Na Dasal i Afu
11
Tata aw, naddasa-dasal i Jesus so tata lugar. Kapiyena naddasal, kunneno tata so disipulunera sikwana, “Afu, tunturuwan dakami a maddasal kakunna i Juan a Gumabbawtismu a tinunturuwanneno disipulunera.”2 Kunna i Jesus sikwara, “Kunna sitaw kayu maddasal,
‘Amami, madayaweno ngannu.
Tangngallan dakami,
3 Indan dakami si akkanammi si kinaaw.
4 Anna pakoman dakami so liwa-liwatmi,
kunneno pammakomami so inoyera a nakaliwat sikwami.
Anna ammem ipabulun a makakkap kami.a’ ”
5 Kunna i Jesus sikwara, “Gangngaryan tata sikwayu e ana kolaknga e umangka sikwana si tangnga na gafi e kunnu, ‘Wayi, patakkawannak si tallu a tinapay, 6 se dinumatang ino kolakku e awan ingke metallangku sikwana.’ 7 Tinumabbag baggina, ‘Ammenak talantanan, nasserren ino lenab anna nakaturugin ino anakkuwera. Ammek makagumbwat a mangiyadda sikwam si maski sanna.’ 8 Itunduk sikwam, maski nu ammena gumumbwat a mangiyadda sikwana si maski sanna gumafu se kolaknga baggina, gumumbwatna keppay a mangiyadda sikwana si maski nenay a maawagnga gumafu se ammena kanggam a mapaatallan.
9 “Antu sapitangku sikwayu, marang kayu sike Dios e maindang kayuna. Mintufuk kayu sikwana nu nenay a intu-intufukan diyaw e maintarakan diyawna. Mattottok kayu sikwana e mabukkatanneno lenab para sikwayu. 10 Dandamman diyaw, amminan a marang e makaarasaw, anna amminan a mintufuk e makaintufuk, anna amminan a mattottok e mabukkatanneno lenab. 11 Ikkayuwera a ama, nu yo anak diyaw e marang si busilad, iraw kad yo iyaddayu? 12 Anna nu marang baggina si illug, malagama kad yo iyaddayu? 13 Nu ikkayu antu a maral ira e ammuyu a mangiyadda si pammakapiyan na anak diyawera, annanotinna sike Amayu si langit a iyaddaneno Espiritu i Dios so inoyera a marang sikwana!”
I Jesus anni Beelsebul
14 Sitoye, pinaanawna i Jesus ino demonyu a nappagumal so tata lalaki. Sin nakalawan ino demonyu, nakaabirin ino tolay. Nalaggat ino tolayera. 15 Udde kundeno korwan, “Paanawanneno demonyuwera si pakapangwa i Beelsebulb a afu-afu na demonyuwera.” 16 Inarang ino korwan ira sikwana a mangwa si milagruwera sike Dios si langit tapenu mamureba sikwana.
17 Udde ammunan ino ana so nakamda e kunna sikwara, “Kada talubbunan a amme mattatarateno tolayera e madaralna, kunnapay yo familya a mappaparakwa e ammena mattatarata. 18 Kakunna keppay, nu kapakwanna i Satanas ino demonyunera, ammena mabbayag ino pattangngalanna. Itunduk iyaw se kun diyaw se pala-palawanangkuweno demonyuwera si pakapangwa i Beelsebul. 19 Nu paanawangkuweno demonyuwera si pakapangwa i Beelsebul, pakaitan a yo disipulum ira e paa-paanawanda pay yo demonyuwera si pakapangwa i Beelsebul. Ipaitarana ingkepay a amme kayu mannono-nonot si fustu. 20 Udde nu paanawangkuweno demonyuwera si pakapangwa i Dios, antuweyaw yo mangipaita a yo pattangngalan i Dios e anen sikwayu.”
21 Nebalinna i Jesus a nakkun, “Kakunna keppay, nu yo tata matuyag a tolay e oddu yo armasna a magguwardiya ingkepay so balena, awan maski tata makakokot so pakkukwanera. 22 Udde nu mas matuyag a tolay ammat sikwana a makipakwa e affutanna baggina, appan ino mas matuyag a tolayeno armasna a netalak sikwana. Antu yo matuyag a tolay e iballeneno kinuyamatna so bulunnera.
23 “Inoyera a ammena mebulun sikwak, ira yo mattulyat anna ammena manuffun sikwak a mangammung si tolayera takesi makimoray sikwak, ira yo mappapasarina so tolayera sikwak.
Na Pannuliyeno Demonyu
24 Nebalinna i Jesus a nakkun, “Nu mallawan ino demonyu so baggiyeno tolay, manondoyug iyan so namma a luga-lugar takesi mintarak si pimemmanganna, udde awan matumpalanna. Kunna si baggina, ‘Muliyaknga so tolay a naggabwatangku!’ 25 So pulina, madatanganneno tolay a kakunna yo balay a awan migigyan, malinis anna mainggud ammat siin. 26 Antu mayag ino demonyu si pitu kepay a demonyu a mas maral ammat sikwana takesi bulunnera a magyanna sinay. Mas maralnengkeno akkekwana iyan a tolay ammat sin palunguna.”
Na Gakkurug a Kapiyanan i Dios
27 Sikwana a sapi-sapitan iyawera i Jesus, ana tata bafay so kaodduwan ino tolay a madappa a nakkun sikwana, “Mapiya i Dios so ina a nanak sikwam anna nappasusu sikwam!”
28 Udde kunna i Jesus, “Mas mapiya i Dios so tolayera a maningngag so Sapitna anna makimorayera.”
Naarangngan i Jesus si Milagru
29 Sin umoddu-oddu yo tolayera, pinefunanna a nakkun, “Iyaw a diyafuwan e maral a diyafuwan se marang ira si milagru udde awan a mepaitak sikwara nu bakkan ino milagru a nedemmu sike profeta Jonas siin nabayagin a tiyempu. 30 I Jonas yo pemunuwan so tolayera a taga-Nineveh se yo mensahena e naggabwat sike Dios. Kunnapay sikwak, a yo Anak na Tolay. Ikkanaknga yo pemunuwan ino tolayera sitaw a diyafuwan a ikkanak e naggabwat sike Dios.
31 “So Aw na Pannunut, testigu pay yo reyna na Sheba metulyat sito diyafuwan se naggabwat kepay baggina so aroyuwengke a lubbun takesi maningngag so angngammu i patul Solomon. Anaak sikwayu sitoye udde ammeyu kanggam a maningngag sikwak e mas atannangak ingkepay ammat sike patul Solomon. 32 So Aw na Pannunut, mattestiguneno tolayera a taga-Nineveh a metulyat so diyafuwan gumafu se nabboboliyera so tunturuwera i profeta Jonas. Anaak sikwayu sitoye udde amme kayuwengke nabboboli e mas atannangak ingkepay ammat sike profeta Jonas!”
Na Pangarig na Adwa a Sirwat
33 Nebalinna i Jesus a nakkun, “Awan a massigi si allamparan anna iyagwana so unagnga pattakalan onnu itawuna. Imbes, iyagwaneno allamparan so pappotunan takesi mangadda si baggaw so amminan a tolayera a tumallung so balay. 34 Na mata e manilla yo sirwat na baggi. Antu, nu yo matam e mapiya kanggamma sapitan e minaggiyaddaka, mabaggawanneno nonotnu a maammuwannuna amminan a kanggam i Dios. Udde nu ammena mabaggaweno aggitam, ammeka makaita si maski sanna e manilla anaka si kalammukan. 35 Kunnantu mimudka se yo sirwat a ana sikwam e tantaro kalammukan. 36 Nu nabaggawanna i Dios ino nakammu a awan kalammukan si nakammu maammuwannuna amminan ino kanggamman i Dios a manilla sirwat a mamaggaw so paddalanannu.”
Inarariyanna i Jesus ino Fariseowera anneno Mapoporay si Katunungan
37 Akkabalinna a nassapit i Jesus, inimbitan na tata Fariseo baggina a makiakkan sikwana. Nebulun i Jesus sikwana so balena e nakitallang baggina so dulang. 38 Nalaggat ino Fariseo sin naitana i Jesus a ammena tinuntul ino gagangay na Hudyuwera a mamaggu si kamat liyera mangngan. 39 Kunna i Afu sikwana, “Ikkayu a Fariseowera, unafan diyaweno lawan na tasera anna duyug ira, udde si unagnga, napannu kayu si agum anna kamarallan. 40 Ikkayu a illawera! Baggina a nangwa so makan-liwan, baggina keppay yo nangwa so makan-unag. 41 Antu palungun diyaw abbu a iballayan ino madidiyat maski nenay a ana so tasa anna duyug diyaw anna amminan a patamu sikwam e malinisangkanna anna kaangga-anggamkana sike Dios.
42 “Udde madammat ingkeno akkastigu a medemmuna sikwayu a Fariseowera! Iyaddayu sike Dios ino katafulu a ballay so nagani so mulayuwera a paammitanna anna pabanguganneno akkanan diyaw anna amminan a nemulayu so pammulan diyaw, udde nakalyawan diyaw a mangwa si mapiya si kasittoleyu anna midduk sike Dios. Antuweyawera yo maawag a akwan diyaw. Pakimorayan diyaw penad inoyera korwan a kaawan a katunungan ira.
43 “Madammat ingkeno akkastigu a medemmuna sikwayu a Fariseowera! Se kanggam diyaw a mattuttud so pattutturan na kaawan a tolayera so sinagoga. Anna kalakanggamman diyaw a kidyotan anna ilawara kayuweno tolayera so merkadowera. 44 Madammat ingkeno akkastigu a medemmuna sikwayu a Fariseowera! Se makasta kayu a itan so lawan a manilla pattanamman ira a awan markana anna pallaka-lakaran ino tolayera e ammera ammu a ana nabbayandag so dolamma.”
45 Kunneno tata so mapoporay si katunungan sike Jesus, “Mestru, sin sinapitnu iyawera a kiya-kiyan meafu so Fariseowera, ininsultu dakami pay.”
46 Kunna i Jesus, “Madammat ingkeno akkastigu a medemmuna sikwayu a mapoporay si katunungan! Itunduyu so tolayera a masiggat a makimorayera so dundun ira a inangwayu anna ikkayu ingkepay e awan maangwayu maski bisang a duffun sikwara takesi tuntulandana iyawera a dundun. 47 Madammat ingkeno akkastigu a medemmuna sikwayu! Se inangwayuweno pattanamman ira na profetera a pinatayeno aggidiyafuwan diyawera! 48 Ipaitayu si amminan a tolayera a umannung kayu so inangweno aggidiyafuwan diyawera. Pinatereno profetera anna nangwa kayu si pattanamman para sikwara. 49 Gumafu si maral a taddam ira, kunna i Dios so angngammuna, ‘Mangidundunak si profetera anna apostol ira sikwayu a Hudyuwera. Patayan diyawneno korwan sikwara anna ilupet diyawneno korwan ira.’
50 “Antu makastiguwanna iyaw a diyafuwan gumafu so akkapatay amminan na profetera a napapatay makiyad sin naparatu yo talubaggan, 51 namefu sin tiyempu na akkapatay i Abel makiyad so tiyempu na akkapatay i Zacarias so nallatanan na Templu anna altar a paggangabban si walli sike Dios. On, itunduk sikwayu se iyaw a diyafuwan e makastiguwanna so akkapatay na profetera siin nabayagin a tiyempu.
52 “Madammat ingkeno akkastigu a medemmuna sikwayu a mapoporay si katunungan! Finuwaddan diyaweno tolayera a mangammu sike Dios. Ikkayu ingkepay e ammeyu ammu i Dios anna finuwaddan diyaw pay yo korwan ira a mangammu sikwana.”