Nepakaammuweno Akkadaral na Templu
24
Sin nallawan anna nanaw i Jesus, inumaranniyeno disipulunera sikwana takesi ipaitara sikwaneno nepataddag ira a Templu. 2 Netabbagnga sikwara e kunna, “Maitayu amminan iyawera, bakkang kad? Gakkurug yo itunduk sikwayu, na kapakwera e darallandana iyawera anna awan maski tata batu a mabattangnga so nakapotunanna, amminan e madabbuknga.”Na Pallupe-lupet anna Passufri a Dumatang
3 Antu inang i Jesus so Dangutul na kakayuwan a Olibu. Sikwana a mattuttu-tuttud, yo disipulunera lamang yo inumaranni sikwana e kunda, “Itundum sikwami nu nainsana iyaw a medemmu anna nenayna yo pemunuwan na paddatangngu anna tamfut pay yo awera sito lubag?”
4 Antu tinumabbag i Jesus sikwara, “Mimud kayu a awan mangillokuna sikwayu. 5 Se oddu yo dumatangnga e massasan a baggira e ikkanaka anna sapitanda, ‘Ikkanak i Mesiya!’ anna illokundaneno oddu a tolayera. 6 Anna makadingngag kayu si giyerera a aranni sikwayu anna baga so aroyu a luga-lugar udde amme kayu mattalaw. Maawag a medemmu iyaw, udde bakkan kepay iyaweno tamfut na talubaggan. 7 Maggigiyeraneno amminan a talubbunan anna gubyernuwera e anana bisin anna lunig ira so naddadaruma a luga-lugar. 8 Udde antuweyaw lamang yo pefu na diyat a kakunna yo low na gampapanak.”
Nepakaammuweno Pallupet
9 Nebalinna i Jesus a nakkun, “Sinoyera a tiyempu, padiyatan dakayuna, patayan dakayuna anna ikalussora kayuneno tolayera si amminan a talubbunan ira gumafu se mangurug kayu sikwak. 10 Antu odduna yo manalekkud so angngurugga e mattatinraydor irana anna makkakinnalussawerana. 11 Anna odduna yo dumatang a sasan-profetera a mangillokuna si oddu a tolayera. 12 Gumafu se umoddu-oddu yo maral a taddera, odduna yo mimemmak a midduk sike Dios anna si korwan a tolayera. 13 Udde yo tolay a mangibali-balin a makimoray sike Dios si kiyanna e matabbutna. 14 Anna iyaw a Mapiya a Baga meafu so pattangngalan i Dios e mebalaggawna si amminan a tolayera so interu a talubaggan anneno tamfut na talubaggan e medemmuna.
Nepakaammuweno Akkadaral na Jerusalem
15 “Se nu maitayuweno kakkalussaw a passipitta sike Dios a mattadda-taddag so lugar a paddayawan na tolayera sike Dios a sinapit i profeta Daniel, (so mabbibbid ira, intindin diyaw iyaw si mapiya) 16 antu inoyera a ana so Judea e makkarelera nad so kabakuluran. 17 Nu anaka so atap na balem, ammekan mullug anna tumallung so balem a mangappa si maski sanna. 18 Na ana so payaw, ammenan muli so balena a mangappa si panglawan a barasina. 19 Sitan a aw, pakekkallak pay yo bafabbayera a mabussit anneno mappasusu a inera. 20 Maddasal kayu sike Dios a yo panoyu e ammenana medemmu so tiyempu na labbat anna so Aw na Aggimemmang. 21 Se sitan a tiyempu, ananeno nafulotan a passufri a awan kakunnana sin kepay pefu na talubaggan makiyad sitoye, e ammenanna a mepidwa. 22 Nu ammena pinaibbafa i Dios ino bilang na awera na diyat, awan nad mesalak a tolay. Udde gumafu so napilinera, paibbafannaneno bilang na awera na diyat.
23 “E nu ana massapit sikwayu, ‘Itan diyaw, anen sitaw i Mesiya!’ onnu ‘Anen baggina sinay!’ Ammeyu ke kuruwan baggina. 24 Anna sitan a tiyempu, odduneno mappadda a sasan-mesiyas anna sasan-profetera. Mappaiterana si oddu a garannud a milagruwera tapenu maillokureno tolayera anna nu damana maski inoyera a pinili i Dios. 25 Maningngag kayu, sapi-sapitangku amminan iyawera sikwayu liyena medemmuna.
26 “Nu kunda, ‘Itan diyaw! ana i Kristo so kulolawat!’ amme kayu umang sinay. E nu kunda, ‘Itan diyaw, ana baggina so kwartu!’ ammeyuwera kuruwan. 27 Se ikkanak a yo Anak na Tolay e lannat a mulina sito lubag a kakunna yo kilat a maggabwat so silawan makiyad so taggappan.
28 “Nanu muliyak, ammuyunengke megafu si pemunuwan ira a maitayu a manilla nu maitayuweno buwitrera a makkaya-kayaf so kalawatan, ammuyu a ana natay a aggayam ira sinay.”
Na Pannuliyeno Anak na Tolay sito Lubag
29 Sinapit pay i Jesus, “Siddarat akkabalinneno tiyempu na passufri,
mallammukngeno sinag,
anna ammenana mabbaggaweno dakkag,
madannagngeno bitun ira so kalawatan
anneno amminan a pakapangwab a ana si langit e mayuyyuknga.
30 Anna mappaddana si langit ino pemunuwan na paddatangku a yo Anak na Tolay. Amminan a tolayera sito lubag e marraddamma si talora anna maitaraknga a yo Anak na Tolay a ana so dulam a dumata-datang si pakapangwak anna pakadayawangku. 31 Dundunangkuneno anghelkuwera a mattrumpeta si matuyag ingke anna ammungandana inoyera a pinili i Dios a naggabwat so interu a lubag.”
Na Makalakammu so Kayu a Igos
32 Nebalinna i Jesus a nakkun, “Intindin diyaweno kalakammu a naggabwat so kayu a igos. Nanu mappanga-pangen anna mallimubbutin, ammuyu a mattali-taliyen ino tiyempu. 33 Kunnapay a nanu maitayu amminan ino pemunuwan ira a sinapitku, ammuyu a aranniyen ingkeno pannulik sito lubag. 34 Gakkurug yo itunduk sikwayu, mededemmuna amminan iyawera so amminan a tolayera a aggatolay liyera matay. 35 Tumallapneno kalawatan anna lubag, udde ammenengke maawan ino sapitkuwera amu-amu.”
Awan Makaammu so Pannuli i Jesus sito Lubag
36 Nebalinna i Jesus a nakkun, “Awan ingke makaammu nu nainsa a medemmuna iyawera maski yo anghel ira si langit onnu ikkanak a yo Anak i Dios. I Amak lamang yo makaammu. 37 Iyan a tiyempu e kakunnaneno pallinang so tiyempu i Noah. 38 Sinoy a tiyempu, liyena nallinang, nangnga-angngan, ninu-inum anna nata-ataweno tolayera makiyad so aw a tinumallung i Noah so arka. 39 Ammera a naimammatan nu nenay yo mededemmu makiyad a nallinang anna neyanud ira amminan. Kunnapay yo mededemmu so aw na pannulik a yo Anak na Tolay. 40 Dengke sitan a tiyempu nanu muliyak, nu ana adwa a lalaki a mattarabafu so payaw, appan i Dios ino tata mangurug sikwak anna mabattangngeno tata. 41 Nu ana adwa bafabbayera a maggili-giling si baggat, appan i Dios ino tata mangurug sikwak anna mabattangngeno tata. 42 Malertu kayu! Se ammeyu ammu nu nenay a aw a ikkanak a Afuyu e mulina sito lubag. 43 Gakkurug yo itunduk sikwayu, nu ammu nad lamang yo makan-akwa so balay nu nainsa dumatang ino gumakkokot, siggagamya nad takesi ammena makatallung ino gumakkokot so balena. 44 Kunnantu, siggaparang kayu nad se ikkanak a yo Anak na Tolay e gumumwang si tiyempu a ammeyu a innanaman.”
Na Matalak anna ammena Matalak a Imbut
45 Kunna i Jesus iyaw, “Yanya yo makurug anna mangngammu a imbut? Bakkang kad yo nadutukan na amuna a makaammu so balena a mappakkan so korwan a imbut ira si fustu a orat? 46 Mapadayawannengke iyan a imbut nu madatangngan ino amuna a akakwanneno tarabafu a netalak sikwana. 47 Gakkurug yo itunduk sikwayu a italakngana i amuneno amminan a pakkukwanera sikwana. 48 Udde nu maral inay a imbut, kunna so baggina, ‘Na pannuliyeno amuk e mabayag kepay,’ 49 anna pefuwanannan a padiyatan ino ka-imbutannera, e umang a makiakkan anna makiinum so gumàinum ira. 50 Dumatangngeno amuna so aw a ammena innanaman anna orat a ammena ammu. 51 Na amuna e kastiguwannengkena baggina anna iyangngana so mappesimpat ira. Mattangi-tangit anna mangngari-ngaritam irana sinay.”