Na Gakkad Metulyat sike Jesus
22
Aranniyen sinoyeno Fiyesta na Tinapay a Awan Labadurana a maayan keppay si Fiyesta na Attalebad. 2 Mintu-intufuk si pakaangwan ino afu-afu a pariyera anneno mapoporay si katunungan nu kasannara a ipapatay i Jesus a ammena makkagulu-gulu gumafu se mattalawera so tolayera.Nakisittata i Judas so Kapakwera i Jesus
3 Antu inumunag i Satanas sike Judas a maayan si Iscariote, tata so tafulu adwa a disipuluwera i Jesus. 4 Anna inang baggina so afu-afu a pariyera anna so afu-afuwera na guwardiyera na Templu takesi pattataretabbanda nu kasanna yo akwanna a medawawa i Jesus sikwara. 5 Mangga-anggam irengke anna netambara a indanda baggina si pirak. 6 Inumannung pay i Judas so netambara sikwana anna mamefu sinoy, nintufuk baggina si makasta a tiyempu tapenu medawawa i Jesus sikwara a ammena maammuwan ino tolayera.
Na Pangiparan si Pananggafi para so Fiyesta
7 Dinumatang ino Fiyesta na Tinapay a Awan Labadurana a antu keppay yo aw a pappatay anna pangiwalliyeno Hudyuwera si ubbun a karnerua takesi akkananda so Fiyesta na Attalebad. 8 Antu dinundunna i Jesus da Pedro anni Juan, “Umang kayun anna iparan diyaweno pananggafitam so Fiyesta na Attalebad.”
9 Anna kunda sikwana, “Afu, sintaw yo kanggammu a pangiparanammi?”
10 Kunna i Jesus sikwara, “Maningngag kayu, pattallung diyaw so lubbun, madafung diyawneno tata lalaki a nakabuttung si buwod a napannu si danum. Dandanan diyaw baggina so balay a pattallunganna. 11 Kun diyaw so makambalay, ‘Ipafuut i Mestru nu sintaw yo kwartu a nakaparan si pananggafina anneno disipulunera para so Fiyesta na Attalebad?’ 12 Ipaitanana sikwayuweno dokal a kwartu so uttun na balay a nakaparan amminin ino maawagtam a rumenta. Mangiparang kayuna sinay si pananggafitam.”
13 Sin inang ira, naintarakanda amminan meantu so netundu i Jesus sikwara. Antu neparanda sinayeno pananggafira para so Fiyesta na Attalebad.
Na Uddi a Pananggafi i Jesus
(Mateo 26:26-30; Markus 14:22-26; 1 Corinto 11:23-25)
14 Sin orattin a pananggafira, nangngan i Jesus anneno apostolnera so dulang. 15 Kunna i Jesus sikwara, “Maanggammak ingke a makatallang takayu sito pananggafi na Fiyesta na Attalebad liyek a mapadiyatan. 16 Se itunduk sikwayu, ammekunna a mangngan si kunna iyaw makiyad si maparulot yo gakkurug a kanggamma sapitan iyaw so aw na pattangngal i Dios.”
17 Akkabalinna, nangappa i Jesus si tasa na binarayan, nappabala-balat sike Dios e kunna sikwara, “Appan diyaw iyaw e minum kayu amminan sitaw. 18 Se itunduk sikwayu a mamefu sito aw, ammekunna minum si binarayan na ubas makiyad si dumatang ino pattangngalan i Dios.”
19 Akkabalinna, nangappa i Jesus si tinapay, nappabalat sike Dios, ginadwa-gadwana anna neyaddana so disipulunera e kunna, “Antuweyaw yo baggik a meyaddana sikwayu. Akwan diyaw iyaw a panandamman sikwak.”
20 Kunnapay, akkabalinda a nangngan, inappaneno tasa a napannu si binarayan, nappabala-balat sike Dios e kunna, “Iyaw a inuman antu yo pemunuwan na bawu a anu-anuwan i Dios para sikwayu. Na pallifiyeno dāk so katayangku antu yo kaparulotan ino bawu a anu-anuwan i Dios.”
Nepakaammuna i Jesus nu Yanya yo Mattraydor Sikwana
21 Antu kunna i Jesus sikwara, “Maningngag kayu! Bulungku sitaw a dulang ino tolay a mattraydorna sikwak. 22 Se meafu so planu i Dios, ikkanak a yo Anak na Tolay e papatayandana udde pakekkallak ingke iyan a tolay a mattraydorna sikwak!”
23 Sin nadingngag iyaweno apostol ira i Jesus, sittatera a nappipinnakifut e kunda, “Danya nakuy sikwatam ino mangwa si kunna sinay?”
Na Pattitinnulyat na Apostol ira
24 Nattitinnulyat ino apostol ira i Jesus nu danya sikwareno kaatannangan.b
25 Antu kunna i Jesus sikwara, “Na patul ira a bakkan a Hudyuwera e ana nammura a mattangngal so tolaydera anna kanggammanda a maayan si ‘Gumadduffun na tolayera.’ 26 Udde amme kayu nad a kunna sinay. Na mas kaawan diyaw e maawag a mattaibbafa a kakunna yo tata abbing anneno afu-afu e maawag a mattabali si tata a gumasserbi. 27 Sitoye, yanya kad yo mas kaawan, yo passerbiyannac onnu yo masserbi sikwana? On ay, yo passerbiyanna. Udde ikkanak a afuyu e bulu-bulun diyaw a gumasserbiyu.
28 “Ikkayu yo gakkurug a bulungku so amminan a paddiriyatku. 29 Antu nu kasanna a inindannak i Amak si pakapangwa a mattangngal, indan takayu pena si kunna sinay a pakapangwa. 30 Katallang takayuna a mangngan anna minum so dulangku so pappatulangku, anna mattangngal kayuna so tafulu adwa a gaka na Israel”
Nepakaammuna i Jesus ino Pangiyambafag i Pedro
31 Kunna i Jesus sike Simon Pedro, “Simon, Simon, maningngagka si mapiya! Narang i Satanas sike Dios se ipabulunna baggina a mamureba sikwayu amminan e maitana nu ana tata sikwayu a mesina kakunna yo akkesina na attap so trigu.d 32 Udde nedasal taka Simon takesi ammena mawawan ino angngurugngu sikwak. Anna nu nannulika imman sikwak, patuyaggannuweno angngurug na wayim ira si angngurug.”
33 Kunna i Simon Pedro sike Jesus, “Afu, nakaparanak a mefukuk anna matay a bulunnu.”
34 Udde kunna i Jesus sikwana, “Pedro, itunduk sikwam, liyena massirallok ino lalung sitoye gafi, mamillunaknga a iyambafag.”
Papparan so Dumatang a Pamureba
35 Akkabalinna, kunna i Jesus so apostolnera, “Madandam diyaw kad sin dinundun takayu so naddadaruma a lubbun anna tarabbunan ira? Netunduk sikwayu se amme kayu a mangikangkalin si pirak, pangiyekwanan si maski sanna a kiya-kiyan onnu sandalyat.” Nakurangang kayu kad?
Kunda, “Ammena Afu.”
36 Kunna i Jesus sikwara, “Udde sitoye, nu ana pangiyekwanan diyaw si maski sanna a kiya-kiyan onnu pirak, ikangkalin diyaw. Anna nu awan a dukyal diyaw, ilakuyuweno tafál diyaw se maggatang kayu si dukyal. 37 Se itunduk sikwayu a maawag a medemmuweno kunna so nakaturak a sapit i Dios meafu sikwak, ‘Nebilang baggina a tata so kriminal ira.’e Gakkurug a maparulotin iyaw sitoye!”
38 Kunneno apostolnera, “Afu, ana adwa a dukyalmi.” Kunna i Jesus, “Fustuwen iyan.”
Naddasal i Jesus so Dangutul na Kakayuwan a Olibu
39 Nanaw i Jesus so lubbun, inang baggina so Dangutul na kakayuwan a Olibu se inayeno negagangena a akwan. Dinumandan pay yo disipulunera sikwana. 40 Paddatangga sinay, kunna sikwara, “Maddasal kayu takesi amme kayu makakkap.”
41 Inumaroyu baggina sikwara si bisang, tata barad a batuweno kaaroyuna. Akkabalinna, nallabba baggina so lubag anna naddasal. 42 Kunna i Jesus, “Ama, nu nakammu, arinnu sikwak iyaw a passufriyangku. Bakkan yo nakamku nu bakkan yo nakammuweno matuntul.” 43 [Sikwana maddasa-dasal i Jesus, nappadda sikwaneno tata anghel i Dios a naggabwat si langit anna nanuffun sikwana takesi mapatuyag ino nakamma. 44 Gumafu so low na nakamma, annanot a naddasal baggina, anneno lingatnera e manilla dā a mappatta-pattak so lubag.]f
45 Sin nabalin i Jesus naddasal, inaranniyanneno disipulunera. Nadatangngannera a matu-maturug gumafu se kurwengkeno raddamda. 46 Antu kunna sikwara, “Saay se matu-maturug kayu? Gumumbwat kayu anna maddasal takesi amme kayu makakkap.”
Na Akkagafut i Jesus
47 Sikwana kepay a massapi-sapit i Jesus, lannat a dinumatang ino odduwengke a tolayera. I Judas, tata so tafulu adwa a disipuluwera a nangipalungu sikwara. Inaranniyanna i Jesus e inummananna, 48 udde kunna i Jesus sikwana, “Judas, traydorannak kad so kapakwak ira, ikkanak a yo Anak na Tolay megafu si tata umma?”
49 Sin naitareno apostol ira i Jesus ino nedemmu sikwana, kunda, “Afu, kepakwammin kad ira?” 50 Tata sikwareno nakkabbang so imbut na katannangan a pari e nesina ino diwanan a layagnga.
51 Udde kunna i Jesus, “Fustuwen iyan!” Sinenggidneno layag na imbut e pinammapiyana iyaw.
52 Akkabalinna, kunna i Jesus so afu-afu a pariyera, so afu-afuwera na guwardiyera na Templu anna so manannakam na Hudyuwera a ana sinay a maggafut sikwana. “Tataak kad a gumakkokot? Saay maawag kad a mangikangkaling kayu si dukyal anna pamaggung diyawera a maggafut sikwak? 53 Kinaaw a bulundak so Templu. Saay ammerak ginafut sinay? Udde sitoye, iyawin ino orat a gafutandak anna sitaw keppay a orat e mattangngal yo kalammukan.”
Neyambafagnga i Pedro i Jesus
54 Ginafutda i Jesus e neyangga so balayeno katannangan a pari. Dinumandan i Pedro udde ammena kurwa aranni sikwara. 55 Ana nakaparan a nagangabban a afuy so tangnga na lagwerta na katannangan a pari e nattuttud ira so lebutna takesi mapatuwan ira. Nakituttud pay i Pedro sikwara. 56 Sin naiteno tata bafay a gumasserbi i Pedro so idag na afuy, minutunganna si mapiya. Kunneno bafay sikwana, “Bulunna pay i Jesus iyaw a tolay!”
57 Udde inambafag iyaw i Pedro e kunna so bafay, “Ammek ammu-ammu baggina!”
58 Ammena nabbayag, ana tata lalaki a nakaita sikwana e kunna, “Bulun daka pay, bakkang kad?”
Udde kunna i Pedro so lalaki, “Wayi, bakkan ay!”
59 Nappasa si tata orat, nelillin pay yo tata lalaki e kunna, “Mangurugak a bulunna pay i Jesus iyaw a tolay, gumafu se tata pay baggina a taga-Galilea!”
60 Udde kunna i Pedro so lalaki, “Wayi, ammek ammuweno sapi-sapitannu!”
Anna sikwana kepay a mabi-abid e nassirallok ino lalung. 61 Nallangngi i Afu e initana i Pedro. Nadandamma i Pedro ino sinapit i Afu, “Liyena massirallok ino lalung nanu daramat si maggibbat, mamillunaknga a iyambafag so tolayera.” 62 Nallawan i Pedro e nattalatangit ingke.
Iniyoyunganda anna Sinuntu-suntukda i Jesus
63 Sikwara a igga-iggamman ino guwardiyera na Templu i Jesus, iniyoyunganda anna sinuntukda baggina. 64 Inabbungandeno matanera takesi ammena makaita anna finuutda sikwana, “Nu tataka a profeta, itundum sikwami nu yanya yo namaggung sikwam!”
65 Anna oddu kepay a maral a sinapitda metulyat sikwana.
Netallang i Jesus so Sanhedrin
66 Kadaddaramatanna, nammu-ammung amminan ino manannakam na Hudyuwera, ino afu-afu a pariyera, anneno mapoporay si katunungan. Netallangga i Jesus so Sanhedrin.g 67 Kunda, “Itundum sikwami, ikka kad i Mesiyah?”
Kunna i Jesus sikwara, “Nu itunduk sikwayu, ammerak keppay kuruwan. 68 Anna nu fuutan takayu, amme kayu keppay a tumabbag. 69 Udde mamefu sitoye, ikkanak a yo Anak na Tolay e makipanangngali sike Dios a makapangwa si amminan.”
70 Kunda amminan sikwana, “Nu kunna sinay, ikka kad yo Anak i Dios?”
Kunna i Jesus sikwara, “Ikkayu lud yo nassapit a ikkanak.”
71 Antu kunda, “Nadingagtamun ino sinapitna, nenay kad kepay a pakaitan a maawagtam?”