yo nakamku e matayaknga si raddam. Magyang kayu sitaw e siggagamya kayu a bulungku!” 35 Inumaroyu si bisang i Jesus e nallabba so lubag anna naddasal a nu damana ammenan medemmu sikwaneno passufri. 36 Kunna, “Ama, Ama, makwam amminan, arinnu sikwak iyaw a passufriyangku. Udde bakkan yo nakamku nu bakkan yo nakammuweno matuntul.”
37 Sin nuli i Jesus, nadatangnganneno tallu a disipulunera a matu-maturug e kunna sike Pedro, “Simon, matu-maturugka kad? Ammeka kad dama a siggagamya maski tata orat lamang? 38 Siggagamya anna maddasal kayu takesi amme kayu makakkap. Gakkurug a kanggamma nakam diyaw a mangwa si mapiya udde ammena makweno makafuy a baggiyu.”
39 Inumaroyu imman i Jesus e pinidwana a dinasal ino dinasalna sinoy. 40 Akkabalinna, nuli imman i Jesus so nagyanan ino tallu a disipulunera, nadatangngannera a matu-maturug se makkatukap irengke. Sin ginamyanera, ammera ammu nu nenay a itabbagga sikwana.
41 Antu inang imman i Jesus a naddasal. So pilluna a nuli, kunna sikwara, “Matu-maturug anna mimemma-memmang kayu kad kepay? Fustuwen iyan! Dinumatangngin ino tiyempu a ikkanak a yo Anak na Tolay e medawawana so sinaliwat ira. 42 Gumumbwat kayu e intamun! Itan diyaw, anen sitaweno tolay a mattraydorna sikwak.”
Na Akkagafut i Jesus
43 Sikwana kepay a massapi-sapit i Jesus, siddarat a dinumatang i Judas, tata so tafulu adwa a disipulu i Jesus. Oddu yo tolayera a nebulun sikwana a nangikangkalin si dukyaldera anna pamaggunggera. Ireno dinundun ino afu-afu a pariyera, mapoporay si katunungan anneno manannakam na Hudyuwera.
44 Sitoye, inindandera i Judas si pemunuwan e kunna, “Na ummanangkuna antu yo tolay a gafutan diyaw. Ikangkalin diyaw e guwardiyan diyaw si mapiya baggina.”
45 Antu sin dinumatang i Judas, siddarat a inumaranni baggina sike Jesus e kunna, “Mestru!” anna inummananna i Jesus. 46 Antu finuwersara a inappa i Jesus e ginafutda baggina.
47 Udde tata so bulun i Jesus e lannat a tinukkutneno dukyalna anna kinabbangngeno layag ino tata so imbut ira na katannangan a pari.
48 Anna kunna i Jesus sikwara, “Tataak kad a gumakkokot? Saay maawag kad a mangikangkaling kayu si dukyal anna pamaggung diyawera a maggafut sikwak? 49 Kinaaw a bulundak a manuntu-tunturu so Templu udde ammerak a ginafut. Udde maawag a makwa iyaw tapenu maparulot ino kunna so neturak a sapit i Dios meafu sikwak.”
50 Antu nattamang amminan ino disipuluwera i Jesus e inanawanda baggina. 51 Ana tata sulteru a nakabarasi lamang si maimpit a linu a dumaladandan sike Jesus. Ginafut ino tolayera baggina, 52 udde nabattangngeno barasina e nakkarantut a nakalubbung.
Netallang i Jesus so Sanhedrin
53 Inoyera a naggafut sike Jesus e neyangga so balay i Caifas a katannangan a pari. Anna nammu-ammung pay sinayeno amminan a afu-afu a pariyera, manannakam na Hudyuwera anneno mapoporay si katunungan. 54 Dinumandan i Pedro sike Jesus udde ammena kurwa aranni sikwana, makiyad so lagwerta na katannangan a pari anna nakituttud so Hudyuwera a guwardiya na Templu anna nappapatu si baggina so nakaparan a nagangabban a afuy.
55 Na afu-afuwera na pariyera anneno interu Sanhedrin e nintu-intufuk si manestiguwera a nakaliwat i Jesus takesi ana pangakiranda a patayan baggina udde awan naintufukanda a liwatna. 56 Se oddu yo naddakkig meafu sike Jesus udde yo testimonyara e ammena inumannung.
57 Ana korwan a nanestiguwera a inang so manannakam na Hudyuwera e naddakkig ira metulyat sike Jesus e kunda, 58 “Nadingngagmi baggina a nakkun, ‘Darallangkuna iyaw a Templu a inangweno tolayera, anna mappataddagaknga imman si tameta a Templu si unagnga tallu aw a bakkan a tolayeno nangwa.’ ” 59 Udde yo testimonyara e ammena umannung.
60 Antu nattaddag ino katannangan a pari so allanganda amminan e finuutna i Jesus, “Saay se awan metabbagngu so akusarera sikwam?” 61 Udde ammenengke nammimmit anna tinumabbag i Jesus.
Finuut imman baggineno katannangan a pari, “Ikka kad i Mesiya,b na Anak ino madaya-dayaw a Dios?”
62 Kunna i Jesus, “On, ikkanak e maitaraknga a yo Anak na Tolay a makipanangngalc sike Dios a makapangwa anna umangak a ana si dulam na langit.”
63 Sin nadingngag iyaweno katannangan a pari, pinisseneno makan-lawan a barasina gumafu si allangnga e kunna, “Maawagtam kad kepay yo manestiguwera? 64 Nadingngag diyaweno passipittana sike Dios. Nenay antu kanggam diyaw a akwan sikwana?”
Nelillinda a mapapatay i Jesus. 65 Niluppan ino korwan ira baggina, inabbungandeno matanera anna sinuntukda e kunda, “Itundum sikwami yanya yo nanuntuk sikwam?” Inappeno guwardiyera na Templu i Jesus e sinuntukda baggina.
Neyambafagnga i Pedro i Jesus
66 Sikwana a ana i Pedro so lagwerta na balayeno katannangan a pari aranni so nagangabban a afuy, inumaranniyeno tata bafay a gumasserbi na katannangan a pari. 67 Sin naitana i Pedro a mangidanda-dandang si baggina, tinulangnganna baggina, e kunna sikwana, “Tataka pay a nebumbulun sike Jesus a taga-Nazaret.”
68 Udde neyambafagnga i Pedro i Jesus a nakkun, “Ammek maintindiyan nu nenay yo sapi-sapitannu.” Nallawan i Pedro anna inang so pattallungan na lagwerta e nassirallok ino lalung.
69 E naiteno bafay a gumasserbi i Pedro e kunna imman so tolayera a ana sinay, “Iyaw a lalaki e tata pay so bulun ira i Jesus.” 70 Udde neyambafag imman i Pedro.
Ammena nabbayag, sinapit ino tolayera a ana sinay sike Pedro, “Gakkurug a tataka sikwara gumafu se ikka e taga-Galilea.”
71 Antu nemamod i Pedro yo baggina e iningananna sikwara a nakkun, “Ammek ammu-ammu iyan a tolay a sapi-sapitan diyaw.”
72 Sitan a orat pinidweno lalung a nassirallok antu nadandam i Pedro ino sinapitna i Jesus sikwana, “Liyena ipidweno lalung a massirallok, mamillunaknga a iyambafag so tolayera.” E nattalatangit ingke i Pedro gumafu so low na nakamma.