Na Pangarig meafu so Tafulu a Sultera
25
Nebalinna i Jesus a nakkun, “Nanu muliyak, yo pattangngalan i Dios e meyarignga si tafulu a sulterera a ammena kepay nasiddun a nangappa si nasiggiyan a allamparan anna dinafunggeno lalaki a mangatawa. 2 Lima sikwareno illaw anna limeno mangngammu. 3 Nekangkalin ino lima illaw a sulterera yo allamparanda udde awan reserbara a lana. 4 Udde nangikangkalin ino lima a mangngammu si reserbara a lana, 5 Gumafu se yo lalaki a mangatawa e nabayagan a dinumatang, nakkatukap ino sulterera antu nakaturug ira.6 “So tangnga na gafi, ana yo maggira-girawa, ‘Anen sitaweno lalaki a mangatawa! Dafungan diyaw!’ 7 Antu ginumumbwat ino sulterera anna pininangereno allamparanda. 8 Kunneno illaw a sulterera so mangngammuwera, ‘Indan dakami si lanayu se maaddappin ino allamparammiyera.’ 9 Tinumabbag ino mangngammuwera, ‘Ammena dama! Ammenana maffustu sikwatam amminan. Umang kayu lamangin so gumallakuwera anna maggatang kayu para sikwayu ingkepay.’ 10 Dengkera a naggatang si lana, dinumatang ino mangatawa a lalaki. Anna inoyera a mangngammu a sulterera a minda-indag e nebulun sikwana so pabbodan anneno lenab e nasserra.
11 “Ammena nabbayag, dinumatang ino illawera e kunda, ‘Afu! Afu! Patallungan dakami.’ 12 Udde netabbag ino mangatawa a lalaki, ‘Gakkurug yo itunduk sikwayu, amme takayu ammu!’ ”
13 Na si uddina, kunna i Jesus, “Kunnantu, mallangnga-langngad kayu, se ammeyu ammuweno aw onnu orat na pannulik.”
Na Pangarig na Tallu a Imbut ira
14 Kunna pay i Jesus, “Na pattangngalan i Dios si langit e meyarig si tata tolay a umang maddoyug so aroyu a lubbun. Inayanneno imbutnera e netalakngeno pakkukwanera sikwara. 15 Inindanna si bulawan a pirak ino siggatatan sikwara meantu so kinaporera a mapaoddu iyawera. Inindanneno tata si limarifu a bulawan a pirak, ino meka-adwa, adwarifu a bulawan a pirak, anneno tata kepay e tarifu a bulawan a pirak. Akkabalinna iyaw, nanaweno amura. 16 Na imbut a nakaarasaw si limarifu a bulawan a pirak e siddarat a nenigosyona anna nagganansiya si limarifu a bulawan a pirak. 17 Na tata a nakaarasaw si adwarifu a bulawan a pirak e parefu keppay yo inangwana anna nagganansiya si adwarifu a bulawan a pirak. 18 Udde yo nakaarasaw si tarifu a bulawan a pirak, nakkokkot baggina anna netawuneno pirak na amuna so lubag.
19 “Akkabalinna a nabayag a tiyempu, yo amuweno imbut ira e dinumatang anna nakikuwenta sikwara so pirak a neyaddana. 20 Na nangarasaw si limarifu a bulawan a pirak e inang so amuna anna inindanna baggina si tafulurifu a bulawan a pirak. Kunna, ‘Afu, inindannak si limarifu a bulawan a pirak. Itannu, nagganansiyaak pay si limarifu a bulawan a pirak.’ 21 Kunneno amuna sikwana, ‘Mapiya yo inangwam. Mapiyaka anna matalakkangke a imbut. Gumafu se matalakkangka si bisang a kiya-kiyan a neyaddak sikwam, talakkan takana si tan-oddu kepay a kiya-kiyan. Kataw anna makilamuwangka sikwak.’ 22 Na imbut a nakaarasaw si adwarifu a bulawan a pirak e inaranniyanna pay yo amuna e kunna, ‘Afu, inindannak si adwarifu a bulawan a pirak, iyaw pay yo adwarifu a bulawan a pirak a naganansiyak.’ 23 Kunneno amuna sikwana, ‘Mapiya yo inangwam. Mapiyaka anna matalakkangke a imbut. Gumafu se matalakkangka si bisang a kiya-kiyan a neyaddak sikwam, talakkan takana si tan-oddu kepay a kiya-kiyan. Kataw anna makilamuwangka sikwak.’ 24 Na imbut a naindan si tarifu a bulawan a pirak e inaranniyanna pay yo amuna e kunna, ‘Afu, ammuk a istriktuka a tolay, gani-ganinnuweno ammem a nemula anna appa-appannuweno ammem a nappakelan. 25 Natalawanak antu nekokkotkuweno bulawan a pirak a neyaddam sikwak. Itolikun ino bulawan a pirakngu.’ 26 Udde kunneno amuna, ‘Mapara-paralka anna makayangka a imbut! Ammum a gani-ganingkuweno ammek a nemula anna appa-appangkuweno ammek a nappakelan. 27 Nebangkum nad yo bulawan a pirakku takesi nanu dumatangak itolimma sikwak a ana ganansiyana.’ 28 Kunna so korwan a imbut ira, ‘Appan diyaw sikwaneno pirak e iyaddayu so imbut a ana tafulurifu a bulawan a piraknga. 29 So amminan a tolayera a ana pintindira si sapit i Dios e maindannera si mas oddu a pintindi, udde so inoyera a awan pintindira maski arigga a maintindiyanda e maawanna keppay sikwara. 30 Itappol diyaw iyaw a imbut a awan serbina so kalammukan se mattangi-tangitna anna mangngari-ngaritamma baggina sinay.’ ”
Na Pannunut na Nasyon Ira
31 Nebalinna i Jesus a nakkun, “Ikkanak a yo Anak na Tolay e umangnga a tata patul a ana pakapangwana anna bulungkuweno amminan a anghel ira anna nanu mattangngalaknga anna mannunutaknga si amminan a ana kadayawanna. 32 Amminan a nasyon ira e mammu-ammungnga sito allangangku. Passasarinangkuneno tolayera a kakunna yo passasarina yo gumappastu so karneru anna ganding ira. 33 Anna iyekwakngeno matunung a tolayera so diwanangku a mekunna so karneru, udde yo mapara-paral a tolayera iyekwaknga so dawirik a mekunna so ganding ira. 34 Antu, ikkanak a patul sapitangkuna so inoyera a ana so diwanangku, ‘Ikkayu a napammapiya i Amak! Umang kayu sitaw e maerensiyayuneno mapiya a iyaddana i Dios so inoyera a tangngallanna a nakaparan para sikwayu makiyad sin akkaparatu yo talubaggan. 35 Se sin nabisinak, pinakkandak, mawawak e pinainumdak, ippingak udde pinadulotdak. 36 Sin awan barasik, binarasiyandak, nattakitak e tinabbuddak, nefukukak e ginannondak.’ 37 Maffuutneno matunung ira sikwana, ‘Afu, kansamika a naita a mabisin anna pinakkammika onnu mawaw, inindammika si inuman? 38 Kansamika a naita a tata ipping anna pinadulotmika onnu awan a barasim anna binarasiyammika? 39 Kansamika a naita a matakit onnu nefukuk anna ginannommika?’ 40 Ikkanak a yo patul e tumabbagnga, ‘Gakkurug yo itunduk sikwayu, a nu akwan diyaw maski so tata so ammena kurwa kaawan a wawwayik, inangwayu pay sikwak.’
41 “Antu kungku so inoyera so dawirik, ‘Umaroyu kayu sikwak! Ikkayu a nemamod i Dios! Umang kayu so manayun a afuy a naiparan para sike Diyablu a i Satanas anneno demonyunera. 42 Se sin nabisinak, ammerak pinakkan, mawawak e ammerak pinainum. 43 Ippingak udde ammerak pinadulot, awan a barasik e ammerak binarasiyan, nattakitak anna nefukukak udde ammerak a ginannon.’
44 “Antu tabbaggandaknga, ‘Afu, kansamika naita a mabisin onnu mawaw, onnu ipping onnu awan a barasim, onnu matakit onnu nefukuk e ammemika a dinuffunan?’
45 “E tabbaggangkunera, ‘Gakkurug yo itunduk sikwayu, sin ammeyu dinuffunan inoyera a ammena kurwa kaawan, ammerak pay a dinuffunan.’
46 “Anna inoyera a mapara-paral e kastiguwanna i Dios amu-amu udde inoyera a matolay meantu so uray i Dios e matolena a bulun i Dios amu-amu.”