Na Akkapatay i Lazaro
11
Ana matakit a tolay a mingan si Lazaro a nagyan so Betania a nu sintaw a nagyanan pay da Maria anni Marta a wawwayinera. 2 I Maria ino nangibubbu si pabangug so takki i Afu Jesus, akkabalinna inay e finunatanna si būknga. Na wayina a i Lazaro e nattakit. 3 Antu ana dinundun ino mawwayi sike Jesus a sapitanda sikwana, “Afu, matakit ino iddu-iddukannu a kolakngu.”4 Sin nadingngagnga iyaw i Jesus, kunna, “Ammena ikapatayeno takitna, udde nakwa iyaw takesi mapadayawan i Dios anna mapadayawanak pay a Anaknga.”
5 Iddukanna i Jesus ino mawwawayi a Marta, Maria anni Lazaro. 6 Udde sin nadingngag i Jesus a matakit i Lazaro, ammena siddarat a inang se adwa aw kepay baggina a nagyan sinay so naffunduwanna. 7 Akkabalinna na adwa aw, kunna so disipulunera, “Muli etamun so Judea.”
8 Kunneno disipulunera, “Mestru, kansa lamang a kanggam daka a lappaggan ino Hudyuwera. Saay se kanggammu kepay a muli sinay?”
9 Kunna i Jesus, “Bakkang kad ana tafulu adwa a orat si makkataw? Seanya yo mallakad si aw e ammena meduffu gumafu se makaita baggina megafu si baggaw sito talubaggan. 10 Udde yo mallakad si gafi e meduffu se awan a sirwatna.”
11 Akkabalinna iyaw a sinapit, kunna sikwara, “Nakaturug i Lazaro a kolaktam udde umangku gamyan baggina.”
12 Kunneno disipulunera, “Afu, nu nakaturug baggina, mammapiyana baggina.” 13 Na kanggam a sapitan i Jesus e natayin i Lazaro, udde arig ino disipuluwera e nakaturug lamang baggina.
14 Antu sinapit i Jesus sikwara, “Natayin i Lazaro. 15 Udde maanggammak se awanak sinay sin natay baggina takesi mangurug kayu sikwak. On, intamun sikwana.”
16 Kunna i Tomas a maayan si Siping so kadisipuluwannera, “Mebulun etam sikwana takesi matay etam pay a bulunna.”
Pinantotolena i Jesus ino Natay
17 Sin dinumatang i Jesus so Betania, naammuwanna a appat a awin a netanam i Lazaro. 18 Tallu kilometroweno kaaroyu na Betania so Jerusalem, 19 anna oddu a Hudyuwera a naggabwat so Jerusalem ino inang a nakibannay sike Marta anni Maria gumafu so akkapatayeno wayira.
20 Sin naammuwan i Marta a aranniyen a gumumwang da Jesus, dinafungnga iyaw daggun a nabattang i Maria so balera. 21 Kunna i Marta sike Jesus, “Afu, nu anaka nad, ammena nad natay i wayik. 22 Udde maski sitoye, ammuk a iyaddana i Dios sikwam maski nenay yo arangngannu sikwana.”
23 Kunna i Jesus sikwana, “Mantotolena i wayim.”
24 Tinumabbag i Marta, “On, ammuk a mantotolena baggina so uddi na tiyempu so panantotolayeno amminan a natayera.”
25 Kunna i Jesus, “Ikkanak ino manolay si natayera anna ikkanak ino mangadda si angat a bulun i Dios amu-amu. Seanya yo mangurug sikwak, maski nu matay e mantotolena a bulun i Dios. 26 Anna seanya yo matolay anna mangurug sikwak e ammena matay si makikiyad. Mangurugka kad so sinapitku?”
27 Tinumabbag i Marta, “On, Afu, mangurugak a ikka i Mesiya, yo Anak i Dios a innanaman a dumatang sito talubaggan.”
Nattangit i Jesus
28 Kapiyena sinapit iyaw i Marta, nuli baggina so balera. Inayanna i Maria e ammena nepaammu si korwan sin kunna, “Anen i Mestru e paayannaka.”
29 Anna sin nadingngag iyaw i Maria, siddarat a nattaddag e inang sike Jesus. 30 Ammena kepay nakadutung i Jesus so tarabbunan, udde ana kepay lamang so lugar a naddafungan i Marta sikwana. 31 Na Hudyuwera a ana so unag na balay a nakibannay sike Maria e naitara baggina a nattaddag anna mappala-palan a nallawan. Antu dinandananda se arigga a umang baggina a mattangit so pattanamman.
32 Paddatang i Maria so nagyanan i Jesus, nallabba baggina so allanganna e kunna, “Afu, nu anaka nad, ammena nad natay i wayik.”
33 Sin maitana i Jesus i Maria anneno bulunnera a Hudyuwera a mattangi-tangit, madammat ingkeno taggang i Jesus anna malowengkeno nakamma. 34 Kunna i Jesus sikwara, “Sintaw yo nattanamman diyaw sikwana?”
Kunda, “Afu, kataw e maitam.”
37 Kundeno korwan ira, “Bakkang kad pinammapiyaneno lalaki a bulag? Saay se ammena nafuwaddan ino akkapatay i Lazaro?”
Na Panantotolay i Lazaro
38 Madammat imman ino taggang i Jesus sin dinumatang so nattanamman. Na nattanammanda sike Lazaro e lungab a naabbungan si dokal a batu. 39 Kunna i Jesus, “Arin diyaweno batu.”
Tinumabbag i Marta a wayiyeno natay, “Afu, madalluwen se appat a awin baggina a natay.”
40 Kunna i Jesus sikwana, “Ammek kad sinapit sikwam a nu mangurugka sikwak e maitam ino kadayawan i Dios?” 41 Antu inarireno batu. Nattangaw i Jesus e kunna, “Ama, mabbala-balatak se diningngagngak. 42 Ammuk a maumid a dingngaggannak, udde sapitangku iyaw gumafu so tolayera a ana sitaw takesi mangurug ira a ikkeno nanundun sikwak.” 43 Sin sinapitna iyaw, naggirawa baggina si madappa a nakkun, “Lazaro, mallawangka!” 44 Nallawan ino natay a nababbattan kepay yo kamatna anneno takkina si nagiriyera a sinnun, nababbattan pay yo mutungnga si panyok. Kunna i Jesus sikwara, “Arin diyaweno sinnun so baggina takesi makaanawin.”
Na Gakkad Metulyat sike Jesus
45 Oddu so Hudyuwera a nebulun sike Maria ino nakaita so inangwa i Jesus e nangurug ira sikwana. 46 Udde yo korwan ira e inang so Fariseowera anna netundureno inangwa i Jesus. 47 Antu inammung ino afu-afu a pariyera anna Fariseowera ino afu-afuwera na Sanhedrin. Kunda, “Nenay yo akwantam?” Nangwa-angwa si odduwengke a milagru iyaw a tolay. 48 Nu purayantam a ibali-balinna a mangwa si milagruwera, mangurug ino tolayera sikwana. Dumatangngeno Romanowera e darallandeno Templutam anna talubbunantam.
49 Udde tata sikwara, i Caifas a katannangan a pari sinoy a dawun e kunna sikwara, “Awan ingke ammuyu! 50 Ammeyu kad ammu a tammapiya a tata lamang a tolayeno matay gumafu si lubbunna ammat si madaral ino interu a kalubbunan.”
51 Iyaw a sinapit i Caifas e bakkan a naggabwat si nakamma ingkepay udde gumafu se baggineno katannangan a pari sinoy a dawun, nepakaammuna i Dios sikwana a matena i Jesus para si kalubbunandera. 52 E bakkan lamang yo Hudyuwera nu bakkan a ammungan ino amminan a anak i Dios a nakawarak so naddadaruma a kalubbunan.
53 Mamefu sinoy, plinanuweno afu-afuwera na Hudyuwera nu kasannara a patayan i Jesus. 54 Gumafu sitaw, nilillikan da Jesus a mallebut a maiteno Hudyuwera, imbes inang ira so Efraim, tata lubbun a aranni so kulolawat. Nagyan i Jesus anneno disipulunera sinay.
55 Sin aranniyen ino Fiyesta na Hudyuwera a ayanda si Fiyesta na Attalebad, oddu a tolayera a naggabwat so naddadaruma a lugar ino inang so Jerusalem takesi akwandeno seremonyas na pallinis si baggira liyena mamefuweno Fiyesta. 56 Intu-intufukanda i Jesus so Templu e nappipinnakifut ira, “Nenay mekun diyaw? Umang nakuy baggina sito fiyesta?” 57 Netun ino afu-afu a pariyera anneno Fariseowera a seanya yo makaammu so nagyanan i Jesus, ipakaammura takesi magafutda baggina.