Na Gakkad Metulyat sike Jesus
26
Sin nabalin i Jesus a nanundu, kunna so disipulunera, 2 “Ammuyu a adwa aw lamangin liyeno Fiyesta na Attalebada, anna ikkanak a yo Anak na Tolay e medawawana a mepatak so kurut.”3 Nammu-ammung ino afu-afu a pariyera anneno manannakam na Hudyuwera so dokal a balay i Caifas a katannangan a pari. 4 Nattataretabbag ira nu kasanna a meyimad a magafut i Jesus anna ipapatera baggina. 5 Udde kunda, “Ammetam nad akwan nu maddaggun ino fiyesta tantaro nu makkaguluweno tolayera.”
Binubbuwan ino Bafay si Pabangug a Lana ino Ulu i Jesus
6 Sikwana a nagyan i Jesus so Betania so balay i Simon a kuruwengkeno takitna si gaddang sinoy, 7 dinumatang ino tata bafay a nangikangkalin si mangina a pabangug a lana a naangwa si fulut a nardo a ana so pangiyekwanan a naangwa si batu a alabastro. Sikwana a mangnga-angngan i Jesus, nebubbuweno bafay amminan ino pabangug a lana so ulu i Jesus. 8 Nakaallang ino disipuluwera sin naitareno inangweno bafay e kunda, “Saay a nasayang ino pabangug? 9 Nelakuna nad lamangin si mangina e meyaddeno pirak so madidiyat ira.”
10 Ammuna i Jesus ino sapi-sapitanda antu kunna sikwara, “Saay se gulu-gulun diyaw iyaw a bafay? Mapiyengkeno inangwana sikwak. 11 Se maumid a bulun diyaweno madidiyat ira, udde ikkanak, ammeknga maumid a ana sikwayu. 12 Binubbuwanna si pabangug ino baggik a pangiparan para so akkatanamku. 13 Gakkurug yo itunduk sikwayu, maski sintaw sito interu a talubaggan e ibalaggawneno tolayera iyaw a Mapiya a Baga meafu sikwak, itundurana pay yo inangwana a pakadandamman sikwana.”
Nakisittata i Judas so Kapakwera i Jesus
14 Akkabalinna iyaw, tata so tafulu adwa a apostol ira a minganan si Judas Iscariote e inang so afu-afu a pariyera, 15 e kunna, “Pigyeno iyaddayu sikwak nu duffunan takayu a maggafut sike Jesus?” Inindanda baggina si tallufulu pirasu a diplata a pirak. 16 Makiyad siin, nintufuk i Judas si makasta a tiyempu a mattraydor sike Jesus.
Na Pangiparan si Pananggafi para so Fiyesta
17 So palungu aw na Fiyesta na Tinapay a Awan Labadurana, inang ino disipuluwera sike Jesus e finuutda sikwana, “Sintaw yo kanggammu a pangiparanammi si pananggafim so Fiyesta na Attalebad?”
18 Kunna sikwara, “Umang kayu so tata tolay so Jerusalem anna itunduyu sikwana, ‘Kunna i Mestru, Dinumatangngin ino tiyempuk. Mangnganaknga sitan balem bulungkuweno disipuluk ira so Fiyesta na Attalebad.’ ” 19 Antu inangweno disipuluwera yo netun i Jesus sikwara e neparandeno pananggafi a para so Fiyesta na Attalebad.
Nepakaammuna i Jesus nu Yanya yo Mattraydor Sikwana
20 Kagafiyananna, nangngan i Jesus anneno tafulu adwa a apostolnera. 21 Sikwara a mangnga-angngan, kunna i Jesus sikwara, “Gakkurug yo itunduk sikwayu, tata sikwayu a mattraydorna sikwak.”
22 Antu narraddam ingkeno apostolnera e sittatera a nakkun sikwana, “Afu, bakkanak!”
23 Tinumabbag i Jesus, “Na makisosawna sikwak si tinapay so mallukung antu yo mattraydorna sikwak. 24 Ikkanak a yo Anak na Tolay e papatayandana meantu so neturak a sapit i Dios, udde pakekkallak ingkeno mattraydorna sikwak! Mas mapiya nad lamangin a ammena neyanak iyan a tolay.”
25 Kunna i Judas a mattraydorna sikwana, “Mestru, bakkanak.”
Tinumabbag i Jesus, “Nasapitnun.”
26 Sikwara a mangnga-angngan, nangappa i Jesus si tinapay e nappabalat sike Dios, ginadwa-gadwana anna neyaddana so disipulunera e kunna, “Appan diyaw, antuweyaw yo baggik.”
27 Akkabalinna, nangappa i Jesus si tasa a napannu si binarayan, nappabala-balat sike Dios, anna neyaddana sikwara. Kunna, “Minum kayu amminan sitaw, 28 se iyaweno dāk. Na dāk a mallifi so katayangku e antu yo kaparulotan ino bawu a anu-anuwan i Dios so tolayera takesi mapakoman ino liwa-liwatda. 29 Itunduk sikwayu, ammekunna imman a minum si binarayan na ubas makiyad so aw a minumak si bawu a binarayan a bulun takayu so pattangngalan i Amak si langit.”
30 Akkabalinda a nakkansyon si pammadayaw sike Dios, inang ira so Dangutul na kakayuwan a Olibu.
Nepakaammuna i Jesus ino Pangiyambafag i Pedro
31 Anna kunna i Jesus sikwara, “Anawandaknga amminan sito gafi, se kunna so neturak a sapit i Dios,
‘Patayangkuneno tolay a manaron so tolek ira
e makkakaratwayerana.’b
32 Udde kapiyek a mantotolena, mapalunguwaknga sikwayu so Galilea.”
33 Kunna i Pedro sike Jesus, “Amme takana anawan maski nu anawan dakayuweno amminan a tolayera.”
34 E kunna i Jesus sikwana, “Gakkurug yo itunduk sikwam, liyena massirallok ino lalung sitoye gafi, mamillunaknga a iyambafag.”
35 Kunna i Pedro sike Jesus, “Amme takana a iyambafag maski nu matayaknga a bulun diyaw.” E parefu keppay yo sinapit ino amminan a disipuluwera.
Naddasal i Jesus so Dangutul na Kakayuwan a Olibu
36 Akkabalinna, inang da Jesus anneno disipulunera so lubbun a maayan si Getsemani. Kunna sikwara, “Mattuttud kayu sitaw sikwak a umang anna maddasal sinay.” 37 Nebulunna pelamang da Pedro anneno adwa lallakiyera a anak i Zebedeo. Narraddam anna naburungan ingke i Jesus. 38 E kunna sikwara, “Kurwengke lowna yo nakamku e matayaknga si raddam. Magyang kayu sitaw e siggagamya kayu a bulungku!”
39 Inumaroyu si bisang i Jesus e nallabba so lubag anna naddasal, “Amak, nu damana, arinnu sikwak iyaw a passufriyangku. Udde bakkan yo nakamku nu bakkan yo nakammuweno matuntul.”
40 Sin nuli i Jesus, nadatangnganneno tallu a disipulunera a matu-maturug e kunna sike Pedro, “Amme kayu kad dama a siggagamya a bulungku maski tata orat lamang? 41 Siggagamya anna maddasal kayu takesi amme kayu makakkap. Gakkurug a kanggamma nakam diyaw a mangwa si mapiya udde ammena makweno makafuy a baggiyu.”
42 Inumaroyu imman i Jesus e pinidwana a naddasal a nakkun, “Amak, nu ammek dama a malillikan ino passufrik ira anna maawag a akwangku iyaw, yo urem antu yo makwa.” 43 Nuli imman baggina so disipulunera e nadatangngannera a matu-maturug se makkatukap irengke.
44 Antu inanawannera imman i Jesus e nepilluna a naddasal, parefu keppay yo dinasalna. 45 Akkabalinna, nuli baggina so disipulunera e kunna sikwara, “Matu-maturug anna mimemma-memmang kayu kad kepay? Itan diyaw, dinumatangngin ino tiyempu a ikkanak a yo Anak na Tolay e medawawana so sinaliwat ira. 46 Gumumbwat kayu e intamun. Itan diyaw, anen sitaweno tolay a mattraydorna sikwak.”
Na Akkagafut i Jesus
47 Sikwana kepay a massapi-sapit i Jesus, dinumatang i Judas, tata so tafulu adwa a disipulu i Jesus. Oddu yo tolayera a nebulun sikwana a nangikangkalin si dukyaldera anna pamaggunggera. Ireno dinundun ino afu-afu a pariyera anneno manannakam na Hudyuwera. 48 Sitoye, inindandera i Judas si pemunuwan e kunna, “Na ummanangkuna antu yo tolay a gafutan diyaw.” 49 Siddarat a inumaranni i Judas sike Jesus e kunna, “Manantawka, Mestru!” anna inummananna baggina.
50 Kunna i Jesus sikwana, “Wayi, akwannun ino gakkadnu.”
Inumaranniyeno tolayera sike Jesus e finuwersara a inappa anna ginafutda baggina. 51 Udde tata so bulun i Jesus e lannat a tinukkutneno dukyalna anna kinabbangngeno layag ino tata so imbut ira na katannangan a pari.
52 Udde kunna i Jesus, “Iyalagngu iyan dukyalnu. Na mangiyusa si dukyal e matena keppay si dukyal. 53 Ammem kad ammu a nu marangngak si duffun sike Amak, mangidundun siddarat sikwak si rinifu a anghel ira? 54 Udde nu arangngangku iyan, kasannana a maparulot ino neturak a sapit i Dios a kunna a massufriyak?”
55 Sitan a orat, kunna i Jesus so tolayera, “Tataak kad a gumakkokot? Saay maawag kad a mangikangkaling kayu si dukyal anna pamaggung diyawera a maggafut sikwak? Kinaaw a nakituttu-tutturak sikwayu a manuntu-tunturu so Templu udde ammerak a ginafut. 56 Udde maawag a makwa iyaw tapenu maparulot ino neturak na profetera meafu sikwak.”
Antu nattamang amminan ino disipuluwera i Jesus e inanawanda baggina.
Netallang i Jesus so Sanhedrin
57 Inoyera a naggafut sike Jesus e neyangga so balay i Caifas a katannangan a pari. Nammu-ammung pay sinayeno mapoporay si katunungan anneno manannakam na Hudyuwera. 58 Dinumandan i Pedro sike Jesus udde ammena kurwa aranni sikwana. Tinumallung baggina so lagwerta na katannangan a pari anna nakituttud so guwardiyera na Templu. Kanggamma a maita amminan a mededemmu.
59 Na afu-afuwera na pariyera anneno interu Sanhedrin e nintu-intufuk si manestiguwera a nakaliwat i Jesus takesi ana pangakiranda a patayan baggina, 60 udde awan naintufukanda a liwatna maski oddu a naddakkig metulyat sikwana. Na si uddina, nattaddag ino adwa a tolay 61 e kunda, “Kunna iyaw a tolay, damak a darallan ino Templu i Dios anna pataddaggangku keppay iyaw si tallu aw.”
62 Nattaddag ino katannangan a pari e kunna sike Jesus, “Saay se awan metabbagngu so akusarera sikwam?” 63 Udde ammenengke nammimmit anna tinumabbag i Jesus. Finuut imman baggineno katannangan a pari, “Itambam si ngan i Dios a aggatolay anna itundum sikwami nu ikka i Mesiya, yo Anak i Dios.”
64 Kunna i Jesus, “Nasapitnun! Udde itunduk sikwayu,
ammena a mabbayag e maitaraknga a yo Anak na Tolay
a makipanangngalc sike Dios a makapangwa
anna umangak a ana si dulam na langit.”
65 Sin nadingngag iyaweno katannangan a pari, pinisseneno makan-lawan a barasina gumafu si allangnga e kunna, “Massipitta baggina! Maawagtam kad kepay yo manestiguwera? Nadingngag diyaweno passipittana sike Dios. 66 Nenay antu kanggam diyaw a akwan sikwana?”
Tinumabbag ira, “Nakaliwat baggina. Matay nad baggina!”
67 Antu niluppanda yo mutungnga anna sinuntukda baggina. Na korwan ira e tinampalanda baggina. 68 Kunda, “Nu ikka i Mesiya, itundum sikwami nu yanya yo namaggung sikwam!”
Neyambafagnga i Pedro i Jesus
69 Aggatuttud i Pedro so lagwerta na balayeno katannangan a pari, inumaranni sikwaneno tata bafay a gumasserbi na katannangan a pari e kunna, “Tataka pay a nebumbulun sike Jesus a taga-Galilea?”
70 Udde neyambafag i Pedro so allanganda amminan e kunna, “Ammek ammu nu nenay yo sapi-sapitannu.”
71 Sin nallawan i Pedro paumang so pattallungan na lagwerta, naiteno korwan a bafay a gumasserbi e kunna so tolayera, “Iyaw a tolay e nebumbulun sike Jesus a taga-Nazaret.”
72 Neyambafag imman i Pedro a nakkun, “Itunduk sikwam ino kagakkuruwanna, ammek ammu-ammu iyan a tolay.”
73 Ammena nabbayag, inoyera a nakataddag e inumaranni sike Pedro e kunda, “Gakkurug a tataka sikwara, memunuwangkangke so aggabirannu.”
74 Antu nemamod i Pedro yo baggina e iningananna sikwara a nakkun, “Ammek ammu-ammu iyan a tolay.” Siddarat a nassirallok ino lalung.
75 Antu nadandam i Pedro ino sapit a netundu i Jesus sikwana, “Liyena massirallok ino lalung, mamillunaknga a iyambafag so tolayera.” Nallawan i Pedro e nattalatangit ingke.