Na Akkepalanán Metulyat so Mappesimpat ira
12
Daggun, sin nammu-ammung ino rinifu-rifu a tolayera sike Jesus, nappipinnimpin ira. Pinefunanna abbu a nassapit so disipulunera, “Mimud kayu so labadura na Fariseowera a mappesimpat. 2 Awan a netawu a ammenana melawan anna awan a meyimad a ammenana maammuwan. 3 Amminan a sinapit diyaw a paimad a ikkayu ingkepay, anana aw e mepakaammuna so kaodduwan anna nu nenay yo nainanifig diyaw so tata tolay e mebalaggawna si amminan.”Na Maawag a Katalawan
4 Nebalinna i Jesus a nakkun, “Itunduk sikwayu a wawwayik, amme kayu mattalaw so inoyera a mamapatay si baggi, anna akkabalinna iyan awaninna a maangwara. 5 Udde ipakaammuknga sikwayu patamu so tata gakkurug ingke a pattalawan diyaw. Mattalaw kayu sike Dios gumafu se ana pakapangwana a golin keppay yo angat diyaw anna itappol nakayu so infiyernu. On, bagginengkeno gakkurug a pattalawan diyaw!
6 “Nonotan diyaweno meafu so dinnat ira. Damana a melakuweno lima a dinnat si adwa a sentimu lamang udde ammena makalyawan i Dios maski kepay ingke tata sikwara. 7 Maski yo būk so uluyu e nabilangin amminan i Dios. Nabu amme kayu mattalaw se mas ikengan nakayu i Dios ammat so oddu a dinnat ira.”
Pangngurug onnu Pangiyambafag sike Jesus
8 Kunna pay i Jesus, “Itunduk sikwayu se nu kada tata sikwayu e itunduna si korwan ira a disipuluk baggina, ikkanak a yo Anak na Tolay e takkilalangku pena baggina so allangan na anghel ira i Dios, 9 udde nu iyambafagnga a disipuluk baggina so korwan ira, iyambafagkuna pay baggina so allangan na anghel ira i Dios.
10 “Pakomanna i Dios ino tolayera a massapit si maral meafu sikwak a yo Anak na Tolay, udde ammenana mapakoman inoyera a massipitta sike Espiritu i Dios. 11 Nu itallang dakayu so sinagogera, so gumattangngal ira, anna so atarannang a ofisyales a maimbestigan patamu so angngurug diyaw, amme kayu maburung nu nenay a sapitan diyaw, 12 se sinay a orat, i Espiritu i Dios e itunturunana sikwayuweno fustu a sapitan diyaw.”
Na Pangarig na Mangngammu a Dammak
13 Ana tata lalaki so kaodduwan na tolayera a nakkun sike Jesus, “Mestru, sapitannu so wayik a lalaki se iballayannak so erensiyami so familya.”
14 Udde kunna i Jesus sikwana, “Wayi, yanya yo naddutuk sikwak a mannunut onnu mabballay so erensiyayu?” 15 E nebalinna i Jesus a nakkun sikwara, “Mimud kayu anna langngaddan diyaw amminan a naddadaruma a pàagum, se yo akkatolay na tata tolay e maita bakkan so kaoddu na pakkukwanera.”
16 Antu nangarig i Jesus sikwara, “Ana tata dammak a oddu yo naganina so lubagnga. 17 Kunna si nakamma, ‘Nenay akwangku sito naganik? 18 Kunna sitaweno akwangkuna. Tattatangkuneno alangku anna mangwaaknga si mas dokal se iyekwak sinayeno naganik anneno pakkukwak ira. 19 Anna itunduknga sito baggik, “Oddu yo pakkukwak ira a naampatku si pigya rawun. Mimemmangaknga, mangnganaknga, minumaknga anna mangga-anggammaknga lamang.” ’
20 “Udde kunna i Dios sikwana, ‘Illawka! Sitoye a gafi, matekana anna amminan a kiya-kiyan a naampatnu para sikwam ingkepay e meyaddana si korwan ira.’
21 “Antu kunna sitaweno medemmuna so inoyera a mampat si wara-warara para si baggira lamang udde madidiyat ira si aggita i Dios.”
Tabarang Patamu so ammena Pabburu-burung
22 Antu nebalinna i Jesus a nakkun so disipulunera, “Amme kayu mabburu-burung patamu so maawag diyawera tapenu matolay, nu nenayna yo akkanan diyaw, onnu yo patamu si baggiyu, onnu nenayna yo iyallung diyaw. 23 Se mas kaawan yo angat ammat si maakkan anna mas kaawan yo baggi ammat si sinnun. 24 Itan diyaweno gayang ira, ammera mammula onnu maggani. Awan alangga udde i Dios ino mamakkan sikwara. Mas kaawang kayuwengke sike Dios ammat so pappitut ira! 25 Awan sikwayu a makadaggana si angatna maski tata orat lamang nu mabburu-burung kayu. 26 Nu ammeyu dama maangwa maski bisang a paroddan yo angat diyaw, saay se ikaburung diyaweno korwan a kiya-kiyan?
27 “Itan diyaweno lappawera so kakaddattan nu kasannera a dumokal. Ammera mattarabafu onnu màabil si sinnunda udde itunduk sikwayu se maski i patul Solomon siin nabayagin a tiyempu a dammak e ammenengke nabbarasi si makasta a kakunna iyawera a lappaw. 28 Udde nu pakastan i Dios iyaw a kadda-kaddat anna lappawera a natolay sitoye anna metappol nanu daddaramat so paggangabban, annanotinna a iyaddana i Dios sikwayuweno kiya-kiyan a maawag diyaw, ikkayu a bisang angngurugnga!
29 “Nabu ammeyu kurwa nonotan nu sintaw pangappan si maakkan anna mainum diyaw. 30 Iyawera yo pakaburungan ino tolayera so talubaggan a ammena mattalak sike Dios, udde ammu i Amayu si langit amminan a kaawan diyaw. 31 Kunnantu, kumanan diyaw a tangngallan dakayuna i Dios e iyaddanana sikwayuweno amminan a kaawan diyaw.
Na Wara-wara si Langit
32 “Amme kayu mattalaw, maski bisang kayu a disipuluk ira se kanggam i Dios a bulun nakayu so pattangngalanna. 33 Nu akwan diyaw iyan, manilla kayuna mimfu-imfun si wara-wara si langit a mabbayagnga amu-amu se sinay awan yo gumakkokot ira a makkokot anna awan yo anayera a manaral. 34 Dandamman diyaw, nu sintaw yo pakkukwayuwera, iyan pay yo maumid a nononotan diyaw.”
Papparan so Pannuli i Kristo
35 Kunna pay i Jesus sikwara, “Siggaparang kayu nanu muliyak kakunna yo tolayera a nakabarasi si pattarabafu anna siggasigiyeno allamparayuwera, 36 kakunna yo imbut ira a minda-indag so amura a inang so pabbodan takesi nu dumatang anna mattottok baggina e siddarat a bukkatanda na lenab. 37 Mapiya so imbut ira a madatangngan na amura a siggagamyera nu gumumwang baggina. Gakkurug yo itunduk sikwayu, iyallungnganeno sinnun na imbut anna pattutturannanera so pangnganan anna serbiyannanera. 38 Mapiya so imbut ira a madatangngan na amura a siggaparan maski gumumwang baggina si tangnga na gafi onnu pallattak na sinag. 39 Udde dandamman diyaw penad iyaw, a nu naammuwan nad na makambalayeno orat a paddatang na gumakkokot, ammenera ipabulun a tumallung so balena anna kokotandeno pakkukwanera. 40 Siggaparang kayu nad se ikkanak a yo Anak na Tolay e gumumwang si tiyempu a ammeyu a innanaman.”
Na Matalak anna ammena Matalak a Imbut
41 Kunna i Pedro, “Afu, ikkami kad pelamang a disipulum ira a nangarigannu onnu amminan a tolayera?”
42 Tinumabbag i Afu, “Sapitangku iyaw sikwayu anna si amminan a kakunna yo makurug anna mangngammu a manabbud so balayeno amuna. Dinutukan ino amuna baggina a mangita so mangwa-angwa so balena anna mappakkan so korwan a imbut ira si fustu a orat. 43 Mapadayawannengke iyan a imbut nu madatangngan ino amuna a akakwanneno tarabafu a netalak sikwana. 44 Gakkurug yo itunduk sikwayu a italakngana i amuneno amminan a pakkukwanera sikwana. 45 Udde nu kunneno imbut so baggina, ‘Mabayag kepay a dumatang ino amuk’ anna pefunanna a padiyatan ino korwan ira a imbut a lallakiyera anna bafabbayera anna nangnga-angngan, ninu-inum anna nabuk. 46 Dumatangngeno amuna so aw a ammena innanaman anna orat a ammena ammu. Na amuna e kastiguwannengkena baggina anna iyangngana so pagyanan ino ammena makurug ira.
47 “Anna iyan a imbut a makaammu so panggamman na amuna a ipaangwa sikwana udde ammena akwan e makastiguwanna si madammat. 48 Udde yo imbut a ammena ammu akwan ino panggamman na amuna anna nangwa si ammena fustu e makastiguwan keppay udde malampaw lamang. Amminan a naindan si oddu, mas odduna yo arangnganda sikwana. Anna sikwana a oddu a netalak, mas odduna yo arangnganda sikwana.”
I Jesus ino Gafu na Pakkakaratwayeno Tolayera
49 Kunna pay i Jesus, “Inangngak a mangiyang si afuya sito lubag anna kanggammangku si gumalla-gallayafin nad! 50 Udde liyena medemmuna iyaw, massufriyaknga ingke. Marinasalaknga makiyad si maparulotna iyaw. 51 Kun diyaw nakuy a inangngak a mangiyang si piya sito lubag. Bakkan, itunduk sikwayu a inangngak sitaw takesi pakkakaratwayan ino tolayera. 52 Mamefu sitoye, yo familya a mabbilang si lima e makkakaratwayna, gumafu se mangurugngeno korwan ira sikwak e yo korwan ira ammera. 53 Makkakaratwaynera a yo ama ikalussawnana yo anaknga a lalaki, yo anaknga a lalaki ikalussawnana yo amana. Kunnapay a makwana so ina anna so anaknga a bafay, anna so katuwangan a bafay e ikalussawnana yo manuwangnga a bafay anna so manuwang a bafay ikalussawnana yo katuwanganna a bafay.”
Pintindi so Kanggamma Sapitan ino Tiyempuwera
54 Kunna i Jesus so tolayera, “Nu maitayuweno lammuk a dulam so taggappan, siddarat a sapitan diyaw se muranna e medemmu. 55 Anna nu maginnayu a malleled so diraya, sapitan diyaw, ‘Mapatunengke sitoye’ e medemmu. 56 Mappesimat kayu! Nu memunuwan diyaweno pemunuwan ira na lubag anna kalawatan, saay se ammeyu maintindiyan ino kanggamma sapitan ino pemunuwan ira a ipaitana i Dios meafu sikwak?”
Pammakoli Si Kapakwam
57 “Saay se amme kayu makanonot nu nenay a fustu a akwan diyaw? 58 Nu gangngaryan ana tolay a màakusana sikwam so usgadu, akwannu amminan a damaramam a marang si pammakoli sikwana sikwayu kepay a paumang so usgadu, se tantaro fuwersan naka a tumallang so huwes e idawawanakana so guwardiya na korte anna mefukukkana. 59 Itunduk sikwam se ammekana makalawan so paffukukan makiyad si mapagannu amminan a maawagngu a pagan.”